Fotopampianarana sy Fanekempihavanana 125–128

Rehefa tafaverina avy namita iraka tany Angletera, izay isan’ireo asa fitoriana maro be nataony i Brigham Young, dia nahazo antso iray hafa manan-danja avy amin’ny Tompo. Nangatahina izy “hikarakara manokana ny fianakavia[ny]” (andininy 3), izay nijaly nandritra ny tsy naha-teo azy. Rehefa mandalina ity fizarana ity ianao dia eritrereto ny antony itakian’ny Tompo fahafoizan-tena indraindray amin’ny asa fanompoana ataontsika. Inona no azonao atao mba hikarakarana ny fianakavianao?

.

Voatery niafina indray i Joseph Smith tamin’ny aogositra 1842 noho ireo fanenjehana sy fandrahonana ny hisamborana azy. Kanefa na dia izany aza dia feno fanantenana zavatra tsara sy fifaliana ireo teny izay nosoratany ho an’ireo Olomasina nandritra izany fotoana izany (izay ny Fotopampianarana sy Fanekempihavanana 127 ankehitriny). Inona no ampianarin’ny andininy 2–4 anao momba an’ Andriamanitra? momba ny fiatrehana fanalam-baraka na fanoherana? Andian-teny inona avy amin’ireo andininy ireo no mety hanampy anao rehefa mahatsapa ho henjehina ianao? Hevero ny hirakitra an-tsoratra ny fomba izay anohanan’ny Tompo anao amin’ny “rano lalin’”ny fiainanao.

Rehefa mamaky ny Fotopampianarana sy Fanekempihavanana 127:5–8; 128:1–8 ianao dia tadiavo ireo antony nahatonga ny Tompo nanome an’i Joseph Smith torolalana mazava tsara toy izany mahakasika ny batisa ho an’ny maty. Mampianatra inona anao momba ny Tompo sy ny asany izany? Ahoana raha ny fahatsapanao no ahafahana mampihatra io torolalana io amin’ireo rakitsoratry ny fianakaviana, toy ny diarin’ny tena manokana?

Tena mazava avy amin’ny zavatra izay nambaran’ny Tompo tamin’ny alalan’ny Joseph Smith ny antony ilan’ireo razambentsika izay tsy vita batisa teto amin’ity fiainana ity antsika: atao batisa ho azy ireo isika mba hahafahany misafidy ny hanaiky na handà io ôrdônansy io. Kanefa nampianatra ihany koa ny Mpaminany fa “ny famonjena [ireo razambentsika] dia ilaina sady zava-dehibe ho an’ny famonjena antsika.” Rehefa mamaky ny Fotopampianarana sy Fanekempihavanana 128: 15–18 ianao dia eritrereto ny antony mahatonga izany.

Mampianatra ny andininy 5 fa ny ôrdônansin’ny batisa ho an’ny maty dia efa “nomanina talohan’ny fanorenana izao tontolo izao.” Inona no ampianarin’io fahamarinana io anao momba an’ Andriamanitra sy ny drafiny? Inona no zavatra mampitombo ny fahatakaranao ao amin’ny hafatry ny Loholona Dale G. Renlund hoe “Tantaram-pianakaviana sy asa atao any amin’ny tempoly: famehezana sy fanasitranana”? (Liahona, mey 2018, 46–49).

Nampiasa andian-teny toy ny “hery mamehy,” “fifamatorana,” sy “firaisana feno” i Joseph Smith rehefa nampianatra momba ny ôrdônansin’ny fisoronana sy ny batisa ho an’ny maty. Rehefa mamaky ny Fotopampianarana sy Fanekempihavanana 128:5–25 ianao dia tadiavo ireo andian-teny ireo na andian-teny izay mitovitovy amin’ireo. Misy zavatra tonga ao an-tsainao izay azonao ampiasaina mba hanehoana ireo andian-teny ireo ve, toy ny rojo na tady? Nahoana ireo no andian-teny tsara hamaritana io fotopampianarana io?

Mety hanampy ihany koa amin’ny fandalinanao an’ireo andininy ireo ny fandinihana ireto fanontaniana manaraka ireto:

• Raha ny hevitrao, dia nahoana ny batisa ho an’ny maty no azo heverina ho “lohahevitra faran’izay be voninahitra amin’ny rehetra … izay an’ny filazantsara maharitra mandrakizay”? (andininy 17). Inona ny zavatra niainana izay nanampy anao hahatsapa izany?

• Amin’ny fomba ahoana no mety hahavoan’ny ozona ny tany raha tsy misy “ny fifamatorana … mampifamatotra ny ray sy ny zanaka”? (andininy18).

• Inona no zavatra manaitra ny saina ao amin’ireo tenin’i Joseph Smith ao amin’ny andininy 19–25? Inona no fiantraikan’ireo andininy ireo amin’ny zavatra tsapanao momba an’i Jesoa Kristy? momba ny fanompoana ny razambenao ao amin’ny tempoly?

Rehefa avy mandalina ireo andininy ireo ianao dia mety hahatsapa ho voataona hanao zavatra ho an’ireo razambenao. Afaka manampy ireo hevitra ao amin’ny FamilySearch.org.

