« ថ្ងៃទី១៩–២៥ ខែមករា ការធ្លាក់នៃលោកអ័ដាម និងនាងអេវ៉ា ៖ លោកុប្បត្តិ ៣–៤; ម៉ូសេ ៤–៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី១៩–២៥ ខែមករា ការធ្លាក់នៃលោកអ័ដាម និងនាងអេវ៉ា » ចូរមកតាមខ្ញុំ ៖ ឆ្នាំ២០២៦
លោកអ័ដាម និងនាងអេវ៉ា [ Adam and Eve ] ដោយ ដូក្លាស អិម ហ្វ្រាយ័រ
ថ្ងៃទី១៩–២៥ ៖ ការធ្លាក់នៃលោកអ័ដាម និងនាងអេវ៉ា
លោកុប្បត្តិ ៣–៤; ម៉ូសេ ៤–៥
ដំបូង ដំណើររឿងនៃការធ្លាក់របស់លោកអ័ដាម និងនាងអេវ៉ា អាចហាក់ដូចជាព្រឹត្តិការណ៍ដ៏សោកសៅមួយ ។ លោកអ័ដាម និងនាងអេវ៉ា ត្រូវបានបណ្តេញចេញពីសួនច្បារអេដែនដ៏ស្រស់ស្អាត ។ ពួកគេត្រូវបានបញ្ជូនទៅក្នុងពិភពលោកនៃការឈឺចាប់ ទុក្ខសោក និងសេចក្តីស្លាប់ ( សូមមើល លោកុប្បត្តិ ៣:១៦–១៩ ) ។ ហើយពួកគេត្រូវបានបំបែកចេញពីព្រះវរបិតាសួគ៌របស់ពួកគេ ។ ប៉ុន្តែសេចក្តីពិតដែលបានស្ដារឡើងវិញតាមរយៈព្យាការី យ៉ូសែប ស្ម៊ីធ នៅក្នុងគម្ពីរម៉ូសេ ផ្ដល់ឲ្យយើងនូវទស្សនវិស័យពិសេសមួយអំពីការធ្លាក់ ។
ពិតណាស់ សួនច្បារអេដែនគឺស្រស់ស្អាត ។ ប៉ុន្តែលោកអ័ដាម និងនាងអេវ៉ា ត្រូវការលើសពីភាពស្រស់ស្អាតនៅជុំវិញនោះ ។ ពួកលោកត្រូវការ—ហើយយើងត្រូវការ—ឱកាសដើម្បីរីកចម្រើន ។ ការចាកចេញពីសួនច្បារអេដែនគឺជាជំហានដំបូងដ៏ចាំបាច់ឆ្ពោះទៅកាន់ការត្រឡប់ទៅរកព្រះវិញ ហើយនៅទីបំផុតបានប្រែក្លាយដូចជាទ្រង់ ។ នោះមានន័យថា ការប្រឈមមុខនឹងការផ្ទុយទាំងឡាយ ការធ្វើការជ្រើសរើស ការធ្វើខុស ការរៀនប្រែចិត្ត និងការទុកចិត្តទៅលើព្រះអង្គសង្រ្គោះ ដែលដង្វាយធួនរបស់ទ្រង់ធ្វើឲ្យមានការវិវត្ត និង « សេចក្តីអំណរអំពីសេចក្តីប្រោសលោះរបស់យើង » ( ម៉ូសេ ៥:១១ ) ។ ដូច្នេះ នៅពេលបងប្អូនអានអំពីការធ្លាក់របស់លោកអ័ដាម និងនាងអេវ៉ា សូមកុំផ្ដោតទៅលើព្រឹត្តិការណ៍ដ៏សោកសៅនេះ ប៉ុន្តែ សូមផ្ដោតទៅលើឱកាសទាំងឡាយ—គឺមិនមែនផ្ដោតតែទៅលើស្ថានសួគ៌ដែលលោកអ័ដាម និងនាងអេវ៉ាបានបាត់បង់នោះទេ ប៉ុន្តែគឺផ្ដោតទៅលើសិរីរុងរឿងដែលការជ្រើសរើសរបស់ពួកលោកក៏អនុញ្ញាតឲ្យយើងអាចទទួលបានផងដែរ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
លោកុប្បត្តិ ៣; ម៉ូសេ ៤
ការធ្លាក់គឺជាផ្នែកមួយនៃផែនការរបស់ព្រះ ។
វាជាការពិតដែលការជ្រើសរើសរបស់លោកអ័ដាម និងនាងអេវ៉ានាំទៅរកការលំបាកជាច្រើនដែលយើងជួបប្រទះនៅក្នុងជីវិតរមែងស្លាប់ ។ ប៉ុន្តែនោះមិនមានន័យថាយើងសោកស្ដាយចំពោះជម្រើសរបស់ពួកគេទេ ។ នៅពេលបងប្អូនអាន លោកុប្បត្តិ ៣ និង ម៉ូសេ ៤ បងប្អូនអាចសួរខ្លួនបងប្អូនថា ហេតុអ្វីបានជាការធ្លាក់មានសារៈសំខាន់ចំពោះផែនការរបស់ព្រះ ?
