Zanafilla 24–33

Ndërsa lexoni te Zanafilla 24, bëjini vetes pyetjen përse Abrahami e konsideronte kaq të rëndësishme martesën e birit të tij, Isakut. Përse martesa është e rëndësishme për Perëndinë?

Çfarë cilësish gjeni te Rebeka që do të jepnin ndihmesë për një martesë dhe familje të fortë? (Shihni veçanërisht vargjet 15–28, 57–61.)

Shihni edhe tek Tema dhe Pyetje, “Marriage” [“Martesa”], Gospel Library [Biblioteka e Ungjillit].

Në kulturën e Isakut dhe Rebekës, biri më i madh në moshë merrte parëbirninë, që do të thoshte një trashëgimi më të madhe, së bashku me përgjegjësi më të mëdha për t’u kujdesur për familjen. Ndërsa lexoni te Zanafilla 25:29–34, përsiatni arsyen përse Esau mund të ketë qenë i gatshëm të hiqte dorë nga parëbirnia e Tij në këmbim të një vakti ushqimi. Çfarë mësimesh gjeni për veten tuaj në këtë rrëfim? Ai mund t’ju ndihmojë që të bëni dy lista: 1) bekimet e përjetshme që Perëndia dëshiron t’jua japë dhe 2) gjërat e botës që mund t’jua heqin vëmendjen. Më pas mund ta lexoni fragmentin, duke e zëvendësuar fjalën “parëbirninë” me diçka nga lista e parë dhe fjalën “supë” me diçka nga lista e dytë. Si do të përqendroheni te Shpëtimtari dhe bekimet e përjetshme të ungjillit të Tij?

Shihni edhe te Mateu 6:19–33; M. Rasëll Ballard, “Kujtoni Atë që Është Më e Rëndësishmja”, Liahona, maj 2023, f. 105–107.

Ndërsa flinte mbi një jastëk gurësh, Jakobi pati një ëndërr jetëndryshuese. Ajo ishte një përvojë kaq e shenjtë sa Jakobi e quajti vendin Bethel, ose “shtëpia e Perëndisë”, duke shpallur: “Me siguri Zoti është në këtë vend” (Zanafilla 28:16).

Ndërkohë që lexoni te Zanafilla 28, mund të pyetni veten se çfarë e bëri këtë përvojë kaq të shenjtë për Jakobin. Çfarë po kalonte ai në atë kohë? Si mund të jetë ndier ai? Gjithashtu mund të kërkoni fjalë dhe fraza te vargjet 10–22, të cilat ju kujtojnë shtëpinë e Zotit. Çfarë mbresash merrni rreth Perëndisë, shtëpisë së Tij dhe besëlidhjeve të Tij?

Në fund të këtij përvijimi është një pikturë që paraqet ëndrrën e Jakobit; mund t’i referoheni asaj teksa lexoni. Nëse do të krijonit vetë përshkrimin tuaj të kësaj ëndrre, çfarë do të bënit? Cilat të vërteta nga historia do të përpiqeshit t’i paraqisnit?

Himni “Më Pran’, Per’ndi, tek Ti”, Himne, nr. 52, u bazua te përvoja e Jakobit. Çfarë lidhjesh shihni midis kësaj kënge dhe vargjeve te Zanafilla 28:10–22? Si ju ndihmon tempull që të ndiheni më pranë Perëndisë? Merreni parasysh të kërkoni përgjigje për këtë pyetje te mesazhi i Presidentit Rasëll M. Nelson “Tempulli dhe Themeli Juaj Shpirtëror” (Liahona, nëntor 2021, f. 93–96). Nëse dëshironi, mund edhe të rishikoni besëlidhjet dhe bekimet e shtëpisë së Zotit te Manuali i Përgjithshëm, 27.2 (Gospel Library [Biblioteka e Ungjillit]). Si e sjell mbajtja e këtyre besëlidhjeve fuqinë e Perëndisë në jetën tuaj?

