“30 Maj–5 Epril. ‘Hae God Bambae I Mekem we Ded Bambae I Go Lus Olgeta’: Ista,” Kam Folem Mi—Blong Hom mo Jos: OlTesteman 2026 (2026)
“30 Maj–5 Epril. ‘Hae God Bambae I Mekem we Ded Bambae I Go Lus Olgeta,’” Kam Folem Mi: OlTesteman 2026
Pikja droing blong emti tumb
30 Maj–5 Epril: “Hae God Bambae I Mekem we Ded Bambae I Go Lus Olgeta”
Ista
Laef blong Jisas Kraes “i stamba blong histri blong ol man” (“Kraes we I Laef: Testemoni blong Olgeta Aposol,” Gospel Laebri). ?Hemia i minim wanem? Long pat ia, i minim se laef blong Sevya i plei wan bigfala pat blong kasem rod ia we i no save finis blong evri man we oli stap laef long wol o bae oli kam yet blong laef long hem. Maet yu talem tu se laef bakegen long ded blong Jisas Kraes, long Ista Sandei ia, i konektem evri pipol blong God truaot long histri. Olgeta we oli bon bifo Kraes oli lukluk i go fored mo wet long Hem wetem fet (luk long Jekob 4:4), mo olgeta we oli bon afta, oli lukluk i go bak mo tingbaot Hem wetem fet. Taem we yumi stap ridim ol stori mo profesi long OlTesteman, yumi neva luk nem blong Jisas Kraes, be yumi luk pruf blong fet blong olgeta blong bifo we oli gat fet long mo wet blong luk Mesaea mo Ridima blong olgeta. Mekem se yumi we oli invaetem blong tingbaot Hem, yumi save filim wan koneksen wetem olgeta we oli lukluk i go fored mo wet long Hem. From i tru, Jisas Kraes i karem “ol sin blong yumi evriwan” (Aesea 53:6; italik oli ademap), mo “olgeta man we i joen long Kraes oli save laef bakegen long ded ”(1 Korin 15:22; italik oli ademap).
Ol aedia blong Stap Lanem Samting long Hom mo long Jos
Ol profet blong bifo mo tedei, oli testifae abaot atonmen mo sakrifaes blong Sevya.
Plante skripja long OlTesteman i poenemaot seves blong Sevya mo sakrifaes blong Hem we i pem praes blong sin. Tebol daon ia i soem sam skripja ia. Taem we yu ridim ol ves ia, ?Wanem tingting i kam long maen blong yu abaot Sevya?
|
OlTesteman |
Niu Testeman |
|---|---|
OlTesteman Sekaraea 9:9 | Niu Testeman Matiu 21:1–11 |
OlTesteman Sekaraea 11:12-13 | Niu Testeman Matiu 26:14–16; 27:3–8 |
OlTesteman Aesea 53:4 . | Niu Testeman Matiu 8:16–17; 26:36–39 |
OlTesteman Aesea 53:7. | Niu Testeman Mak 14:60-61; |
OlTesteman Ol Sam 22:16 | Niu Testeman Jon 19:17–18; 20:25–27 |
OlTesteman Ol Sam 22:18 | Niu Testeman Matiu 27:35 |
OlTesteman Ol Sam 69:21 | Niu Testeman Matiu 27:34,48 |
OlTesteman Ol Sam 118:22 | Niu Testeman Matiu 21:42 |
OlTesteman Aesea 53:9,12 | Niu Testeman Matiu 27:57–60; Mak 15:27–28 |
OlTesteman Aesea 25:8 | Niu Testeman Mak 16:1–6; Luk 24:6 |
OlTesteman Daniel 12:2 | Niu Testeman Matiu 27: 52– 53 |
Ol profesi we oli tij abaot Sevya oli fulap mo oli klia insaed long Buk long Momon. Tingting long olsem wanem nao fet blong yu i kam strong tru long ol skripja olsem olgeta ia: 1 Nifae 11:31–33; 2 Nifae 25:13; Mosaea 3:2–11; Alma 7:10–13.