ស្របតាម ម៉ូសេ ៥:៩–១២ តើលោកអ័ដាម និងនាងអេវ៉ាមានអារម្មណ៍យ៉ាងណាចំពោះការធ្លាក់ ? តើបងប្អូនអាចអនុវត្តពាក្យសម្តីរបស់ពួកលោកចំពោះបទពិសោធន៍របស់បងប្អូននៅក្នុងពិភពលោកដែលធ្លាក់នេះដោយរបៀបណា ? តើបងប្អូនបានរៀនអ្វីខ្លះចេញពី នីហ្វៃទី២ ២:១៩–២៥ ?
សូមមើលផងដែរ ម៉ូសាយ ៣:១៩; អាលម៉ា ១២:២១–៣៧ និង គោលលទ្ធិ និងសេចក្តីសញ្ញា ២៩:៣៩–៤៣ ។
Leaving Eden [ ការចាកចេញពីសួនច្បារអេដែន ] ដោយ អានី ហែនរី ណេឌើរ
លោកុប្បត្តិ ៣:១–៧; ម៉ូសេ ៤:២២–៣១; ៥:៤–១៥
ព្រះយេស៊ូវគ្រីស្ទប្រទានសេចក្តីសង្ឃឹម និងការប្រោសលោះ ។
ដំណើររឿងរបស់លោកអ័ដាម និងនាងអេវ៉ា គឺជាដំណើររឿងនៃសេចក្តីសង្ឃឹម និងការប្រោសលោះមួយតាមរយៈព្រះយេស៊ូវគ្រីស្ទ ។ ដើម្បីមើលឃើញពីមូលហេតុ បងប្អូនអាចចាប់ផ្ដើមដោយការស្រាវជ្រាវរកលទ្ធផលនៃការធ្លាក់នៅក្នុង លោកុប្បត្តិ ៣:១–៧; ម៉ូសេ ៤:២២–៣១ និងការគូសចំណាំ និងការធ្វើបញ្ជីនៃអ្វីដែលបងប្អូនរកឃើញ ។ តើលទ្ធផលនេះជះឥទ្ធិពលលើបងប្អូនដោយរបៀបណា ? បន្ទាប់មក បងប្អូនអាចស្រាវជ្រាវ ម៉ូសេ ៥:៤–១៥ ដោយរកមើលផែនការរបស់ព្រះដើម្បីប្រោសលោះយើងពីឥទ្ធិពលទាំងនេះ ។ ហេតុអ្វីបានជាលោកអ័ដាម និងនាងអេវ៉ា« រីករាយ » បន្ទាប់ពីទេវតាមកជួបពួកលោក ? តើបងប្អូនបានរៀនអ្វីខ្លះមកពីពួកលោកអំពីផែនការរបស់ព្រះវរបិតាសួគ៌ ?
សូមមើលផងដែរ « Because of Him » ( វីដេអូ ) នៅលើបណ្ណាល័យដំណឹងល្អ ។
Because of Him
លោកុប្បត្តិ ៣:១៦; ម៉ូសេ ៤:២២
តើវាមានន័យយ៉ាងដូចម្តេចដែលលោកអ័ដាមត្រូវ « ត្រួតត្រាលើ » នាងអេវ៉ា ?
