Kenese 6–11; Mose 8

Pe o e vaai i se mea i le faamatalaga o aso o Noa e foliga mai e talitutusa ma tulaga o o tatou aso? Ae faapitoa lava, tagai i le Mose 8:15–24, 28. O a ni autu o e vaaia o loo toe faia foi?

O se tasi o mea taua e tutusa ai o le a e vaaia o le valaauina lea e le Atua o Noa e avea ma perofeta, ma ua Ia valaauina foi se perofeta i aso nei. Mafaufau e fai se lisi o upumoni ua e aoaoina e uiga i perofeta mai le Mose 8:13–30. E faapefea ona pei lo tatou perofeta soifua o Noa? Ioe, e le o lapataia e le perofeta a le Alii i aso nei se Lolo pe valaaulia i tatou e fesoasoani e fausia se vaa. Ae o le a le mea o loo ia lapataia ai i tatou? Ma o le a le mea o loo ia valaaulia i tatou e fai? Ina ia fesoasoani e tali nei fesili, e mafai ona e iloiloina se mataupu mai Aoaoga a Peresitene o le Ekalesia i le Potutusi o le Talalelei, aemaise lava le vaega “Valaaulia ma Faamanuiaga Folafolaina”. Atonu e mafai ona e filifilia se lapataiga se tasi ma se valaaulia se tasi e foliga mai e sili ona taua ia te oe.

Na aoao mai Elder Allen D. Haynie, “Ua filifilia e le Tama oi le Lagi le mamanu o le faaalia mai o upumoni i Ana fanau e ala mai i se perofeta” (“O Se Perofeta Soifua mo Aso e Gata Ai,” Liahona, Me 2023, 25). Mafaufau e suesue le savali a Elder Haynie, ma vaavaai mo mafuaaga o le i ai o se perofeta o se faailoga lea o le alofa o le Tama Faalelagi. Na faapefea ona fesoasoani le mulimuli i le perofeta a le Alii ia te oe e lagona ai le saogalemu o le ola ai i aso e gata ai?

Tagai foi i Autu ma Fesili, “Perofeta,” Potutusi o le Talalelei; “Why Do We Have Prophests?” (vitio), Potutusi o le Talalelei.

1:37

O nisi tagata e tau mafaufau e uiga i le faamasinoga tonu o le Atua i le auina mai o se lolo e “soloieseina i le fogaeleele tagata” (Kenese 6:7). Na faamalamalama mai e Elder Neal A. Maxwell e faapea, i le taimi o le Lolo Tele, “na oo ai faiga pi’opi’o i se tulaga e faatamaia ai le faitalia lea e le mafai ai, i le faamasinoga tonu, ona auina mai agaga iinei” (We Will Prove Them Herewith [1982], 58). Atonu foi e te mafaufau pe na faapefea ona avea le Lolo Tele ma se faatinoga o le alofa mutimutivale. O le a se mea e te maua i le Kenese 6:5–13 o loo faaalia ai le alofa mutimutivale ma le alofa o le Alii mo tagata?

E tusa ai ma le Kenese 9:8–17, o le a le mea e mafai ona faamanatu atu e se nuanua ia te oe? O le a se mea ua faaopoopo atu e le Faaliliuga a Iosefa Samita, Kenese 9:21–25 (o loo i le faaopoopoga o le Tusi Paia) i lou malamalama? Atonu foi e te mafaufau e fai se lisi o isi mea (e pei o faatusa, mea faitino, po o soo se isi lava mea) ua tuuina mai e le Atua ia te oe e faamanatu atu ai ia te oe au feagaiga. O le a se mea o aoao atu e nei mea ia te oe? E faapefea ona fesoasoani ia mea ia te oe ina ia e manatua ai?

Tagai foi i le Gerrit W. Gong, “Ia Manatua Pea o Ia,” Liahona, Me 2016, 108–11; “Ifo Mai ia Nei Outou,” Viiga. nu. 103.