Ol profet blong Ol las dei ia oli gohed blong talem spesel witnes abaot Jisas Kraes mo misin blong atonmen blong Hem. Taem yu lisin long jeneral konfrens long Ista wiken ia, raetemdaon ol testemoni blong Kraes we yu harem. ?Wanem nao hemia i tijim yu abaot Hem?
Jisas Kraes i givim pis long mi mo glad.
Ista i wan taem blong glad, from se i wan taem blong selebretem Atonmen mo Laef Bakegen long Ded blong Sevya. Be yet, long taem blong Ista, i gat plante pipol we oli no filim glad from ol defdefren risen. ?Wanem nao yu save mekem blong serem pis mo glad blong Sevya long Ista ia?
Wan wei i blong faenem ol mesej insaed long ol skripja abaot pis mo glad we Jisas Kraes i givim, olsem olgeta ia: Ol Sam 16:8–11; 30:2–5; Aesea 12; 25:8–9; 40:28–31; Jon 14:27; 16:33; Alma 26:11–22. Tingting long olsem wanem yu save serem ol mesej ia wetem ol narawan. Eksampol, maet yu save krietem ol Ista kad blong serem, folem ol mesej ia. Prea blong faenemaot huia i nidim blong kasem ol Ista kad blong yu. Mo tu, yu save disaed blong serem ol mesej blong yu long sosol media, long ples ia, plante pipol i save luk olgeta.
Hym abaot Kraes mo Laef Bakegen long Ded, olsem “He Is Risen!” (Hym, namba 199), i save helpem yumi tu blong filim pis mo glad long Ista ia. Lukaotem ol toktok insaed long hym ia, long tingting blong yuwan, olgeta we oli givim glad ia blong Ista.
Luk tu long Jeffrey R. Holland, “I No Olsem Pis we Ol Man blong Wol Oli Save Givim,” Liahona, Mei 2021, 35–38; Mark S. Palmer, “Harem Nogud blong Yumi Bae I Tanem i Kam Glad,” Liahona, Mei 2021, 88–90.
From Wanem Yu Stap Krae, i kam long Simon Dewey (ditel)
From se, tru long Atonmen blong Hem, Jisas Kraes i gat paoa blong helpem mi blong winim sin, ded, ol tes blong laef mo ol samting we mi no strong long hem.
Hemia wan aktiviti we i save helpem yu blong luk plante blesing we oli kam tru long Jisas Kraes mo Atonmen blong Hem. Ridim ol skripja andanit ia abaot wanem Jisas Kraes i helpem yumi blong winim. Traem blong stretem ol sentens i kam long ol grup: sin, ded, ol tes blong laef, mo ol samting we yumi no strong long hem (sam toktok bae i save go moa long wan grup). ?Taem yu rid, wanem ol tingting we i kam long yu abaot paoa blong Sevya?
-
Aesea 61:1– 3
-
Esikel 36:26–28
-
Matiu 11:28–30
-
Luk 1:46–55
-
Rom 8:35 –39
?Olsem wanem nao bae yu eksplenem long wan fren we i no wan Kristin Man, abaot from wanem Jisas Kraes i impoten long yu? Mesej blong Elda Ahmad S. Corbitt “?Yu Save From Wanem Mi olsem wan Kristin Man, Mi Biliv long Kraes?” (Liahona, Mei 2023, 119–21) i save help.
Luk tu long Reyna I. Aburto, “Gref I No Save Win,” Liahona, Mei 2021, 85–87; Topics and Questions, “Atonement of Jesus Christ,” “Resurrection,” Gospel Library.
Long en, Jisas Kraes nao i pem praes blong sevem laef blong mi.
?Wanem nao yumi lanem aot long ol ves ia abaot praes we Jisas Kraes i bin pem blong sevem yumi: Aesea 53:3–5; Mosaea 3:7; Doktrin mo Ol Kavenan 19:16–19? ?Wanem praes nao Papa long Heven i pem? (luk long Jon 3:16).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jisas Kraes i safa mo ded from mi.
