« ថ្ងៃទី១១–២២ ខែកុម្ភៈ ‹ ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង › ៖ លោកុប្បត្តិ ១២–១៧; អ័ប្រាហាំ ១–២ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី១១–២២ ខែកុម្ភៈ ‹ ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង › » ចូរមកតាមខ្ញុំ ៖ ឆ្នាំ២០២៦
Melchizedek Blesses Abram [ ម៉ិលគីស្សាដែកប្រសិទ្ធពរដល់អាប់រ៉ាម ] ដោយ វ៉លធើរ រ៉េន ( សេចក្តីលម្អិត )
ថ្ងៃទី១៦–២២ ខែកុម្ភៈ ៖ « ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង »
លោកុប្បត្តិ ១២–១៧; អ័ប្រាហាំ ១–២
ដោយសារតែសេចក្តីសញ្ញាដែលព្រះបានធ្វើជាមួយលោក អ័ប្រាហាំត្រូវបានហៅ « ជាបិតានៃពួកស្មោះត្រង់ » ( គោលលទ្ធិ និងសេចក្តីសញ្ញា ១៣៨:៤១ ) និង « សំឡាញ់របស់ទ្រង់ » ( យ៉ាកុប ២:២៣ ) ។ មនុស្សរាប់លាននាក់នៅសព្វថ្ងៃនេះគោរពលោក ទុកជាបុព្វការីជនរបស់ពួកគេផ្ទាល់ និងអ្នកដទៃទៀតត្រូវបានយកទៅចិញ្ចឹមចូលក្នុងគ្រួសាររបស់លោក តាមរយៈការប្រែចិត្តជឿលើដំណឹងល្អនៃព្រះយេស៊ូវ គ្រីស្ទ ។ ប៉ុន្តែ អ័ប្រាហាំលោកផ្ទាល់កើតចេញពីក្រុមគ្រួសារដែលមានបញ្ហា—ឪពុករបស់លោក ដែលបានបោះបង់ចោលការថ្វាយបង្គំពិតប្រាកដដល់ព្រះ បានព្យាយាមយកអ័ប្រាហាំថ្វាយដង្វាយទៅព្រះក្លែងក្លាយ ។ ថ្វីបើមានរឿងនេះក្តី ក៏បំណងប្រាថ្នារបស់អ័ប្រាហាំ គឺ « ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង » ដែរ ( អ័ប្រាហាំ ១:២ ) ហើយដំណើររឿងរបស់ជីវិតលោកបង្ហាញថា ព្រះបានគោរពបំណងប្រាថ្នារបស់លោក ។ ជីវិតរបស់អ័ប្រាហាំឈរជាទីបន្ទាល់ថា មិនថាបុគ្គលម្នាក់ណាធ្លាប់មានប្រវត្តិគ្រួសារយ៉ាងណាទេ អនាគតកាលអាចត្រូវបានបំពេញដោយសេចក្តីសង្ឃឹម ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
ព្រះនឹងប្រទានពរដល់ខ្ញុំចំពោះសេចក្តីជំនឿ និងបំណងប្រាថ្នាសុចរិតរបស់ខ្ញុំ ។
អែលឌើរ នែល អិល អាន់ឌើរសិន បានបង្រៀនថា « យើងទាំងអស់គ្នាបានទទួលឥទ្ធិពលពីក្រុមគ្រួសាររបស់យើង[ និង ]សង្គមរបស់យើង ហើយផ្ទុយទៅវិញខ្ញុំជឿថា មានកន្លែងមួយនៅក្នុងខ្លួនយើង ដែលយើងបង្កើត និងគ្រប់គ្រងយ៉ាងពិសេស និងដោយផ្ទាល់ខ្លួន ។ … នៅទីបំផុត បំណងប្រាថ្នាខាងក្នុងចិត្តរបស់យើងគឺសម្រាប់ជីវិត ហើយបំណងប្រាថ្នានោះត្រូវមើលឃើញតាមរយៈជម្រើសរបស់យើង និងសកម្មភាពរបស់យើង » ( « Educate Your Desires, Elder Andersen Counsels » នៅលើគេហទំព័រ ChurchofJesusChrist.org ) ។ សូមពិចារណារបៀបដែល អ័ប្រាំហាំ ១:១–១៩ បង្ហាញពីអ្វីដែលអែលឌើរ អាន់ឌើរសិនបានបង្រៀន ។ សំណួរបែបនេះអាចជួយ ៖
-
តើអ័ប្រាហាំបានប៉ងប្រាថ្នាអ្វីខ្លះ ? តើបំណងប្រាថ្នារបស់លោកបង្ហាញឲ្យឃើញយ៉ាងណាតាមរយៈសកម្មភាពរបស់លោក ? តើព្រះបានគាំទ្របំណងប្រាថ្នារបស់លោកយ៉ាងដូចម្ដេច ?
