« ថ្ងៃទី២៦ ខែមករា–ថ្ងៃទី១ ខែកុម្ភៈ ‹ បង្រៀនការណ៍ទាំងនេះដោយសេរីដល់កូនចៅអ្នក › ៖ លោកុប្បត្តិ ៥; ម៉ូសេ ៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី២៦ ខែមករា–ថ្ងៃទី១ ខែកុម្ភៈ ‹ បង្រៀនការណ៍ទាំងនេះដោយសេរីដល់កូនចៅអ្នក › » ចូរមកតាមខ្ញុំ ៖ ឆ្នាំ២០២៦
Better Than Paradise [ ប្រសើរជាង ស្ថានបរមសុខ ] ដោយ ឃេនឌែល រ៉េ ចនសុន
ថ្ងៃទី២៦ ខែមករា–ថ្ងៃទី១ ខែកុម្ភៈ ៖ « បង្រៀនការណ៍ទាំងនេះដោយសេរីដល់កូនចៅអ្នក »
លោកុប្បត្តិ ៥; ម៉ូសេ ៦
ភាគច្រើន លោកុប្បត្តិ ៥ គឺជាបញ្ជីជំនាន់រវាងលោកអ័ដាម និងនាងអេវ៉ា ហើយនឹង ណូអេ ។ យើងអានឈ្មោះជាច្រើន ប៉ុន្តែយើងពុំបានរៀនច្រើនអំពីពួកគាត់ឡើយ ។ បន្ទាប់មកយើងអានឃ្លាដែលគួរឲ្យចាប់អារម្មណ៍ ប៉ុន្តែមិនបានពន្យល់ ៖ « ហេណុកគាត់ជាអ្នកដើរជាមួយនឹងព្រះនោះគាត់មិននៅទៀតទេ ពីព្រោះព្រះទ្រង់បានទទួលយកគាត់ទៅ » ( លោកុប្បត្តិ ៥:២៤ ) ។ ប្រាកដណាស់មានដំណើររឿងមួយនៅខាងក្រោយខគម្ពីរនោះ ! ប៉ុន្តែ ដោយគ្មានការពន្យល់តទៅទៀត ហើយបញ្ជីជំនាន់ទាំងឡាយក៏បន្តទៅទៀត ។
អរគុណ ម៉ូសេ ៦ ដែលបង្ហាញដំណើររឿងលម្អិតរបស់ហេណុក—ហើយវាជារឿងដ៏អស្ចារ្យ ។ យើងរៀនអំពីការបន្ទាបខ្លួនរបស់ហេណុក ភាពមិនប្រាកដប្រជារបស់គាត់ និងសក្តានុពលដែលព្រះទតឃើញនៅក្នុងគាត់ និងកិច្ចការដ៏អស្ចារ្យដែលគាត់បានធ្វើក្នុងនាមជាព្យាការីរបស់ព្រះ ។ យើងក៏បានដឹងច្បាស់ជាងមុនពីក្រុមគ្រួសាររបស់លោកអ័ដាម និងនាងអេវ៉ា កាលដែលវារីកលូតលាស់ទៅជាច្រើនជំនាន់ ។ យើងអានអំពី « អំណាចត្រួតត្រាដ៏ធំ » របស់សាតាំង ប៉ុន្តែក៏អំពីឪពុកម្តាយដែលបង្រៀនកូនចៅ « តាមផ្លូវទាំងឡាយនៃព្រះ » ( ម៉ូសេ ៦:១៥, ២១ ) ។ អ្វីដែលមានតម្លៃជាពិសេសគឺជាអ្វីដែលយើងរៀនអំពីគោលលទ្ធិដែលឪពុកម្តាយទាំងនេះបានបង្រៀន ៖ សេចក្តីជំនឿ ការប្រែចិត្ត ពិធីបុណ្យជ្រមុជទឹក និងការទទួលព្រះវិញ្ញាណបរិសុទ្ធ ( សូមមើល ម៉ូសេ ៦:៥០–៥២ ) ។ គោលលទ្ធិនោះ ដូចជាបព្វជិតភាពដែលអមជាមួយវា « ដែលមានតាំងពីដើមដំបូងមក នោះ[ និង ]ក៏ត្រូវមានរហូតដល់ចុងបំផុតលោកិយដែរ » ( ម៉ូសេ ៦:៧ ) ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
អំពើបាបដាក់ដែនកំណត់សមត្ថភាពរបស់ខ្ញុំក្នុងការមើលឃើញ ទទួលអារម្មណ៍ និងស្តាប់រឿងរបស់ព្រះ ។
នៅពេលបងប្អូនសិក្សា ម៉ូសេ ៦:២៦–៣៦ តើបងប្អូនរៀនអ្វីខ្លះអំពីឥទ្ធិពលនៃអំពើបាប ? តើបងប្អូនបានឃើញឥទ្ធិពលនេះដោយរបៀបណា ? តើហេណុកមានគុណលក្ខណៈអ្វីខ្លះដែលបានជួយលោកយកឈ្នះលើឥទ្ធិពលទាំងនេះ ? តើជាលទ្ធផល ព្រះប្រទានពរដល់លោកដោយរបៀបណា ?