នៅពេលខ្លះ វគ្គបទគម្ពីរនេះត្រូវបានយល់ច្រឡំ ដោយមានន័យថាប្តីត្រូវបានរាប់ថាត្រឹមត្រូវក្នុងការប្រព្រឹត្តចំពោះភរិយាដោយមិនសប្បុរស ។ នៅជំនាន់យើង ព្យាការីរបស់ព្រះអម្ចាស់បានបង្រៀនថា ស្វាមី និងភរិយាគួរគិតចំពោះគ្នាទៅវិញទៅមកក្នុងនាមជាដៃគូស្មើភាពគ្នាក្នុងការបំពេញការទទួលខុសត្រូវដ៏ទេវភាពរបស់ពួកគេក្នុងគ្រួសារ ( សូមមើល « ក្រុមគ្រួសារ ៖ ការប្រកាសដល់ពិភពលោក » [ បណ្ណាល័យដំណឹងល្អ ] ) ។ អែលឌើរ ឌែល ជី រិនឡាន់ និងស៊ីស្ទើរ រ៉ូធ លីប៊ឺត រិនឡាន់ បានពន្យល់ថា ស្វាមីដែលសុចរិត « នឹងស្វែងរកធ្វើការងារបម្រើ ទទួលស្គាល់កំហុស និងស្វែងរកការអភ័យទោស គាត់ចូលចិត្តសរសើរ គាត់នឹងគិតពិចារណាពីចំណង់ចំណូលចិត្តរបស់សមាជិកគ្រួសារ គាត់នឹងស្គាល់ពីទម្ងន់ដ៏ធំនៃទំនួលខុសត្រូវដើម្បីផ្តល់ឲ្យ ‹ សេចក្ដីត្រូវការក្នុងជីវិត ព្រមទាំងការពារ › ដល់ក្រុមគ្រួសាររបស់គាត់ គាត់នឹងប្រព្រឹត្តចំពោះភរិយារបស់គាត់ដោយការគោរព និងស្របតាមបំផុត ។… គាត់នឹងប្រសិទ្ធពរដល់គ្រួសាររបស់គាត់ » ( The Melchizedek Priesthood: Understanding the Doctrine, Living the Principles [ ឆ្នាំ ២០១៨ ] ទំព័រ ២៣ ) ។
ខ្ញុំត្រូវការសិទ្ធិជ្រើសរើស និងការផ្ទុយដើម្បីរីកចម្រើន ។
អែលឌើរ ឌែល ជី រិនឡាន់ បានបង្រៀនថា « គោលដៅរបស់ព្រះវរបិតាសួគ៌យើង ក្នុងការធ្វើជាឪពុកម្តាយគឺមិនមែនដើម្បីឲ្យបុត្រាបុត្រីរបស់ទ្រង់ ធ្វើ អ្វីដែលត្រឹមត្រូវនោះទេ វាគឺដើម្បីឲ្យបុត្រាបុត្រីរបស់ទ្រង់ ជ្រើសរើស ធ្វើអ្វីដែលត្រឹមត្រូវ ហើយចុងក្រោយប្រែក្លាយដូចជាទ្រង់ » ( « Choose You This Day » Liahona ខែវិច្ឆិកា ឆ្នាំ២០១៨ ១០៤ ) ។ ហេតុអ្វីវាសំខាន់ខ្លាំងម្ល៉េះនៅក្នុងផែនការរបស់ព្រះវរបិតាសួគ៌ ដែលយើង ជ្រើសរើស ធ្វើអ្វីដែលត្រឹមត្រូវ ?
