« គំនិតដែលត្រូវចងចាំ ៖ សេចក្តីសញ្ញា » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« សេចក្តីសញ្ញា » ចូរមកតាមខ្ញុំ ៖ ឆ្នាំ២០២៦
គំនិតដែលត្រូវចងចាំ
សេចក្តីសញ្ញា
នៅទូទាំងព្រះគម្ពីរសញ្ញាចាស់ បងប្អូននឹងអានជាញឹកញាប់នូវពាក្យ សេចក្តីសញ្ញា ។ នៅសព្វថ្ងៃនេះ ជាញឹកញាប់យើងគិតពីសេចក្តីសញ្ញាជាសេចក្តីសន្យាពិសិដ្ឋជាមួយព្រះ ប៉ុន្តែនៅក្នុងពិភពលោកកាលពីបុរាណ សេចក្តីសញ្ញាក៏ជាផ្នែកសំខាន់នៃការប្រាស្រ័យទាក់ទងរបស់មនុស្សជាមួយគ្នាទៅវិញទៅមកផងដែរ ។ ដើម្បីសុវត្ថិភាព និងការរស់រានរបស់ពួកគេ មនុស្សត្រូវតែអាចទុកចិត្តលើគ្នាទៅវិញទៅមក ហើយសេចក្តីសញ្ញាតែងតែជាវិធីដើម្បីទទួលបានទំនុកចិត្តនោះ ។
ដូច្នេះ នៅពេលព្រះបានមានព្រះបន្ទូលទៅកាន់ ហេណុក ណូអេ ម៉ូសេ និងអ្នកដទៃអំពីសេចក្តីសញ្ញា ទ្រង់បានអញ្ជើញពួកលោកឲ្យចូលទៅក្នុងទំនាក់ទំនងនៃការទុកចិត្តលើទ្រង់ ។ យើងហៅសេចក្តីសញ្ញានេះថាជាសេចក្ដីសញ្ញាថ្មី ហើយអស់កល្បអស់កាលជានិច្ច ឬសេចក្តីសញ្ញាអ័ប្រាហាំ—ជាការយោងទៅសេចក្ដីសញ្ញាដែលព្រះបានធ្វើជាមួយអ័ប្រាហាំ និងសារ៉ា ហើយបន្ទាប់មកបានបន្តជាមួយកូនចៅរបស់ពួកលោកដែលមាន អ៊ីសាក និងយ៉ាកុប ( ហៅម្យ៉ាងទៀតថាអ៊ីស្រាអែល ) ។ នៅក្នុងព្រះគម្ពីរសញ្ញាចាស់ត្រូវគេស្គាល់យ៉ាងសាមញ្ញថា « សេចក្តីសញ្ញា » ។ បងប្អូននឹងមើលឃើញថា ព្រះគម្ពីរសញ្ញាចាស់គឺជាមូលដ្ឋានគ្រឹះនៃដំណើររឿងនៃប្រជាជនដែលបានឃើញខ្លួនរបស់ពួកគេជាអ្នកគ្រងមរតកនៃសេចក្តីសញ្ញានេះ—រាស្រ្តក្នុងសេចក្តីសញ្ញា ។
សេចក្តីសញ្ញាអ័ប្រាហាំបន្តមានសារៈសំខាន់ដល់សព្វថ្ងៃនេះ ជាពិសេសចំពោះពួកបរិសុទ្ធថ្ងៃចុងក្រោយ ។ ហេតុអ្វី ? ពីព្រោះយើងក៏ជារាស្រ្តក្នុងសេចក្តីសញ្ញាដែរ ទោះបីជាយើងជាកូនចៅ ឬមិនមែនកូនចៅផ្ទាល់របស់អ័ប្រាហាំ អ៊ីសាក និងយ៉ាកុបក៏ដោយ ។ ព្រោះមូលហេតុនេះ ទើបវាមានសារៈសំខាន់ដែលត្រូវយល់ថា អ្វីទៅជាសេចក្តីសញ្ញាអ័ប្រាហាំ និងរបៀបដែលវាអនុវត្តចំពោះយើងនៅសព្វថ្ងៃនេះ ។
តើសេចក្តីសញ្ញាអ័ប្រាហាំជាអ្វី ?
