Eksodas 14–18

Taem yu stap rid long Eksodas 14: 1–10, tingting olsem wanem ol man blong Isrel oli filim taem oli luk ami blong King blong Ijip oli stap kam kolosap. Maet yu filim se yu nidim wan merikel blong save winim had jalenj we yu stap go tru long hem. ?Wanem nao yu faenem long Eksodas 14:13–31 we i givim insperesen long yu blong lukaotem paoa blong God long laef blong yu? Tingting hevi long olsem wanem yu bin luk paoa blong Hem long taem bifo. ?Wanem nao yu bin lanem abaot Hem long eksperiens ia?

Eksodas 15:1–19 i wan singsing blong pres we Ol Man Isrel oli bin singsing long hem afta we Lod i bin seraotem Red Si. ?Wijwan long ol toktok insaed long singsing ia we yu filim se i spesel mo i gat mining? Maet i gat wan singsing we yu filim se yu wantem blong singsing long hem taem we Lod i bin mekem wan naesfala samting long yu, olsem “Ridima blong Isrel” (STSP, pej 5). Tingting blong stap singsing o stap lisin long hem olsem pat blong wosip blong yu tedei.

Luk tu long Doktrin mo Ol Kavenan 8:2–3.

Blong stap ridim abaot wokbaot blong Isrel, maet i lidim yu blong tingbaot ol samting long laef blong yu we i luk olsem se oli, “konkon” olsem ol wota blong Mara (luk long Eksodas 15:23–27). ?Olsem wanem nao Lod i bin mekem ol samting we ol konkon long laef blong yu oli kam swit? ?Wanem valiu nao ol eksperiens ia i gat long laef blong yu?

Bae yu luk moa eksampol blong ol eksperiens we oli konkon blong Ol man Isrel long Eksodas 16 mo 17. Bae i wan temtesen blong no stap agri long ol komplen blong olgeta, be taem yu rid, tingting sapos yu bin eva mekem semmak samting olsem. ?Wanem nao yu lanem aot long ol eksperiens’ blong Ol Man Isrel ia we i save helpem yu blong no stap komplen tumas mo blong trastem God moa? ?Wanem nao ol ves ia oli tijim yu abaot God?

Luk tu long 1 Nifae 2:11–12.

From se yumi evriwan i nid blong kakae, oltaem Lod i komperem ol samting long saed blong spirit i go wetem kaekae. Lukaotem ol lesen blong Hem long saed blong spirit aot long ol eksperiens blong Ol Man Isrel wetem mana long Eksodas 16. Eksampol, ?wanem nao yu faenem insaed long ol instraksen blong Lod long Eksodas 16:16, 19, 22–26 we yu save yusum olsem kaekae blong fidim yu long saed blong spirit?

Blong faenemaot ol narafala lesen we maet Lod i wantem yu blong lanem aot long merikel ia, tingting hevi long ol kwestin olsem:

• ?Wanem nao Lod i givim long yumi we i olsem mana ia we Hem i bin givim evri dei long Ol Man blong Isrel?

• ?Wanem nao bae mi save mekem, we i olsem blong pikimap mana?

Maet yu save faenem sam moa niu tingting long wan o moa long ol vidio ia: “Daily Bread: Pattern,” “Daily Bread: Experience,” mo “Daily Bread: Change” (Gospel Library).

2:52

3:12

3:0

Tingting long ol narafala samting, we i no blong stap kakae, we yu stap mekem evri dei. ?From wanem i gat sam samting we oli mas mekem olgeta evri dei blong i save gat paoa? ?Wanem insperesen nao yu filim blong mekem blong lukaotem evri dei eksperiens long saed blong spirit?

Luk tu long Dieter F. Uchtdorf, “Daily Restoration,” Liahona, Novemba 2021, 77–79; “Daily Restoration” (vidio), Gospel Library.

5:27

Tingbaot Sevya taem yu stap ridim Eksodas 17:1–7. ?Long wanem wei nao, long yu, Jisas Kraes i stap olsem wan strong ston? (luk long Ol Sam 62:6–7; Hileman 5:12). ?Long wanem wei nao Hem i stap olsem wota? (luk long Jon 4:10–14; 1 Korin 10:1–4; 1 Nifae 11:25).

Maet i gat ol taem long laef blong yufala taem yu save tingting long Moses i go wetem—taem we ol narawan oli stap dipen long yu, be “ol han [blong yu oli filim] hevi” (Eksodas 17:12). Long ol narafala taem, maet yu stap moa olsem, Eron, Huru mo Jetro, we oli sapotem Moses. Putum yuwan long ples blong wanwan long ol pipol ia taem yu ridim Eksodas 17:8–16; 18:13–26, mo luk wanem Lod i tijim long yu abaot wok blong Hem.

Luk tu long Mosaea 4:27; 18:8–9.

• Taem we Lod i seraotem Red Si, Moses mo Ol Man blong Isrel oli bin luk hamas bigfala paoa Hem i gat. Letem ol pikinini blong oli helpem yu blong tingting long wan wei blong gat gudtaem blong aktem bakegen stori long Eksodas 14:5–22 (luk tu long “Pasova” long Ol Stori long OlTesteman, 70–74). Maet yu setemap ol jea o ol blangket mo “seraotem” olgeta olsem Red Si. Afta, yu save serem wetem wanwan long olgeta, olsem wanem yu bin luk paoa blong God insaed long laef blong yufala.

  

  2:54

• ?Wanem nao Doktrin mo Ol Kavenan 8:2–3 i ademap long andastaning blong yumi abaot stori ia long Eksodas 14? Tingting blong stap talem long ol pikinini blong yu abaot wan eksperiens taem we Tabu Spirit i talem wan samting long maen o hat blong yu, mo invaetem olgeta blong serem ol eksperiens blong olgeta. Mo tu, yufala i save singsing wan singsing abaot Tabu Spirit, olsem “Let the Holy Spirit Guide” (Hym, namba 143).

• Maet yu mo ol pikinini blong yu i save drink wan samting we i swit mo wan samting we i konkon taem yufala i stap stadi tugeta long Eksodas 15:22–25 . ?Olsem wanem nao Sevya i bin mekem ol “konkon” eksperiens long laef blong yumi i kam “swit”?

• Taem yu mo ol pikinini blong yu i ridim Eksodas 15:23–25; 16:14–15; 17:1–6, letem olgeta oli helpem yu blong fanem ol samting we oli save help blong talem stori—olsem wan branj (blong mekem wota blong Mara i kam gud),wan jak o sospen (blong fulumap mana), mo wan ston (blong wota blong Sinae). ?Olsem wanem ol stori ia oli stap mekem yumi tingbaot wanem we Jisas Kraes i bin mekem blong yumi? Olsem pat blong toktok storian blong yufala, yufala i save ridim Matiu 7:24–27; Jon 4:10–14; 6:29–35, 48–51; Hileman 5:12; Doktrin mo Ol Kavenan 20:77, 79.

• Taem yu ridim Eksodas 17:8–16, yu save invaetem wan pikinini blong leftemap han blong hem i hae i go antap long ea. Taem we pikinini i taet, ol narafala pikinini oli save help, long wei we Eron mo Huru i bin helpem Moses. ?Wanem nao stori ia i tijim abaot olsem wanem yumi save helpem Kingdom blong God i gat sakses? Mo tu yu save ridim Eksodas 18:13–26 mo tokbaot ol hevi responsabiliti blong ol pipol we oli givim seves insaed long wod blong yu. ?Wanem nao yumi save mekem tedei blong helpem ol lida blong Jos, semmak olsem Eron mo Huru we tufala bin helpem profet Moses?