Ny amboaran’ireo “Vidéos inspirantes” ao amin’ny “Œuvre de l’histoire familiale et du temple” ao amin’ny Médiathèque de l’Évangile dia afaka manome anao fanampiana hanaovana fampiharana, tantara manome hevitra, ary hafatra avy amin’ireo mpitarika momba ny tantaram-pianakaviana.

Jereo koa ny Kevin R. Duncan, “Feon’ny fifaliana!,” Liahona, mey 2023, 95–97.

Hoy ny Filoha Gordon B. Hinckley:

“Ny Sorompanavotan’i Jesoa ho an’ny rehetra dia maneho sorona lehibe isoloany toerana ho antsika. Nametraka fakan-tahaka Izy rehefa nisolo toerana ny olombelona rehetra. Izany fakan-tahaka izany izay ahafahan’ny olona iray manao zavatra ho an’ny olona iray hafa dia hoentina ao anatin’ireo ôrdônansin’ny tranon’ny Tompo. Any isika dia manompo ho an’ireo izay maty tsy nanana fahalalana momba ny filazantsara. Afaka misafidy ny hanaiky na handà ilay ôrdônansy izay notanterahina izy ireo. Apetraka amina toerana mitovy amin’ireo izay mandia ny tany izy ireo. Nomena fahafahana mitovy amin’ny velona ireo maty. Averiko indray, fanomezana mahafinaritra sy feno voninahitra no nomen’ilay Tsitoha tamin’ny alalan’ny fanambarana nomeny ny Mpaminaniny” (“The Great Things Which God Has Revealed,” Liahona, May 2005, 82–83).

• Mba hanampiana ny ankizy hianatra hanompo ny olona ao amin’ny fianakaviany, dia hevero ny hizara ilay fampahalalana momba an’i Brigham Young ao amin’ny “Toko 50: Ireo Olomasina tao Nauvoo” (Tantara ao amin’ny Fotopampianarana sy Fanekempihavanana, 184) na fintino amin’ny teninao manokana ny Fotopampianarana sy Fanekempihavanana 126. Azonao atao ny manamafy ilay andian-teny hoe “hikarakara manokana ny fianakavianao” (andininy 3) ary miresaka amin’ny ankizy ny dikan’ny hoe mikarakara manokana ny fianakavianao.

  

  1:33

• Mety hahafinaritra anao sy ny ankizy ny hitady sarin’ny fianakaviana (na hanao sary) rehefa miara-miresaka momba ireo fomba ahafahantsika “mikarakara” ireo olona ao amin’ny fianakaviantsika ianareo. Afaka manao hira toy ny “Notre foyer ici-bas” (Cantiques, no.188) koa ianareo.

• Asao ny ankizy hamantara avy amin’ny Fotopampianarana sy Fanekempihavanana 128:1 hoe inona no lohahevitra nibahana tao an-tsain’i Joseph Smith. Azon’izy ireo atao koa ny manao fikarohana ao amin’ny andininy 17 mba hahitana ny lohahevitra izay noraisiny ho “faran’izay be voninahitra.” Avelao izy ireo hizara ny zavatra hitany sy hiresaka momba ny antony mahatonga io lohahevitra io ho mampientanentana tokoa.

• Ankoatra ny fanampiana ny ankizy hiomana hanao ny fanekempihavanan’ny batisa ho an’ny tenany manokana (sy hiaina izany), dia afaka manampy azy ireo ianao hahafantatra ny fomba anampiana ireo olona tsy nanao ireo fanekempihavanana ireo nandritra ny androm-piainan’izy ireo. Tantarao amin’ny ankizy ny momba ny olona iray fantatrao izay maty tsy vita batisa. Aorian’izay dia afaka miara-mamaky ny Fotopampianarana sy Fanekempihavanana 128:5 ianareo ary mijery sarina dobo fanaovana batisa ao amin’ny tempoly (tahaka ilay iray any amin’ny faran’ity lesona ity). Lazao amin’ny ankizy ny zavatra tsapanao momba izany hoe atao batisa ho an’ireo olona maty izany mba hananan’ny olona rehetra fahafahana ny hanao fanekempihavanana amin’ny Ray any An-danitra.

• Mety hahafinaritra anao sy ny ankizy ny hanao rojo vita amin’ny taratasy misy anaran’ny ray aman-dreny, ny an’ireo raibe sy renibe, ny ray aman-drenin’ny raibe sy ny renibe, sy ny sisa (jereo ny pejin’ny sahanasa ho an’ity herinandro ity). Avy eo dia afaka mifampizara ny zavatra fantatrareo momba ireo razambe ireo ianareo. Iaraho mamaky ny Fotopampianarana sy Fanekempihavanana 128:18 mba hahafantarana ilay “fifamatorana” izay mahatonga ny tantaran’ny fianakaviantsika hikambana sy ho feno.

  

  1:44

• Misy sahanasa fanampiny hanampiana ny ankizy handray anjara amin’ny tantaram-pianakaviana azo jerena ao amin’ny “Ny tempoly sy ny drafitry ny fahasambarana” ao amin’ny tovana B na ao amin’ny FamilySearch.org.