ព្រះបានហៅខ្ញុំឲ្យធ្វើកិច្ចការនេះ ទោះជាខ្ញុំមានភាពទន់ខ្សោយក្តី ។
ប្រសិនបើបងប្អូនធ្លាប់មានអារម្មណ៍លើសលប់នឹងអ្វីដែលព្រះអម្ចាស់បានហៅបងប្អូនឲ្យធ្វើ នោះបងប្អូនមិននៅម្នាក់ឯងទេ ។ សូម្បីតែហេណុក ក៏មានអារម្មណ៍ដូច្នោះដែរ នៅពេលព្រះអម្ចាស់បានហៅគាត់ឲ្យធ្វើជាព្យាការី ។ កាលបងប្អូនអាន ម៉ូសេ ៦:២៦–៣៦ សូមរកមើលពីមូលហេតុដែលហេណុក បានមានអារម្មណ៍ភ័យខ្លាច និងអ្វីដែលព្រះអម្ចាស់បានមានបន្ទូលដើម្បីផ្តល់នូវការលើកទឹកចិត្តដល់គាត់ ។
នៅក្នុង ខទី ៣៧–៤៧ បងប្អូនអាចរកមើលរបៀបដែលព្រះអម្ចាស់បានគាំទ្រហេណុក ហើយធ្វើឲ្យលោកមានសមត្ថភាពដើម្បីធ្វើកិច្ចការរបស់ទ្រង់ ( សូមមើលផងដែរ ម៉ូសេ ៧:១៣ ) ។ បងប្អូនអាចប្រៀបធៀបបទពិសោធន៍របស់ហេណុកទៅនឹងពួកព្យាការីផ្សេងទៀតដែលមានអារម្មណ៍ថាខ្វះសមត្ថភាព ដូចជាម៉ូសេ ( សូមមើល និក្ខមនំ ៤:១០–១៦ ) យេរេមា ( សូមមើល យេរេមា ១:៤–១០ ) នីហ្វៃ ( សូមមើល នីហ្វៃទី២ ៣៣:១–៤ ) និងមរ៉ូណៃ ( សូមមើល អេធើរ ១២:២៣–២៩ ) ។ តើបងប្អូនមានអារម្មណ៍ថា ព្រះមានព្រះទ័យចង់ឲ្យបងប្អូនរៀនអ្វីខ្លះចេញពីខគម្ពីរទាំងនេះអំពីកិច្ចការដែលទ្រង់បានប្រទានឲ្យបងប្អូនធ្វើ ?
A Seer Hath the Lord Raised Up (Moses 6:36) [ អ្នកមើលឆុតដែលព្រះអម្ចាស់បានប្រោសឡើង ] ដោយ អ៊ីវ៉ា ធីម៉ូធី
ពួកសាវក និងព្យាការីសម័យទំនើបជាច្រើនបានបង្ហាញពីអារម្មណ៍ដែលស្រដៀងគ្នានឹងការពិពណ៌នារបស់អេណុកដែរ នៅពេលពួកលោកបានពិពណ៌នាពីអារម្មណ៍ខ្លួនលោក ពេលទទួលបានការហៅរបស់ពួកលោក ។ ឧទាហរណ៍ សូមមើលទីបន្ទាល់របស់អែលឌើរ អូលីសេស សូរ៉េស នៅក្នុង « Prophets Speak by the Power of the Holy Spirit » ( Liahona ខែឧសភា ឆ្នាំ២០១៨ ទំព័រ ៩៨–៩៩ ) ។
តើបងប្អូនអាចរៀនអ្វីខ្លះពីព្យាការី និងសាវកទាំងនេះ អំពីអារម្មណ៍នៃការខ្វះសមត្ថភាពរបស់បងប្អូន ? តើនៅពេលណាដែលបងប្អូនមានអារម្មណ៍ថាព្រះអង្គសង្គ្រោះបានជួយបងប្អូន នៅពេលទ្រង់បានបង្គាប់ឲ្យបងប្អូនធ្វើកិច្ចការលំបាក ? សូមពិចារណាសរសេរបទពិសោធន៍ពីរបីនៅក្នុងពេលអនាគតរបស់បងប្អូន នៅពេលបងប្អូននឹងត្រូវពឹងផ្អែកលើជំនួយរបស់ព្រះអង្គសង្គ្រោះ ។ តើបងប្អូនអាចចូលទៅកាន់ព្រឹត្តិការណ៍ទាំងនេះដោយក្តីជំនឿនៅលើព្រះយេស៊ូវគ្រីស្ទដោយរបៀបណា ?
