« ថ្ងៃទី២៣ ខែកុម្ភៈ–ថ្ងៃទី១ ខែមីនា ‹ តើមានការអ្វីដែលព្រះយេហូវ៉ាធ្វើមិនកើតដែរឬអី › » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី២៣ ខែកុម្ភៈ–ថ្ងៃទី១ ខែមីនា ‹ តើមានការអ្វីដែលព្រះយេហូវ៉ាធ្វើមិនកើតដែរឬអី › » ចូរមកតាមខ្ញុំ ៖ ឆ្នាំ២០២៦
សារ៉ាយ និងអ៊ីសាក ដោយ ស្កត ស្នូ
ថ្ងៃទី២៣ ខែកុម្ភៈ–ថ្ងៃទី១ ខែមីនា ៖ « តើមានការអ្វីដែលព្រះយេហូវ៉ាធ្វើមិនកើតដែរឬអី ? »
លោកុប្បត្តិ ១៨–២៣
ជីវិតរបស់អ័ប្រាហាំ និងសារ៉ាយ ពោរពេញដោយព្រឹត្តិការណ៍ មានទាំងការឈឺចាប់ និងការលួងលោម ដែលជាភស្តុតាងនៃសេចក្តីពិតដែលអ័ប្រាហាំបានរៀននៅក្នុងការនិមិត្ត—ថាយើងនៅលើផែនដី ត្រូវបញ្ជាក់ភស្តុតាង « មើលបើសិនជា[ យើង ]នឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់[ យើង ]នឹងបញ្ជា » ( អ័ប្រាហាំ ៣:២៥ ) ។ តើអ័ប្រាហាំ និងសារ៉ាយបញ្ជាក់ថាស្មោះត្រង់ឬទេ ? តើពួកលោកនឹងបន្តមានសេចក្តីជំនឿនៅលើសេចក្តីសន្យារបស់ព្រះអំពីការមានកូនចៅដ៏ច្រើន ខណៈពេលដែលពួកលោកគ្មានកូនក្នុងវ័យចំណាស់របស់ពួកលោកដែរឬទេ ? ហើយនៅពេលអ៊ីសាកបានកើតមក តើសេចក្តីជំនឿរបស់ពួកលោកអាចទ្រាំទ្របានទេ—ចំពោះបញ្ញត្តិដែលឲ្យបូជាកូនប្រុសតែម្នាក់ដែលព្រះបានសន្យាដើម្បីបំពេញសេចក្តីសញ្ញានោះ ?
អ័ប្រាហាំ និងសារ៉ាយបានទុកចិត្តលើព្រះ ហើយទ្រង់បានទុកព្រះទ័យលើពួកគេ ( សូមមើល លោកុប្បត្តិ ១៥:៦; រ៉ូម ៤:៣ ) ។ នៅក្នុង លោកុប្បត្តិ ១៨–២៣ យើងឃើញដំណើររឿងចេញពីជីវិតរបស់អ័ប្រាហាំ សារ៉ាយ និងអ្នកដទៃទៀតដែលអាចបំផុសគំនិតយើងឲ្យគិតអំពីឆន្ទៈផ្ទាល់ខ្លួនរបស់យើងដើម្បីជឿលើសេចក្តីសន្យារបស់ព្រះ ដើម្បីគេចចេញពីអំពើទុច្ចរិត ហើយមិនត្រឡប់ក្រោយវិញ និងត្រូវទុកចិត្តលើព្រះ ទោះជាមានការលះបង់ក៏ដោយ ។ ក្នុងការបញ្ជាក់ដល់យើង ព្រះក៏ធ្វើឲ្យយើងប្រសើរឡើងដែរ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