អ័ប្រាហាំចង់ « ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង » ( អ័ប្រាហាំ ១:២ ) ដូច្នេះ ព្រះបានឲ្យលោកចុះក្នុងទំនាក់ទំនងនៃសេចក្តីសញ្ញា ។ អ័ប្រាហាំពុំមែនជាមនុស្សដំបូងគេដែលមានបំណងប្រាថ្នានេះនោះទេ ហើយលោកក៏មិនមែនជាមនុស្សដំបូងដែលទទួលសេចក្តីសញ្ញានេះដែរ ។ ជាចុងក្រោយ វាគឺជាសេចក្តីសញ្ញាដ៏អស់កល្បអស់កាលជានិច្ច ។ អ័ប្រាហាំបានស្វែងរក « ព្រះពរទាំងឡាយខាងពួកអយ្យកោ » ( អ័ប្រាហាំ ១:២ )—ពរជ័យដែលបានត្រូវប្រទានឲ្យដោយសេចក្តីសញ្ញាទៅកាន់លោកអ័ដាម និងនាងអេវ៉ា ហើយបន្ទាប់មកដល់មនុស្សដែលស្វែងរកពរជ័យទាំងនេះដោយឧស្សាហ៍ព្យាយាម ។
សេចក្តីសញ្ញារបស់ព្រះជាមួយនឹងអ័ប្រាហាំ សន្យានូវពរជ័យដ៏អស្ចារ្យទាំងឡាយ ៖ គ្រងមរតកនៃដែនដី មានកូនចៅដ៏ច្រើន ទទួលបានពិធីបរិសុទ្ធនៃបព្វជិតភាព និងនាមដែលត្រូវបានគេគោរពរាប់ជំនាន់ ។ ប៉ុន្តែ ចំណុចសំខាន់នៃសេចក្តីសញ្ញានេះពុំមែនគ្រាន់តែជាពរជ័យដែលអ័ប្រាហាំ និងក្រុមគ្រួសាររបស់លោកនឹង ទទួល ប៉ុណ្ណោះទេ ថែមទាំង ផ្តោតលើពរជ័យដែលកូនចៅរបស់ព្រះទាំងអស់នឹង ត្រូវ ទទួលបានទៀតផង ។ ព្រះបានប្រកាសថា « ឯងនឹងបានធ្វើជាទីបញ្ចេញពរដល់មនុស្សទាំងឡាយ » « គ្រប់ទាំងគ្រួនៅផែនដីនឹងបានពរដោយសារឯង »( លោកុប្បត្តិ ១២:២–៣ ) ។
តើសេចក្ដីសញ្ញានេះបានផ្ដល់ងារជាឯកសិទ្ធិដល់អ័ប្រាហាំ សារ៉ា និងពូជពង្សរបស់ពួកគាត់នៅក្នុងចំណោមបុត្រាបុត្រីរបស់ព្រះដែរឬទេ ? មានតែនៅក្នុងន័យថា វាគឺជាឯកសិទ្ធិមួយដើម្បីផ្ដល់ពរដល់មនុស្សដទៃទៀតប៉ុណ្ណោះ ។ គ្រួសារអ័ប្រាហាំត្រូវ « បានកាន់ការងារបម្រើ និងបព្វជិតភាពនេះដល់អស់ទាំងសាសន៍ » ដោយចែកចាយ « ព្រះពរទាំងឡាយនៃដំណឹងល្អ ដែលជាព្រះពរទាំងឡាយខាងសេចក្ដីសង្គ្រោះ គឺខាងជីវិតដ៏នៅអស់កល្បជានិច្ច » ( អ័ប្រាហាំ ២:៩, ១១ ) ។ ការធ្វើជារាស្ដ្រនៃសេចក្ដីសញ្ញារបស់ព្រះមិនមានន័យថា ពួកគេល្អជាងអ្នកដទៃនោះទេ វាមានន័យថា ពួកគេមានកាតព្វកិច្ចជួយអ្នកដទៃឲ្យកាន់តែប្រសើរ ។