-
តើបងប្អូនមានបំណងប្រាថ្នាអ្វី ? តើបំណងប្រាថ្នានោះ វាស្តែងចេញតាមរយៈសកម្មភាពរបស់បងប្អូនដូចម្តេច ? តើព្រះគាំទ្របងប្អូនដោយរបៀបណា ?
-
តើខគម្ពីរទាំងនេះមានសារលិខិតអ្វីខ្លះសម្រាប់អ្នកទាំងឡាយណាដែលមានសមាជិកគ្រួសារពុំមានបំណងប្រាថ្នាសុចរិត ?
បំណងប្រាថ្នាដ៏ធំបំផុតមួយរបស់អ័ប្រាហាំ និងសារ៉ាយ—ចង់មានកូន—មិនបានសម្រេចអស់ជាច្រើនឆ្នាំមកហើយ ( សូមមើល លោកុប្បត្តិ ១៥:១–៦ ) ។ តើបងប្អូនបានរៀនអ្វីខ្លះចេញពី ហេព្រើរ ១១:៨–១៣ អំពីរបៀបដែលអ័ប្រាហាំ និងសារ៉ាយប្រឈមមុខនឹងការសាកល្បងនេះ ? តើព្រះអង្គសង្រ្គោះជួយបងប្អូន « ប្រកាន់ខ្ជាប់ » សេចក្តីសន្យារបស់ទ្រង់ ទោះបីជាវា « មិនមកភ្លាម » ដោយរបៀបណា ?
សូមមើលផងដែរ « Deliverance of Abraham » ( វីដេអូ ) នៅលើបណ្ណាល័យដំណឹងល្អ ។
Deliverance of Abraham
លោកកុប្បត្តិ ១២:១–៣; ១៣:១៥–១៦; ១៥:១–៦; ១៧:១–៨, ១៥–២២; អ័ប្រាហាំ ២:៦–១១
ព្រះចង់ឲ្យខ្ញុំធ្វើ និងរក្សាសេចក្តីសញ្ញាជាមួយទ្រង់ ។
ហេតុអ្វីបានជាវាសំខាន់សម្រាប់បងប្អូនដើម្បីដឹងអំពីសេចក្តីសញ្ញាដែលព្រះបានធ្វើជាមួយអ័ប្រាហាំ ? ដោយសារព្រះចង់ធ្វើសេចក្ដីសញ្ញាស្រដៀងគ្នានេះជាមួយនឹងបងប្អូន ។ ទ្រង់បានសន្យាថា សេចក្តីសញ្ញានេះនឹងបន្តទៅដល់កូនចៅ ឬ « ពូជ » របស់អ័ប្រាហាំ ហើយថា « ចំពោះមនុស្សជាច្រើនដែលទទួលដំណឹងល្អនេះ នោះនឹងត្រូវបានរាប់ថាជាពូជអ្នក » ( អ័ប្រាហាំ ២:១០–១១ ) ។ ម្យ៉ាងទៀត សេចក្ដីសញ្ញានៅតែបន្តនៅក្នុងបងប្អូន—នៅពេលបងប្អូនបានទទួលបុណ្យជ្រមុជទឹក ហើយសេចក្ដីសញ្ញានោះកាន់តែមានភាពពេញលេញ ពេលបងប្អូនធ្វើសេចក្ដីសញ្ញានៅក្នុងព្រះវិហារបរិសុទ្ធ ( សូមមើល កាឡាទី ៣:២៦–២៩; គោលលទ្ធិ និងសេចក្តីសញ្ញា ១៣២:៣០–៣២ ) ។
សម្រាប់មូលហេតុនោះ បងប្អូនអាចសិក្សា អ័ប្រាហាំ ២:៦–១១ និងធ្វើបញ្ជីនៃអ្វីដែលព្រះពិតជាបានសន្យាដល់អ័ប្រាហាំ និងសារ៉ាយ ( សូមមើលផងដែរ លោកុប្បត្តិ ១២:១–៣; ១៣:១៥–១៦; ១៥:១–៦; ១៧:១–៨, ១៥–២២ ) ។ តើពរជ័យទាំងនេះអាចអនុវត្តចំពោះបងប្អូនបានដោយរបៀបណា ?
