Mose 7

Ina ua faatoa aoao le Perofeta o Iosefa Samita e uiga ia Enoka ma lona Aai Paia, sa musuia o ia. Sa ia “iloa ua oo mai le aso o le a toe faatuina ai e le Alii Siona i luga o le fogaeleele” (Au Paia, 1:108–9), ma sa ia amataina se sailiga i le olaga atoa e fausia Siona. O le faitauina o le Mose 7 e mafai ona musuia ai oe e faaauau lena taumafaiga i le asō.

E mafai ona e amata i le suesueina o fesili “O le a Siona?” ma le “E faapefea ona ese mai le lalolagi atoa?” Mafaufau e lisi tali e oo mai ia te oe a o e suesueina le Mose 7, e faapitoa lava fuaiupu 16–21, 27, 53, 62–69.

O au tali i nei fesili atonu e faamanino mai ai o loo tele pea a tatou galuega e fai e fausia ai Siona. O lea, e faapefea la ona tatou fausia Siona? Atonu e fesoasoani le mafaufau i taimi na e lagona ai sa “tasi o [le] loto ma tasi le mafaufau” ma se tasi (Mose 7:18). Atonu sa i ai i totonu o se uarota, aiga, po o se vaega i le galuega po o le aoga. O le a se mea na faia e tagata e fatu ai le lotogatasi amiotonu?

O nisi nei o punaoa e mafai ona e suesueina e saili ai manatu ma musumusuga. Filifili se tasi pe sili atu e suesue ai, ona tusi lea i lalo o mea ua e lagonaina ua musuia e fai e fausia ai Siona:

• Filipi 2:1–4; 4 Nifae 1:15–18; ; Mataupu Faavae ma Feagaiga 97:21; 105:5.

• Ulisses Soares, “Uso e ma Tuafafine ia Keriso,” Liahona, Nov. 2023, 70–73.

• D. Todd Christofferson, “Tasi ia Keriso,” Liahona, Me 2023, 77–80.

O le a le uiga ia te oe o le avea o Iesu Keriso ma ou Tupu? Matau isi faalagiga o Iesu Keriso i lenei fuaiupu. O a ni mea ua latou aoao mai ia te oe e uiga ia te Ia? O le a sou manatu i le uiga o le sau “i totonu i le faitotoa ma a’e mai i luga e ala ia te [Ia]”?

Tagai foi i le “Le Tupu o tupu, Afio Mai,” Viiga, nu. 25.

O nisi tagata e vaai atu i le Atua o se tagata e mamao ese ma e leai ni [Ona] aafiaga faalelagona i mea e tutupu ia i tatou. Na ese le vaaiga a Enoka i le Atua i le faaaliga o loo faamauina i le Mose 7. O le a se mea na ia aoaoina e uiga i le Atua—ma o le a se mea ua e aoaoina—i fuaiupu 28–40? Aisea e te manatu na faateia ai Enoka i le vaai atu i le tutulu o le Atua? Aisea e taua ai mo oe le iloa e tutulu o Ia?

A o faaauau pea le faaaliga, sa tagi foi Enoka. Ae na faasoa mai fo’i e le Atua iā te ia māfuaaga e olioli ai. Vaavaai mo na mea i le Mose 7:41–69. O le a se mea ua e aoaoina mai le faaaliga vaaia a Enoka e mafai ona fesoasoani ia te oe e “sii a’e lou loto, ma fiafia,” e ui lava i “faanoanoaga” i lou olaga (fuaiupu 44)?

Tagai foi i le Jeffrey R. Holland, “O Le Silisiliese o le Atua,” Liahona, Nov. 2003, 70–73.

O le faaaliga vaaia a Enoka, aemaise lava o mea o loo faamaumauina i le Mose 7:59–67, o se tasi lea o uluai valoaga o le talafaasolopito e uiga i le Afio Mai Faalua o le Faaola. O le a se mea e faagaeetia ai oe i le auala o loo faamatala ai e nei fuaiupu aso e gata ai? Mo se faataitaiga, mafaufau pe o le a sou lagona i le faataunuuina o valoaga mai le fuaiupu e 62 . O a ni mea ua aoao mai ia te oe e nei fuaitau e uiga i le galuega a le Atua i aso e gata ai?

