Eksodi 1–6

Çfarë ju bën përshtypje rreth grave të përshkruara tek Eksodi 1–2? Si ndihmuan ato për ta përmbushur planin e Perëndisë për popullin e Tij? Çfarë ju mësojnë përpjekjet e tyre rreth shërbimit në veprën e Perëndisë?

Përpara se të filloni leximin e librit Eksodi, mund të mendoni rreth një vështirësie që po kaloni – nganjëherë shpresoni që Zoti do t’ju çlirojë prej saj. Cilat fjalë dhe fraza tek Eksodi 1–3duken të ngjashme me robërinë shpirtërore ose gjëra të tjera që i hasim sot? Vini re gjithashtu se si fëmijët e Izraelit kërkuan çlirim dhe se si u përgjigj Zoti (shihni, për shembull, tek Eksodi 2:23–25; 3:7–8). Si ka “zbrit[ur]” Zoti “për [t’ju] çliruar”?

Gjatë gjithë librit të Eksodit, ju gjithashtu mund të vini re disa ngjashmëri midis Moisiut dhe Jezu Krishtit (shihni te Ligji i Përtërirë 18:18–19; 1 Nefi 22:20–21). Për shembull, çfarë ngjashmërish shihni midis vargjeve tek Eksodi 1:22; 2:1–10 dhe Mateu 2:13–16? Ose midis vargjeve tek Eksodi 24:18 dhe Mateu 4:1–2? Çfarë ndieni se Zoti dëshiron që të kuptoni rreth Atij vetë dhe fuqisë së Tij?

A mund të mendoni për një rast kur diçka ju mbushi me habi dhe çudi? Si reaguat? Si do t’i përshkruanit emocionet që ndiet?

Me atë në mendje, lexoni tek Eksodi 3:1–6. Çfarë ju bën përshtypje rreth përvojës frymëzuese të Moisiut? Çfarë bëri Moisiu që të tregonte nderim për Perëndinë? Çfarë lidhjesh shihni midis veprimeve dhe nderimit të tij për gjërat e shenjta?

Leximi i këtyre vargjeve mund t’ju nxitë që të mendoni rreth gjërave të shenjta dhe vendeve të shenjta në jetën tuaj. Përse janë ato të shenjta për ju? Si i trajtoni ato ndryshe nga gjërat që janë të zakonshme? Për ta udhërrëfyer përsiatjen tuaj, mund t’i referoheni pjesës së titulluar “Të Kujtuarit e Premtimeve” në mesazhin e Plakut Dejvid A. Bednar “Premtimet e Çmueshme dhe Shumë të Mëdha” (Liahona, nëntor 2017, f. 91–92). Gjithashtu mund të këndoni ose dëgjoni një himn që ju ngjall habi, si “Qëndroj Plot Habi” (Himne, nr. 113) dhe të përsiatni se çfarë ju mahnit rreth ungjillit.

Sigurisht, edhe kur kemi pasur përvoja të mrekullueshme shpirtërore, ka rrezik që të bëhemi tepër rastësorë ndaj gjërave të shenjta. Si e shmangni këtë? Ja tek janë dy mesazhe që e trajtojnë këtë çështje; zgjidhni njërën dhe kërkoni thëniet që ju ndihmojnë: Ulises Soares, “Të Mahnitur nga Krishti dhe Ungjilli i Tij” (Liahona, maj 2022, f. 115–118); Zherard Kosé, “A Është Ende i Mahnitshëm për Ju?” (Liahona, maj 2015, f. 98–100).

Shihni edhe te Doktrina e Besëlidhje 6:10–12; 63:64.

Sot ne e njohim Moisiun si një profet dhe udhëheqës të madh. Por Moisiu nuk e pa veten në atë mënyrë kur Zoti e thirri fillimisht. Ndërsa lexoni tek Eksodi 3–4, renditni shqetësimet e Moisiut dhe se si iu përgjigj Zoti secilit shqetësim. Çfarë gjeni në këta kapituj që mund t’ju frymëzojnë kur ndiheni të papërshtatshëm? Kur e keni parë Perëndinë që t’ju fuqizojë juve ose të tjerëve për të bërë punën e Tij?

Shihni edhe tek “The Church Gives Us Opportunities to Assist in God’s Work” [“Kisha na Jep Mundësi për të Ndihmuar në Veprën e Perëndisë”] në “Church Organization” [“Organizimi i Kishës”] në Tema dhe Pyetje, Gospel Library [Biblioteka e Ungjillit].

