« គំនិតដែលត្រូវចងចាំ ៖ វង្សអ៊ីស្រាអែល » ចូរមកតាមខ្ញុំ—សម្រាប់គេហដ្ឋាន និងសាសានចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« វង្សអ៊ីស្រាអែល » ចូរមកតាមខ្ញុំ ៖ ឆ្នាំ២០២៦
គំនិតដែលត្រូវចងចាំ
វង្សអ៊ីស្រាអែល
នៅទីកន្លែងក្នុងទីរហោស្ថានភាគខាងកើតនៃស្រុកកាណាន យ៉ាកុបបានរង់ចាំជួបបងប្រុសភ្លោះរបស់គាត់ អេសាវ ដោយភ័យខ្លាច ។ ពេលចុងក្រោយដែលយ៉ាកុបបានឃើញអេសាវ ប្រមាណជា ២០ ឆ្នាំ មុនអេសាវបានចង់សម្លាប់គាត់ ។ យ៉ាកុបបានចំណាយពេលពេញមួយយប់រសាប់រសល់ ដោយទូលសុំពរជ័យពីព្រះ ។ ដោយសារតែសេចក្ដីជំនឿ ការតស៊ូ និងការតាំងចិត្តរបស់យ៉ាកុប ព្រះបានឆ្លើយការអធិស្ឋានរបស់លោក ។ នៅយប់នោះឈ្មោះរបស់យ៉ាកុបត្រូវបានប្ដូរទៅជាអ៊ីស្រាអែល ជាឈ្មោះមួយដែលមានន័យថា « លោកគង់វង្សនៅជាមួយនឹងព្រះ » ( លោកុប្បត្តិ ៣២:២៨ footnote b ) ។
នៅក្បែរស្ទឹងយ៉ាបុក យ៉ាកុបបានទទួលឈ្មោះ អ៊ីស្រាអែល ។
នេះគឺជាគ្រាដំបូងដែលឈ្មោះ អ៊ីស្រាអែល លេចឡើងនៅក្នុងព្រះគម្ពីរប៊ីប ហើយវាគឺជាឈ្មោះមួយដែលរក្សាទុកនៅក្នុងព្រះគម្ពីរនោះ និងនៅក្នុងប្រវត្តិសាស្ត្រ ។ មិនយូរប៉ុន្មានឈ្មោះនោះត្រូវប្រើសំដៅទៅលើមនុស្សជាច្រើន ។ អ៊ីស្រាអែលមានកូនប្រុស ១២នាក់ ហើយពូជពង្សរបស់ពួកគេត្រូវបានគេស្គាល់ជា « វង្សអ៊ីស្រាអែល » ជា « ពូជអំបូរអ៊ីស្រាអែល » ជា « កូនចៅអ៊ីស្រាអែល » ឬ « សាសន៍អ៊ីស្រាអែល » ។
នៅក្នុងប្រវត្តិសាស្ត្រ កូនចៅអ៊ីស្រាអែលបានភ្ជាប់ទំនាក់ទំនងជាពិសេសទៅនឹងដើមកំណើតរបស់ពួកគេចេញពីពូជអំបូរមួយក្នុងចំណោមពូជអំបូរទាំងដប់ពីរ ។ ត្រកូលរបស់ពួកគេគឺជាផ្នែកដ៏សំខាន់មួយនៃអត្តសញ្ញាណនៃសេចក្ដីសញ្ញារបស់ពួកគេ ។ សាវកប៉ុលបានប្រកាសថា លោកគឺជា « ពូជអំបូរបេនយ៉ាមីន » ( រ៉ូម ១១:១ ) ។ មូលហេតុមួយដែលលីហៃបានចាត់កូនៗរបស់លោកទៅកាន់ទីក្រុងយេរូសាឡិមដើម្បីទៅយកផ្ទាំងលង្ហិន គឺដោយសារផ្ទាំងទាំងនោះមាននូវ « ពង្សាវតាររបស់ពួកអយ្យកោលោក » ( នីហ្វៃទី១ ៥:១៤ ) ។ លីហៃបានរកឃើញថា លោកគឺជាពូជពង្សរបស់យ៉ូសែប ហើយការយល់ដឹងរបស់ពូជពង្សលោកស្ដីពីទំនាក់ទំនងរបស់ពួកគេទៅនឹងវង្សអ៊ីស្រាអែលបានបង្ហាញពីសារៈសំខាន់ទៅកាន់ពួកគេនៅឆ្នាំខាងមុខ ។
