Pashka

Shumë fragmente në Dhiatën e Vjetër na drejtojnë te shërbesa e Shpëtimtarit dhe flijimi shlyes. Tabela më poshtë rendit disa nga këto fragmente. Teksa i lexoni këto vargje, çfarë mbresash ju vijnë në mendje rreth Shpëtimtarit?

Profecitë që na mësojnë rreth Shpëtimtarit janë edhe më të shumta e të qarta në Librin e Mormonit. Merreni parasysh se si forcohet besimi juaj nga fragmente si këto: 1 Nefi 11:31–33; 2 Nefi 25:13; Mosia 3:2–11; Alma 7:10–13.

Profetët e ditëve të mëvonshme vazhdojnë të japin dëshmi të veçantë për Jezu Krishtin dhe misionin e Tij shlyes. Teksa dëgjoni konferencën e përgjithshme këtë fundjavë Pashke, mbani shënim dëshmitë që i dëgjoni për Krishtin. Çfarë ju mësojnë ato rreth Tij?

Pashka është një kohë e gëzueshme, sepse është një kohë për të kremtuar Shlyerjen dhe Ringjalljen e Shpëtimtarit. Prapëseprapë, madje gjatë Pashkës, ka shumë njerëz që nuk ndihen të gëzuar për arsye të ndryshme. Çfarë mund të bëni për të shpërndarë paqen dhe gëzimin e Shpëtimtarit në këtë Pashkë?

Një ide është të gjeni mesazhe në shkrimet e shenjta rreth paqes dhe gëzimit që ofron Jezu Krishti, si këto: Psalmeve 16:8–11; 30:2–5; Isaia 12; 25:8–9; 40:28–31; Gjoni 14:27; 16:33; Alma 26:11–22. Merrni parasysh se si mund t’i shpërndani këto mesazhe te njerëzit e tjerë. Për shembull, ndoshta mund të krijoni kartolina Pashke për t’i shpërndarë, bazuar te këto mesazhe. Jini plot lutje rreth asaj se kush ka nevojë që të marrë urimin tuaj të Pashkës. Gjithashtu mund të vendosni që t’i shpërndani mesazhet tuaja në mediat shoqërore, ku shumë njerëz mund t’i shohin ato.

Himne rreth Krishtit dhe Ringjalljes, tilla si “Ai Ësht’ Ngritur!” (Himne, nr. 118), gjithashtu mund të na ndihmojnë që të ndiejmë paqe dhe gëzim gjatë Pashkës. Kërkoni fraza te himni që, sipas mendimit tuaj, shprehin gëzimin për Pashkën.

Shihni edhe te Xhefri R. Holland, “Jo si e Jep Bota”, Liahona, maj 2021, f. 35–38; Mark S. Palmer, “Pikëllimi Ynë Do të Kthehet në Gëzim”, Liahona, maj 2021, f. 88–89.

Këtu është një veprimtari që mund t’ju ndihmojë të shihni bekimet e shumta që vijnë nëpërmjet Jezu Krishtit dhe Shlyerjes së Tij. Lexoni shkrimet e shenjta më poshtë rreth asaj që Jezu Krishti na ndihmon ta mposhtim. Përpiquni t’i gruponi fragmentet në këto kategori: mëkati, vdekja, sprovat dhe dobësitë (disa fragmente mund të përshtaten te më shumë se një kategori). Ndërsa lexoni, çfarë mbresash keni rreth fuqisë së Shpëtimtarit?

• Isaia 61:1–3

• Ezekiel 36:26–28

• Mateu 11:28–30

• Lluka 1:46–55

• Romakëve 8:35–39

• Alma 7:10–13

• Alma 11:42–45

• Alma 58:11

• Moroni 10:32–33

• Doktrina e Besëlidhje 19:15–19

• Moisiu 5:9–12

Si do t’i shpjegonit një miku që nuk është i krishterë se përse Jezu Krishti është i rëndësishëm për ju? Mund t’ju ndihmojë mesazhi i Plakut Ahmad S. Korbit “A e Dini Përse Unë si i Krishterë Besoj te Krishti?” (Liahona, maj 2023, f. 119–122).