សេចក្ដីសញ្ញានេះគឺជាពរជ័យដែលអ័ប្រាហាំទន្ទឹងចង់បាន ។ បន្ទាប់ពីទទួលបានពរជ័យនេះ អ័ប្រាហាំបានថ្លែងនៅក្នុងដួងចិត្តរបស់លោកថា « អ្នកបម្រើរបស់ទ្រង់បានខំស្វែងរកទ្រង់ ឥឡូវនេះ ទូលបង្គំបានរកឃើញព្រះអង្គហើយ » ( អ័ប្រាហាំ ២:១២ ) ។
ការណ៍នោះបានកើតឡើងកាលពីរាប់ពាន់ឆ្នាំមុន ប៉ុន្តែសេចក្ដីសញ្ញានេះត្រូវបានស្ដារឡើងវិញនៅក្នុងជំនាន់របស់យើង ។ ហើយបច្ចុប្បន្ននេះវាត្រូវបានបំពេញនៅក្នុងជីវិតនៃរាស្ត្ររបស់ព្រះ ។ ការបំពេញនៃសេចក្ដីសញ្ញានេះកំពុងតែមានសន្ទុះនៅថ្ងៃចុងក្រោយ ពេលដែលកិច្ចការរបស់ព្រះដំណើរការទៅមុខ ដោយផ្ដល់ពរជ័យដល់ក្រុមគ្រួសារទូទាំងពិភពលោក ។ ហើយដូចជាអ័ប្រាហាំដែរ អ្នកទាំងឡាយណាដែលចង់ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង—អ្នកទាំងឡាយណាដែលស្វែងរកព្រះដោយចិត្តស្មោះ—អាចក្លាយជាផ្នែកមួយនៃសេចក្ដីសញ្ញានេះ ។
តើសេចក្ដីសញ្ញាអ័ប្រាហាំមានន័យដូចម្តេចចំពោះខ្ញុំ ?
បងប្អូនគឺជាកូនចៅនៃសេចក្ដីសញ្ញានោះ ។ បងប្អូនបានចុះសេចក្តីសញ្ញាជាមួយព្រះ នៅពេលបងប្អូនបានទទួលបុណ្យជ្រមុជទឹក ហើយនៅពេលបងប្អូនទទួលទានសាក្រាម៉ង់ ។ ហើយបងប្អូនទទួលបានភាពពេញលេញនៃសេចក្ដីសញ្ញាជាមួយនឹងពិធីបរិសុទ្ធដ៏ពិសិដ្ឋនៃព្រះវិហារបរិសុទ្ធ ។
តាមរយៈសេចក្ដីសញ្ញា និងពិធីបរិសុទ្ធទាំងនេះ យើងក្លាយជារាស្ត្ររបស់ព្រះ ។ យើងចងភ្ជាប់ទៅនឹងទ្រង់« ដែលចងភ្ជាប់ដល់អស់កល្បអស់កាលជានិច្ច » ។ « ពេលយើងចុះសេចក្តីសញ្ញាជាមួយព្រះ » ប្រធាន រ័សុល អិម ណិលសុន បានបង្រៀនថា « នោះយើងពុំនៅលើដីអព្យាក្រឹតទៀតឡើយ » ។ ព្រះនឹងមិនបោះបង់ចោលទំនាក់ទំនងរបស់ទ្រង់ជាមួយអស់អ្នកដែលបានបង្កើតចំណងមិត្តភាពបែបនោះជាមួយទ្រង់ឡើយ ។ តាមពិត អស់អ្នកទាំងឡាយណាដែលបានចុះសេចក្តីសញ្ញាជាមួយព្រះ អាចទទួលបានសេចក្តីស្រឡាញ់ និងសេចក្តីមេត្តាករុណាដ៏ពិសេសមួយ ។ … ដោយសារតែសេចក្តីសញ្ញារបស់យើងជាមួយព្រះ ទ្រង់ពុំដែលនឿយហត់ក្នុងកិច្ចខិតខំរបស់ទ្រង់ដើម្បីជួយយើងឡើយ ហើយយើងនឹងមិនដែលប្រើអស់ការអត់ធ្មត់ដ៏មេត្តារបស់ទ្រង់ជាមួយយើងដែរ » ។ បងប្អូននឹងឃើញវានៅក្នុងប្រវត្តិសាស្ត្រនៃរាស្ដ្រនៃសេចក្ដីសញ្ញារបស់ព្រះនៅក្នុងព្រះគម្ពីរសញ្ញាចាស់ ហើយបងប្អូននឹងឃើញវានៅក្នុងជីវិតរបស់បងប្អូនផ្ទាល់ក្នុងនាមជាបុត្រម្នាក់នៃសេចក្ដីសញ្ញារបស់ទ្រង់ ។
Be Not Afraid [ កុំឲ្យភ័យឡើយ ] ដោយ ដាន់ វិលសុន
នេះគឺជាការយល់ដឹងដ៏មានតម្លៃដែលបានប្រទានឲ្យយើង ដោយសារតែការស្តារឡើងវិញនៃសេចក្តីសញ្ញាអ័ប្រាហាំ តាមរយៈព្យាការី យ៉ូសែប ស្ម៊ីធ ។ ដូច្នេះនៅពេលបងប្អូនអានអំពីសេចក្តីសញ្ញានៅក្នុងព្រះគម្ពីរសញ្ញាចាស់ សូមកុំគ្រាន់តែគិតអំពីទំនាក់ទំនងរបស់ព្រះជាមួយអ័ប្រាហាំ អ៊ីសាក និងយ៉ាកុប ឡើយ ។ សូមគិតផងដែរអំពីទំនាក់ទំនងរបស់ទ្រង់ជាមួយបងប្អូន ។ នៅពេលបងប្អូនអានអំពីសេចក្តីសន្យាពីកូនចៅជំនាន់ក្រោយដែលរាប់មិនអស់ សូមកុំគិតតែពីមនុស្សរាប់លាននាក់ដែលហៅ អ័ប្រាហាំថាជាឪពុករបស់ពួកគេឡើយ ។ គិតផងដែរអំពីការសន្យារបស់ព្រះចំពោះបងប្អូនពីក្រុមគ្រួសារដ៏នៅអស់កល្បជានិច្ច និងការកើនឡើងដ៏នៅអស់កល្បជានិច្ច ។ នៅពេលបងប្អូនអានអំពីការសន្យានៃដែនដីជាមរតកមួយ សូមកុំគ្រាន់តែគិតអំពីដែនដីដែលបានសន្យាដល់អ័ប្រាហាំឡើយ ។ សូមគិតផងដែរអំពីជោគវាសនានៃសេឡេស្ទាលនៃផែនដីដោយផ្ទាល់—មរតកដែលបានសន្យានូវសេចក្តី « ស្លូតត្រង់ » អ្នកដែល « រង់ចាំព្រះយេហូវ៉ា » ( ម៉ាថាយ ៥:៥; ទំនុកដំកើង ៣៧:៩, ១១ ) ។ ហើយនៅពេលបងប្អូនអានអំពីសេចក្តីសន្យាដែលរាស្រ្តនៃសេចក្តីសញ្ញានៃព្រះនឹងទទួលបានពរ « គ្រួសារនៅលើផែនដី » ( អ័ប្រាហាំ ២:១១ ) កុំគិតតែពីការងារបម្រើរបស់អ័ប្រាហាំ ឬព្យាការីដែលជាកូនចៅរបស់លោកឡើយ ។ សូមគិតផងដែរអំពីអ្វីដែលបងប្អូនអាចធ្វើ—ក្នុងនាមជាអ្នកដើរតាមសេចក្តីសញ្ញានៃព្រះយេស៊ូវគ្រីស្ទ—ដើម្បីធ្វើជាពរជ័យដល់ក្រុមគ្រួសារទាំងឡាយដែលនៅជុំវិញបងប្អូន ។