1. Mósebók 5; HDP Móse 6

Hvað lærið þið við lestur HDP Móse 6:26–36 um áhrif syndar? Hvernig hafið þið greint þessi áhrif? Hvaða eiginleika hafði Enok sem hjálpuðu honum að sigrast á þessum áhrifum? Hvernig blessaði Guð hann í kjölfarið?

Ef ykkur hefur einhvern tíma fundist það yfirþyrmandi sem Drottinn hefur kallað ykkur til að gera, þá eruð þið ekki ein um það. Meira að segja Enok upplifði það þegar Drottinn kallaði hann sem spámann. Þegar þið lesið HDP Móse 6:26–36, gætið þá að ástæðu þess að það þyrmdi yfir Enok og hvað Drottinn sagði til að telja í hann kjark.

Í versum 37–47 gætuð þið leitað að því hvernig Drottinn veitti Enok styrk og efldi hann til að gera verk sitt (sjá einnig HDP Móse 7:13). Þið gætuð borið upplifun Enoks saman við aðra spámenn sem fundu fyrir vanmætti, eins og Móse (sjá 2. Mósebók 4:10–16), Jeremía (sjá Jeremía 1:4–10), Nefí (sjá 2. Nefí 33:1–4) og Moróní (sjá Eter 12:23–29). Hvað finnst ykkur Guð vilji að þið lærið í þessum ritningargreinum um verkið sem hann hefur falið ykkur?

Margir nútíma spámenn og postular hafa tjáð álíka tilfinningar og Enok gerði, er þeir hafa lýst því hvernig þeim leið við köllun þeirra. Sjá t.d. vitnisburð öldungs Ulisses Soares í „Spámenn tala með krafti heilags anda“ (aðalráðstefna, apríl 2018).

Hvað getið þið lært af þessum spámönnum og postulum um vanmáttartilfinningar ykkar? Hvenær hafið þið fundið frelsarann hjálpa ykkur þegar hann bauð ykkur að gera erfiða hluti? Íhugið að skrifa niður nokkrar atburði í framtíðinni þar sem þið munið þurfa að reiða ykkur á hjálp frelsarans. Hvernig getið þið tekist á við þessa atburði með trú á Jesú Krist?

Sjá einnig David A. Bednar, „Þú munt vera í mér og ég í þér. Gakk þess vegna með mér,“ aðalráðstefna, apríl 2023; „Ég fer hvert sem vilt að ég fari,“ Sálmar, nr. 104.

Þar sem við höfum Bók Móse, vitum við að Guð hefur kennt börnum sínum alveg frá upphafi hvernig finna má endurlausn. Leitið að því sem við þurfum að vita og gera til að endurleysast, við lestur HDP Móse 6:48–68. Gætið að spurningu Adams í versi 53. Hafið þið einhvern tíma velt henni fyrir ykkur? Hvað lærið þið af svari Drottins í versum 53–65? Þið gætuð hugsað um þessi vers sem boðskap Drottins við skírnarathöfn Adams. Hvað lærið þið um skírnina í boðskap hans? Af hverju haldið þið að hann hafi líkt skírn við að „endurfæðast“? (vers 59). Hvað getum við gert til að halda áfram að „endurfæðast“ ævina á enda?

Eftir að hafa kennt Adam sannleika fagnaðarerindis Jesú Krists í HDP Móse 6:51–63, bauð Drottinn Adam að kenna þetta kynslóðum framtíðar. Íhugið að búa til lista yfir þennan sannleika. (Gagnlegt gæti verið að skipta versunum í litla hópa, t.d. vers 51–52, 53–57, 58–60, 61–63). Af hverju er þessi sannleikur mikilvægur hinni upprennandi kynslóð okkar tíma? Hvað annað getum við lært af boði Drottins til foreldra í Mósía 4:14–15 og Kenningu og sáttmálum 68:25–28; 93:40–50?

Að lesa um „minningabók“ sem fjölskylda Adams og Evu hélt, gæti uppörvað fjölskyldur ykkar til að halda eigin minningabók. Hvað finnst ykkur að Drottinn vilji að þið hafið þar með? Íhugið að vista upplýsingar úr minningabók ykkar á FamilySearch.org.

Sjá einnig Dieter F. Uchtdorf, „Jesús Kristur er styrkur foreldra,“ aðalráðstefna, apríl 2023; „Parenting: Touching the Hearts of Our Youth,“ „But Why?“ (myndbönd), Gospel Library.

• Þegar Enok var kallaður til að prédika fagnaðarerindið, hafði hann áhyggjur af því að honum myndi mistakast. En Guð hjálpaði honum. Lesið þessa frásögn saman í HDP Móse 6:26–34 (sjá einnig „Spámaðurinn Enok“ í Sögur úr Gamla testamentinu, 19–21). Af hverju fannst Enok hann ekki geta prédikað fagnaðarerindið? (sjá HDP Móse 6:31). Hvernig hjálpaði Guð Enok? (sjá HDP Móse 6:32–34; 7:13).

• Börn ykkar gætu notið þess að miðla eða leika önnur dæmi um það hvernig Guð hjálpaði fólki að gera erfiða hluti – t.d. Nóa, Davíð, Ammon eða Lamanítann Samúel (sjá Trúarmyndabók, nr. 7, 19, 78, 81). Þið gætuð líka miðlað eigin reynslu og látið börn ykkar tala um það hvernig Guð hjálpar þeim að gera erfiða hluti.

• Guð kenndi Adam það sem við þurfum að gera til að snúa aftur til hans – hafa trú á Jesú Krist, iðrast, láta skírast og meðtaka gjöf heilags anda. Hjálpið börnum ykkar að finna þessar reglur í HDP Móse 6:52, 57. Þið gætuð síðan hjálpað þeim að skrifa stutta ræðu um eina regluna. Hver ræða gæti innihaldið ritningarvers úr HDP Móse 6, upplifun og vitnisburð. Látið þau miðla hvert öðru ræðum sínum.

• Þið gætuð líka sýnt myndir sem tákna frumreglur fagnaðarerindisins (sjá fjórða trúaratriðið). Setjið þær í röð sem leiðir þau að mynd af Jesú Kristi. Þegar þið lesið HDP Móse 6:52, gætu börn ykkar staðið við hlið réttrar myndar þegar þau heyra orðin sem myndin táknar.

• Börn ykkar gætu notið þess að syngja söngva sem kenna reglurnar í HDP Móse 6:52, t.d. „Trú,“ „Þegar ég skírist“ og „Heilagur andi“ (Barnasöngbókin, 50, 53, 56). Hjálpið þeim að finna þessar reglur í HDP Móse 6:52.

• Til að hvetja börn ykkar til að styðja ykkur sem foreldra í hlutverki trúarkennara, íhugið þá að biðja barn að lesa HDP Móse 6:58 og bera kennsl á boðorðið sem Guð gaf foreldrum. Þið gætuð síðan sýnt mynd af Adam og Evu við að kenna börnum sínum (eins og þá sem er aftast í þessum lexíudrögum) og látið börn ykkar ræða um það sem þau sjá á myndinni. Börn ykkar gætu teiknað myndir af fjölskyldu sinni lesandi ritningarnar saman, biðjandi saman eða við leik saman.