Mund të jetë shkurajuese kur përpjekjet tona të sinqerta për të bërë mirë nuk duket se po funksionojnë – kur po përpiqemi të bëjmë vullnetin e Zotit por nuk po shohim rezultatet që prisnim. Për të mësuar rreth një përvoje të ngjashme që pati Moisiu, lexoni tek Eksodi 5:4–9, 20–23. Si e ndihmoi Zoti Moisiun që t’i mposhtte ndjenjat e tij të shkurajimit? (Shihni tek Eksodi 6:1–13.) Si ju ka ndihmuar Zoti që të këmbëngulni për të bërë vullnetin e Tij?

Shihni edhe te Xhefri R. Holland, “Duke Pritur për Zotin”, Liahona, nëntor 2020, f. 115–117.

• Moisiu kishte një rol madhor për çlirimin e Izraelit nga robëria. Por ai nuk do të kishte qenë në gjendje ta përmbushte këtë nëse nëna e tij, motra e tij, bija e faraonit dhe gra të tjera besnike nuk do ta kishin mbrojtur dhe nuk do të ishin kujdesur për të. Ndihmojini fëmijët tuaj që të mësojnë rreth këtyre grave tek Eksodi 1:15–20; Eksodi 2:2–10 (shihni edhe te Numrat 26:59) dhe Eksodi 2:16–21. Mund të përdorni gjithashtu faqen e veprimtarisë së kësaj jave dhe “Moisiu Foshnjë” (tek Tregime nga Dhiata e Vjetër, f. 61–63) për të treguar ngjarjet e tyre. Si ndihmuan këto gra për të përmbushur planin e Perëndisë? Flisni me njëri‑tjetrin rreth njerëzve të tjerë që ju i admironi, të cilët ndihmojnë për veprën e Perëndisë, përfshirë në mënyra të vogla dhe të thjeshta. Si mund ta ndjekim shembullin e tyre?

  

  1:36

• Pasi të lexoni së bashku tek Eksodi 3:1–5, kërkojuni fëmijëve tuaj që t’i përmbledhin këto vargje me fjalët e veta (shihni edhe mësimin “Moisiu, Profeti” tek Tregime nga Dhiata e Vjetër, f. 64–66). Si tregoi Moisiu nderim në praninë e Zotit? Si dëshiron Zoti që ne të tregojmë nderim? Gjithashtu mund t’u kërkoni fëmijëve tuaj t’ju ndihmojnë të gjeni (ose vizatoni) figura të vendeve ose veprimtarive të shenjta ku ata duhet të jenë nderues. Çfarë mund të bëjmë që ta bëjnë shtëpinë tonë një vend të shenjtë?

  

  1:26

• Këndoni së bashku një këngë rreth nderimit, të tillë si “Nderimi Ësht’ Dashuri” (Libri i Këngëve të Fëmijëve, f. 12). Ndërsa e bëni këtë, fëmijët tuaj mund të gjejnë fjalë ose fraza që shpjegojnë se çfarë do të thotë të jenë nderues. Nëse po sillnim një mik në kishë për herë të parë, si do ta shpjegonit se çfarë do të thotë të jemi nderues?

• Duke përdorur rrëfimin tek Eksodi 3; 4:1–17, lërini fëmijët tuaj që me radhë të hiqen sikur janë Moisiu. Mund të jetë argëtuese që të përfshini sende ose objekte skenike të thjeshta, të tilla si një elektrik dore dhe një bimë për të përfaqësuar shkurren që digjej. Ndihmojini fëmijët tuaj të zbulojnë se si u ndie Moisiu rreth detyrës që Zoti i dha (shihni tek Eksodi 3:11; 4:1, 10). Ndoshta mund t’i tregoni njëri‑tjetrit për raste të tjera kur patët ndjenja të ngjashme. Çfarë këshille do t’i jepnim Moisiut për ta ndihmuar? Lexoni rreth mënyrës se si Zoti e nxiti Moisiun tek Eksodi 3:12; 4:2–9, 11–12. Tregojuni fëmijëve se si Shpëtimtari ju ka ndihmuar që ta përmbushni një thirrje, të ndiqni një nxitje ose të bëni diçka tjetër që ishte e vështirë për ju.