លោកុប្បត្តិ ១៨:៩–១៤; ២១:១–៧
ព្រះអម្ចាស់បំពេញសេចក្តីសន្យារបស់ទ្រង់តាមពេលវេលារបស់ទ្រង់ ។
ព្រះអម្ចាស់បានធ្វើសេចក្តីសន្យាដ៏រុងរឿងចំពោះមនុស្សដែលស្មោះត្រង់ ប៉ុន្តែ នៅពេលខ្លះកាលៈទេសៈនៃជីវិតរបស់យើងអាចបណ្តាលឲ្យយើងឆ្ងល់ពីរបៀបដែលសេចក្តីសន្យាទាំងនេះអាចបំពេញបានដោយរបៀបណា ។ អ័ប្រាហាំ និងសារ៉ាយ អាចមានអារម្មណ៍បែបនោះ ។ តើបងប្អូនអាចរៀនអ្វីខ្លះ ចេញពីបទពិសោធន៍របស់ពួកលោក ? វាអាចមានអត្ថប្រយោជន៍ដើម្បីចាប់ផ្តើមសិក្សាដោយការពិនិត្យមើលអ្វីដែលព្រះអម្ចាស់បានសន្យានៅក្នុង លោកុប្បត្តិ ១៧:៤, ១៥–២២ ។ តើអ័ប្រាហាំ និងសារ៉ាយ បានមានប្រតិកម្មយ៉ាងណា ? ( សូមមើលផងដែរនៅក្នុង ការបកប្រែដោយយ៉ូសែប ស្ម៊ីធ លោកុប្បត្តិ ១៧:២៣ [ នៅក្នុង លោកុប្បត្តិ ១៧:១៧ footnote b ]; លោកុប្បត្តិ ១៨:៩–១២ ) ។ តើព្រះអម្ចាស់បានឆ្លើយតបយ៉ាងដូចម្តេចដើម្បីជួយពួកលោកឲ្យមានជំនឿកាន់តែខ្លាំងលើសេចក្តីសន្យារបស់ទ្រង់ ( សូមមើល លោកុប្បត្តិ ១៨:១៤ ) ។
តើបងប្អូនរកឃើញអ្វីខ្លះនៅក្នុងខគម្ពីរទាំងនេះ ដែលស្ថាបនាសេចក្តីជំនឿរបស់បងប្អូន ? តើមានបទពិសោធន៍អ្វីផ្សេងទៀត—នៅក្នុងជីវិតរបស់បងប្អូន ឬជីវិតនរណាម្នាក់ផ្សេងទៀត—បានពង្រឹងសេចក្តីជំនឿរបស់បងប្អូនថា ព្រះអម្ចាស់នឹងបំពេញសេចក្តីសន្យារបស់ទ្រង់ចំពោះបងប្អូន តាមពេលវេលាកំណត់របស់ទ្រង់ ? បងប្អូនក៏ប្រហែលជាជញ្ជឹងគិតពីរបៀបដែលបងប្អូនអាចទ្រទ្រង់សេចក្តីជំនឿរបស់បងប្អូន នៅពេលពរជ័យដែលបានសន្យា មិន បានទទួលនៅក្នុងជីវិតនេះដែរ ។ តើដំបូន្មានអ្វីដែលបងប្អូនរកឃើញនៅក្នុង ហេព្រើរ ១១:៨–១៣ និងសារលិខិតរបស់ប្រធាន រ័សុល អិម ណិលសុន « ព្រះគ្រីស្ទមានព្រះជន្មរស់ឡើងវិញ សេចក្តីជំនឿលើទ្រង់នឹងរើភ្នំចេញបាន » ? ( លីអាហូណា ខែឧសភា ឆ្នាំ២០២១ ទំព័រ ១០១–១០៤ ) ។
សូមមើលផងដែរ គោលលទ្ធិ និង សេចក្ដីសញ្ញា ៨៨:៦៨ ។
លោកុប្បត្តិ ១៩:១២–២៩