សូមមើលផងដែរ ដេវីឌ អេ បែដណា « នៅក្នុងយើង ហើយយើងក្នុងអ្នក ហេតុដូច្នេះហើយ ចូរដើរជាមួយនឹងយើងចុះ » លីអាហូណា ខែឧសភា ឆ្នាំ២០២៣ ទំព័រ ១២៣–១២៥ « ខ្ញុំនឹងទៅដែលទ្រង់ឲ្យខ្ញុំទៅ » ទំនុកតម្កើង ល.រ. ១៦៨ ។
ដំណឹងល្អនៃព្រះយេស៊ូវគ្រីស្ទត្រូវបានបង្រៀនតាំងពីដើមដំបូងមក ។
ដោយសារយើងមានគម្ពីរម៉ូសេ យើងដឹងថា ព្រះបានបង្រៀនបុត្រាបុត្រីរបស់ទ្រង់ពីរបៀបដើម្បីស្វែងរកការប្រោសលោះចាប់តាំងពីលោកអ័ដាម និងនាងអេវ៉ាមកម្ល៉េះ ។ នៅពេលបងប្អូនសិក្សា ម៉ូសេ ៦:៤៨–៦៨ ស្វែងរកអ្វីដែលបងប្អូនត្រូវតែដឹង និងធ្វើដើម្បីបានការប្រោសលោះ ។ សូមកត់សម្គាល់សំណួររបស់លោកអ័ដាមនៅក្នុង ខទី ៥៣ ។ តើបងប្អូនធ្លាប់ឆ្ងល់ពីការណ៍នោះដែរឬទេ ? តើបងប្អូនរៀនអ្វីខ្លះមកពីបទពិសោធន៍របស់ព្រះអម្ចាស់នៅក្នុង ខទី ៥៣–៦៥ អ្វីខ្លះ ? បងប្អូនអាចនឹងគិតអំពីខគម្ពីរទាំងនេះថាជាសារលិខិតរបស់ព្រះអម្ចាស់នៅឯកម្មវិធីពិធីបុណ្យជ្រមុជទឹករបស់លោកអ័ដាម ។ តើបងប្អូនរៀនអ្វីខ្លះអំពីពិធីបុណ្យជ្រមុជទឹចេញពីសារលិខិតរបស់ទ្រង់ ? តើបងប្អូនគិតថា ហេតុអ្វីបានជា ទ្រង់ប្រៀបធៀបពិធីបុណ្យជ្រមុជទឹកទៅនឹង ការ« កើតម្ដងទៀត » ? ( ខទី ៥៩ ) ។ តើបងប្អូនអាចធ្វើអ្វីដើម្បីបន្ត « កើតម្តងទៀត » នៅពេញមួយជីវិតរបស់បងប្អូន ?
ស្វែងរកនិមិត្តរូប ។ នៅក្នុងព្រះគម្ពីរ វត្ថុ ឬព្រឹត្តិការណ៍ជាញឹកញាប់អាចតំណាង ឬជានិមិត្តរូបនៃសេចក្តីពិតខាងវិញ្ញាណ ជាពិសេសសេចក្តីពិតអំពីព្រះអង្គសង្គ្រោះ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។ និមិត្តរូបនេះអាចពង្រីកការយល់ដឹងរបស់បងប្អូនពីទ្រង់ និងគោលលទ្ធិរបស់ទ្រង់ ។ ឧទាហរណ៍ តើបងប្អូនរៀនអ្វីខ្លះពីនិមិត្តរូបនៃចិត្ត និងត្រចៀក ម៉ូសេ ៦:២៧ ភ្នែក និងដីឥដ្ឋនៅក្នុង ម៉ូសេ ៦:៣៥ ឬទឹកនៅក្នុង ម៉ូសេ ៦:៥៩–៦០ ?