នៅពេលបងប្អូនអាន ម៉ូសេ ៤:១–៤ សូមរកមើលអ្វីដែលព្រះវរបិតាសួគ៌ និងព្រះយេស៊ូវគ្រីស្ទបានធ្វើដើម្បីការពារសិទ្ធិដើម្បីជ្រើសរើស—សិទ្ធិជ្រើសរើសរបស់បងប្អូន ។ តើបងប្អូនអាចទទួលបានអំណាចការពាររបស់ទ្រង់ទាំងទ្វេដោយរបៀបណា ? សម្រាប់ជាគំនិត សូមពិចារណាសិក្សាផ្នែកនេះ « ធ្វើការជ្រើសរើសដែលបំផុសគំនិត » នៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ទំព័រ ៤–៥ ) ។
សូមពិចារណាផងដែរអំពីការអាននូវអ្វីដែលលីហៃបានបង្រៀនអំពីសិទ្ធិជ្រើសរើសនៅក្នុង នីហ្វៃទី២ ២:១១–២០, ២៥–៣០ ។ ហេតុអ្វីបានជាការផ្ទុយចាំបាច់សម្រាប់សិទ្ធិជ្រើសរើស ? តើបងប្អូនអាចបង្ហាញការដឹងគុណរបស់បងប្អូនចំពោះព្រះយេស៊ូវគ្រីស្ទដោយរបៀបណាដែលទ្រង់ធ្វើឲ្យបងប្អូនមាន « សិទ្ធិនឹងរើសយក » ? ( នីហ្វៃទី២ ២:២៧ ) ។
សូមមើលផងដែរ ដាល្លិន អេក អូក « Opposition in All Things » Liahona ខែឧសភា ឆ្នាំ២០១៦ ទំព័រ ១១៤–១១៧ Topics and Questions « Agency » នៅលើបណ្ណាល័យដំណឹងល្អ « ជ្រើសផ្លូវត្រូវ » ទំនុកតម្លើង ល.រ. ១៤៨ ។
បង្កើនការចូលរួម ។ សកម្មភាពរៀនសូត្រជាច្រើនអាចធ្វើឡើងជាបុគ្គល គ្រួសារ ឬជាថ្នាក់នៅក្នុងក្រុមតូចៗ ឬជាគូៗ ។ សូមប្រើវិធីសាស្ត្រផ្សេងៗគ្នាដើម្បីឲ្យសមាជិកក្នុងថ្នាក់ចូលរួម ដែលពួកគេអាចនឹងគ្មានឱកាសចូលរួម ប្រសិនបើគ្មានវិធីសាស្ត្រនោះទេ ។ សម្រាប់សកម្មភាពនេះ បងប្អូនអាចអញ្ជើញបុគ្គលម្នាក់ ឬក្រុមឲ្យអាន ម៉ូសេ ៤ និងសេចក្តីណែនាំ ដើម្បីកម្លាំងនៃយុវជន ខណៈក្រុមផ្សេងទៀតសិក្សាខគម្ពីរនេះនៅក្នុង នីហ្វៃទី២ ២ ។ បន្ទាប់មកពួកគេអាចបង្រៀនគ្នាទៅវិញទៅមកនូវអ្វីដែលពួកគេបានរៀននៅក្នុងផ្នែករៀងៗខ្លួន ។
សាតាំងព្យាយាម « ដើម្បីបញ្ឆោត ហើយដើម្បីធ្វើឲ្យ » ខ្ញុំខ្វាក់ភ្នែក ។
នៅពេលបងប្អូនអាន ម៉ូសាយ ៤:៤–១២; ៥:១៣–៣៣ សូមពិចារណាធ្វើបញ្ជីពីរបៀបដែលសាតាំងបានព្យាយាមល្បួងលោកអ័ដាម និងនាងអេវ៉ា និងកូនៗរបស់ពួកលោក ។ តើវាប៉ុនប៉ងធ្វើការណ៍ដូចគ្នាទាំងនេះនាសព្វថ្ងៃនេះតាមរបៀបណា ? តើព្រះវរបិតាសួគ៌អាចជួយបងប្អូនទប់ទល់នឹងការបញ្ឆោតរបស់សាតាំងដោយរបៀបណា ?
« យើងជាព្រះអម្ចាស់ដ៏ជាព្រះ … ឲ្យពាក់បិទបាំងកាយ » ។
បន្ទាប់ពីទទួលទានផ្លែឈើហាមឃាត់ លោកអ័ដាម និងនាងអេវ៉ាបានព្យាយាមបិទបាំងភាពអាក្រាតរបស់ពួកលោក ។ ក្រោយមក ព្រះអម្ចាស់ឲ្យសម្លៀកបំពាក់ដល់ពួកលោក ។ នៅពេលបងប្អូនអាន ម៉ូសេ ៤:១៣–១៦, ២៧ សូមពិចារណាដូចខាងក្រោម ៖
-
សូមពិចារណាពីរបៀបដែលភាពអាក្រាត និងការស្លៀកពាក់ អាចតំណាងឲ្យនៅក្នុងបទគម្ពីរ ( សូមមើលសម្រាប់ឧទាហរណ៍ វិវរណៈ ៧:៩, ១៣–១៥; នីហ្វៃទី២ ៩:១៤; គោលលទ្ធិ និងសេចក្តីសញ្ញា ១០៩:២២–២៦, ៧៦ ) ។ តើបងប្អូនរៀនអ្វីខ្លះពីបទពិសោធន៍របស់លោកអ័ដាម និងនាងអេវ៉ាពីការអាក្រាត និងសម្លៀកបំពាក់?
