« ថ្ងៃទី២៩ ខែធ្នូ–ថ្ងៃទី៤ ខែមករា សក្ខីបទទីមួយនៃព្រះយេស៊ូវគ្រីស្ទ ៖ សេចក្តីណែនាំទៅកាន់ព្រះគម្ពីរសញ្ញាចាស់ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« សេចក្តីណែនាំទៅកាន់ព្រះគម្ពីរសញ្ញាចាស់ » ចូរមកតាមខ្ញុំ ៖ ឆ្នាំ២០២៦
ថ្ងៃទី២៩ ខែធ្នូ–ថ្ងៃទី៤ ខែមករា ៖ សក្តីបទទីមួយនៃព្រះយេស៊ូវគ្រីស្ទ
បុព្វកថានៃព្រះគម្ពីរសញ្ញាចាស់
នៅពេលបងប្អូនពិចារណាពីការសិក្សាព្រះគម្ពីរសញ្ញាចាស់នៅឆ្នាំនេះ តើបងប្អូនមានអារម្មណ៍បែបណា ? អន្ទះសា ? មិនប្រាកដ ? ភ័យខ្លាច ? សតិអារម្មណ៍ទាំងអស់នោះអាចយល់បាន ។ ព្រះគម្ពីរសញ្ញាចាស់គឺជាការប្រមូលផ្ដុំនៃការសរសេរដ៏ចំណាស់បំផុតមួយនៅក្នុងពិភពលោកនេះ ហើយវាអាចធ្វើឲ្យមានអារម្មណ៍ទាំងរំភើបរីករាយ និងភិតភ័យ ។ ការសរសេរទាំងនេះកើតចេញមកពីវប្បធម៌បុរាណមួយដែលពេលខ្លះវាទំនងជាមានភាពចម្លែក ឬភាពមិនស្រណុកក្នុងចិត្ត ។ ប៉ុន្តែនៅក្នុងការសរសេរទាំងនេះ យើងឃើញមនុស្សជាច្រើនកំពុងមានពិសោធន៍ដែលស្រដៀងគ្នា ។ យើងស្គាល់បាវចនានៃដំណឹងល្អដែលធ្វើជាសាក្សីពីភាពជាព្រះរបស់ព្រះយេស៊ូវគ្រីស្ទ និងដំណឹងល្អរបស់ទ្រង់ ។ ពិតណាស់ មនុស្សដូចជា អ័ប្រាហាំ សារ៉ា ហាណា និងដានីយ៉ែលបានរស់នៅក្នុងបែបជីវិតដែលខុសប្លែកពីយើង ។ ប៉ុន្តែពួកគេក៏ដកពិសោធន៍នូវអំណរនៃគ្រួសារ និងការមិនចុះសម្រុងក្នុងគ្រួសារ គ្រានៃសេចក្ដីជំនឿ និងគ្រានៃភាពមិនច្បាស់លាស់ ព្រមទាំងភាពជោគជ័យ និងភាពបរាជ័យ—ដូចជាយើងគ្រប់គ្នាជួបដែរ ។ សំខាន់ជាងនេះទៅទៀត ពួកគេបានអនុវត្តសេចក្ដីជំនឿ បានប្រែចិត្ត បានចុះសេចក្ដីសញ្ញា មានបទពិសោធន៍ខាងវិញ្ញាណ និងពុំដែលបោះបង់ការសន្យារបស់ព្រះអង្គសង្គ្រោះឡើយ ។ នៅពេលយើងរៀនពីរបៀបដែលព្រះផ្លាស់ទីចូលក្នុងជីវិតរបស់ពួកគេ យើងក៏ឃើញទ្រង់នៅក្នុងរបស់យើងដែរ ហើយយើងនិយាយជាមួយអ្នកតែងបទទំនុកដំកើង ៖ « ព្រះបន្ទូលនៃទ្រង់ជាចង្កៀងដល់ជើងទូលបង្គំ ហើយជាពន្លឺបំភ្លឺផ្លូវទូលបង្គំផង ។ … ហេតុនោះអ្នកបម្រើរបស់ទ្រង់ក៏ស្រឡាញ់ណាស់ » ( ទំនុកដំកើង ១១៩:១០៥, ១៤០ ) ។
គំនិតសម្រាប់ការរៀនសូត្រនៅឯគេហដ្ឋាន និងព្រះវិហារ
ព្រះគម្ពីរសញ្ញាចាស់ថ្លែងទីបន្ទាល់អំពីព្រះយេស៊ូវគ្រីស្ទ
មធ្យោបាយមួយដើម្បីស្វែងរកអាហារបំប៉នខាងវិញ្ញាណដ៏សម្បូរបែបនៅក្នុងព្រះគម្ពីរសញ្ញាចាស់គឺការស្វែងរកនំបុ័ងជីវិតជា ព្រះយេស៊ូវគ្រីស្ទ ( សូមមើល យ៉ូហាន ៦:៤៨ ) ។ ឧទាហរណ៍ តើអ្នកមើលឃើញព្រះអង្គសង្គ្រោះនៅក្នុងរឿងដូចតទៅនេះដោយរបៀបណា ?