ព្រះអម្ចាស់បានបញ្ជាដល់យើងឲ្យចាកចេញពីសេចក្ដីទុច្ចរិត និងកុំងាកមើលក្រោយឡើយ ។
តើបងប្អូនបានរៀនមេរៀនអ្វីខ្លះអំពីការគេចចេញពីអំពើទុច្ចរិតនៅពេលបងប្អូនអានអំពីឡុត និងក្រុមគ្រួសាររបស់គាត់ ? ឧទារហណ៍ តើអ្វីដែលធ្វើឲ្យបងប្អូនចាប់អារម្មណ៍អំពីអ្វីដែលពួកទេវតាបានមានបន្ទូល និងបានធ្វើដើម្បីជួយឡុត និងក្រុមគ្រួសាររបស់គាត់គេចពីការបំផ្លិចបំផ្លាញ ? ( សូមមើល លោកុប្បត្តិ ១៩:១២–១៧ ) ។ តើព្រះអម្ចាស់ជួយបងប្អូន និងក្រុមគ្រួសារបងប្អូនគេចចេញ ឬរកឃើញការការពារពីឥទ្ធិពលរបស់អារក្សនៅក្នុងពិភពលោកយ៉ាងដូចម្តេច ? សូមគិតអំពីស្ថានភាពដែលបងប្អូនអាចនឹងត្រូវបានល្បួងឲ្យ « ងាកបែរ [ មើល ] ( ខទី ២៦ ) នៅពេលបងប្អូនគួរតែទន្ទឹងរង់ចាំដោយសេចក្ដីជំនឿលើព្រះអង្គសង្គ្រោះ ។ តើ លូកា ៩:៦២ បន្ថែមអ្វីខ្លះទៅលើការយល់ដឹងរបស់បងប្អូនអំពីគោលគំនិតនេះ ?
សូមមើលផងដែរ ការបកប្រែដោយ យ៉ូសែប ស្ម៊ីធ លោកុប្បត្តិ ១៩:៩–១៥ ( នៅក្នុងសេចក្ដីណែនាំដល់បទគម្ពីរទាំងឡាយ ) ។
លោកុប្បត្តិ ១៩:២៦
តើប្រពន្ធរបស់ឡុតបានធ្វើខុសអ្វី ?
អែលឌើរ ជែហ្វ្រី អ័រ ហូឡិន បានបង្រៀន ៖
« តាមមើលទៅ អ្វីដែលប្រពន្ធរបស់ឡុតបានធ្វើខុសគឺថា នាងមិនគ្រាន់តែ ងាកមើល ត្រឡប់ក្រោយវិញនោះទេ គឺនាងមានបំណងប្រាថ្នាចង់ ត្រឡប់ ទៅវិញតែម្តង ។ វាហាក់ដូចជា សូម្បីតែពីមុននាងបានឆ្លងកាត់ព្រំប្រទល់ទីក្រុង នាងបាននឹកពីអ្វីដែលក្រុងសូដុំម និងក្រុងកូម៉ូរ៉ា បានផ្តល់ឲ្យនាងទៅហើយ ។…
« វាអាចទៅរួចដែលថា ប្រពន្ធរបស់ឡុត ងាកត្រឡប់មើលក្រោយដោយការអាក់អន់ចិត្តនឹងព្រះអម្ចាស់ចំពោះអ្វីដែលទ្រង់បានសុំឲ្យនាងបោះបង់ចោលនោះ ។ … ដូច្នេះ វាមិនត្រឹមតែថា នាងបានងាកមើលក្រោយនោះទេ តែនាងបានងាកបែរមើលទៅក្រោយ ទាំងអាល័យ ។ សរុបមក ការជាប់ចិត្តនឹងអតីតកាលរបស់នាងបានគាបសង្កត់លើទំនុកចិត្តរបស់នាងទៅពេលអនាគត ។ តាមមើលទៅ នោះយ៉ាងហោចណាស់ជាផ្នែកមួយនៃអំពើបាបរបស់នាង ។
