« ថ្ងៃទី២–៨ ខែកុម្ភៈ ‹ ព្រះអម្ចាស់ទ្រង់បានហៅរាស្ត្រទ្រង់ថា ស៊ីយ៉ូន › ៖ ម៉ូសេ ៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី២–៨ ខែកុម្ភៈ ‹ ព្រះអម្ចាស់ទ្រង់បានហៅរាស្ត្រទ្រង់ថា ស៊ីយ៉ូន › » ចូរមកតាមខ្ញុំ ៖ ឆ្នាំ២០២៦
Enoch Sees the Meridian of Time [ ហេណុកមើលឃើញកាលដ៏ខ្ពង់ខ្ពស់បំផុត ] ដោយ ជេនីហ្វឺ ផេហ្គីត
ថ្ងៃទី២–៨ ខែកុម្ភៈ ៖ « ព្រះអម្ចាស់ទ្រង់បានហៅរាស្ត្រទ្រង់ថា ស៊ីយ៉ូន »
ម៉ូសេ ៧
នៅក្នុងប្រវត្តិសាស្រ្ត មនុស្សបានព្យាយាមសម្រេចនូវអ្វីដែលហេណុក និងប្រជាជនរបស់លោកបានសម្រេច ៖ បង្កើតសង្គមល្អមួយដែលគ្មានភាពក្រីក្រ ឬ អំពើហិង្សា ។ ក្នុងនាមជារាស្រ្តរបស់ព្រះ យើងសូមចែកចាយបំណងប្រាថ្នានេះ ។ យើងហៅវាថា ការស្ថាបនាស៊ីយ៉ូន ហើយវារួមទាំង—ការថែរក្សាជនខ្វះខាត និងលើកកម្ពស់សេចក្តីសុខសាន្ត—ការចុះសេចក្តីសញ្ញា រស់នៅជាមួយគ្នានៅក្នុងសេចក្តីសុចរិត ហើយមានសាមគ្គីភាពជាមួយគ្នា និងជាមួយព្រះយេស៊ូវ គ្រីស្ទ « ស្តេចនៃស៊ីយ៉ូន » ( ម៉ូសេ ៧:៥៣ ) ។ ប្រសិនបើពិភពលោក សហគមន៍របស់បងប្អូន ឬគ្រួសាររបស់បងប្អូនមិនសូវបានដូចអ្វីដែលបងប្អូនចង់បាន វាមានប្រយោជន៍ក្នុងការសួរថា តើហេណុក និងប្រជាជនរបស់លោកបានធ្វើវាដោយរបៀបណា ? តើពួកគេក្លាយជា « មានចិត្តតែមួយ និងគំនិតតែមួយ » ( ម៉ូសេ ៧:១៨ ) យ៉ាងដូចម្ដេច ថ្វីបើមានទាស់ទែងគ្នានៅជុំវិញពួកគេក៏ដោយ ? នៅក្នុងចំណោមរឿងលម្អិតជាច្រើនដែល ម៉ូសេ ៧ ផ្ដល់ឲ្យយើងនូវព័ត៌មានអំពីក្រុងស៊ីយ៉ូន នោះរឿងដ៏មានតម្លៃជាក់លាក់មួយសម្រាប់ពួកបរិសុទ្ធថ្ងៃចុងក្រោយអាចជារឿងដូចតទៅនេះ ៖ ក្រុងស៊ីយ៉ូនមិនគ្រាន់តែជាទីក្រុងមួយប៉ុណ្ណោះទេ—វាមាននូវលក្ខខណ្ឌនៃដួងចិត្ត និងស្មារតី ។ ដូចដែលព្រះអម្ចាស់បានបង្រៀន នោះក្រុងស៊ីយ៉ូនគឺ « ជាអ្នកដែលមានចិត្តល្អសុទ្ធសាធ » ( គោលលទ្ធិ និងសេចក្ដីសញ្ញា ៩៧:២១ ) ។ ដូច្នេះប្រហែលជារបៀបដ៏ល្អបំផុតដើម្បីសង់ក្រុងស៊ីយ៉ូនគឺត្រូវចាប់ផ្ដើមនៅក្នុងដួងចិត្ត និងគេហដ្ឋានរបស់យើងផ្ទាល់ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
ខ្ញុំអាចជួយស្ថាបនាស៊ីយ៉ូន ។
