“Nsanananmu ne Ndze horow: Relief Society,” Bra, Bɛka Mo Do—Dze Ma Fie na Asɔr: Nkyerɛkyerɛ na Ahyɛmudzi 2025 (2025)
“Relief Society,” Bra, Bɛka Mo Do—Dze Ma Fie na Asɔr: 2025
Nsanananmu ne Ndze horow
Relief Society
Afe 1842 mu no, wɔkyekyeer Relief Society wɔ Nauvoo, Illinois ekyir no, Nkɔnhyɛnyi Joseph Smith kãa dɛ, “Asɔr no nna wɔnnkyekyɛree no emudzi mu kɛpeem dɛ wɔkyekyeer mbaa no dɛm kwan do no.” Dɛmara so, Ewuradze N’Asɔr Nsanananmu na N’asɔfodzi ho adzesũa no nnkedzi mu kɛpem dɛ Relief Society, a ɔnoara ɔyɛ, Jesus Christ ne esuafo mbaa “tsetse nhwɛdo ne nsanananmu” ho adzesũa kã ho.
Eliza R. Snow dzii akotsen wɔ dɛm nsanananmu no mu. Nna ɔwɔ hɔ ber a wodzii kan kyekyeer Relief Society, dɛ ne kyerɛwfo no, ɔkyerɛɛw dza ɔkɔr do wɔ ne nhyiamu horow no mu. Ohun no enyim na enyim dɛ wɔkyekyer Relief Society wɔ “asɔfodzi no nhwɛdo do.” Ne nsɛm a ɔkyerɛwee ber a na ɔrosom dɛ Wiadze Mfɛndzanan Relief Society President a otsia ebien no na odzi do yi, ama wɔaaboa ne nkyerɛbaa no ma wɔatse dwuma krɔnkrɔn a wɔdze ahyɛ Nyame n’ahyɛmu mbabaa nsa no ase.
Ama eesũa mbrɛ wosii kyekyeer Relief Society ho nsɛm binom akã ho no, hwɛ Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Relief Society nhyehyɛɛ ho nsaano mfonyin a Paul Mann yɛe
Eliza R. Snow
“Dzin (Relief Society) bɛyɛ abaefo dze, naaso nhyehyɛɛ no yɛ tsetse dze. [Joseph Smith] kãa kyerɛɛ hɛn dɛ nna nhyehyɛɛ kor noara wɔ tsetse asɔr no mu, a ɔkãa no nkrataa a wɔakyerɛw no wɔ Ahyɛmu Fofor no mu, a wɔkãa dzibew, ‘ewuraba a [o]dzi mu’ ho asɛm no [hwɛ 2 John 1:1; Nkyerɛkyerɛ na Ahyɛmudzi 25:3].
“Nhyehyɛɛ yi nnkotum aba mu a Asɔfodzi no nnkã ho, osiandɛ nokwar ara onya no tumdzi na nhyɛdo nyina fi dɛm farbaa no. Ber a woyii Asɔfodzi no fii asaase do no, kuw yi na mbataho biara a ɔwɔ Jesus Christ asɔr no nokwar nhyehyɛɛ a ɔwɔ asaase do no, bɛyewee. …
“Mowɔ hɔ ma wɔkyekyeer Nauvoo Mbaa Relief Society’ no, … na mowɔ sũahu mapã fa dɛm kuw no ho no, bia mebɛkã nsɛm kakrabaa a ɔbɔboa Zion mbabaa a wɔreba kan abɛfa dzibew a ohia no, a asodzi fofor pii ahyɛ mu mã no. Sɛ Israel mbabaa na nãnom nya atsenka dɛ hɛn nhyɛdo nnkɔ ekyir siesiara a, afei wobenya tum na tumdzi biara yie a wɔdze bɛyɛ papa biara a ɔyɛ hɔn akyɛdze mbordo no. …
Wɔkyekyeer Relief Society wɔ Mbrekese Memen Fiadze n’abansor dan no mu.
“Sɛ asɛmbisa biara soɛr wɔ w’adwen mu, biribiara dɛ, Ebɛnadze nye Mbaa Relief Society no botae a? Mibeyi ano—dze ayɛ papa—yɛdze tum biara a yɛwɔ a wɔdze yɛ papa no bɔbɔadze, nnyɛ ehiafo ahotɔ nko ho, mbom wɔ akra no kwagye ho. Hɛn mbɔdzembɔ a yɛdze bɔbɔ mu ayɛ dza yebotum ayɛ no bɔbor hɛn ankorankor ahom biara do. …
“Yɛrohwɛ ehiafo do no, Mbaa Relief Society no wɔ asɛdze binom yɛ kyɛn wɔrema honandua apɛdze ho ahotɔ nko. Adwen a osuar na akoma a ɔyar, so hia ahwɛyie, na mber pii mu a ayamuyie asɛnkã—afotusɛm kakrabaa, anaa nkyia ɔdɔ mu ara na anyɛnkoyɛ mu bɛyɛ papa ara yie na enyi asɔ mpo akyɛn sika bɔtɔ. …
“Sɛ Ahotseweefo fi ekyir boa ano, a wɔyɛ ahohɔ ma obiara, na nsɛm a hɔn a wɔrohwehwɛ kwan adaadaa hɔn rekã no begya hɔn ma wɔafom kwan no a, [Relief] Society wɔ dɛ wɔyɛ ntsɛm hwɛ [hɔn] do, na wɔdze hɔn ba kuw no a ɔbɛtsew hɔnho na woepegya hɔn no mu, na ne nyina mu no ɔdze gyedzi wɔ Asɛmpa no mu no ahyɛ hɔn dzen, na wɔreyɛ dɛm no, woetum ayɛ edwindadze a wɔbɛgye dodowara nkwa.
Ɔbɛgye nwoma pii dze akyerɛ ndwuma, ndzinoa, na asodzi horow a ɔwɔ Kuw yi mu no ase. … Kɔ do yɛ (wɔ wo bishop no kwankyerɛ ase) abodwee, enyidahɔ, ahoɔdzen mu ara, wɔ nkabɔmu na mpaabɔ mu, na Nyame dze konyimdzi abɔtsir behyira wo mbɔdzembɔ do.”