« … ខ្ញុំសូមអង្វរដល់អ្នកកុំឲ្យរស់នៅក្នុងថ្ងៃដែលបានកន្លងផុតទៅនាពេលនេះ ហើយក៏កុំចង់បានអ្វីឥតប្រយោជន៍មកពីម្សិលមិញដែរ ប៉ុន្ដែវាល្អដែលបទពិសោធន៍អតីតកាលទាំងនោះអាចកើតមាន ។ អតីតកាលគឺជាអ្វីដែលយើងត្រូវរៀនពីវា ប៉ុន្ដែមិនរស់នៅក្នុងវាទេ ។ យើងក្រឡេកក្រោយមើលអ្វីដែលល្អបំផុត ចេញពីបទពិសោធន៍ល្អនោះ ពុំមែនផេះផង់ទេ ។ ហើយនៅពេលយើងបានរៀននូវអ្វីដែលយើងចាំបាច់ត្រូវរៀន ហើយបាននាំយកមកជាមួយយើងនូវអ្វីដែលល្អបំផុត ដែលយើងបានជួបប្រទះ នោះយើងសម្លឹងមើលទៅមុខ ហើយចងចាំថា សេចក្ដីជំនឿតែងតែចង្អុលទៅរកអនាគតកាលជានិច្ច ។…
« … ការរស់នៅក្នុងជីវិតអតីតកាល រួមទាំងកំហុសពីអតីតកាល គឺមិនមែនជារឿងត្រឹមត្រូវនោះទេ ! វាមិនមែនជាដំណឹងល្អនៃព្រះយេស៊ូវគ្រីស្ទនោះទេ ។ …
« ចំពោះ[ ប្រជាជន ]នៅគ្រប់ជំនាន់ ខ្ញុំសូមអំពាវនាវឲ្យ ‹ ចូរនឹកចាំពីប្រពន្ធលោកឡុត › [ លូកា ១៧:៣២ ] ។ សេចក្តីជំនឿគឺសម្រាប់អនាគត ។ សេចក្តីជំនឿគឺស្ថាបនាឡើងពីអតីតកាល ប៉ុន្តែពុំស្ថិតនៅទីនោះទេ ។ សេចក្តីជំនឿដែលទុកចិត្តថា ព្រះមានអ្វីៗដ៏អស្ចារ្យរក្សាទុកសម្រាប់យើងម្នាក់ៗ ហើយថាព្រះគ្រីស្ទពិតជា ‹ សម្តេចសង្ឃ ខាងឯសេចក្តីល្អដែលត្រូវមក › ( ហេព្រើរ ៩:១១ ) » ( «The Best Is Yet to Be » Ensign ខែមករា ឆ្នាំ២០១០ ទំព័រ ២៤, ២៦–២៧ ) ។
Abraham and Isaac [ អ័ប្រាហាំ និងអ៊ីសាក ] ដោយ ហារ៉ូល ខូបភីង
លោកុប្បត្តិ ២២:១–១៩
អ័ប្រាហាំសុខចិត្តបូជាអ៊ីសាក គឺជានិមិត្តរូបពីព្រះ និងព្រះរាជបុត្រារបស់ទ្រង់ ។
ទោះបីជាយើងពុំដឹងពីមូលហេតុទាំងអស់ដែលព្រះបានបញ្ជាឲ្យអ័ប្រាហាំ ត្រូវថ្វាយអ៊ីសាក ជាការបូជាក៏ដោយ យើងដឹងថា វាគឺជាការសាកល្បងពីសេចក្តីជំនឿរបស់លោកនៅលើព្រះ ។ យើងក៏ដឹងថា វាគឺជា « និមិត្តរូបអំពីព្រះ និងព្រះរាជបុត្រាបង្កើតតែមួយរបស់ទ្រង់ » ( យ៉ាកុប ៤:៥ ) ។ នៅពេលបងប្អូនអាន លោកុប្បត្តិ ២២:១–១៩ បងប្អូនអាចរកមើលនិមិត្តរូប ឬភាពស្រដៀងគ្នារវាងការថ្វាយអ៊ីសាករបស់អ័ប្រាហាំ និងដង្វាយរបស់ព្រះវរបិតានៃព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ។ សូមពិចារណាសរសេរអ្វីដែលបងប្អូនរកឃើញនៅក្នុងតារាងដូចនេះ ៖
|
អ័ប្រាហាំ និង អ៊ីសាក |
ព្រះវរបិតាសួគ៌ និងព្រះយេស៊ូវគ្រីស្ទ |
|---|---|
អ័ប្រាហាំ និង អ៊ីសាក អ៊ីសាកជាកូនប្រុសបង្កើតតែមួយរបស់អ័ប្រាហាំ និងសារ៉ាយ ( លោកុប្បត្តិ ២២:២; សូមមើលផងដែរ ហេព្រើរ ១១:១៧ ) | ព្រះវរបិតាសួគ៌ និងព្រះយេស៊ូវគ្រីស្ទ ព្រះយេស៊ូវគឺជាព្រះរាជបុត្រាបង្កើតតែមួយនៃព្រះវរបិតា ( យ៉ូហាន ៣:១៦ ) |
អ័ប្រាហាំ និង អ៊ីសាក អ៊ីសាកត្រូវថ្វាយជំនួសកូនចៀម ( លោកុប្បត្តិ ២២:៧–៩ ) | ព្រះវរបិតាសួគ៌ និងព្រះយេស៊ូវគ្រីស្ទ ព្រះយេស៊ូវគ្រីស្ទជាកូនចៀមរបស់ព្រះ ( យ៉ូហាន ១:២៩ ) |
តើនិមិត្តរូប ឬភាពស្រដៀងគ្នាអ្វីខ្លះចំពោះពលិកម្មធួនរបស់ព្រះអង្គសង្គ្រោះ ដែលបងប្អូនយល់ឃើញថា មានអត្ថន័យបំផុត ? សូមពិចារណាពីការច្រៀង ឬអានទំនុកច្រៀងនៃទំនុកតម្កើងដែលបង្ហាញពីសេចក្តីស្រឡាញ់របស់ព្រះវរបិតាសួគ៌ចំពោះយើង ដូចជាបទ « ព្រះស្នេហ៍យើងទើបចាត់បុត្រាទ្រង់ » ទំនុកតម្កើង ល.រ. ១៨៧ ។ បងប្អូនក៏អាចកត់ត្រាអារម្មណ៍របស់បងប្អូនអំពីព្រះវរបិតាសួគ៌ និងព្រះយេស៊ូវគ្រីស្ទ និងការពលិកម្មរបស់ទ្រង់ទាំងទ្វេសម្រាប់បងប្អូនផងដែរ ។
ប្រសិនបើបងប្អូនចង់សិក្សាបន្ថែមអំពីការពលិកម្មរបស់ព្រះអង្គសង្គ្រោះរបស់យើង សូមពិចារណាអានសារលិខិតរបស់ប្រធាន ជែហ្វ្រី អ័រ ហូឡិន « Behold the Lamb of God » ( Liahona ខែឧសភា ឆ្នាំ២០១៩ ទំព័រ ៤៤–៤៦ ) ។ ហេតុអ្វីបានជាកូនចៀមជានិមិត្តរូបដ៏មានឥទ្ធិពលនៃព្រះរាជបុត្រានៃព្រះ ? តើប្រធាន ហូឡិន បង្រៀនអ្វីខ្លះ ដែលបង្កើនគារវភាពរបស់បងប្អូនចំពោះអំណោយទានរបស់ព្រះវរបិតាសួគ៌ ?
