“Manatu e Nofouta i Ai: O le Feagaiga,” Sau, Mulimuli Mai ia te A’u—Mo Aiga ma le Ekalesia: Feagaiga Tuai 2026 (2026)
“O le Feagaiga,” Sau, Mulimuli Mai ia te A’u: 2026
Manatu e Nofouta i Ai
O le Feagaiga
I le Feagaiga Tuai atoa, o le a tele lava ina e faitau ai i le upu feagaiga. O aso nei e masani lava ona tatou mafaufau i feagaiga o ni folafolaga paia ma le Atua, ae i le lalolagi anamua, o feagaiga sa avea foi ma se vaega taua o fegalegaleaiga ma le tasi ma le isi. Mo lo latou saogalemu ma le ola, sa manaomia e tagata ona mafai ona talitonuina e le tasi le isi, ma o feagaiga sa o se auala lea e faamausaliina ai lena talitonuina.
O lea la, ina ua fetalai atu le Atua ia Enoka, Noa, Mose, ma isi e uiga i feagaiga, sa Ia valaauliaina i latou ia ulu atu i se sootaga o le talitonuina faatasi ma Ia. Tatou te ta’ua lenei feagaiga o le feagaiga fou ma tumau-faavavau po o le feagaiga faa-Aperaamo—o se faasino i le feagaiga na osia e le Atua ma Aperaamo ma Sara ona faafouina lea faatasi ma le la fanau o Isaako ma Iakopo (ua ta’ua foi o Isaraelu). I le Feagaiga Tuai, sa lauiloa lava o “le feagaiga.” O le a e iloa ai e faapea o le Feagaiga Tuai e faatatau lava i le tala i tagata o e na manatu o i latou lava o suli o lenei feagaiga—o tagata o le feagaiga.
O le feagaiga faa-Aperaamo o loo faaauau pea ona ta’ua i aso nei, aemaise lava i le Au Paia o Aso e Gata Ai. Aisea? Ona o i tatou foi o tagata o le feagaiga, tusa lava pe o tatou o ni suli moni o Aperaamo; Isaako, ma Iakopo pe leai. Ona o le mafuaaga lea, e taua ai le malamalama po o le a le feagaiga faa-Aperaamo ma pe faapefea ona faaaoga ia i tatou i aso nei.
O le A le Feagaiga faa-Aperaamo?
Na manao Aperaamo ia “avea o se soo sili atu o le amiotonu” (Aperaamo 1:2), o le mea lea na valaaulia ai o ia e le Atua i se sootaga o se feagaiga. E le o Aperaamo na muamua i ai lenei manaoga, ma e le o ia foi na muamua maua se feagaiga. O le mea a ia, o se feagaiga tumau-faavavau lava lea. Na saili Aperaamo mo “faamanuiaga a tamā” (Aperaamo 1:2)—faamanuiaga na tuuina atu e ala i le feagaiga ia Atamu ma Eva ma mulimuli ane ia i latou na saili i ia faamanuiaga ma le filiga.
O le feagaiga a le Atua ma Aperaamo na folafolaina atu ai ni faamanuiaga matagofie: o lo latou tofi o le laueleele, o ni fanau se toatele, o le mauaina o sauniga o le perisitua, ma se igoa o le a faamamaluina e augatupulaga e mulimuli mai. Ae o le taulaiga o lenei feagaiga sa le na o faamanuiaga o le a maua e Aperaamo ma lona aiga ae o faamanuiaga foi o le a i ai i fanau uma a le Atua. “E manuia foi oe,” ua fetalai mai ai le Atua, “e manuia foi ia te oe o aiga uma o le lalolagi” (Kenese 12:2–3).
Na tuuina atu ea e lenei feagaiga ia Aperaamo, Sarai ma i latou o e tupuga mai ai se tulaga aloaia i le fanau a le Atua? Ua na’o i le faauigaga o se avanoa e faamanuia ai isi. O le aiga o Aperaamo e tatau ona latou “tauaveina i o latou lima lenei auaunaga ma le Perisitua i atunuu uma,” faasoa atu “faamanuiaga lava o le Talalelei, o faamanuiaga ia o le olataga, o le ola faavavau lava” (Aperaamo 2:9, 11). O le avea ai ma tagata o le feagaiga a le Atua e le faapea ai ua sili atu i latou nai lo isi; o lona uiga sa i ai so latou tiute e fesoasoani i isi ia lelei atili.
