Nkyerɛkyerɛ na Ahyɛmudzi 124

Ewuradze kãa kyerɛ Nkɔnhyɛnyi Joseph Smith dɛ “[ɔ]mbɔ [n’]asɛmpa no dawur awɔse mu” nkyerɛ “ahemfo a wɔwɔ wiadze ne mfɛndzanan nyina” (hwɛ Nkyerɛkyerɛ na Ahyɛmudzi 124:2–11). Sɛ ɔwo na inyaa edwuma yi a, nkyɛ wo dawurbɔ no bɛkã ebɛn asɛm afa Jesus Christ na N’asɛmpa nsanananmu ho? Dwendwen ho mbrɛ ibesi nye nkorɔfo a daa daa enye hɔn nya nkitahodzi no bɛkyɛ wo dasee so wɔ ɔwoara wo su do.

Hwɛ “Jesus Christ N’Asɛmpa no ne Mãhyɛ ne Nsanananmu no: Mfe Ahaebien Dawurbɔ a wɔdze ma Wiadze,” Asɛmpa Nwoma Korabea so.

Susu dɛ enye binom bɛkyɛ, dɛ mbrɛ Agyenkwa no yɛe wɔ Nkyerɛkyerɛ na Ahyɛmudzi 124:12–21, Christ-su ahorow a ihu wɔ hɔn mu. Oesi dɛn akyerɛ wo No dɔ na awerɛhyɛmu?

Hwɛ Richard J. Maynes, “Earning the Trust of the Lord and Your Family,” Liahona, Ɔberɛfɛw 2017, 75–77 so.

Ber a edwendwen Ewuradze ne nkyerɛkyerɛ a ɔwɔ Nkyerɛkyerɛ na Ahyɛmudzi 124:22–24, 60–61 mu ho no, dwen mbrɛ ibesi bɛyɛ wo fie na wo ward ma wɔayɛ bea a ɔtse dɛ ma Ewuradze susui maa Nauvoo no.

San hwɛ “A Friend to All” (video), ChurchofJesusChrist.org.

4:1

Etse nka dɛ dɛn ntsi na “aber nyina Ewuradze hyɛ” no nkorɔfo dɛ “wonsi [temple horow] mma [Ne] dzin krɔnkrɔn”? Susu dɛ ebɛkyerɛw siantsir horow a ihu wɔ Nkyerɛkyerɛ na Ahyɛmudzi 124:25–45, 55 mu no nkorkor. Ibotum ehu binom so wɔ asɔr ndwom tse dɛ “We Love Thy House, O God” (Hymns, nkanee 247) anaa video no “What is a Temple?” (Asɛmpa Nwoma Korabea). Osi dɛn na temple horow ne nsisii yɛ sɛnkyerɛdze ma Ewuradze no dɔ a Ɔwɔ ma wo no?

5:41

Fitsi ber a wosii Nauvoo Temple wɔ mfe 1840 aber no, woesisi temple horow 300 na no mboree anaa wɔabɔ ho amandzɛɛ. President Russell M. Nelson kyerɛkyerɛɛ dɛ “Yenyim dɛ temple no hia tsitsir ma hɛn na hɛn ebusua ebusua nkwagye na nkwagye ntowdo. … Otsĩafo no kõ a ɔkõ tsia no rodɔɔ sõ papaapa, wɔ ne dzenyɛ na n’ahorow mu. Hia a ohia dɛ yɛtaa kɔ temple nnkehiaa kɛse nnkyɛn ber biara” (“Becoming Exemplary Latter-day Saints,” Liahona, Ɔberɛfɛw 2018, 114). Temple esi dɛn aboa wo ma egyina “otsĩafo no kõ a ɔkõ tsia no” ano? Ebɛnadze na enya ho nkenyan dɛ ebɛyɛ dze edzi President Nelson n’afotu do?

Hwɛ “Why Latter-day Saints Build Temples,” temples.ChurchofJesusChrist.org so.

Nna wɔama Ahotseweefo no mbrasɛm dɛ wonsi temple wɔ Jackson County, Missouri, mbom “hɔn atamfo siiw hɔn kwan” (Nkyerɛkyerɛ na Ahyɛmudzi 124:51). Nyiyimu 49–55 wɔ nkuranhyɛ nsɛm ma nkorɔfo a wɔpɛ dɛ wɔyɛ setsie ma Nyankopɔn ne mbrasɛm mbom hɔn ebusua anaa gyinabew binom so siw hɔn kwan ma wonnkotum ayɛ. Ebɛn afotu na ihu wɔ nyiyimu yinom mu a obotum aboa obi a ɔwɔ gyinabew a ɔtse dɛm mu?

Nkɔnhyɛnyi n’egya, Joseph Smith Panyin, twaa mu kɔree ekyir mber kakra ara no, Ewuradze frɛɛ Hyrum Smith ma okegyinaa ɔfrɛ no a wɔfrɛɛ n’egya no ananmu—Asɔr no ne Patriarch. Ibotum akenkan iyi ho asɛm wɔ Nkyerɛkyerɛ na Ahyɛmudzi 124:91–92.