សូមមើលផងដែរ « Akedah ( The Binding ) » ( វីដេអូ ) នៅលើ ChurchofJesusChrist.org ។
Akedah (The Binding)
ប្រើរូបភាពដើម្បីបង្រៀន ។ ដើម្បីបន្ថែមភាពចម្រុះក្នុងការបង្រៀន និងការរៀន បងប្អូនអាចប្រើរូបភាពមួយ ឬច្រើននៅក្នុងគម្រោងនេះ នៅពេលបងប្អូនសិក្សាដំណើររឿងនោះនៅក្នុង លោកុប្បត្តិ ១៨–២៣ ។ ឬឧទាហរណ៍ បងប្អូន និងគ្រួសារ ឬថ្នាក់របស់បងប្អូនអាចកត់សម្គាល់ព័ត៌មានលម្អិតនៅក្នុងរូបភាពរបស់អ័ប្រាហាំ និងអ៊ីសាក ។ សូមនិយាយអំពីមូលហេតុដែលព័ត៌មានលម្អិតទាំងនេះមានសារៈសំខាន់ចំពោះដំណើររឿងនេះ ហើយស្វែងរកព័ត៌មានលម្អិតទាំងនេះនៅក្នុងព្រះគម្ពីរ ។ តើព័ត៌មានលម្អិតនេះគូសបញ្ជាក់អំពីនិមិត្តរូបនៃដំណើររឿងអំពីពលិកម្មរបស់ព្រះរាជបុត្រានៃព្រះយ៉ាងដូចម្ដេច ?
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
លោកុប្បត្តិ ១៧:១៥–២១; ១៨:១៤; ២១:១–៧
ខ្ញុំអាចទុកចិត្តព្រះថាទ្រង់នឹងរក្សាសេចក្តីសន្យារបស់ទ្រង់ ។
-
ដើម្បីរៀនអំពីការទុកចិត្ដរបស់អ័ប្រាហាំ និងសារ៉ាយលើការសន្យារបស់ព្រះ នោះបងប្អូន និងកូនៗរបស់បងប្អូនអាចនិយាយអំពីពេលដែលពួកគេត្រូវរង់ចាំសម្រាប់អ្វីមួយដែលពួកគេពិតជាចង់បាន ។ បន្ទាប់មក បងប្អូនអាចមើលរូបភាពរបស់សារ៉ាយ និងអ៊ីសាក នៅដើមនៃគម្រោងនេះ ហើយនិយាយអំពីការសន្យាដែលព្រះបានធ្វើចំពោះនាង និងអ័ប្រាហាំ ( សូមមើលផងដែរ « អ័ប្រាហាំ និងសារ៉ាយ » នៅក្នុង ដំណើររឿងព្រះគម្ពីរសញ្ញាចាស់ ទំព័រ ២៨–៣១ ) ។ សូមជួយកូនៗរបស់បងប្អូនឲ្យគិតអំពីអ្វីដែលព្រះបានសន្យាដល់យើង ប្រសិនបើយើងស្មោះត្រង់ ។ សូមលើកទឹកចិត្តពួកគេឲ្យអត់ធ្មត់ ហើយទុកចិត្តថា ព្រះនឹងរក្សាការសន្យារបស់ទ្រង់ ។
2:20Abraham and Sarah
-
ដើម្បីជួយកូនៗរបស់បងប្អូនរៀនពីសេចក្តីពិតដ៏សំខាន់នៅក្នុង លោកុប្បត្តិ ១៨:១៤ នោះបងប្អូនអាចសរសេរពាក្យនីមួយៗពីប្រយោគដំបូងនៃខគម្ពីរនោះនៅលើក្រដាសដាច់ដោយឡែក ។ បន្ទាប់មក សូមច្របល់ក្រដាសទាំងនោះចូលគ្នា ហើយសូមអញ្ជើញកូនៗរបស់បងប្អូនឲ្យរៀបពាក្យទាំងនេះតាមលំដាប់លំដោយ ។ បន្ទាប់មក បងប្អូន និងកូនៗរបស់បងប្អូនអាចអាន លោកុប្បត្តិ ១៧:១៥–២១; ២១:១–៧ ដើម្បីស្វែងរកឧទាហរណ៍ពីអ្វីមួយដែលព្រះអម្ចាស់បានធ្វើ ដែលហាក់ដូចជាមិនអាចទៅរួច ។ សូមចែកចាយជាមួយកូនៗរបស់បងប្អូននូវសេចក្តីជំនឿរបស់បងប្អូនថា ព្រះអម្ចាស់នឹងបំពេញការសន្យារបស់ទ្រង់ ទោះបីជាវាហាក់ដូចជាមិនអាចទៅរួច ឬចំណាយពេលយូរក៏ដោយ ។