O le tala i tagata o Papelu na fauina se olo ua tuuina mai ai se faatusatusaga malie i le tala ia Enoka ma ona tagata i le fausiaina o Siona, lea na outou suesueina i le vaiaso talu ai. Na taumafai vaega uma e lua ia oo atu i le lagi ae e eseese auala. Na faapefea ona maua e tagata o Siona le lagi? (tagai i le Mose 7:18–19, 53, 62–63, 69). O le a se mea ua e aoaoina mai i le Kenese 11:1–9 ma le Helamana 6:26–28 e uiga i tagata o Papelu? O le a se mea ua tatou aoao mai i lenei mea e uiga ia tatou lava taumafaiga e toe foi atu i le afioaga o le Atua? O le a le mea ua aumaia e le Atua e fesoasoani ia i tatou e “o a’e ai i le lagi”? Kenese 11:4; tagai foi i le Ioane 3:16).

• O le toatele o tamaiti e fiafia i le tala ia Noa ma le vaa. Mafaufau e tuu atu i lau fanau ni avanoa e faasoa mai ai mea latou te iloa e uiga i ai. Ina ia fesoasoani ia i latou, e mafai ona e faaaogaina ata o loo i lenei otootoga, “Noa ma Lona Aiga” i Tala o le Feagaiga Tuai (22–25), ma le fuaiupu lona tolu o le “Mulimuli i le Perofeta” (Tusipese a Tamaiti, 58). Atonu e ono fiafia lau fanau e faatino vaega o le tala—mo se faataitaiga, e ala i le faafoliga e faaaoga se mea faigaluega e fau ai le vaa po o le savavali e pei o manu e ulu atu i le vaa.

• A o outou talanoa faatasi e uiga ia Noa, fesoasoani i lau fanau ia iloa le faamanuiaina o i tatou i le i ai o se perofeta a le Atua i aso nei. Fesoasoani i lau fanau e sue i le Mose 8:16–24 e saili ai mea na aoao atu e Noa o loo aoao mai pea lava e perofeta a le Alii i aso nei. E faapefea ona faamanuiaina i tatou pe a tatou usiusitai i ia aoaoga?

• Atonu e fiafia lau fanau e tusi pe valivali se nuanua a o outou talanoa i mea ua faatusa i ai (tagai Faaliliuga Iosefa Samita, Kenese 9:21–25 [i le vaega faaopoopo o le Tusi Paia]). O le a le mea na finagalo le Atua e mafaufau i ai Noa ma lona aiga i soo se taimi lava latou te vaai ai i se nuanua?

• E mafai foi ona e faaali atu i lau fanau sau mea o i ai lea e faamanatu atu ai ia te oe se mea taua i lou olaga, e pei o se mama faaipoipo, o se ata, po o se api talaaga. Tuu atu i lau fanau e faasoa mai a latou lava faataitaiga. Atonu e ono taitai atu ai i se talanoaga i mea ia e fesoasoani tatou te manatua ai a tatou feagaiga, e pei o le faamanatuga, lea e fesoasoani tatou te manatua ai a tatou feagaiga o le papatisoga e mulimuli ia Iesu Keriso (tagai i le Mataupu Faavae ma Feagaiga 20:75–79).

• Atonu e mafai ona malie le fausia o se olo mai poloka po o isi mea faitino faatasi ma lau fanau. A o e faia faapea, faamatala atu na manatu tagata Papelu e mafai ona latou oo atu i le lagi e ala i le fausiaina o se olo maualuga. Ona mafai lea ona outou vaai faatasi i se ata o le Faaola ma fesili atu i lau fanau pe faapefea ona Ia fesoasoani ia i tatou ia oo atu i le lagi. Ona mafai lea ona outou talanoa i le tasi ma le isi e uiga i mea e mafai ona outou faia e mulimuli ai i le Faaola.

• E le gata i le faitauina o le tala i le olo o Papelu i le Kenese 11:1–9, e mafai foi e oe ma lau fanau ona faitau le Helamana 6:28. I le fuaiupu lenei, aisea na fau ai e tagata o Papelu le olo? Aisea e avea ai le fausia o lenei olo o se auala sese e tau atu i le lagi? Ona mafai lea ona outou suesue le 2 Nifae 31:20–21 ma le Helamana 3:28 e maua ai le auala sao e tau atu i le lagi. O le a se fautuaga tatou te avatu i tagata o Papelu?