-
ប្រសិនបើបងប្អូនបានទទួលអំណោយទានពិសិដ្ឋនៅក្នុងព្រះវិហារបរិសុទ្ធ សូមពិចារណាពីអ្វីដែលលោកអ័ដាម និងនាងអេវ៉ាអាចនិយាយទៅកាន់បងប្អូនអំពីសារៈសំខាន់នៃសម្លៀកបំពាក់ពិសិដ្ឋនៃព្រះវិហារបរិសុទ្ធរបស់បងប្អូន និងអ្វីដែលសម្លៀកបំពាក់នេះតំណាងឲ្យ ។
សូមមើលផងដែរ « Sacred Temple Clothing » ( វីដេអូ ) នៅលើបណ្ណាល័យដំណឹងល្អ ។
សម្លៀកបំពាក់ពិសិដ្ឋព្រះវិហារបរិសុទ្ធ
ព្រះនឹងទទួលយកដង្វាយរបស់ខ្ញុំ ប្រសិនបើខ្ញុំថ្វាយវាដោយសុឆន្ទៈ និងដួងចិត្តគោរពប្រតិបត្តិ ។
នៅពេលបងប្អូនសិក្សា ម៉ូសេ ៥:៤–៩, ១៦–២៦ សូមពិចារណាពីអាកប្បកិរិយារបស់លោកអ័ដាម និងនាងអេវ៉ា និងកូនប្រុសរបស់ពួកលោក គឺ កាអ៊ីន និងអេបិល ចំពោះយញ្ញបូជានេះ ។ ហេតុអ្វីព្រះអម្ចាស់ទទួលយកយញ្ញបូជារបស់អេបិល ប៉ុន្តែមិនទទួលយកយញ្ញបូជារបស់កាអ៊ីន ?
តើព្រះអម្ចាស់បង្គាប់ឲ្យបងប្អូនធ្វើយញ្ញបូជាអ្វី ? តើមានអ្វីខ្លះនៅក្នុងខគម្ពីរទាំងនេះដែលបង្ហាញពីរបៀបដែលបងប្អូនគិតអំពីយញ្ញបូជាទាំងនោះ ?
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
លោកុប្បត្តិ ៣; ម៉ូសេ ៤; ៥:៨–១៥
ព្រះយេស៊ូវគ្រីស្ទសង្រ្គោះយើងពីការធ្លាក់ ។
-
ដើម្បីជួយកូនៗរបស់បងប្អូនឲ្យយល់កាន់តែច្បាស់អំពីការធ្លាក់របស់លោកអ័ដាម និងនាងអេវ៉ា បងប្អូនអាចថតចម្លងរូបភាពពី « អ័ដាម និងអេវ៉ា » ( នៅក្នុង ដំណើររឿងព្រះគម្ពីរសញ្ញាចាស់ ទំព័រ ១៣–១៦ ) និងកាត់រូបនោះចេញ ។ បន្ទាប់មកបងប្អូនអាចធ្វើការជាមួយគ្នាដើម្បីផ្គុំរូបភាពតាមលំដាប់លំដោយ នៅពេលបងប្អូនពិភាក្សាពីបទពិសោធន៍របស់លោកអ័ដាម និងនាងអេវ៉ា ។ នៅពេលបងប្អូនធ្វើដូច្នោះ សូមនិយាយអំពីមូលហេតុដែលវាសំខាន់នៅក្នុងផែនការរបស់ព្រះវរបិតាសួគ៌សម្រាប់លោកអ័ដាម និងនាងអេវ៉ាដើម្បីចាកចេញពីសួនច្បារអេដែន ។
-
កូនៗរបស់បងប្អូនអាចមានអារម្មណ៍ដឹងគុណចំពោះដង្វាយធួននៃព្រះយេស៊ូវគ្រីស្ទ នៅពេលពួកគេយល់ពីរបៀបដែលទ្រង់យកឈ្នះលើឥទ្ធិពលនៃការធ្លាក់ ។ នៅពេលបងប្អូនអានជាមួយគ្នានៅក្នុង ម៉ូសេ ៤:២៥; ៦:៤៨; រ៉ូម ៥:១២; នីហ្វៃទី២ ២:២២–២៣ ជួយកូនៗរបស់បងប្អូនស្វែងរករបៀបដើម្បីបំពេញប្រយោគនេះ ៖ « ដោយសារការធ្លាក់ នោះខ្ញុំ … » បន្ទាប់មក នៅពេលបងប្អូនអានជាមួយគ្នាក្នុង ម៉ូសេ ៥:៨–១១, ១៤–១៥; ៦:៥៩; អាលម៉ា ១១:៤២ ពួកគេអាចបំពេញប្រយោគនេះ ៖ « ដោយសារព្រះយេស៊ូវគ្រីស្ទ នោះខ្ញុំ … » ចែកចាយជាមួយគ្នានូវអំណរគុណរបស់បងប្អូនចំពោះព្រះយេស៊ូវគ្រីស្ទ ។