Ndërsa lexoni vargjet te Zanafilla 29:31–35 dhe 30:1–24, kërkoni fjalë që përshkruajnë mëshirën e Perëndisë ndaj Rakelës dhe Leas. Përsiatni se si Perëndia e ka “pa[rë] trishtimin t[uaj]” dhe ju ka “kujtua[r]” (Zanafilla 29:32; 30:22).

Kur Jakobi u kthye në Kanaan, atë e zuri “një frikë e madhe dhe një ankth” se si do ta priste vëllai i tij, Esau (Zanafilla 32:7). Ndërsa lexoni te Zanafilla 32–33, përsiatni për vetë marrëdhëniet tuaja familjare – ndoshta veçanërisht për një marrëdhënie që ka nevojë për shërim. Ndoshta kjo histori mund t’ju frymëzojë që t’i afroheni dikujt. Pyetje si këto mund ta udhërrëfejnë leximin tuaj:

• Si u përgatit Jakobi që të takohej me Esaun?

• Çfarë ju bën përshtypje nga lutja e Jakobit që gjendet te Zanafilla 32:9–12?

• Çfarë mësoni rreth faljes nga shembulli i Esaut?

• Si mund të na ndihmojë Shpëtimtari që t’i shërojmë marrëdhëniet familjare?

• Për ta theksuar shembullin mbresëlënës të Rebekës për mirësinë, mund t’u tregoni fëmijëve tuaj figurën më poshtë ose faqen e veprimtarisë së kësaj jave, ndërkohë që përmblidhni tregimin te Zanafilla 24:10–21. Fëmijëve tuaj mund t’iu pëlqejë ta aktrojnë ngjarjen. Kjo mund të çojë drejt një bashkëbisedimi rreth veprimeve të mirësisë që i keni parë ju dhe fëmijët tuaj.

• Merreni parasysh të këndoni së bashku një këngë rreth mirësisë, të tillë si “Mir’sia Fillon tek Ti” (Libri i Këngëve të Fëmijëve, f. 83). Fëmijët tuaj mund të mbajnë vesh për fjalën “mirësi” (ose një fjalë të ngjashme) dhe të ngrihen në këmbë kur ta dëgjojnë. Si mund të jemi të mirë si Rebeka?

• Merreni parasysh të përdorni mësimin “Jakobi dhe Esau” (tek Tregime nga Dhiata e Vjetër, f. 38–41) për t’i ndihmuar fëmijët tuaj ta kuptojnë historinë te Zanafilla 25:21–34. Ndoshta fëmijët tuaj mund të përfytyrojnë sikur Esau kërkoi këshillën e tyre nëse duhej apo jo ta shkëmbente parëbirninë e tij për supë. Çfarë do t’i thoshit atij?

  

  2:5

• Cilat gjëra kanë rëndësi të përjetshme për ju dhe fëmijët tuaj? Ndoshta fëmijët tuaj mund të gjejnë figura ose sende që i përfaqësojnë këto gjëra. Si mund t’i tregojmë Zotit se këto gjëra janë të rëndësishme për ne?

• Ndërsa lexoni së bashku te Zanafilla 28:10–22, ju mund të përdorni një shkallë (ose një figurë si ajo në fund të këtij përvijimi) për të folur rreth asaj se si besëlidhjet tona janë si një shkallë. Ndoshta fëmijët tuaj mund të hiqen sikur po ngjiten në një shkallë dhe me çdo hap flisni për rastet kur ne premtojmë që t’i bindemi Perëndisë, si në rastet kur pagëzohemi, marrim sakramentin ose shkojmë në tempull. Si na sjellin besëlidhjet tona më pranë Perëndisë?

• Për t’i paraqitur këto vargje, mund të shpjegoni se pas shumë vitesh ndjenjash të ashpra, Jakobi po shkonte të takohej përsëri me Esaun. Lexoni së bashku te Zanafilla 32:6–11. Si u ndie Jakobi? Çfarë bëri ai për të marrë ndihmë? Lexoni së bashku te Zanafilla 33:1–4 për të zbuluar se si iu përgjigj Zoti lutjes së Jakobit. Nëse Jakobi dhe Esau do të mund të na flisnin sot, çfarë mund të thoshnin për të na ndihmuar kur ka grindje në familjen tonë?