នៅពេលព្យាការី យ៉ូសែប ស្ម៊ីធ បានរៀនអំពីហេណុក និងទីក្រុងនៃភាពបរិសុទ្ធរបស់លោកជាលើកដំបូង លោកត្រូវបានបំផុសគំនិត ។ លោក « បានដឹងថាថ្ងៃនោះនឹងមកដល់ នៅពេលព្រះអម្ចាស់នឹងបង្កើតស៊ីយ៉ូននៅលើផែនដីជាថ្មីម្តងទៀត » ( Saints ១:១០៨–១០៩ ) ហើយលោកបានចាប់ផ្ដើមស្វែងរកពេញមួយជីវិតដើម្បីស្ថាបនាស៊ីយ៉ូន ។ ការអាន ម៉ូសេ ៧ អាចបំផុសគំនិតបងប្អូនឲ្យបន្តកិច្ចខិតខំនោះនៅសព្វថ្ងៃនេះ ។
បងប្អូនអាចចាប់ផ្ដើមដោយការស្រាវជ្រាវសំណួរនេះ « តើស៊ីយ៉ូនជាអ្វី ? » និង « តើវាខុសពីពិភពលោកដទៃទៀតដោយរបៀបណា ? » សូមពិចារណារាយបញ្ជីចម្លើយដែលបងប្អូននឹកឃើញ នៅពេលបងប្អូនសិក្សា ម៉ូសេ ៧ ជាពិសេសនៅក្នុង ខទី ១៦–២១, ២៧, ៥៣, ៦២–៦៩ ។
ចម្លើយរបស់បងប្អូនចំពោះសំណួរទាំងនេះអាចបញ្ជាក់យ៉ាងច្បាស់ថា យើងនៅតែមានការងារជាច្រើនដែលត្រូវធ្វើដើម្បីស្ថាបនាស៊ីយ៉ូន ។ ដូច្នេះតើយើងធ្វើវាយ៉ាងដូចម្តេចទៅ ? វាអាចជួយឲ្យគិតអំពីពេលវេលាដែលបងប្អូនមានអារម្មណ៍ថាបងប្អូនធ្លាប់ « មានចិត្តតែមួយ និងគំនិតតែមួយ » ជាមួយនរណាម្នាក់ ( ម៉ូសេ ៧:១៨ ) ។ ប្រហែលជាវាស្ថិតនៅក្នុងវួដ គ្រួសារ ឬក្រុមនៅកន្លែងធ្វើការ ឬសាលារៀន ។ តើមនុស្សបានធ្វើអ្វីខ្លះដើម្បីបង្កើតការរួបរួមដ៏សុចរិត ?
នេះគឺជាធនធានមួយចំនួនទៀតដែលបងប្អូនអាចស្វែងរកដើម្បីរុករកយោបល់ និងការបំផុសគំនិត ។ សូមជ្រើសរើសមួយ ឬច្រើនដើម្បីសិក្សា ហើយបន្ទាប់មកសរសេរនូវអ្វីដែលបងប្អូនមានអារម្មណ៍បំផុសគំនិតឲ្យធ្វើដើម្បីស្ថាបនាទីក្រុងស៊ីយ៉ូន ៖
-
ភីលីព ២:១–៤; នីហ្វៃទី៤ ១:១៥–១៨; គោលលទ្ធិ និងសេចក្តីសញ្ញា ៩៧:២១; ១០៥:៥ ។
-
អូលីសេស សូរ៉េស « បងប្អូនប្រុសស្រីនៅក្នុងព្រះគ្រីស្ទ » លីអាហូណា ខែវិច្ឆិកា ឆ្នាំ២០២៣ ទំព័រ ៧០–៧៣ ។
-
ឌី ថត គ្រីស្តូហ្វឺសិន « រួមមកតែមួយនៅក្នុងព្រះគ្រីស្ទ » លីអាហូណា ខែឧសភា ឆ្នាំ២០២៣ ទំព័រ ៧៧–៨០ ។
ព្រះមានព្រះទ័យឲ្យប្រជារាស្រ្តរបស់ទ្រង់ « មានចិត្តតែមួយ និងគំនិតតែមួយ » ( ម៉ូសេ ៧:១៨ ) ។
ព្រះយេស៊ូវគ្រីស្ទគឺជា « ស្ដេចនៃស៊ីយ៉ូន » ។
តើវាមានអត្ថន័យចំពោះបងប្អូនយ៉ាងណាដែលមានព្រះយេស៊ូវគ្រីស្ទជាស្តេចរបស់បងប្អូន ? សូមកត់ចំណាំព្រះបរមងារផ្សេងទៀតរបស់ព្រះយេស៊ូវគ្រីស្ទនៅក្នុងខគម្ពីរនេះ ។ តើការពិពណ៌នាទាំងនេះបង្រៀនបងប្អូនអ្វីខ្លះអំពីទ្រង់ ? តើបងប្អូនគិតថាវាមានន័យយ៉ាងណាក្នុងការមក « ចូលតាមទ្វារ ហើយ[ លើក ]ឡើងដោយសារ[ ទ្រង់ ] » ?
