Haos blong Isrel

Samples long waelples long Is blong Kenan, Jekob i wet wetem fraet blong i mitim twin brata blong hem, Esao. Lastaem we Jekob i bin luk Esao, i bin 20 yia i pas finis, Esao i bin wantem blong kilim hem i ded. Jekob i bin spendem ful naet blong traehad, blong stap lukaotem blesing long God. Olsem wan ansa blong fet blong Jekob, fasin blong hem blong stap gogohed, mo gat strong tingting, God i ansarem ol prea blong hem. Long naet ia, nem blong Jekob i jenis i kam Isrel, wan nem we i minim, long medel blong ol narafala samting , “ hem bae i gohed blong win wetem God” (Jenesis 32:28, futnot b).

Hemia i fas taem we nem ia, Isrel, i kamaot long Baebol, mo nem ia i gohed blong kamaot truaot long buk mo long histri. Kwiktaem nem ia i kam blong i no nem blong wan man nomo. Isrel i gat 12 pikinini boe, mo ol laen blong olgeta, oli save olgeta olsem “haos blong Isrel,” “laen blong Isrel,” “ol pikinini blong Isrel,” o “Ol Man blong Isrel.”

Truaot long histri, ol pikinini blong Isrel oli filim se hem i impoten tumas blong stap olsem wan we i kamaot long wan long olgeta twelef laen blong Isrel. Laen blong olgeta i wan impoten pat blong kavenan aedentiti blong olgeta. Aposol Pol i talem se hem i kamaot long “laen blong Benjamin” (Rom 11:1). Wan risen we Lihae i sendem ol pikinini boe blong hem oli go long Jerusalem blong karem buk ia we oli mekem wetem bras, hem i we ol buk ia oli gat “wan famli laen blong papa blong hem” (1 Nifae 5:14). Lihae i faenemaot se hem i kamaot long famli laen blong Josef, mo save blong hem abaot laen blong hem se oli joen long haos blong Isrel, i stap olsem wan impoten samting long olgeta long ol yia we oli kam afta.

Long Jos tedei, yu save harem ol toktok ia abaot Isrel olsem “kam tugeta blong Isrel.” Yumi singsing abaot, “Ridima blong Isrel,” “Hop blong Isrel,” mo “Yufala, Ol Elda blong Isrel.” Long ol situesen ia, yumi no stap tokbaot o singsing abaot kingdom blong Isrel blong bifo o nesen blong taem tedei we oli singaotem Isrel. Be, yumi stap tokbaot olgeta we oli bin karem olgeta long ol nesen long wol oli kam long Jos Ia blong Jisas Kraes. Yumi stap tokbaot ol pipol we oli gohed mo traehad wetem God, olgeta we oli stap lukaotem ol blesing blong Hem wetem tru tingting, mo olgeta we tru long baptaes, oli bin kam ol kavenan pipol blong Hem. Long ol toktok blong Presiden Russell M. Nelson, blong stap olsem Isrel i minim “blong letem God i stap win insaed long laef blong yumi, … blong letem God i paoa ia blong jenisim laef blong yumi.”

Petriakel blesing blong yu i talemaot olsem wanem yu yu joen long wan long ol laen blong haos blong Isrel. Hemia i moa bitim blong gat wan pis blong famli histri infomesen nomo we i gud tumas. Hemia i tekem tu wanem we bae i hapen long yu naoia mo long fiuja. Blong stap pat long haos blong Isrel i minim se yu gat wan kavenan rilesensip wetem Papa long Heven mo Jisas Kraes. Hemia i minim se yu, olsem Ebraham, yufala i gat janis ia blong “stap olsem wan blesing” long ol pikinini blong God (Jenesis12:2; Ebraham 2:9–11). I minim se, long ol toktok blong Pita, se “yufala God i jusum yufala i laen blong hem.Yufala i pris blong King.Yufala i man blong wan kantri nomo,we yufala i wan tabu man blong God, mo yufala i man blong hem nomo. Hem i mekem olsem long yufala,blong yufala i save talemaot ol gudgudfala wok blong hem. Hem i singaotem yufala finis blong yufala i aot long tudak, yufala i kam ol gudfala laet blong hem” (1 Pita 2:9)). I minim se yu yu “letem God i win”—se yu yu wan we yu “gohed blong win wetem God” taem yu givim ona long ol kavenan blong yu wetem Hem.