Shihni edhe te Rejna I. Aburto, “Varri Nuk Ka Fitore”, Liahona, maj 2021, f. 85–87; Tema dhe Pyetje, “Atonement of Jesus Christ” [“Shlyerja e Jezu Krishtit”], “Resurrection” [“Ringjallja”], Gospel Library [Biblioteka e Ungjillit].

Çfarë mësoni nga vargjet vijuese rreth çmimit që pagoi Jezu Krishti për shpëtimin tuaj: Isaia 53:3–5; Mosia 3:7; Doktrina e Besëlidhje 19:16–19? Çfarë çmimi pagoi Ati Qiellor? (Shihni te Gjoni 3:16.)

• Java e Pashkës është një rast i mirë për t’u mësuar fëmijëve tuaj rreth asaj që bëri Shpëtimtari për ne në Gjetseman dhe në kryq. Mund ta filloni duke u treguar atyre figurat më poshtë dhe duke i lejuar të flasin rreth asaj që po ndodh te figurat. Ndërkohë që fëmijët tuaj po shikojnë figurat, mund të lexoni vargje që i përshkruajnë këto ngjarje (shihni te Mateu 26:36–46; 27:35–50; Lluka 22:39–46; Gjoni 19:16–30). Fëmijët tuaj mund të vënë në dukje hollësitë te figurat që i dëgjojnë te vargjet.

• Si bekohemi për shkak të flijimit të Jezusit për ne? Ndihmojini fëmijët tuaj që të kërkojnë fjalë dhe fraza që i japin përgjigje kësaj pyetjeje tek Isaia 53:4–12; Alma 7:11–13 dhe Doktrina e Besëlidhje 19:16–19. Tregojini njëri‑tjetrit se si ndiheni rreth Shpëtimtarit pas leximit të këtyre shkrimeve të shenjta.

• Ju mund të përdorni faqen e veprimtarisë së kësaj jave ose figura të tjera në këtë përvijim për t’ju treguar fëmijëve tuaj historinë e Ringjalljes (shihni edhe te “Jezusi u Ngrit”, në Tregime nga Dhiata e Re, f. 139–144). Më pas lejojini fëmijët tuaj t’jua tregojnë juve historinë përsëri.

• Merreni parasysh se si do t’i ndihmoni fëmijët tuaj që të gjejnë gëzim te Krishti gjatë kësaj Pashke. Për shembull, mund të këndoni së bashku një himn të parapëlqyer rreth Pashkës, të tillë si “Zoti Krisht Ësht’ Ngritur Sot” (Himne, nr. 119) ose “Gethsemane” [“Gjetsemani”] (Gospel Library) [Biblioteka e Ungjillit]. Për të gjetur këngë të tjera rreth Ringjalljes, mund të shikoni tek treguesi tematik te librat Himne dhe Libri i Këngëve të Fëmijëve. Ju dhe fëmijët tuaj mund t’i tregoni njëri‑tjetrit përse ju pëlqejnë këto këngë dhe se si ndiheni kur i këndoni ato. Çfarë na mësojnë këto këngë rreth Atit Qiellor dhe Jezu Krishtit?

• Gospel Library [Biblioteka e Ungjillit] ka një koleksion materialesh filmike për Pashkën që fëmijët tuaj mund t’i pëlqejnë. Ndoshta mund t’i lejoni të zgjedhin një për ta parë. Pyetini se çfarë mësojnë rreth Jezu Krishtit nga materiali filmik. Ju mund t’u kërkoni gjithashtu që ta përmbledhin me një fjali mesazhin e materialit filmik.

• Ndërkohë që ju dhe fëmijët tuaj shihni së bashku konferencën e përgjithshme këtë fundjavë Pashke, ndihmojini ata të vënë re kur dëshmitarët e veçantë të Shpëtimtarit japin dëshmi për Ringjalljen. Ndoshta mund të bëni një lojë për të – ftojini të ngrihen në këmbë çdo herë që dëgjojnë fjalë si Pashkë ose Shlyerje apo Ringjallje. Flisni me njëri‑tjetrin se përse jeni mirënjohës/e për dëshmitë e profetëve të gjallë për Shpëtimtarin.