សូមមើលផងដែរ « សូមយាង ឱ ស្តេចនៃស្តេច ! » ទំនុកតម្កើង ល.រ. ២៣ ។
ព្រះទ្រង់ព្រះកន្សែង—ហើយអរសប្បាយ—ដោយសារបុត្រាបុត្រីរបស់ទ្រង់ ។
មនុស្សខ្លះយល់ថាព្រះជាអង្គដែលនៅឆ្ងាយ ហើយពុំបានទទួលរងនូវអារម្មណ៍ខាងផ្លូវចិត្តចំពោះអ្វីដែលកើតឡើងចំពោះយើងទាំងអស់គ្នានោះទេ ។ ហេណុកបានទទួលទស្សនៈផ្សេងពីព្រះនៅក្នុងការនិមិត្តដែលបានកត់ត្រានៅក្នុង ម៉ូសេ ៧ ។ តើលោកបានរៀនអ្វីខ្លះអំពីព្រះ—ហើយតើបងប្អូនរៀនអ្វីខ្លះ—នៅក្នុង ខទី ២៨–៤០ ? តើបងប្អូនគិតថា ហេតុអ្វីហេណុកភ្ញាក់ផ្អើលពេលឃើញព្រះទ្រង់ព្រះកន្សែង ? ហេតុអ្វីវាសំខាន់ចំពោះបងប្អូនដើម្បីដឹងថាព្រះទ្រង់ព្រះកន្សែង ?
នៅពេលដែលការនិមិត្តនេះបន្ត ហេណុកក៏យំដែរ ។ ប៉ុន្តែ ព្រះក៏មានបន្ទូលដល់លោកអំពីមូលហេតុដើម្បីអរសប្បាយ ។ សូមរកមើលវានៅក្នុង ម៉ូសេ ៧:៤១–៦៩ ។ តើបងប្អូនរៀនអ្វីខ្លះពីការនិមិត្តរបស់ហេណុក ដែលអាចជួយបងប្អូន « ចូរលើកចិត្តអ្នកឡើង ហើយរីករាយចុះ » ទោះជាបងប្អូនមាន « សេចក្ដីល្វីងជូរចត់ » នៅក្នុងជីវិតរបស់បងប្អូនក្តី ( ខទី ៤៤ ) ?
សូមមើល ជែហ្វ្រី អ័រ ហូឡិន « The Grandeur of God » Liahona ខែវិច្ឆិកា ឆ្នាំ២០០៣ ទំព័រ ៧០–៧៣ ។
ព្រះយេស៊ូវគ្រីស្ទនឹងយាងមកម្តងទៀតនៅថ្ងៃចុងក្រោយ ។
ការនិមិត្តរបស់ហេណុក ជាពិសេសអ្វីដែលបានកត់ត្រានៅក្នុង ម៉ូសេ ៧:៥៩–៦៧ គឺជាការព្យាករដំបូងមួយក្នុងប្រវត្តិសាស្ត្រនៃការយាងមកជាលើកទីពីររបស់ព្រះអង្គសង្គ្រោះ ។ តើអ្វីធ្វើឲ្យបងប្អូនចាប់អារម្មណ៍អំពីរបៀបដែលខគម្ពីរទាំងនេះពិពណ៌នាអំពីថ្ងៃចុងក្រោយ ? ឧទាហរណ៍ សូមពិចារណាអំពីរបៀបដែលបងប្អូនទទួលអារម្មណ៍ថាការព្យាករនៅក្នុង ខទី ៦២ ត្រូវបានបំពេញ ។ តើឃ្លាទាំងនេះបង្រៀនយើងអ្វីខ្លះអំពីកិច្ចការរបស់ព្រះនៅថ្ងៃចុងក្រោយ ?
