« ថ្ងៃទី៥–១១ ខែមករា ‹ នេះហើយជាកិច្ចការរបស់យើង និងសិរីល្អរបស់យើង › ៖ ម៉ូសេ ១; អ័ប្រាហាំ ៣ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី៥–១១ ខែមករា ‹ នេះហើយជាកិច្ចការរបស់យើង និងសិរីល្អរបស់យើង › » ចូរមកតាមខ្ញុំ ៖ ឆ្នាំ២០២៦
ថ្ងៃទី៥–១១ ខែមករា ៖ « នេះហើយជាកិច្ចការរបស់យើង និងសិរីល្អរបស់យើង »
ម៉ូសេ ១; អ័ប្រាហាំ ៣
ព្រះគម្ពីរប៊ីបចាប់ផ្ដើមជាមួយនឹងពាក្យ « កាលដើមដំបូងឡើយ ព្រះបានបង្កើតផ្ទៃមេឃ និងផែនដី »( លោកុប្បត្តិ ១:១ ) ។ ចុះតើមានអ្វីខ្លះ ពីមុន « កាលដើមដំបូង »នេះ ? ហើយ ហេតុអ្វី បានជាព្រះបង្កើតវត្ថុទាំងនេះ ? តាមរយៈព្យាការី យ៉ូសែប ស៊្មីធ ព្រះអម្ចាស់បានប្រទានចម្លើយចំពោះសំណួរទាំងនេះ ។
ឧទាហរណ៍ ទ្រង់បានប្រទានដល់យើងនូវកំណត់ត្រានៃការនិមិត្តមួយដែលអ័ប្រាហាំបានឃើញពីជីវិតរបស់យើងជាវិញ្ញាណ « មុនកំណើតលោកិយ » ( សូមមើល អ័ប្រាហាំ ៣:២២–២៨ ) ។ ព្រះអម្ចាស់ក៏បានប្រទានដល់យើងនូវការបកប្រែដែលបានបំផុសគំនិត ឬការកែប្រាំមួយជំពូកដំបូងនៃ គម្ពីរលោកុប្បត្តិ ដែលត្រូវបានហៅថា គម្ពីរម៉ូសេ—ដែលពុំបានចាប់ផ្តើមជាមួយនឹង « កាលដើមដំបូងឡើយ » ។ ផ្ទុយទៅវិញ វាចាប់ផ្ដើមជាមួយនឹងបទពិសោធន៍ដែលម៉ូសេមាន ដែលផ្ដល់នូវបរិបទមួយចំនួនសម្រាប់ដំណើររឿងការបង្កបង្កើតនោះ ។ ព្រះគម្ពីរថ្ងៃចុងក្រោយទាំងនេះរួមគ្នាគឺជាកន្លែងដ៏ល្អមួយដើម្បីចាប់ផ្ដើមការសិក្សារបស់យើងអំពីព្រះគម្ពីរសញ្ញាចាស់ ដោយសារវាលើកឡើងនូវសំណួរសំខាន់ៗមួយចំនួនដែលអាចផ្ដល់បរិបទដល់អំណានរបស់យើងដូចជា ៖ តើព្រះជានរណា ? តើយើងជានរណា ? តើកិច្ចការរបស់ព្រះគឺជាអ្វី ហើយតើតួនាទីរបស់យើងនៅក្នុងកិច្ចការនោះគឺជាអ្វី ? ជំពូកដំបូងៗនៃលោកុប្បត្តិអាចមើលឃើញថាជាការឆ្លើយតបរបស់ព្រះអម្ចាស់ទៅកាន់សំណើរបស់ម៉ូសេថា « ឱ ព្រះអង្គអើយ សូមមានសេចក្ដីមេត្តាករុណាដល់បាវបម្រើរបស់ទ្រង់ផងចុះ ហើយសូមប្រាប់ទូលបង្គំអំពីផែនដីនេះ និងអំពីបណ្ដាជនដែលអាស្រ័យនៅលើទីនោះ និងអំពីផ្ទៃមេឃ » ( ម៉ូសេ ១:៣៦ ) ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
ក្នុងនាមជាបុត្រម្នាក់របស់ព្រះ ខ្ញុំមានជោគវាសនាដ៏ទេវភាព ។
« ប្រសិនបើព្រះអម្ចាស់មានព្រះបន្ទូលមកកាន់ក្មួយៗដោយផ្ទាល់ » ប្រធាន រ័សុល អិម ណិលសុន បានបង្រៀនថា « រឿងដំបូងដែលទ្រង់សព្វព្រះទ័យឲ្យក្មួយៗយល់នោះគឺ អត្តសញ្ញាណពិតរបស់ក្មួយៗ » ( Choices for Eternity » [ ការប្រជុំធម្មនិដ្ឋានសម្រាប់យុវម្ឈិមវ័យ ខែឧសភា ឆ្នាំ២០២២ ] នៅលើបណ្ណាល័យដំណឹងល្អ ) ។ វាកើតឡើងថាសាតាំងនឹងព្យាយាមបំភាន់បងប្អូនលើចំណុចដូចគ្នានោះ ។ សូមរកមើលលំនាំនេះនៅក្នុងសារលិខិតរបស់ព្រះទៅកាន់ម៉ូសេ នៅក្នុង ម៉ូសេ ១:៤, ៦ ហើយនៅក្នុងសាររបស់សាតាំងនៅក្នុង ម៉ូសេ ១:១២ ។ តើយើងរៀនអ្វីខ្លះមកពីខគម្ពីរទាំងនេះអំពីភាពខុសគ្នារវាងព្រះ និងសាតាំង ?