ការសន្យាទាំងនេះមួយចំនួនមានភាពស្របគ្នាដ៏នៅអស់កល្បជានិច្ច ។ តើការសន្យាដូចជា ដែនដីជាមរតក ឬកូនចៅដ៏ច្រើនបានសម្រេចជាអស់កល្បជានិច្ចដោយរបៀបណា ? ( សូមមើល គោលលទ្ធិ និងសេចក្តីសញ្ញា ១៣១:១–៤; ១៣២:២០–២៤, ២៨–៣២ ) ។
ក្រៅពីការសន្យាពរជ័យទាំងឡាយ ព្រះក៏បានមានបន្ទូលដល់អ័ប្រាហាំឲ្យ « ធ្វើ ជាទីបញ្ចេញពរ » ( លោកុប្បត្តិ ១២:២; បានបន្ថែមការបញ្ជាក់ ) ។ តើបងប្អូនគិតថា វាមានន័យយ៉ាងណា ? តើ បងប្អូន ធ្វើជាពរជ័យដោយរបៀបណា ? ( សូមមើល អ័ប្រាហាំ ២:១១ ) ។
ដើម្បីបង្រៀនអំពីសេចក្ដីសញ្ញា អែលឌើរ ឌែល ជី រិនឡាន់ បានមានប្រសាសន៍អំពីជំនោរទឹកនៅទន្លេអាម៉ាហ្សូន ហើយប្រធាន អេមីលី បេលី ហ្វ្រីមែន បានមានប្រសាសន៍អំពីការដើរតាមផ្លូវដែលមានដុំថ្មទាំងកជើងបាក់ ( សូមមើល « ការទទួលបានព្រះចេស្តារបស់ព្រះតាមរយៈសេចក្ដីសញ្ញា » លីអាហូណា ខែឧសភា ឆ្នាំ២០២៣ ទំព័រ ៣៥–៣៧ « ការដើរនៅក្នុងទំនាក់ទំនងសេចក្ដីសញ្ញាជាមួយព្រះគ្រីស្ទ » លីអាហូណា ខែវិច្ឆិកា ឆ្នាំ២០២៣ ទំព័រ ៧៦–៧៩ ) ។ ស្វែងរកមួយ ឬទាំងពីរនៃសារលិខិតទាំងនេះសម្រាប់ប្រយោគដែលជួយឆ្លើយសំណួរ « ហេតុអ្វីបានជាព្រះចង់ឲ្យខ្ញុំធ្វើសេចក្តីសញ្ញាជាមួយទ្រង់ ? »
អញ្ជើញពួកគេឲ្យបង្រៀនគ្នាទៅវិញទៅមក ។ ប្រសិនបើបងប្អូនកំពុងបង្រៀនគ្រួសាររបស់បងប្អូន ឬថ្នាក់រៀនក្នុងសាសនាចក្រអំពីសេចក្ដីសញ្ញាទាំងឡាយ សូមពិចារណាផ្ដល់ដល់បុគ្គលម្នាក់ៗនូវចំណែកនៃសារលិខិតរបស់អែលឌើរ រិនឡាន់ ឬប្រធាន ហ្វ្រីមែន ដើម្បីសិក្សា។ បន្ទាប់មក ពួកគេអាចចែកចាយជាមួយក្រុមគ្រួសារ ឬថ្នាក់ផ្សេងទៀតនូវអ្វីដែលពួកគេបានរៀន ។ ការណ៍នេះអនុញ្ញាតឲ្យមនុស្សថ្លែងទីបន្ទាល់ដល់ និងរៀនពីគ្នាទៅវិញទៅមក ហើយដែលយាងអញ្ជើញព្រះវិញ្ញាណ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៦ ) ។