-
នំម៉ាន៉ា ( និក្ខំមនំ ១៦:៤, ១១–១៥; យ៉ូហាន ៦:៣៥ )
-
ចៀមដែលបូជា ( និក្ខមនំ ១២:៣–៥; យ៉ូហាន ១:២៩ )
-
ពស់លង្ហិន ( ជនគណនា ២១:៤–១០; យ៉ូហាន ៣:១៤ )
-
យ៉ូណាស ( យ៉ូណាស ១:៤–១៧; ម៉ាថាយ ១២:៣៨–៤១ )
តើឧទាហរណ៍ទាំងនេះបង្រៀនអ្វីខ្លះអំពីទ្រង់ ? តើសេចក្ដីយោងអ្វីទៀតទៅនឹងព្រះយេស៊ូវគ្រីស្ទនៅក្នុងព្រះគម្ពីរសញ្ញាចាស់ដែលបងប្អូនធ្លាប់ស្គាល់ហើយ ?
នៅក្នុងសារលិខិតរបស់លោក « ព្រះយេស៊ូវគ្រីស្ទគឺជាកំណប់ទ្រព្យ » អែលឌើរ ឌែល ជី រិនឡាន់ បានលើកទឹកចិត្តយើងឲ្យ« ចងចាំ និងផ្ដោតជានិច្ចទៅលើព្រះយេស៊ូវគ្រីស្ទ » ( លីអាហូណា ខែវិច្ឆិកា ឆ្នាំ២០២៣ ទំព័រ ៩៨ ) ។ សូមពិចារណាអានសារលិខិតរបស់លោក ដោយរកមើលអ្វីដែលបងប្អូនអាចធ្វើដើម្បីស្វែងរកព្រះយេស៊ូវគ្រីស្ទមិនត្រឹមតែនៅក្នុងព្រះគម្ពីរសញ្ញាចាស់ប៉ុណ្ណោះទេ ថែមទាំងនៅក្នុងជីវិតរបស់បងប្អូនផងដែរ ។
សូមមើលផងដែរ « គំរូ និងនិមិត្តរូបទាំងឡាយអំពីព្រះគ្រីស្ទ »នៅក្នុងសេចក្ដីណែនាំដល់បទគម្ពីរទាំងឡាយ « ព្រះយេស៊ូវគ្រីស្ទ » បណ្ណាល័យដំណឹងល្អ « ស្វែងរកព្រះអម្ចាស់ពីក្មេង » សៀវភៅចម្រៀងកុមារ ៦៧ ។
ស្វែងរកនិមិត្តរូបនានាដែលធ្វើទីបន្ទាល់អំពីព្រះយេស៊ូវគ្រីស្ទ ។ ព្រះអម្ចាស់បានបង្រៀនអ័ដាមថា « គ្រប់អ្វីទាំងអស់មានរូបភាពដូចគ្នា ហើយគ្រប់អ្វីទាំងអស់ត្រូវបានបង្កើត ហើយធ្វើឡើងមក ដើម្បីធ្វើទីបន្ទាល់អំពីយើង ( ម៉ូសេ ៦:៦៣ ) ។ មិនថាបងប្អូនកំពុងសិក្សា ឬបង្រៀនទេ ការផ្តោតលើព្រះយេស៊ូវគ្រីស្ទអាចជួយបងប្អូនស្វែងរកអត្ថន័យនៅក្នុងបទគម្ពីរ ហើយបង្កើនសេចក្តីស្រឡាញ់ និងសេចក្តីជំនឿរបស់បងប្អូនលើទ្រង់ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។
ព្រះយេស៊ូវគ្រីស្ទ គឺជាព្រះយេហូវ៉ានៅក្នុងព្រះគម្ពីរសញ្ញាចាស់ ។