ប្រធាន ណិលសុន ក៏បានបង្រៀនផងដែរថា « របៀបដែលក្មួយៗគិតថាក្មួយៗជានរណាឲ្យពិត ជះឥទ្ធិពលស្ទើរតែគ្រប់ការសម្រេចចិត្តដែលក្មួយៗធ្លាប់ធ្វើ » ( « Choices for Eternity » ) ។ សូមពិចារណាធ្វើបញ្ជីនៃជម្រើសដែលបងប្អូនជ្រើសរើស ពីព្រោះអត្តសញ្ញាណរបស់បងប្អូនជាកូនរបស់ព្រះមានសារៈសំខាន់ជាងកិច្ចការផ្សេងទៀត ។
តើខគម្ពីរ ឬឃ្លាបន្ថែមអ្វីខ្លះនៅក្នុង ម៉ូសេ ១ ជួយបងប្អូនយល់ពីតម្លៃដ៏ទេវភាពរបស់បងប្អូន ? បងប្អូនក៏អាចអានសារលិខិតរបស់ប្រធាន ណិលសុន នៅក្នុងផ្នែកនៃ « Choices for Eternity » ដែលមានចំណងជើងថា « First: Know the truth about who you are. » ។ តើបងប្អូនមានអារម្មណ៍បំផុសគំនិតឲ្យធ្វើអ្វីដើម្បីធ្វើឲ្យអត្តសញ្ញាណជាបុត្ររបស់ព្រះរបស់បងប្អូន ជាអត្តសញ្ញាណដ៏សំខាន់បំផុតរបស់បងប្អូន ?
សូមមើលផងដែរ « ខ្ញុំជាកូនរបស់ព្រះ » ទំនុកតម្កើង ( ឆ្នាំ១៩៨៥ ) ល.រ. ១៨៨ « Our True Identity » ( វីដេអូ ) នៅលើបណ្ណាល័យដំណឹងល្អ ប្រធានបទ និងសំណួរ « បុត្រាបុត្រីនៃព្រះ » នៅលើបណ្ណាល័យដំណឹងល្អ ។
Our True Identity
ដោយមានជំនួយរបស់ព្រះអម្ចាស់ នោះខ្ញុំអាចតទល់នឹងសាតាំង ។
ដូចជា ម៉ូសេ ១ បង្ហាញយ៉ាងច្បាស់នូវបទពិសោធន៍ខាងវិញ្ញាណដ៏មានអានុភាព មិនមានន័យថា យើងនឹងមិនត្រូវបានល្បួងទៀតនោះទេ ។ ពិតណាស់ ល្បិចកលមួយរបស់សាតាំងគឺល្បួងយើងឲ្យសង្ស័យចំពោះបទពិសោធន៍ទាំងនេះ ។ នៅពេលបងប្អូនអានការឆ្លើយតបរបស់ម៉ូសេទៅកាន់សាតាំងនៅក្នុង ខទី ១២–២៦ តើបងប្អូនរៀនអ្វីខ្លះដែលអាចជួយបងប្អូនឲ្យបន្តមានភក្ដីភាពចំពោះទីបន្ទាល់ដែលបងប្អូនបានទទួល ? តើនៅទីបំផុត អ្វីទៅដែលបានជួយម៉ូសេយកឈ្នះសាតាំង ?