សូមមើលផងដែរ Topics and Questions « Abrahamic Covenant » នៅលើបណ្ណាល័យដំណឹងល្អ « Thoughts to Keep in Mind: The Covenant » នៅក្នុងធនធានទាំងនេះ ។
The Abrahamic Covenant [ សេចក្ដីសញ្ញាអ័ប្រាហាំ ] ដោយ ឌីលីន ម៉ាស្ហ ( សេចក្តីលម្អិត )
លោកុប្បត្តិ ១៤:១៨–១៩; ការបកប្រែដោយយ៉ូសែប ស្ម៊ីធ លោកុប្បត្តិ ១៤:២៥–៤០
« ម៉ិលគីស្សាដែកគឺជាបុរសនៃសេចក្ដីជំនឿ » ។
សូមស្រមៃថា បងប្អូនកំពុងណែនាំម៉ិលគីស្សាដែកទៅកាន់នរណាម្នាក់ដែលមិនស្គាល់លោក ។ តើបងប្អូននឹងនិយាយអ្វី ? សូមរកមើលគំនិតទាំងឡាយនៅក្នុង ការបកប្រែដោយយ៉ូសែប ស្ម៊ីធ លោកុប្បត្តិ ១៤:២៦–២៧, ៣៣–៣៨ ( នៅក្នុង Bible appendix ); អាលម៉ា ១៣:១៣–១៩ និង គោលលទ្ធិ និងសេចក្ដីសញ្ញា ១០៧:១–៤ ។ តើលក្ខណសម្បត្ដិដូចជាព្រះគ្រីស្ទអ្វីខ្លះដែលបងប្អូនរកឃើញនៅក្នុងការពិពណ៌នាទាំងនេះអំពីម៉ិលគីស្សាដែក ? តើការសិក្សារបស់បងប្អូនអំពីជីវិតរបស់ម៉ិលគីស្សាដែកជះឥទ្ធិពលដល់របៀបដែលបងប្អូនគិតពីបព្វជិតភាពម៉ិលគីស្សាដែកយ៉ាងដូចម្តេច ?
លោកុប្បត្តិ ១៤:១៨–២៤; ការបកប្រែដោយ យ៉ូសែប ស្ម៊ីធ លោកុប្បត្តិ ១៤:៣៦–៤០
អ័ប្រាហាំបានបង់ដង្វាយមួយភាគក្នុងដប់ ។
តើបងប្អូនរៀនអ្វីខ្លះអំពីអាកប្បកិរិយារបស់អ័ប្រាហាំចំពោះទ្រព្យសម្បត្តិ មកពី លោកុប្បត្តិ ១៤:១៨–២៤ និង ការបកប្រែដោយ យ៉ូសែប ស្ម៊ីធ លោកុប្បត្តិ ១៤:៣៦–៤០ ( នៅក្នុង the Bible appendix ) ? ឧទាហរណ៍ សូមកត់សម្គាល់ការឆ្លើយតបរបស់លោកចំពោះស្ដេចសូដុំមនៅក្នុង លោកុប្បត្តិ ១៤:២៣ ។ តើការគោរពតាមច្បាប់ដង្វាយមួយភាគក្នុងដប់បានជះឥទ្ធិពលដល់ទស្សនៈរបស់បងប្អូនចំពោះលុយយ៉ាងដូចម្ដេច ?