ប្រធាន ដាល្លិន អេក អូក បានបង្រៀន ៖ « ព្រះវរបិតាបានណែនាំអំពីព្រះរាជបុត្រាបង្កើតតែមួយគត់របស់ទ្រង់ គឺព្រះយេស៊ូវគ្រីស្ទ ថាជាព្រះអង្គសង្គ្រោះ និងព្រះប្រោសលោះរបស់យើង រួចទ្រង់បានបង្គាប់យើង ‹ ចូរស្តាប់តាមទ្រង់ចុះ › ។ ចេញពីការណែនាំនេះ យើងសន្និដ្ឋានថា កំណត់ត្រាព្រះគម្ពីរអំពីព្រះបន្ទូលថ្លែងដោយ ‹ ព្រះ › ឬ ‹ ព្រះអម្ចាស់ › គឺសឹងតែជាព្រះបន្ទូលរបស់ព្រះយេហូវ៉ាជានិច្ច ជាព្រះអម្ចាស់ដ៏មានព្រះជន្មរស់ឡើងវិញរបស់យើង គឺព្រះយេស៊ូវគ្រីស្ទ »( « ការបង្រៀនរបស់ព្រះយេស៊ូវគ្រីស្ទ » លីអាហូណា ខែឧសភា ឆ្នាំ២០២៣ ទំព័រ ១០២ ) ។
ការបង្រៀនរបស់ព្រះយេស៊ូវគ្រីស្ទ
នៅពេលមេដឹកនាំពួកសាសន៍យូដាបានចោទប្រកាន់ព្រះយេស៊ូវអំពីអត្តសញ្ញាណរបស់ទ្រង់ នោះទ្រង់បានប្រកាសថា « មុនដែលលោកអ័ប្រាហាំកើតមក នោះមានខ្ញុំហើយ » ។ បន្ទូលទាំងនេះបានធ្វើឲ្យមនុស្សដែលបានស្ដាប់ឮព្រះយេស៊ូវភ្ញាក់ផ្អើល ហើយពួកគេបានត្រៀមខ្លួនបម្រុងយកដុំថ្មគប់ទ្រង់ ( សូមមើល យ៉ូហាន ៨:៥៨–៥៩ ) ។ សូមពិចារណាអាន និក្ខំមនំ ៣:១៣–១៥; ៦:៣–៥ ដើម្បីដឹងថាហេតុអ្វីបានជាពួកសាសន៍យូដាមួយចំនួនខឹងនឹងអ្វីដែលព្រះយេស៊ូវមានបន្ទូល ។
ហេតុអ្វីបានជាវាមានសារៈសំខាន់ចំពោះបងប្អូនក្នុងការដឹងថាព្រះយេស៊ូវគ្រីស្ទគឺជាព្រះយេហូវ៉ា ?
ព្រះអម្ចាស់បានស្ដារឡើងវិញនូវ« សេចក្ដីដ៏ច្បាស់ និងពិសេសៗ »ជាច្រើនតាមរយៈយ៉ូសែប ស្ម៊ីធ ។
នៅក្នុងការនិមិត្តមួយ ព្រះអម្ចាស់បានបង្ហាញនីហ្វៃអំពីការលេចចេញមកនៃព្រះគម្ពីរប៊ីប ដោយពន្យល់ថា « សេចក្ដីដ៏ច្បាស់ និងពិសេសៗជាច្រើន » នឹងត្រូវបានយកចេញពីព្រះគម្ពីរនេះ ។ សូមពិចារណា នីហ្វៃទី១ ១៣:២១–២៩, ៣៨–៤២ ដោយរកមើលពីរបៀបដែលព្រះអម្ចាស់បានគ្រោងទុកដើម្បី« បង្ហាញឲ្យដឹងសេចក្ដីដ៏ច្បាស់ និងពិសេសៗ » ។ យោងតាម នីហ្វៃទី២ ៣:១២ តើព្រះគម្ពីរប៊ីប និងព្រះគម្ពីរមរមនធ្វើការរួមគ្នាយ៉ាងដូចម្តេច ?