មេរៀនផ្សេងទៀតចេញពីបទពិសោធន៍របស់ម៉ូសេគឺថា សាតាំងល្បួងយើង តាមរយៈការក្លែងបន្លំសេចក្ដីពិត និងព្រះចេស្ដារបស់ព្រះ ។ សូមគិតអំពីរបស់ខ្លះៗដែលក្លែងក្លាយ ដូចជារុក្ខជាតិសិប្បនិមិត្ត ឬកូនក្រមុំតុក្កតា ។ តើបងប្អូនអាចដឹងថាវាក្លែងក្លាយដោយរបៀបណា ? បន្ទាប់មក សូមពិចារណាអំពីរបស់ក្លែងក្លាយដែលសាតាំងប្រើសព្វថ្ងៃនេះដើម្បីល្បួងបងប្អូន ។ តើបងប្អូនរៀនអ្វីខ្លះចេញពី ម៉ូសេ ១:១៣–១៨ អំពីរបៀបស្គាល់ និងបដិសេធភាពក្លែងក្លាយរបស់វា ? តើព្រះអម្ចាស់អាចជួយបងប្អូនយ៉ាងដូចម្ដេច ? ( សូមមើល ម៉ូសេ ១:២៤–២៦ ) ។
សូមមើលផងដែរ ម៉ាថាយ ៤:១–១១; ហ្គែរី អ៊ី ស្ទីវ៉ែនសុន « Deceive Me Not » Liahona ខែវិច្ឆិកា ឆ្នាំ២០១៩ ទំព័រ ៩៣–៩៦ « I Am a Son of God » ( វីដេអូ ) នៅលើបណ្ណាល័យដំណឹងល្អ ។
I Am a Son of God
ការរៀនសូត្រនៅគេហដ្ឋានអាចត្រូវបានធ្វើឡើងដោយដាក់ផែនការ ប៉ុន្តែក៏អាចធ្វើឡើងដោយចៃដន្យផងដែរ ។ « ឱកាសបង្រៀននៅក្នុងគ្រួសារ កើតឡើងជារឿយៗក្នុងរបៀបមួយក្រៅផ្លូវការក្នុងគ្រានានាប្រចាំថ្ងៃ—ដូចជាពេលទទួលទានអាហារ ធ្វើការងារផ្ទះ លេងល្បែងកម្សាន្ត [ ឬ ] ធ្វើដំណើរ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ទំព័រ ៣១ ) ។ ឧទាហរណ៍ បន្ថែមពីលើការអានអំពីរបៀបដែលម៉ូសេតទល់នឹងសាតាំងនៅក្នុង ម៉ូសេ ១ បងប្អូនអាចចំណាយពេលមួយភ្លែតនៅពេលអាហារពេលល្ងាចនិយាយជាក្រុមគ្រួសារអំពីរបៀបដែលបងប្អូនទប់ទល់នឹងឥទ្ធិពលរបស់មារសត្រូវ ។
កិច្ចការ និងសិរីល្អរបស់ព្រះគឺដើម្បីជួយខ្ញុំទទួលបានជីវិតដ៏នៅអស់កល្បជានិច្ច ។
បន្ទាប់ពីបានឃើញការនិមិត្តមួយអំពីការបង្កបង្កើតរបស់ព្រះ ម៉ូសេបានទូលទៅព្រះអម្ចាស់ថា « សូមប្រាប់ទូលបង្គំថា … ម្ដេចក៏មានការណ៍ទាំងនេះ » ( ម៉ូសេ ១:៣០ ) ។ តើអ្វីទៅដែលធ្វើឲ្យបងប្អូនមានចំណាប់អារម្មណ៍ទៅលើការឆ្លើយតបរបស់ព្រះអម្ចាស់នៅក្នុង ម៉ូសេ ១:៣១–៣៩ ? តើអ្វីជាភាពខុសគ្នារវាងជីវិតអមតៈ និងជីវិតដ៏នៅអស់កល្បជានិច្ច ? ( សូមមើលTopics and Questions « Eternal Life » នៅលើបណ្ណាល័យដំណឹងល្អ ) ។ តើព្រះយេស៊ូវគ្រីស្ទធ្វើដូចម្តេចដើម្បីនាំមកនូវជីវិតទាំងពីរនេះ ? អ័ប្រាហាំក៏មានការនិមិត្តមួយផងដែរ ដែលបានកត់ត្រានៅក្នុង អ័ប្រាហាំ ៣ ។ តើបងប្អូនរកឃើញអ្វីខ្លះនៅក្នុង ខទី ២៤–២៦ ដែលវាអាចជួយឆ្លើយតបទៅនឹងសំណើរបស់ម៉ូសេ ?