Ibesi dɛn akã mbrɛ patriarch nhyira tse akyerɛ obi a ɔnntsee ho asɛm dabiarada? Ebɛnadze na ebɛkã akyerɛ obi dze ahyɛ no nkuran ma ɔakɛgye bi? Hwehwɛ nsɛmbisa yinom ne nyiano wɔ Elder Randall K. Bennett n’asɛm mu “Your Patriarchal Blessing—Inspired Direction from Heavenly Father” (Liahona, May 2023, 42–43) anaa Nsɛngyinado na Nsɛmbisa, “Patriarchal Blessings” (Asɛmpa Nwoma Korabea).

Ɔnam dza esũa na enya ho sũahu no, susu mbrɛ ibesi bowie asɛntɔw yi: “Patriarch nhyira tse dɛ .” Dɛn ntsi na Ɔsor Egya pɛ dɛ Ne mba gye patriarch nhyira?

Sɛ nngyee wo patriarch nhyira a, ebɛnadze na ibotum ayɛ dze ayɛ ahosiesie dɛ ebɛgye bi? Sɛ agye patriarch nhyira a, ebɛnadze na ibotum ayɛ dze akyerɛ Nyame dɛ akyɛdze yi som wo bo.

Hwɛ Kazuhiko Yamashita, “When to Receive Your Patriarchal Blessing,” Liahona, Esusow Aketseaba 2023, 88–90; General Handbook, 18.17, Asɛmpa Nwoma Korabea so.

• Ama wɔaaboa wo mbofra ma wɔakaa dza wosũa fi Nkyerɛkyerɛ na Ahyɛmudzi 124:15, 20 mu no, ibotum aboa hɔn ma wɔadorɔw na woetwa akoma ahorow efi krataa do. Akoma horow no do no, ibotum aboa hɔn ma wɔakyerɛw kasasin tsitsir fi nyiyimu yinom mu. Ndwom tse dɛ “Stand for the Right” (Children’s Songbook, 159) botum aboa ma woesi Ewuradze ne nsɛm no pi.

• Wɔabɔ mu akenkan Nkyerɛkyerɛ na Ahyɛmudzi 124:15, 20 ewie no, bia ibotum aboa wo mbofra no ma wɔahwehwɛ edze emudzi robɔ bra n’asekyerɛ wɔ krataafa 31 wɔ For the Strength of Youth: A Guide to Making Choices mu. Ebɛn asɛm na Ewuradze kãa no pɔkyee faa George Miller ho wɔ nyiyimu 20 “osian [George] n’akoma mu emudzi ntsi”? Ibotum so akyerɛ fasusu horow a mbofra botum akyerɛ emudzi fi wankasa wo sũahu mu anaa fi Friend dawurbɔ krataa mu. Ma wo mba no nsi botae dɛ wɔbɛkyerɛ emudzi dapɛn yi na wɔnkã atsenkã a wonya nkyerɛ wo ber a wɔyɛ dɛm.

• Wo mbofra hɔn enyi bɛgye dɛ wɔbɔhwɛ temple ahorow no mfonyin, a tsetse temple bi na temple a ɔbɛn bea a wɔtse no kã ho (hwɛ ChurchofJesusChrist.org/temples/list). Ibotum edze mfonyin yinom na Nkyerɛkyerɛ na Ahyɛmudzi 124:39 edze akyerɛkyerɛ mu dɛ aber nyina Jesus Christ ahyɛ no nkorɔfo mbra dɛ wonsisi temple ahorow—wɔ tsetse ber na hɛn nda yi mu (hwɛ dapɛn yi dwumadzi krataafa so).

• Sɛ etse bɛn temple bi ara yie a, susu dɛ ebɛfa wo mbofra no akɔ hɔ na wɔanantsew temple asaase do no obu mu ara. Ma wɔnhwehwɛ nsɛmfua “Krɔnkrɔn ma Ewuradze—Ewuradze ne Fie” wɔ temple no ho wɔ abowano. Enye wo mbofra no nkasa mfa dza nsɛmfua yinom ase kyerɛ.

• Susu dɛ edze adwenkyerɛ a ɔwɔ “Being Baptized and Confirmed for Ancestors” a ɔwɔ abɔekyir A no bɔboa wo mbofra ma wɔahwɛ kan ahwɛ da a wobotum ahɛn temple mu (hwɛ “The Temple and the Plan of Happiness” wɔ abɔekyir B mu so).

• Ber a hom bɔ mu kenkan Nkyerɛkyerɛ na Ahyɛmudzi 124:91–92 no, boa wo mbofra ma wɔnhwehwɛ dza Ewuradze frɛɛ Hyrum Smith dɛ ɔmbɛyɛ. Kasa fa patriarch nhyira n’adzeban ho, dɛ ɔyɛ: nhyira soronko a no mu no Ewuradze kyerɛkyerɛ hɛn hɛnho nsɛm na dza Ɔpɛ dɛ yɛyɛ na nyimpa ban a yɛbɛyɛ. Susu dɛ edze ɔfã “Receiving a Patriarchal Blessing” a ɔwɔ abɔekyir A mu bedzi dwuma dze aboa wo mbofra ma wɔayɛ ahosiesie agye patriarch nhyira.