នៅពេលបងប្អូនសិក្សាព្រះគម្ពីរសញ្ញាចាស់នៅឆ្នាំនេះ បងប្អូនក៏នឹងសិក្សា« គម្ពីរផ្សេងទៀត »មួយចំនួនដែលនីហ្វៃបានឃើញផងដែរ ។ ទាំងនេះរួមមាន ៖
-
គម្ពីរម៉ូសេ គឺជាផ្នែកដំបូងនៃការបកប្រែរបស់យ៉ូសែប ស្ម៊ីធអំពីព្រះគម្ពីរប៊ីប ។ វាស្តារឡើងវិញនូវសេចក្ដីពិត និងដំណើររឿងដែលមិនបានរកឃើញនៅក្នុងអត្ថបទបច្ចុប្បន្ននៃ លោកុប្បត្តិ ១–៦ ។
-
គម្ពីរអ័ប្រាហាំ ដែលត្រូវបានបើកសម្ដែងដល់យ៉ូសែប ស្ម៊ីធ នៅពេលលោកពិនិត្យមើលក្រដាសបបុសរបស់សាសន៍អេស៊ីព្ទ( សូមមើលប្រធានបទ និងសំណួរ « គម្ពីរអ័ប្រាហាំ » បណ្ណាល័យដំណឹងល្អ ) ។
-
វគ្គផ្សេងៗពីការបកប្រែដោយ យ៉ូសែប ស្ម៊ីធ ដែលខ្លះមាននៅក្នុងលេខយោង ឧបសម្ព័ន្ធនៃព្រះគម្ពីរប៊ីប និងសេចក្ដីណែនាំដល់បទគម្ពីរទាំងឡាយ ។
ខាងក្រោមនេះគឺជាឧទាហរណ៍មួយចំនួនអំពីដំណើររឿងព្រះគម្ពីរសញ្ញាចាស់ដែលបានស្ដារឡើងវិញតាមរយៈ យ៉ូសែប ស្ម៊ីធ ៖ ទីក្រុងស៊ីយ៉ូនរបស់ហេណុក ( ម៉ូសេ ៧:១៨–១៩ ) ការនិមិត្តរបស់អ័ប្រាហាំអំពីក្រុមប្រឹក្សានៅស្ថានសួគ៌ ( អ័ប្រាហាំ ៣:២២–២៨ ) និងការងារបម្រើរបស់ម៉ិលគីស្សាដែក ( ការបកប្រែដោយ យ៉ូសែប ស្ម៊ីធ លោកុប្បត្តិ ១៤:២៥–៤០ ) ។ ហេតុអ្វីបានជាដំណើររឿងទាំងនេះ « ច្បាស់ និងពិសេស »ចំពោះបងប្អូន ?