ខ្ញុំបានរស់នៅជាវិញ្ញាណ មុនពេលខ្ញុំកើតនៅលើផែនដី ។
យើងដឹងបន្តិចបន្តួចអំពីជីវិតមុនជីវិតលើផែនដីរបស់យើង ។ ប៉ុន្តែអ្វីដែលយើងដឹងជាច្រើនមកពីការនិមិត្តរបស់អ័ប្រាហាំ អ័ប្រាហាំ ៣:២២–២៨ ។ នៅពេលបងប្អូនអានខគម្ពីរទាំងនេះ សូមធ្វើបញ្ជីនៃសេចក្ដីពិតដែលបងប្អូនរកឃើញ—រួមទាំងសេចក្ដីពិតអំពីខ្លួនបងប្អូន និងអំពីព្រះយេស៊ូវគ្រីស្ទផងដែរ ។ ហេតុអ្វីសេចក្ដីពិតទាំងនេះមានតម្លៃចំពោះបងប្អូន ? តើវាធ្វើឲ្យមានភាពខុសប្លែកអ្វីខ្លះនៅក្នុងជីវិតរបស់បងប្អូន ?
សូមមើលផងដែរ Topics and Questions « Premortal Life » នៅលើបណ្ណាល័យដំណឹងល្អ ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ខ្ញុំជាបុត្ររបស់ព្រះ ។
-
បន្ទាប់ពីយើងអានសារលិខិតរបស់ព្រះជាមួយគ្នានៅក្នុង ម៉ូសេ ១:៤ សូមពិចារណាអនុញ្ញាតឲ្យកូនរបស់បងប្អូនមើលរូបរបស់ពួកគេនៅក្នុងកញ្ចក់ ហើយផ្ដល់សារស្រដៀងគ្នានេះទៅកាន់ខ្លួនរបស់ពួកគេថា ៖ « ខ្ញុំជាកូនរបស់ព្រះ » ។ បន្ទាប់មកពួកគេអាចផ្តល់សារដូចគ្នាទៅវិញទៅមក ៖ « អ្នកគឺជាកូនរបស់ព្រះ » ។ បងប្អូនក៏ប្រហែលជាអាចរករូបភាពមនុស្សផ្សេងៗគ្នាផងដែរ ហើយសុំកូនៗរបស់បងប្អូនឲ្យចង្អុលទៅម្នាក់ៗ ហើយនិយាយ « នេះគឺជាកូនរបស់ព្រះ » ។ សូមចែកចាយជាមួយគ្នាអំពីមូលហេតុដែលបងប្អូនរីករាយដែលបានដឹងថា បងប្អូនជាកូនរបស់ព្រះ ។ តើចំណេះដឹងនេះផ្លាស់ប្តូររបៀបដែលបងប្អូនប្រព្រឹត្តចំពោះខ្លួនឯង និងអ្នកដទៃដោយរបៀបណា ?
-
បងប្អូន និងកូនៗរបស់បងប្អូនអាចប្រៀបធៀបសារលិខិតរបស់ព្រះទៅនឹងម៉ូសេនៅក្នុង ម៉ូសេ ១:៤ ជាមួយសាររបស់សាតាំងនៅក្នុង ខទី ១២ ។ តើបងប្អូនអាចជួយកូនៗរបស់បងប្អូនបែងចែករវាងសារលិខិតរបស់ព្រះចំពោះពួកគេ និងសាររបស់សាតាំងដោយរបៀបណា ?