លោកុប្បត្តិ ១៦
ព្រះព្រះសណ្តាប់ខ្ញុំ ។
នៅពេលបងប្អូនអាន លោកុប្បត្តិ ១៦ បងប្អូនអាចគិតអំពីពេលមួយដែលបងប្អូនមានអារម្មណ៍ថា បងប្អូនទទួលទង្វើដោយអយុត្តិធម៌ ដូចដែលហាការបានទទួលដែរ ។ សូមកត់ចំណាំថា « អ៊ីសម៉ាអែល » មានន័យថា « ព្រះព្រះសណ្តាប់ » ។ តើព្រះបានបង្ហាញបងប្អូនយ៉ាងណាថា ទ្រង់បានព្រះសណ្តាប់បងប្អូន ?
សូមមើលផងដែរ « ការអធិស្ឋានស្ងប់ស្ងាត់ » ទំនុកតម្កើង ល.រ. ៧៨ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ព្រះយេស៊ូវគ្រីស្ទនឹងដឹកនាំខ្ញុំដោយព្រះហស្ដ ។
-
នៅពេលបងប្អូន និងកូនៗរបស់បងប្អូនអាន អ័ប្រាហាំ ១:១៨ និង ២:៨ បងប្អូនអាចអញ្ជើញពួកគេឲ្យស្ដាប់ពីផ្នែកអវៈយវៈនៃរូបកាយរបស់ពួកគេដែលបានលើកឡើងនៅក្នុងខគម្ពីរទាំងពីរ ។ ប្រហែលជាបងប្អូនអាចលេងល្បែងកម្សាន្តដែលកុមារបិទភ្នែក ហើយបងប្អូននាំកុមារទៅកន្លែងណាមួយដោយកាន់ដៃ ។ បន្ទាប់មក បងប្អូនអាចនិយាយថា តើវាមានអារម្មណ៍យ៉ាងណាដែលមានព្រះយេស៊ូវគ្រីស្ទដឹកនាំយើងដោយកាន់ដៃ ឬការពារយើង ។
លោកុប្បត្តិ ១៣:៥–១២
ខ្ញុំអាចក្លាយជាអ្នកផ្សះផ្សាគេបាន ។
-
កូនៗរបស់បងប្អូនអាចរីករាយនឹងការសម្តែងតាមដំណើររឿងចេញពី លោកុប្បត្តិ ១៣:៥–១២ ដោយការសម្តែងធ្វើជាអ័ប្រាហាំ ឡុត និងអ្នកគង្វាល ។ តើយើងអាចធ្វើតាមគំរូរបស់អ័ប្រាហាំក្នុងការធ្វើជាអ្នកផ្សះផ្សាគេជាមួយក្រុមគ្រួសារ ឬមិត្តភក្ដិរបស់យើងយ៉ាងដូចម្ដេច ? សូមសាកល្បងសម្តែងតាមចម្លើយរបស់ពួកគេ ។
Lot’s Choice [ ជម្រើសរបស់ឡុត ] ដោយ ហ្វ្រែឌើរិក វិលលាម្ស © Providence Collection/បានអាជ្ញាប័ណ្ណពី goodsalt.com
លោកុប្បត្តិ ១៣:១៦; លោកុប្បត្តិ ១៥:១–៦; ១៧:១–៨; អ័ប្រាហាំ ២:៩–១១
ព្រះមានព្រះទ័យចង់ឲ្យខ្ញុំធ្វើសេចក្ដីសញ្ញាជាមួយនឹងទ្រង់ ។
-
សូមពិចារណាបង្ហាញកូនៗរបស់បងប្អូននូវធុងខ្សាច់ ផ្កាយនៅលើមេឃពេលយប់ ឬរូបភាពនៅចុងបញ្ចប់នៃគម្រោងនេះ ។ ការណ៍នេះអាចជួយពួកគេឲ្យយល់ពីការសន្យារបស់ព្រះនៅក្នុង លោកុប្បត្តិ ១៣:១៦; ១៥:១–៦ ។ សូមនិយាយអំពីរបៀបដែលបងប្អូនបានរៀនដើម្បីទុកចិត្តលើការសន្យារបស់ព្រះ ទោះបីជាវាហាក់ដូចជាមិនអាចទៅរួចក៏ដោយ ។