លោកុប្បត្តិ ១៩:១៥–២៦
ខ្ញុំអាចភៀសខ្លួនចេញពីអំពើទុច្ចរិត ។
-
សូមសួរកូនៗរបស់បងប្អូនអំពីស្ថានភាពដែលនរណាម្នាក់អាចអញ្ជើញពួកគេឲ្យធ្វើអ្វីមួយដែលពួកគេដឹងថាមិនត្រឹមត្រូវ ។ តើយើងអាច « គេចចេញ » ពីស្ថានភាពទាំងអស់នោះយ៉ាងដូចម្តេច ? សូមសង្ខេប លោកុប្បត្តិ ១៩:១៥–២៦ ដោយពន្យល់ថា ក្រុមគ្រួសាររបស់ ឡុត បានរស់នៅក្នុងទីក្រុងមួយដែលទុច្ចរិតបំផុត ហើយទេវតាបានព្រមានឲ្យពួកគេចាកចេញ ។ នៅពេលកូនៗរបស់បងប្អូនអានជាមួយគ្នា ខទី ១៥–១៧, ២៦ សូមសួរពួកគេអំពីអ្វីដែលវាអាចមានអត្ថន័យសម្រាប់យើងនៅសព្វថ្ងៃនេះដើម្បី « ឲ្យបានរួច » ពីអំពើអាក្រក់ និង « កុំឲ្យមើលមកក្រោយឡើយ » ( ខទី ១៧ ) ។
Sodom [ សូដុំម ] ដោយ ជូលៀស ឆ្នូ វន់ ខារូលស្វីល
លោកុប្បត្តិ ២២:១–១៤
អ័ប្រាហាំបានគោរពតាមព្រះអម្ចាស់ ។
-
សូមប្រើរូបភាពរបស់អ័ប្រាហាំ និងអ៊ីសាក និងការឆ្កាង ( សូមមើល សៀវភៅរូបភាពដំណឹងល្អ លេខ ៩, ៥៧ ) អាចជួយបងប្អូនប្រៀបធៀបដំណើររឿងនៅក្នុង លោកុប្បត្តិ ២២ ជាមួយនឹងដំណើររឿងនៃការពលិកម្មរបស់ព្រះអម្ចាស់ ( សូមមើល ម៉ាថាយ ២៧:២៦–៣៧ ) ។ តើយើងអាចរៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទដែលចេញមកពីដំណើររឿងរបស់អ័ប្រាហាំ និងអ៊ីសាក ហើយនិងការឆ្កាង ? ( សូមមើលផងដែរ « អ័ប្រាហាំ និងអ៊ីសាក » នៅក្នុង ដំណើររឿងព្រះគម្ពីរសញ្ញាចាស់ ទំព័រ ៣៤–៣៧ ) ។
2:0Abraham and Isaac
-
តើបងប្អូនអាចគិតពីល្បែងកម្សាន្តសាមញ្ញមួយដើម្បីលេងជាមួយកូនៗបងប្អូនដែលតម្រូវឲ្យពួកគេធ្វើតាមការណែនាំបានដែរឬទេ ? ប្រហែលជាការណែនាំនេះអាចនាំទៅរករូបភាពរបស់ព្រះអង្គសង្គ្រោះដែលបានលាក់ ។ ល្បែងកម្សាន្តនេះអាចជំរុញឲ្យមានការសន្ទនាអំពីអ្វីដែលព្រះវរបិតាសួគ៌បានបញ្ជាឲ្យយើងធ្វើ ដើម្បីយើងអាចរស់នៅជាមួយទ្រង់ និងព្រះយេស៊ូវគ្រីស្ទម្តងទៀត ។ សូមពិចារណាច្រៀងចម្រៀង ដូចជាបទ « រក្សាបទបញ្ញត្តិ » ( សៀវភៅចម្រៀងកុមារ ទំព័រ ៦៨–៦៩ ) ។ ទំព័រសកម្មភាពសប្ដាហ៍នេះអាចជួយបានផងដែរ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។