« បង្រៀនការណ៍ទាំងនេះដោយសេរីដល់កូនចៅអ្នក » ។
បន្ទាប់ពីបានបង្រៀនលោកអ័ដាមនូវសេចក្តីពិតនៃដំណឹងល្អនៃព្រះយេស៊ូវគ្រីស្ទហើយ នៅក្នុង ម៉ូសេ ៦:៥១–៦៣ ព្រះអម្ចាស់បានប្រាប់លោកអ័ដាមឲ្យបង្រៀនពួកគេដល់ជំនាន់នៅពេលអនាគត ។ សូមពិចារណាបង្កើតបញ្ជីនៃសេចក្តីពិតទាំងនេះ ។ ( វាអាចជាជំនួយដើម្បីបែងចែកវគ្គបទគម្ពីរជាក្រុមតូចៗនៃខគម្ពីរដូចជា ខទី ៥១–៥២, ៥៣–៥៧, ៥៨–៦០, ៦១–៦៣ ) ។ ហេតុអ្វីសេចក្ដីពិតទាំងនេះមានតម្លៃចំពោះជំនាន់កំពុងពេញវ័យនាសព្វថ្ងៃនេះ ? តើបងប្អូនអាចរៀនអ្វីខ្លះទៀតមកពីការណែនាំរបស់ព្រះអម្ចាស់ដល់ឪពុកម្ដាយនៅក្នុង ម៉ូសាយ ៤:១៤–១៥ និង គោលលទ្ធិ និងសេចក្ដីសញ្ញា ៦៨:២៥–២៨; ៩៣:៤០–៥០ ?
សូមអានអំពី « សៀវភៅរំឭក » ដែលក្រុមគ្រួសាររបស់លោកអ័ដាម និងនាងអេវ៉ាបានរក្សាទុក ដែលអាចបំផុសដល់បងប្អូន ឬក្រុមគ្រួសាររបស់បងប្អូនឲ្យធ្វើសៀវភៅរំឭករបស់បងប្អូនផ្ទាល់ ។ តើបងប្អូនមានអារម្មណ៍ថាព្រះអម្ចាស់ចង់ឲ្យបងប្អូនរួមបញ្ចូលអ្វីខ្លះ ? សូមពិចារណាដើម្បីរក្សាព័ត៌មានចេញពីសៀវភៅរំឭករបស់បងប្អូននៅលើគេហទំព័រ FamilySearch.org ។
សូមមើលផងដែរ ឌៀថើរ អេហ្វ អុជដូហ្វ « ព្រះយេស៊ូវគ្រីស្ទគឺជាកម្លាំងរបស់ឪពុកម្ដាយ » លីអាហូណា ខែឧសភា ឆ្នាំ២០២៣ ទំព័រ ៥៥–៥៩ « Parenting: Touching the Hearts of Our Youth », « But Why? » ( វីដេអូ ) នៅលើបណ្ណាល័យដំណឹងល្អ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ព្រះអាចជួយខ្ញុំឲ្យធ្វើកិច្ចការពិបាកៗបាន ។
-
ពេល ហេណុក ត្រូវបានហៅឲ្យផ្សាយដំណឹងល្អលោកព្រួយបារម្ភថាលោកនឹងត្រូវបរាជ័យ ។ ប៉ុន្តែព្រះបានជួយគាត់ » ។ សូមអានជាមួយគ្នានូវដំណើររឿងនេះនៅក្នុង ម៉ូសេ ៦:២៦–៣៤ ( សូមមើលផងដែរ « ហេណុកជាព្យាការី » នៅក្នុង ដំណើររឿងព្រះគម្ពីរសញ្ញាចាស់ ទំព័រ ១៩–២១ ) ។ ហេតុអ្វីបានជាហេណុក មានអារម្មណ៍ថា គាត់មិនអាចផ្សាយដំណឹងល្អបាន ? ( សូមមើល ម៉ូសេ ៦:៣១ ) ។ តើព្រះបានជួយហេណុកយ៉ាងដូចម្តេចខ្លះ ? ( សូមមើល ម៉ូសេ ៦:៣២–៣៤; ៧:១៣ ) ។
-
កូនៗរបស់បងប្អូនអាចរីករាយនឹងការចែកចាយ ឬធ្វើគំរូផ្សេងទៀតអំពីពេលដែលព្រះបានជួយមនុស្សឲ្យធ្វើរឿងពិបាកៗ—ឧទាហរណ៍ ណូអេ ដាវីឌ អាំម៉ូន ឬសាំយូអែលជាសាសន៍លេមិន ( សូមមើល សៀវភៅរូបភាពដំណឹងល្អ ល.រ.៧, ១៩, ៧៨, ៨១ ) ។ បងប្អូនក៏អាចចែកចាយបទពិសោធន៍ផ្ទាល់ខ្លួនរបស់បងប្អូន និងអនុញ្ញាតឲ្យកូនៗរបស់បងប្អូននិយាយអំពីរបៀបដែលព្រះជួយពួកគេធ្វើរឿងលំបាកៗ ។