លោកអ័ដាម និងនាងអេវ៉ាថ្វាយយញ្ញបូជា ដោយ ខេធ ឡាសិន( លម្អិត )
ព្រះគម្ពីរសញ្ញាចាស់ជួយខ្ញុំឲ្យយល់ដឹងពីទំនាក់ទំនងសេចក្ដីសញ្ញារបស់ខ្ញុំជាមួយនឹងព្រះ ។
ព្រះគម្ពីរសញ្ញាចាស់គឺជាដំណើររឿងអំពីព្រះខិតខំធ្វើឲ្យយើងក្លាយ« ដាច់ជារបស់ »ផងទ្រង់តាមរយៈសេចក្ដីសញ្ញា ( និក្ខមនំ ១៩:៥ ) ។ ដោយហេតុនោះហើយ វិធីដ៏ល្អមួយដើម្បីរៀបចំខ្លួនអានព្រះគម្ពីរសញ្ញាចាស់គឺការរៀនអំពីសេចក្ដីសញ្ញា—ជាពិសេសសេចក្ដីសញ្ញាដ៏នៅអស់កល្បអស់កាលជានិច្ចដែលព្រះបានប្រទានដល់ពួកព្យាការីពីបុរាណដូចជា អ័ប្រាហាំ អ៊ីសាក យ៉ាកុប និងពូជពង្សពួកលោក ។ ហើយវិធីដ៏អស្ចារ្យមួយដើម្បីរៀនអំពីសេចក្ដីសញ្ញាគឺការសិក្សាសារលិខិតរបស់ប្រធាន រ័សុល អិម ណិលសុន « សេចក្តីសញ្ញាដ៏នៅអស់កល្បអស់កាលជានិច្ច » ( លីអាហូណា ខែតុលា ឆ្នាំ២០២២ ទំព័រ ៤–១១ ) ។
នៅពេលបងប្អូនអាន សូមសួរខ្លួនឯង ៖ ហេតុអ្វីបានជាសេចក្ដីសញ្ញាសំខាន់ចំពោះខ្ញុំ ? តើ« សេចក្តីស្រឡាញ់ និងសេចក្តីមេត្តាករុណាដ៏ពិសេស »អ្វីខ្លះដែលខ្ញុំទទួលបានពីព្រះ នៅពេលខ្ញុំរក្សាសេចក្ដីសញ្ញារបស់ខ្ញុំជាមួយទ្រង់ ? នៅពេលបងប្អូនអានព្រះគម្ពីរសញ្ញាចាស់នៅឆ្នាំនេះ ចូរឃ្លាំមើលរឿងដែលព្រះចង់បង្រៀនបងប្អូនអំពីទំនាក់ទំនងសេចក្ដីសញ្ញារបស់បងប្អូនជាមួយនឹងទ្រង់ ។
សូមមើលផងដែរ យេរេមា ៣១:៣១–៣៤ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ខ្ញុំអាចរៀនអំពីព្រះយេស៊ូវគ្រីស្ទនៅក្នុងព្រះគម្ពីរសញ្ញាចាស់ ។
-
ពាក្យពេចន៍ និងវប្បធម៌នៃព្រះគម្ពីរសញ្ញាចាស់អាចពិបាកធ្វើឲ្យកុមារយល់ ប៉ុន្តែបងប្អូនអាចជួយពួកគេឲ្យឃើញព្រះយេស៊ូវគ្រីស្ទនៅក្នុងនិមិត្តសញ្ញា និងរឿងទាំងឡាយ ។ ប្រហែលជាបងប្អូន និងកូនៗរបស់បងប្អូនអាចមើលរូបភាពខាងក្រោម ព្យាការីអេសាយព្យាករណ៍ការប្រសូតរបស់ព្រះគ្រីស្ទ ។ ចូរអនុញ្ញាតឲ្យកូនៗរបស់បងប្អូនចង្អុលបង្ហាញព័ត៌មានលម្អិតដែលពួកគេឃើញ ។ សូមទាញយកចំណាប់អារម្មណ៍របស់ពួកគេជាពិសេសទៅរកព្រះឱរសយេស៊ូវ ។ បន្ទាប់មកបងប្អូនអាចអានជាមួយនឹងពួកគេនូវអ្វីដែលអេសាយបានសរសេរអំពីការប្រសូតរបស់ព្រះអង្គសង្គ្រោះនៅក្នុង អេសាយ ៧:១៤; ៩:៦ ។ សូមចែកចាយជាមួយនឹងកូនៗរបស់បងប្អូនពីអារម្មណ៍របស់បងប្អូនចំពោះការរកមើលព្រះអង្គសង្គ្រោះនៅក្នុងព្រះគម្ពីរសញ្ញាចាស់នៅឆ្នាំនេះ ។
អេសាយសរសេរអំពីការប្រសូតរបស់ព្រះគ្រីស្ទ ( ព្យាការីអេសាយប្រាប់ទុកជាមុនពីការប្រសូតរបស់ព្រះគ្រីស្ទ ) ដោយ ហារី អាន់ឌើរសុន
-
បងប្អូន និងកូនៗរបស់បងប្អូនក៏អាចអាន ទំនុកដំកើង ២៣ ឬ អេសាយ ៥៣:៣–៩ ហើយរកឃើញពាក្យពេចន៍ដែលរំឭកបងប្អូនអំពីព្រះយេស៊ូវគ្រីស្ទ ។ តើពាក្យពេចន៍ទាំងនេះបង្រៀនយើងអ្វីខ្លះអំពីព្រះជន្ម និងដង្វាយធួនរបស់ទ្រង់ ?