សូមមើលផងដែរ ហែនរី ប៊ី អាវរិង « Sisters in Zion » Liahona ខែវិច្ឆិកា ឆ្នាំ២០២០ ទំព័រ ៦៧–៦៩ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ព្រះចង់ឲ្យយើង « មានចិត្តតែមួយ និងគំនិតតែមួយ » ។
-
ដើម្បីជួយកូនៗរបស់បងប្អូនរៀនអំពីហេណុក និងស៊ីយ៉ូន បងប្អូនអាចប្រើ « ហេណុកជាព្យាការី » នៅក្នុង ដំណើររឿងព្រះគម្ពីរសញ្ញាចាស់ ( ទំព័រ ១៩–២១ ) ឬឃ្លាទីពីរនៃបទ « ធ្វើតាមព្យាការី » ( សៀវភៅចម្រៀងកុមារ ទំព័រ ៥៨–៥៩ ) ។ បន្ទាប់មក បងប្អូនអាចសុំឲ្យកូនៗរបស់បងប្អូនជួយបងប្អូនប្រាប់ដំណើររឿងនេះឡើងវិញតាមពាក្យពេចន៍របស់ពួកគេផ្ទាល់ ។ រូបភាពរបស់ហេណុកនៅក្នុងគម្រោងនេះអាចជួយបាន ។
-
នេះគឺជារបៀបមួយដើម្បីជួយកូនៗរបស់បងប្អូនយល់ពីអត្ថន័យនៃ « មានចិត្តតែមួយ និងគំនិតតែមួយ » ( ម៉ូសេ ៧:១៨ ) ៖ សូមធ្វើរូបបេះដូងក្រដាស និងកាត់វាជាបំណែកៗ ឲ្យបានគ្រប់គ្រាន់សម្រាប់កុមារម្នាក់ៗមានចំណែកមួយនៃរូបបេះដូងនោះ ។ សូមអនុញ្ញាតឲ្យពួកគេសរសេរឈ្មោះរបស់ពួកគេនៅលើបំណែករបស់ពួកគេ ហើយធ្វើការរួមគ្នាដើម្បីផ្គុំបេះដូងជាមួយគ្នាវិញ ។ នៅពេលបងប្អូនធ្វើដូច្នេះ នោះបងប្អូនអាចនិយាយអំពីអ្វីៗដែលបងប្អូនចូលចិត្តអំពីកូនម្នាក់ៗ ។
-
សូមជួយកូនៗរបស់បងប្អូនរាប់ថាតើពាក្យស៊ីយ៉ូនមានចំនួនប៉ុន្មានដងដែលបានលេចឡើងនៅក្នុង ម៉ូសេ ៧:១៨–២១, ៦២–៦៣, ៦៨–៦៩ ។ រាល់ពេលដែលពួកគេស្វែងរកពាក្យនេះ សូមជួយពួកគេរកឃើញនូវអ្វីដែលខគម្ពីរនិយាយអំពីស៊ីយ៉ូន ( សូមមើលផងដែរ សេចក្តីណែនាំដល់បទគម្ពីរទាំងឡាយ « ស៊ីយ៉ូន » នៅលើបណ្ណាល័យដំណឹងល្អ ) ។ តើយើងអាចប្រែក្លាយកាន់តែដូចជាប្រជាជនដែលបានពិពណ៌នានៅក្នុងខគម្ពីរទាំងនេះយ៉ាងដូចម្ដេច ?