នៅក្នុងសាសនាចក្រសព្វថ្ងៃនេះ អ្នកប្រហែលជាឮអំពីអ៊ីស្រាអែលនៅក្នុងឃ្លាដូចជា« ការប្រមូលផ្តុំពួកសាសន៍អ៊ីស្រាអែល » ។ យើងច្រៀងអំពី « ព្រះនៃអ៊ីស្រាអែល » « សង្ឃឹមអ៊ីស្រាអែល » និង « ពួកអែលឌើរនៃអ៊ីស្រាអែល » ។ នៅក្នុងករណីទាំងនេះ យើងពុំមែនកំពុងនិយាយ ឬកំពុងច្រៀងអំពីនគរអ៊ីស្រាអែលពីបុរាណ ឬប្រជាជាតិសម័យទំនើបដែលហៅថាអ៊ីស្រាអែលតែនោះទេ ។ ផ្ទុយទៅវិញ យើងកំពុងសំដៅទៅលើមនុស្សដែលត្រូវបានប្រមូលផ្ដុំមកពីប្រជាជាតិនានាជុំវិញពិភពលោកចូលមកក្នុងសាសនាចក្រនៃព្រះយេស៊ូវគ្រីស្ទ ។ យើងកំពុងសំដៅទៅលើមនុស្សដែលគង់វង្សនៅជាមួយនឹងព្រះ ដែលខិតខំស្វែងរកព្រះពររបស់ទ្រង់ដោយស្មោះសរ និងអ្នកដែលបានក្លាយជារាស្ត្រនៃសេចក្ដីសញ្ញារបស់ទ្រង់តាមរយៈពិធីបុណ្យជ្រមុជទឹក ។ នៅក្នុងប្រសាសន៍របស់ប្រធាន រ័សុល អិម ណិលសុន ដើម្បីធ្វើជាអ៊ីស្រាអែលមានន័យថា « ទុកឲ្យព្រះឈ្នះនៅក្នុងជីវិតរបស់យើង … ទុកឲ្យព្រះមានឥទ្ធិពលខ្លាំងបំផុតនៅក្នុងជីវិតរបស់យើង » ។
ពរលោកអយ្យកោរបស់អ្នកប្រកាសពីទំនាក់ទំនងរបស់អ្នកទៅនឹងពូជអំបូរមួយនៃវង្សអ៊ីស្រាអែល ។ ការណ៍នោះគឺលើសពីផ្នែកមួយដ៏គួរឲ្យចាប់អារម្មណ៍នៃពង្សប្រវត្តិទៅទៀត ។ វាក៏ទាក់ទងនឹងបច្ចុប្បន្ន និងអនាគតរបស់បងប្អូនផងដែរ ។ ការធ្វើជាផ្នែកមួយនៃវង្សអ៊ីស្រាអែលមានន័យថា បងប្អូនមានទំនាក់ទំនងនៃសេចក្ដីសញ្ញាមួយជាមួយនឹងព្រះវរបិតាសួគ៌ និង ព្រះយេស៊ូវគ្រីស្ទ ។ វាមានន័យថា បងប្អូនដូចគ្នានឹងអ័ប្រាហាំដែរ គឺជាមធ្យោបាយដើម្បី « ធ្វើជាទីបញ្ចេញពរ » ដល់កូនចៅរបស់ព្រះ ( លោកុប្បត្តិ ១២:២; អ័ប្រាហាំ ២:៩–១១ ) ។ តាមពាក្យពេចន៍របស់ពេត្រុស វាមានន័យថា « អ្នករាល់គ្នាជាពូជជ្រើសរើស ជាពួកសង្ឃហ្លួង ជាសាសន៍បរិសុទ្ធ ជារាស្ត្រដ៏ជាកេរ្តិ៍អាករនៃព្រះ ដើម្បីឲ្យអ្នករាល់គ្នាបានសម្តែងចេញ ឲ្យឃើញអស់ទាំងលក្ខណៈរបស់ព្រះ ដែលទ្រង់បានហៅអ្នករាល់គ្នាចេញពីសេចក្តីងងឹត មកក្នុងពន្លឺអស្ចារ្យរបស់ទ្រង់ » ( ពេត្រុស ទី១ ២:៩ ) ។ វាមានន័យថា បងប្អូន « ទុកឲ្យព្រះឈ្នះ »—ថាបងប្អូនគឺជាអ្នកដែល « គង់វង្សជាមួយនឹងព្រះ » នៅពេលបងប្អូនគោរពសេចក្ដីសញ្ញារបស់បងប្អូនជាមួយនឹងទ្រង់ ។
Family Tree of Jacob (Israel) [ មែកធាងគ្រួសាររបស់យ៉ាកុប ( អ៊ីស្រាអែល ) ] ដោយ ប្រីនធ៍ អ៊ីវ៉ានស៍