Moses Sees Jehovah [ ម៉ូសេឃើញព្រះយេហូវ៉ា ] ដោយ យ៉ូសែប ប្រ៊ីកឃី ( សេចក្តីលម្អិត )
ព្រះវរបិតាសួគ៌មានកិច្ចការមួយសម្រាប់ឲ្យយើងធ្វើ ។
-
នៅពេលបងប្អូនអាន ម៉ូសេ ១:៦ ជាមួយកូនៗរបស់បងប្អូន បងប្អូនអាចនិយាយជាមួយពួកគេអំពី « កិច្ចការ » ដែលព្រះមានសម្រាប់ម៉ូសេ ។ សូមពិចារណាប្រើប្រាស់ សៀវភៅរូបភាពដំណឹងល្អ ល.រ. ១៣–១៦ ឬ ដំណើររឿងព្រះគម្ពីរសញ្ញាចាស់ ទំព័រ ៦៤–៨៤ ដើម្បីជួយកូនៗរបស់បងប្អូនឲ្យឃើញពីអ្វីដែលម៉ូសេបានសម្រេចដោយមានជំនួយពីព្រះវរបិតាសួគ៌ ។ តើកិច្ចការអ្វីដែលព្រះមានសម្រាប់ឲ្យយើងធ្វើ ? ( សូមមើលឧទាហរណ៍ គោលលទ្ធិ និងសេចក្តីសញ្ញា ១១:២០ ) ។
ខ្ញុំអាចទប់ទល់នឹងការល្បួងទាំងឡាយរបស់សាតាំង ។
-
នៅពេលបងប្អូនសិក្សា ម៉ូសេ ១:១២–២៦ ជាមួយនឹងកូនៗរបស់បងប្អូន សូមជួយពួកគេរកឃើញនូវអ្វីដែលម៉ូសេបានធ្វើដើម្បីទប់ទល់នឹងសាតាំង ( សូមមើល ខទី ១៣, ១៥, ១៨, ២០–២២, ២៦ ) ។ វាអាចជាការសប្បាយសម្រាប់ពួកគេក្នុងការធ្វើសកម្មភាពដែលពួកគេអាចធ្វើបាន ដើម្បីទប់ទល់នឹងការល្បួង ( ដូចជាការអធិស្ឋាន ការដើរចេញ ឬការសុំជំនួយ ) ។
ខ្ញុំបានរស់នៅជាវិញ្ញាណ មុនពេលខ្ញុំកើតនៅលើផែនដី ។
-
ការដឹងអំពីជីវិតមុនឆាកជីវិតនេះអាចបំផុសគំនិតកូនៗរបស់បងប្អូនឲ្យធ្វើការជ្រើសរើស ដោយផ្អែកទៅលើសេចក្តីពិតដ៏អស់កល្បជានិច្ច ។ ដើម្បីជួយពួកគេរៀនអំពីវា បងប្អូនអាចផ្តល់ឲ្យពួកគេនូវពាក្យ និងឃ្លាគន្លឹះមួយចំនួនដើម្បីស្វែងរក អ័ប្រាហាំ ៣:២២–២៨ ដូចជា « មុនកំណើតលោកិយមកម្ល៉េះ » « វិញ្ញាណ » « ធ្វើផែនដី » និង « សាកល្បង » ។ តើខគម្ពីរទាំងនេះបង្រៀនយើងអ្វីខ្លះអំពីមូលហេតុដែលព្រះវរបិតាសួគ៌បានបញ្ជូនយើងមកផែនដី ?
-
បទចម្រៀងដូចជាបទ « ខ្ញុំនឹងធ្វើតាមផែនការព្រះ » ( សៀវភៅចម្រៀងកុមារ ទំព័រ ៨៦–៨៧ ) អាចបញ្ជាក់បន្ថែមពីអ្វីដែល អ័ប្រាហាំ ៣ បង្រៀន ។ បងប្អូនអាចអញ្ជើញកូនៗរបស់បងប្អូនឲ្យគូររូបភាពដែលត្រូវនឹងពាក្យពេចន៍ទាំងនេះ ។
-
សូមជួយកូនៗរបស់បងប្អូនគិតអំពីស្ថានភាពដែលពួកគេត្រូវជ្រើសរើស ថាតើត្រូវធ្វើ ឬមិនធ្វើតាមអ្វីដែលព្រះបានបង្គាប់ពួកគេឲ្យធ្វើ ( សូមមើល អ័ប្រាហាំ ៣:២៥; សូមមើលផងដែរ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ) ។ សូមទុកពេលឲ្យពួកគេអនុវត្តន៍ឆ្លើយតបដែលអាចមានទៅនឹងស្ថានភាពទាំងនេះ ។ តើព្រះអង្គសង្គ្រោះអាចជួយយើងនៅពេលយើងជ្រើសរើសខុសដោយរបៀបណា ?
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។