Tagai foi i le Henry B. Eyring, “Tuafafine i Siona,” Liahona, Nov. 2020, 67–69.

• O le a le uiga o le faapea, “o fanau a Kaino sa uli?”

• O le a le uiga e faapea, “ua fasia le Tamai Mamoe mai le faavaega o le lalolagi”?

• E faapefea e le Faaliliuga a Iosefa Samita ona faaleleia lo tatou malamalama i le feagaiga a le Atua ma Enoka ma Noa?

Kiliki e vaai i isi mea.

• Ina ia fesoasoani i lau fanau e aoao e uiga ia Enoka ma Siona, e mafai ona e faaaogaina le “Enoka le Perofeta” i le Tala o le Feagaiga Tuai (19–21) po o le fuaiupu lona lua o le “Mulimuli i le Perofeta” (Tusipese a Tamaiti, 58–59). Ona mafai lea ona e fai atu i lau fanau e fesoasoani ia te oe e toe faamatala le tala i a latou lava upu. E ono fesoasoani ata o Enoka i lenei otootoga.

• O se tasi lenei o auala e fesoasoani ai i lau fanau ia malamalama i le uiga o le “tasi o latou loto ma tasi le mafaufau” (Mose 7:18): Fai se fatu pepa ma tipi i ni fasipepa, ia lava mo tamaiti taitasi e maua ai se fatu. Tuu atu ia i latou e tusi o latou igoa i luga o a latou fasi pepa ma galulue faatasi e tuufaatasi le fatu. A o latou faia o lea, atonu e te manao e talanoa e uiga i mea e te fiafia i ai e uiga i tamaiti taitasi.

• Fesoasoani atu i lau fanau e faitau pe faafia ona i ai le upu “Siona” i le Mose 7:18–21, 62–63, 68–69. O taimi uma lava latou te maua ai le upu, fesoasoani ia i latou e iloa ai le mea o loo fai mai ai le fuaiupu e uiga ia Siona (tagai foi i le Taiala i Tusitusiga Paia, “Siona,” Potutusi o le Talalelei). E mafai faapefea ona avea atili i tatou e pei o tagata o loo faamatalaina i nei fuaiupu?

• Ina ia faalauiloa atu le Mose 7:32–33 i lau fanau, atonu e mafai ona e talanoa atu ia i latou e uiga i se filifiliga sa tatau ona latou faia talu ai nei. Ona mafai lea ona outou faitauina faatasi fuaiupu e iloa ai po o le a le mea e finagalo le Tama Faalelagi tatou te filifili i ai. O a filifiliga e mafai ona tatou faia e faaali atu ai ua tatou filifilia o Ia? Atonu e mafai ona feauauai lau fanau e faatino se tasi o nei filifiliga ae mate mai e isi le mea e faatusa i ai le faatinoga.

• I le Mose 7:59, ua fesili atu ai Enoka i le Alii. Valaaulia lau fanau e su’e, ona fai atu lea ia i latou e su’e le tali i le fuaiupu e 60. E mafai foi ona e talanoa ma i latou e uiga i se taimi na latou faamoemoe ai e toe foi mai se tasi i le fale. Fesili atu ia i latou po o a o latou lagona ma mea na latou faia ina ia saunia ai. E mafai faapefea ona tatou saunia mo le toe foi mai o Iesu?

• Mafaufau e faaali atu ata o taimi na faaali mai ai le Faaola i tagata (e pei o Tusi Ata o le Talalelei, nu. 60, 82, 83, ma le 84). O a mea a tagata o loo fai i ata? Faamata o a ni lagona o tagata ina ua latou feiloai ia Iesu? E mafai foi ona outou usuina se pese e uiga i le Afio Mai Faalua o le Faaola, e pei o le “Pe A Ia Toe Afio Mai” (Tusipese a Tamaiti, 46), ma fesili atu i tamaiti pe o le a so latou manatu pe o le a faapeī pe a toe afio mai Iesu. Tuu atu i tamaiti e faasoa mai o latou lagona e uiga i le vaai atu ia Iesu pe a toe afio mai o Ia.