-
ដើម្បីបង្រៀនកូនៗរបស់បងប្អូនអំពីសេចក្ដីសញ្ញា សូមសុំឲ្យពួកគេប្រាប់បងប្អូនអំពីពេលវេលាមួយនៅពេលដែលពួកគេបានសន្យា ឬនរណាម្នាក់បានសន្យាចំពោះពួកគេ ។ ប្រសិនបើវាមានប្រយោជន៍ សូមចែកចាយឧទាហរណ៍ខ្លះអំពីខ្លួនបងប្អូន—រួមទាំងសេចក្ដីសញ្ញាដែលបងប្អូនបានធ្វើជាមួយព្រះនៅឯពិធីបុណ្យជ្រមុជទឹក ឬនៅក្នុងព្រះវិហារបរិសុទ្ធ ។ តើសេចក្ដីសញ្ញារបស់បងប្អូនបានជះឥទ្ធិពលដល់ទំនាក់ទំនងរបស់បងប្អូនជាមួយនឹងព្រះយ៉ាងដូចម្ដេច ? សូមជ្រើសរើសពីរបីឃ្លាមកពី លោកុប្បត្តិ ១៥:១–៦; ១៧:១–៨; អ័ប្រាហាំ ២:៩–១១ ដើម្បីចែកចាយពរជ័យមួយចំនួនដែលព្រះបានសន្យាចំពោះអ័ប្រាហាំ និងសារ៉ាយ ។
-
ដើម្បីជួយកូនៗរបស់បងប្អូនរៀបចំខ្លួនធ្វើសេចក្ដីសញ្ញាជាមួយនឹងព្រះ នៅពេលពួកគេទទួលបុណ្យជ្រមុជទឹក នោះបងប្អូនអាចប្រើគំនិតសកម្មភាពមួយចំនួនដែលបានណែនាំនៅក្នុង ឧបសម្ព័ន្ធ ក ឬ ឧបសម្ព័ន្ធ ខ ។
អ័ប្រាហាំ ១:១២–១៧; លោកុប្បត្តិ ១៦:៧–១១
ព្រះព្រះសណ្តាប់ខ្ញុំ ។
-
នៅពេលដែលជីវិតរបស់អ័ប្រាហាំស្ថិតនៅក្នុងគ្រោះថ្នាក់លោកបានអំពាវនាវដល់ព្រះ ។ នៅពេលហាការនៅទីរហោស្ថានតែម្នាក់ឯង នាងបានដឹងថា ព្រះបានព្រះសណ្ដាប់ដល់នាង ។ សូមពិចារណាចែកចាយដំណើររឿងទាំងពីរនេះជាមួយកូនៗរបស់បងប្អូន ៖ « អ័ប្រាហាំ និងសារ៉ាយ » និង « ហាការ » នៅក្នុង ដំណើររឿងព្រះគម្ពីរសញ្ញាចាស់ ទំព័រ ២៨–៣១, ៣២–៣៣ ។ តើយើងរៀនអ្វីខ្លះអំពីព្រះមកពីដំណើររឿងទាំងនេះ ? បន្ទាប់មក បងប្អូនអាចចែកចាយបទពិសោធន៍ជាមួយគ្នាទៅវិញទៅមក នៅពេលបងប្អូនមានអារម្មណ៍ថា ព្រះបានព្រះសណ្ដាប់ដល់បងប្អូន ។ បទចម្រៀងដូចជាបទ « ការអធិស្ឋានរបស់កុមារ » ( សៀវភៅចម្រៀងកុមារ ទំព័រ ទំព័រ ៦–៧ ) អាចសង្កត់ធ្ងន់បន្ថែមដល់គោលការណ៍នេះ ។
Abraham and Sarah
Hagar
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។