ព្រះវរបិតាសួគ៌សព្វព្រះទ័យចង់ចុះសេចក្ដីសញ្ញាជាមួយនឹងខ្ញុំ ។
-
សេចក្ដីសញ្ញាគឺជាប្រធានបទសំខាន់មួយនៅក្នុងព្រះគម្ពីរសញ្ញាចាស់ ។ ដើម្បីណែនាំប្រធានបទនេះដល់កូនៗរបស់បងប្អូន បងប្អូនអាចនិយាយជាមួយពួកគេអំពីការសន្យាដែលពួកគេធ្វើ និងរក្សាជាមួយគ្រួសារ ឬមិត្តភក្តិ ហើយហេតុអ្វីបានជាការរក្សាការសន្យាទាំងនេះមានសារៈសំខាន់ ។ បន្ទាប់មក បងប្អូនអាចមើលរូបភាពនៃពិធីបុណ្យជ្រមុជទឹកមួយ ហើយនិយាយអំពីការសន្យា ឬសេចក្តីសញ្ញា ដែលយើងធ្វើជាមួយព្រះនៅពេលយើងទទួលពិធីបុណ្យជ្រមុជទឹក ( សូមមើល ម៉ូសាយ ១៨:១០, ១៣ ) ។ បងប្អូនក៏អាចបង្ហាញរូបភាពព្រះវិហារបរិសុទ្ធមួយ ហើយចែកចាយអារម្មណ៍របស់បងប្អូនអំពីសេចក្ដីសញ្ញាដែលយើងបានធ្វើនៅទីនោះ ។
-
ទំព័រសកម្មភាពសប្តាហ៍នេះអាចជួយកូនៗរបស់បងប្អូនឲ្យរំភើបចិត្តក្នុងការធ្វើ និងការរក្សាសេចក្ដីសញ្ញាជាមួយព្រះវរបិតាសួគ៌ ។ បងប្អូនក៏អាចច្រៀងចម្រៀងមួយបទអំពីការធ្វើសេចក្ដីសញ្ញា ដូចជា « ពេលខ្ញុំបានជ្រមុជទឹក » ( សៀវភៅចម្រៀងកុមារ ទំព័រ ១០៣ ) ។
ព្រះយេស៊ូវគ្រីស្ទ គឺជាព្រះយេហូវ៉ានៅក្នុងព្រះគម្ពីរសញ្ញាចាស់ ។
-
តើកូនៗរបស់បងប្អូនស្គាល់នរណាម្នាក់ដែលប្រើឈ្មោះខុសគ្នានៅក្នុងកន្លែងផ្សេងៗគ្នាទេ ? ប្រហែលជាឪពុកម្តាយ ឬគ្រូបង្រៀនម្នាក់ត្រូវបានគេហៅឈ្មោះខុសគ្នានៅកន្លែងធ្វើការ នៅផ្ទះ និងនៅព្រះវិហារ ។ សូមពិភាក្សាអំពីឈ្មោះទាំងនោះ បន្ទាប់មកអាន និក្ខមនំ ៦:៣ ជាមួយគ្នា ហើយអញ្ជើញកូនៗរបស់បងប្អូនឲ្យស្វែងរកព្រះនាមដែលព្រះយេស៊ូវគ្រីស្ទត្រូវបានគេស្គាល់មុនពេលទ្រង់ប្រសូត ( សូមមើលផងដែរ ការបកប្រែដោយ យ៉ូសែប នៅក្នុងលេខយោង c ) ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។