ខ្ញុំអាចជ្រើសរើសត្រូវ ។
-
សូមជញ្ជឹងគិតអំពីមេរៀនដែលប្រើវត្ថុសាមញ្ញៗដើម្បីណែនាំពីគោលការណ៍នៃសិទ្ធិជ្រើសរើស ៖ អញ្ជើញកូនៗរបស់បងប្អូនឲ្យផាត់ពណ៌ទំព័រសកម្មភាពសប្ដាហ៍នេះ ប៉ុន្តែសូមឲ្យខ្មៅដៃពណ៌តែមួយប៉ុណ្ណោះដើម្បីប្រើ ។ ហេតុអ្វីក៏វាល្អជាងដើម្បីមានជម្រើស ? បន្ទាប់មក បងប្អូនអានជាមួយគ្នានូវ ម៉ូសេ ៤:១–៤ ហើយនិយាយអំពីមូលហេតុដែលព្រះចង់ឲ្យយើងអាចជ្រើសរើសរវាងត្រូវ និងខុស ។ តើព្រះវរបិតាសួគ៌ និងព្រះយេស៊ូវគ្រីស្ទជួយយើងធ្វើការជ្រើសរើសត្រឹមត្រូវដោយរបៀបណា ?
-
សូមជួយកូនៗរបស់បងប្អូនឲ្យគិត និងជ្រើសរើសរូបភាពនៃជម្រើសត្រឹមត្រូវ ដែលពួកគេអាចធ្វើដើម្បីធ្វើតាមព្រះយេស៊ូវគ្រីស្ទ ។ ឬបងប្អូនអាចច្រៀងចម្រៀងមួយបទជាមួយគ្នាអំពីជម្រើសត្រឹមត្រូវ ដូចជាបទ« ជ្រើសរើសផ្លូវត្រូវ » ( សៀវភៅចម្រៀងកុមារ ទំព័រ ៨២–៨៣ ) ។ បងប្អូនអាចប្រាប់គ្នាអំពីពេលវេលានៅពេលបងប្អូនបានធ្វើជម្រើសត្រឹមត្រូវ និងនិយាយអំពីរបៀបដែលបងប្អូនមានអារម្មណ៍បន្ទាប់ពីនោះ ។
The Fall [ ការធ្លាក់ ] ដោយ រ៉ូប៊ើត ធី បារ៉ែត
ខ្ញុំអាចអធិស្ឋានទៅកាន់ព្រះវរបិតាសួគ៌ ។
-
នៅពេលលោកអ័ដាម និងនាងអេវ៉ាត្រូវចាកចេញពីសួនច្បារអេដែន ពួកលោកមិនអាចនៅជាមួយព្រះវរបិតាសួគ៌ទៀតទេ ។ សូមអាន ម៉ូសេ ៥:៤, ៨ ជាមួយកូនៗរបស់បងប្អូន ហើយជួយពួកគេស្វែងរកអ្វីដែលលោកអ័ដាម និងនាងអេវ៉ាបានធ្វើ ដើម្បីមានអារម្មណ៍នៅជិតទ្រង់ ហើយស្តាប់ឮទ្រង់ ។ តើយើងអាចពោលពាក្យអ្វីខ្លះទៅកាន់ព្រះវរបិតាសួគ៌នៅក្នុងការអធិស្ឋានរបស់យើង ?
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។
In Similitude of the Sacrifice of the Only Begotten of the Father [ នៅក្នុងភាពស្រដៀងគ្នានៃការបូជាព្រះរាជបុត្រាបង្កើតតែមួយគត់របស់ព្រះវរបិតា ] ដោយម៉ៃ ម៉ាម ( សូមមើល ម៉ូសេ ៥:៥–៩ )