-
Wik blong Ista i wan gud taem blong tijim ol pikinini blong yu abaot wanem Sevya i bin mekem from yumi insaed long Getsemane mo long kros. Yu save stat blong stap soem ol pikja daon ia mo stap letem olgeta blong tokbaot wanem i stap hapen long ol pikja. Taem ol pikinini blong yu oli stap lukluk long ol pikja ia, yu save ridim ol ves we ol tokbaot ol samting ia we oli stap hapen (luk long Matiu 26:36–46; 27:35–50; Luk 22:39–46; Jon 19:16–30). ol pikinini blong yu oli save poenemaot evri smosmol samting insaed long ol pikja ia we oli harem long ol ves.
Lef: Kraes long Getsemane, i kam long Harry Anderson. Raet: Taem Oli Hangem Hem long Kros, i kam long Harry Anderson
-
?Olsem wanem nao yumi kasem blesing blong sakrifaes we Jisas i go tru long hem from yumi? Helpem ol pikinini blong yu blong lukaotem ol toktok mo ol sentens we oli givim ansa long kwestin ia Aesea 53:4–12; Alma 7:11–13; mo Doktrin mo Ol Kavenan 19:16–19. Serem wetem wanwan long yufala, wanem yufala i filim abaot Sevya afta we yufala i ridim ol skripja ia.
Jisas Kraes i bin laef bakegen long ded from mi.
-
Yu save yusum aktiviti pej blong wik ia o ol narafala pikja long aotlaen ia blong talem stori blong Laef Bakegen long Ded, long ol pikinini blong yu (luk tu long “Jisas I Bin Girap Bakegen,” long Ol Niu Testeman Stori, 139–44). Afta letem ol pikinini blong yu oli talem bakegen stori ia long yu.
-
Tingting long olsem wanem bae yu helpem ol pikinini blong yu blong faenem glad long Kraes long Ista taem ia. Eksampol, tugeta yufala save singsing wan fevret hym blong Ista, olsem “Christ the Lord Is Risen Today” (Hym, namba 200) o “Gethsemane” (Gospel Library). Blong faenem ol narafala singsing abaot Laef Bakegen long Ded, yu save lukluk long topik indeks blong Hymns mo Children’s Songbook. Yu wetem ol pikinini blong yu i save serem wetem wanwan long yufala, from wanem yufala i laekem ol singsing ia mo wanem filing i kam long yu taem yu singsing long olgeta. ?Wanem nao ol singsing ia i stap tijim yumi abaot Papa long Heven mo Jisas Kraes?
ol pikinini oli save filim Spirit be, bae oli save nidim help blong stap luksave paoa blong Hem. “Tijim long ol pikinini abaot ol defdefren wei we Spirit i save toktok wetem yumi. Helpem olgeta blong haremsave voes blong Hem taem Hem i stap toktok long olgeta. Hemia bae i helpem olgeta blong developem wan fasin blong stap lukaotem mo stap tekem aksen folem revelesen truaot long laef blong olgeta” (Tij Folem Wei blong Sevya, 32). Eksampol, taem yu singsing ol singsing abaot Sevya wetem ol pikinini blong yu, lukluk long ol pikja blong Hem, o ridim ol stori abaot Hem, serem wetem wanwan long yufala, ol filing we yu gat long saed blong spirit.
-
Gospel Laebri i gat wan koleksen blong Easter videos [ol vidio blong Ista] we maet ol pikinini blong yu bae oli laekem. Maet yu save letem olgeta oli jusum wan blong wajem. Askem olgeta, wanem oli lanem abaot Jisas Kraes long vidio ia. Mo tu, yu save askem olgeta blong talem i sot, mesej blong vidio ia long wan sentens.
Ol profet oli testifae abaot Jisas Kraes mo Atonmen blong Hem.
-
Taem yu mo ol pikinini blong yu i wajem jeneral konfrens tugeta, long Ista wiken ia, helpem olgeta blong luksave taem we ol spesel witnes blong Sevya oli serem testemoni abaot Laef Bakegen long Ded. Maet yufala save mekem wan gem long hemia—invaetem olgeta blong stanap evri taem oli harem ol toktok olsem Ista o Atonmen o Laef Bakegen long Ded. Serem wetem wanwan long yufala, from wanem yu talem tangkyu from ol testemoni blong ol profet we oli stap laef, abaot Sevya.
Blong kasem moa aedia, luk long magasin blong Fren blong manis ia.