Nsanananmu ne Ndze horow

Nna Phebe Woodruff tse bɛn Nauvoo ber a Joseph Smith hyɛɛ ase kyerɛkyerɛɛ dɛ wobotum enuma ama hɔn a wɔaatsena ase pɛn no. Ɔkyerɛɛw ho nsɛm kɛmaa no kun, Wilford a, nna ɔrosom asɛmpakã dwuma wɔ England, Aborekyir:

“Onuabanyin Joseph … edua nyikyerɛ mu esũa dɛ hɔn a wɔwɔ asɔr yi mu no, wobotum enuma hɔn ama hɔn ebusuafo a woewuwu na woennya ndzinoa no dɛ wɔbɛtse asɛmpa yi, ama hɔn mba, awofo, nuambanyin, nkyerɛbaa, nananom, wɔfanom na antsefo mpo. … Sɛ wonuma hɔn ma hɔn anyɛnkofo a, ntsɛmara wogyaa hɔn fi efiadze na nsa botum akã hɔn wɔ wusoɛr ber no na wɔdze hɔn aba celestial ahenman no mu—nkyerɛkyerɛ yi asɔr no agye ato mu koryɛ mu na woetu punkum rokɔ kan, binom rokɔ ma woenuma hɔn mpɛn 16 … dakor.”

Wilford Woodruff kãa ekyir no wɔ fapem yi ho dɛ, “Mber a metsee no, me kra dze enyigye huruwii. … Mokɔr kan ma wonumaa me maa m’ebusuafo a woewuwu a mubotum akaa hɔn nyina. … Minyaa atsenka dɛ menkã hallelujah ber a nyikyerɛ no puei a ɔreda no edzi akyɛrɛ hɛn dɛ yennuma mma hɛn ewufo. Minyaa atsenka dɛ ɔsɛ dɛ yedzi ehurusi wɔ Ɔsor nhyira horow ho.”

Tse dɛ Akyerɛbaa Woodruff no, Vilate Kimball tsee ngyina ananmu enuma ho nsɛm ber a no kun, Heber, efir edzi rekã asɛmpa no. Ɔkyerɛɛw kɛmaa no:

“President Smith ebue nsɛngyinado enyimnyam fofor bi do … a ɔdze nkenyan kɛse aba asɔr no mu. Ɔno nye dɛ, wobonuma wo ama owufo. Paul kã ho asɛm wɔ Corinthfo nwoma a odzi kan, tsir 15 nyiyimu 29 mu. Joseph edua Nyikyerɛ do enya ne nkyerɛkyerɛmu a ɔhyɛ mã ara yie. … Ɔyɛ asɔr yi ne ndzinoa dɛ wobonuma wo ama w’ebusuafo nyina a wowuwui ansaana Asɛmpa yi reba no, asan ekyir ekesi hɛn Ananasum mpo do. … Yɛyɛ dɛm a, yɛyɛ dɛ ananmusifo ma hɔn, na yɛma hɔn ndzinoa dɛ wɔbɛba kan wɔ wusoɛr a odzi kan no mu. Ɔkã dɛ wɔbɛkã Asɛmpa no akyerɛ hɔn … mbom biribiara nnyi hɔ a ɔtse dɛ esunsum a wobonuma hɔn. … Fitsi ber a wɔkãa nhyehyɛɛ yi ho asɛm no, esu no ho nntɔɔ no. Ehyiadzi no mu no, ɔtɔfabi a Elderfo baawɔtwe kesi du na wɔwɔ esutsen no mu ber kor mu runuma. … Mepɛ dɛ wonuma me ma me Nã. Mububuu dɛ mobɔtweɔn kesi dɛ ebɛba fie, mbom ber a Joseph kasaa faa nsɛngyinado no ho a odzi ekyir no, otuu obiara fo dɛ ɔnyɛ ntsɛm nkɛyɛ, na wonyi hɔn anyɛnkofo mfi ndɔmmum mu ntsɛmara a wobotum ayɛ. Ntsi modwen ho dɛ mobɔkɔ kan dapɛn yi mu, osiandɛ hɛn fipamfo dodowara rokɔ kan. Binom woenuma hɔn mpɛn pii dada. … Dɛm ntsi ihu dɛ kwan wɔ hɔ ma obiara. Ana iyi nnyɛ enyimnyam nkyerɛkyerɛ a?”

Wonyaa wiee Nauvoo Temple enuma nsubura no, ngyina ananmu enuma no wɔyɛɛ no wɔ hɔ kyɛn dɛ wɔbɛyɛ no esutsen no mu. Phebe Chase, a ɔtse Nauvoo no, kyerɛɛw ne maame na ɔkãa temple no ho asɛm kyerɛɛ no, a ɔkãa faa enuma nsubura no ho dɛ ɔyɛ bea a “yebotum enuma ama hɛn ewufo na yɛabɛyɛ agyefo wɔ Zion Bepɔw do.” Ɔkɔr do kyerɛkyerɛɛ mu dɛ enuma nsubura yi mu no, “Woenuma me ama m’egya dɔfo na m’anyɛnkofo nkaa no a woewuwu no. … Afei mepɛ dɛ muhu w’egya na wo Nã hɔn edzin ama meetum ekegyaa hɔn, osiandɛ modɔ pɛ dɛ mema Ewufo no ahotɔ. … Ewuradze akasa bio na ɔdze tsetse nhyehyɛɛ no asan ananmu aba.”

Ɔrekyerɛw akɛma n’anyɛnkofo na ebusua afa enuma ma ebusua mu mba a wɔatsena ase dada no, Sally Randall kae ne babanyin George a oetwa mu kɔ:

“O nna ɔyɛ dzen ma me dodow na ɔyɛ dɛ ma biribiara nnkotum apata me ma magye ato mu, mbom … n’egya enuma ama no na enyimnyam adze nye yi a yɛgye dzi na yɛgye asɛmpa ne mãhyɛ no dɛ mbrɛ wɔkã ho asɛm kyerɛ hɛn sesei na yebotum enuma ama hɛn anyɛnkofo adɔfo a yebotum akaa hɔn akɔ ekyir na yɛagye hɔn nkwa.

“Mepɛ dɛ ekyerɛw hɔn a yɛnye hɔn wɔ nkitahodzi na woewuwu dze akɔ ekyir ekesi nananom do hɔn edzin ma me. Mo botae nye dɛ mebɛyɛ dza mubotum dze agye m’anyɛnkofo nkwa na ɔbɛyɛ me enyigye dodow dɛ hom mu binom bɛba na hom abɔboa me osiandɛ ɔyɛ edwuma kɛse a wɔnnyɛ no ankorankor nko . … Minyim dɛ hom bɔdwen dɛ iyi yɛ nkyerɛkyerɛ fofor bi mbom hom bohu dɛ ɔyɛ nokwar.”