សេចក្តីជំនឿលើព្រះគ្រីស្ទ ការប្រែចិត្តពិធីបុណ្យជ្រមុជទឹក និងពិធីទទួលព្រះវិញ្ញាណបរិសុទ្ធបានរៀបចំឲ្យខ្ញុំត្រឡប់ទៅជួបព្រះ ។
-
ព្រះបានបង្រៀនអ័ដាម អំពីអ្វីដែលយើងត្រូវធ្វើ ដើម្បីត្រឡប់ទៅជួបទ្រង់វិញ—មានសេចក្តីជំនឿលើព្រះយេស៊ូវគ្រីស្ទ ប្រែចិត្តទទួលបុណ្យជ្រមុជទឹក ហើយទទួលអំណោយទាននៃព្រះវិញ្ញាណបរិសុទ្ធ ។ សូមជួយកូនៗរបស់បងប្អូនស្វែងរកគោលការណ៍ទាំងនេះនៅក្នុង ម៉ូសេ ៦:៥២, ៥៧ ។ បន្ទាប់មក បងប្អូនអាចជួយពួកគេសរសេរសុន្ទរកថាខ្លីមួយអំពីគោលការណ៍ទាំងនេះ ។ រាល់សុន្ទរកថានីមួយៗរួមបញ្ជូលទាំងបទគម្ពីរចេញពី ម៉ូសេ ៦ នូវបទពិសោធន៍ និងទីបន្ទាល់មួយ ។ សូមឲ្យពួកគេចែកចាយសុន្ទរកថារបស់ពួកគេជាមួយគ្នាទៅវិញទៅមក ។
-
បងប្អូនក៏អាចបង្ហាញរូបភាពដែលតំណាងឲ្យគោលការណ៍ដំបូងនៃដំណឹងល្អផងដែរ ( សូមមើល មាត្រានៃសេចក្តីជំនឿទីបួន ) ។ សូមដាក់ពួកគេក្នុងជួរដែលនាំទៅរករូបភាព ដែលដឹកនាំទៅរកព្រះយេស៊ូវគ្រីស្ទ ។ នៅពេលបងប្អូនអាន ម៉ូសេ ៦:៥២ កូនៗរបស់បងប្អូនអាចឈរក្បែររូបភាពដែលត្រឹមត្រូវ នៅពេលពួកគេឮពាក្យដែលរូបភាពតំណាងឲ្យ ។
-
កូនៗរបស់បងប្អូនអាចរីករាយនឹងការច្រៀងចម្រៀងដែលបង្រៀនគោលការណ៍នៅក្នុង ម៉ូសេ ៦:៥២ ដូចជា « សេចក្ដីជំនឿ » « ពេលខ្ញុំបានជ្រមុជទឹក » និង « ព្រះវិញ្ញាណបរិសុទ្ធ » ( សៀវភៅចម្រៀងកុមារ ទំព័រ ៥០–៥១, ៥៣, ៥៦ ) ។ សូមជួយពួកគេស្វែងរកគោលការណ៍ទាំងនេះនៅក្នុង ម៉ូសេ ៦:៥២ ។
ព្រះវរបិតាសួគ៌ចង់ឲ្យឪពុកម្តាយបង្រៀនដល់កូនៗរបស់ខ្លួន ។
-
ដើម្បីលើកទឹកចិត្តកូនៗរបស់បងប្អូនឲ្យគាំទ្រឪពុកម្តាយរបស់ពួកគេក្នុងតួនាទីរបស់ពួកគេជាគ្រូបង្រៀនដំណឹងល្អ សូមពិចារណាសុំឲ្យកុមារម្នាក់អាន ម៉ូសេ ៦:៥៨ ហើយស្វែងរកបទបញ្ញត្តិដែលព្រះប្រទានឲ្យឪពុកម្តាយ ។ បន្ទាប់មក បងប្អូនអាចបង្ហាញរូបភាពរបស់លោកអ័ដាម និងនាងអេវ៉ាបង្រៀនកូនៗរបស់ពួកលោក ( ដូចជារូបភាពនៅចុងបញ្ចប់នៃគម្រោងនេះ ) ហើយឲ្យកូនៗរបស់បងប្អូននិយាយអំពីអ្វីដែលពួកគេឃើញនៅក្នុងរូបភាពនោះ ។ កូនរបស់បងប្អូនអាចគូររូបភាពគ្រួសាររបស់ពួកគេ អានព្រះគម្ពីរជាមួយគ្នា អធិស្ឋានជាមួយគ្នា ឬលេងជាមួយគ្នា ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។