សូមលើកទឹកចិត្តឲ្យមានការសិក្សាព្រះគម្ពីរផ្ទាល់ខ្លួន ។ មិនថាបងប្អូនកំពុងបង្រៀនគ្រួសាររបស់បងប្អូននៅផ្ទះ ឬថ្នាក់រៀននៅថ្ងៃអាទិត្យនោះទេ របៀបដ៏ល្អបំផុតមួយដែលបងប្អូនអាចជួយអ្នកដទៃឲ្យស្ថាបនាសេចក្តីជំនឿដ៏យូរអង្វែងលើព្រះយេស៊ូវគ្រីស្ទ គឺដើម្បីជួយពួកគេបង្កើតទម្លាប់ស្វែងរកបទពិសោធន៍ផ្ទាល់ខ្លួនជាមួយព្រះគម្ពីរ ។ សូមចែកចាយបទពិសោធន៍ដែលបងប្អូនកំពុងមានពីបទគម្ពីរ ហើយលើកទឹកចិត្តគ្រួសារ ឬសមាជិកក្នុងថ្នាក់ឲ្យចែកចាយបទពិសោធន៍របស់ពួកគេ ។ នៅពេលយើងឮអំពីរបៀបដែលការអានព្រះគម្ពីរផ្តល់ពរជ័យដល់អ្នកដទៃ នោះយើងជារឿយៗត្រូវបានបំផុសគំនិតឲ្យស្វែងរកពរជ័យដូចគ្នានេះពីព្រះអម្ចាស់ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។
ព្រះវរបិតាសួគ៌ចង់ឲ្យខ្ញុំជ្រើសរើសដើម្បីធ្វើតាមទ្រង់ ។
-
ដើម្បីណែនាំ ម៉ូសេ ៧:៣២–៣៣ ដល់កូនៗរបស់បងប្អូន នោះបងប្អូនអាចនិយាយជាមួយពួកគេអំពីជម្រើសដែលពួកគេត្រូវធ្វើនាពេលថ្មីៗនេះ ។ បន្ទាប់មក បងប្អូនអាចអានខគម្ពីរជាមួយគ្នា ដើម្បីរកមើលអ្វីដែលព្រះវរបិតាសួគ៌សព្វព្រះទ័យឲ្យយើងជ្រើសរើស ។ តើយើងអាចជ្រើសរើសអ្វីខ្លះដើម្បីបង្ហាញថាយើងជ្រើសរើសទ្រង់ ? ប្រហែលជាកូនៗរបស់បងប្អូនអាចប្តូរវេនគ្នាធ្វើសកម្មភាពមួយក្នុងចំណោមជម្រើសទាំងនេះ ខណៈពេលដែលបងប្អូនផ្សេងទៀតទស្សទាយថា សកម្មភាពនោះតំណាងឲ្យអ្វី ។
ព្រះយេស៊ូវនឹងយាងមកផែនដី ។
-
នៅក្នុង ម៉ូសេ ៧:៥៩ ហេណុកបានទូលសួរសំណួរមួយទៅព្រះអម្ចាស់ ។ សូមអញ្ជើញកូនៗរបស់បងប្អូនឲ្យរកសំណួរនោះ ហើយបន្ទាប់មកសុំពួកគេឲ្យស្វែងរកចម្លើយនៅក្នុង ខទី ៦០ ។ បងប្អូនក៏អាចនិយាយជាមួយពួកគេអំពីពេលវេលាដែលពួកគេកំពុងរំពឹងថា នរណាម្នាក់នឹងត្រឡប់មកផ្ទះវិញផងដែរ ។ សូមសួរពួកគេពីរបៀបដែលពួកគេទទួលអារម្មណ៍ និងអ្វីដែលពួកគេបានធ្វើដើម្បីត្រៀមខ្លួន ។ តើយើងអាចត្រៀមខ្លួនយ៉ាងដូចម្ដេចសម្រាប់ពេលព្រះយេស៊ូវយាងត្រឡប់មកវិញ ?
-
សូមបង្ហាញរូបភាពនៃគ្រាដែលព្រះអង្គសង្គ្រោះលេចមកឯប្រជាជន ( សូមមើល សៀវភៅរូបភាពដំណឹងល្អ លេខ ៦០, ៨២, ៨៣ និង ៨៤ ) ។ តើនៅក្នុងរូបភាពនេះប្រជាជនកំពុងធ្វើអ្វី ? តើមនុស្សទាំងនេះបានមានអារម្មណ៍ដូចម្តេច នៅពេលដែលពួកគេបានជួបព្រះយេស៊ូវ ? បងប្អូនក៏អាចច្រៀងអំពីការយាងមកជាលើកទីពីររបស់ព្រះអង្គសង្រ្គោះ ដូចជាបទ « ពេលទ្រង់យាងមកម្តងទៀត » ( សៀវភៅចម្រៀងកុមារ ទំព័រ ៤៦–៤៧ ) ហើយសួរកុមារអំពីអ្វីដែលពួកគេគិត នៅពេលដែលព្រះយេស៊ូវ យាងមកម្តងទៀត ។ សូមអញ្ជើញឲ្យកុមារចែកចាយតើពួកគេមានអារម្មណ៍យ៉ាងណា ពេលឃើញព្រះយេស៊ូវយាងមកជាថ្មីម្តងទៀត ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។