O lenei feagaiga o le faamanuiaga lea na mo’omo’o i ai Aperaaamo. Ina ua [ia] mauaina, na faapea ifo Aperaamo i lona loto, “Ua saili atu lau auauna ia te oe ma le naunau lava; o lenei ua ou maua oe” (Aperaamo 2:12).
O le afe ma afe o tausaga ua tuanai lena, ae o lenei feagaiga ua toefuataiina mai i o tatou aso nei. Ma o loo faataunuuina i le taimi nei i olaga o tagata o le Atua. O le faataunuuina o le feagaiga ua faatupulaia le mana ma agai ina malosi atili i aso e gata ai, a o agaigai i luma le galuega a le Atua, i le faamanuiaina o aiga i lalolagi atoa. Ma o soo se tagata, e pei o Aperaamo, e manao ia avea o se soo sili atu o le amiotonu—o soo se tasi o loo sailia ma le filiga le Alii—e mafai ona avea ma se vaega o lena mea.
O le A le Uiga o le Feagaiga faa-Aperaamo ia te Au?
O oe o se afafine/atalii o le feagaiga. E te osia se feagaiga ma le Atua pe a papatisoina oe ma pe a e taumafa i le faamanatuga. Ma e te maua le atoatoaga o le feagaiga faatasi ai ma sauniga paia o le malumalu.
E ala mai i nei feagaiga ma sauniga, tatou te avea ai ma tagata o le Atua. Ua noatia i tatou ia te Ia ma “ni fusi e faavavau.” “O le taimi lava tatou te osia ai se feagaiga ma le Atua,” na aoao mai ai Peresitene Russell M. Nelson, “tatou te tuua loa ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. … Ona o la tatou feagaiga ma le Atua, o le a lē pa’u ai lava o Ia i Ana taumafaiga e fesoasoani ia i tatou, ma o le a tatou le faaumaina Lona onosai alofa mutimutivale ia i tatou.” O le a e vaaia lenei mea i le talafaasolopito o tagata o le feagaiga a le Atua i le Feagaiga Tuai, ma o le a e vaaia i lou lava olaga o se tasi o Ana fanau o le feagaiga.
Be Not Afraid [Aua Le Fefe], saunia e Dan Wilson
O le malamalamaaga matagofie lenei ua foai mai ia i tatou ona o le Toefuataiga o le feagaiga faa-Aperaamo e tauala mai i le Perofeta o Iosefa Samita. Afai la e te faitau e uiga i feagaiga i le Feagaaiga Tuai, aua e te mafaufau na o le sootaga a le Atua ma Aperaamo, Isaako ma Iakopo. Mafaufau foi e uiga i le lua sootaga ma Ia. A e faitau e uiga i le folafolaga o fanau e le mafaitaulia, aua le mafaufau tau na o le miliona o e ua valaauina Aperaamo o lo latou tamā. Mafaufau foi i le folafolaga a le Atua ia te oe e uiga i aiga e faavavau ma le faatupulaia e faavavau. A e faitau e uiga i le folafolaga o se eleele o le tofi, aua le mafaufau i le na o le eleele na folafolaina atu ia Aperaamo. Mafaufau foi i le taunuuga faaselesitila o le lalolagi lava ia—o se tofi ua folafola mai i e “agamalu” o e “faatalitali i le Alii” (Mataio 5:5; Salamo 37:9, 11). Ma a e faitau e uiga i le folafolaga o le a faamanuiaina e tagata o le feagaiga a le Atua “aiga uma o le lalolagi” (Aperaamo 2:11), aua le mafaufau i na o galuega a Aperaamo po o perofeta o e na tupuga mai ia te ia. Mafaufau foi e uiga i le mea e mafai ona e faia—o se soo osifeagaiga a Iesu Keriso—e avea o se faamanuiaga ia i latou o loo siomia oe.