“Ɔberɛfɛw 17–23: ‘Hom Nsiesie Homho mma Ayeforkun ne Mbae no’: Nkyerɛkyerɛ na Ahyɛmudzi 133–134,” Bra, Bɛka Mo Do—Dze Ma Fie na Asɔr: Nkyerɛkyerɛ na Ahyɛmudzi 2025 (2025)
“Nkyerɛkyerɛ na Ahyɛmudzi 133–134,” Bra, Bɛka Mo Do—Dze Ma Fie na Asɔr: 2025
Mbaabun Du, Jorge Cocco yɛɛ nsaano mfonyin no
Ɔberɛfɛw 17–23: “Hom Nsiesie Homho mma Ayeforkun ne Mbae no”
Nkyerɛkyerɛ na Ahyɛmudzi 133–134
Afe 1833 mu no, dɔm tuii hyɛɛ Asɔr no ne tsintsim efir dan do na wɔsɛɛ no. Nna tsintsim ndwuma a wogu do reyɛ dɛm aber no yɛ Book of Commandments [Mbrasɛm Nwoma]—Asɔr no mbɔdzembɔ a odzi kan dɛ wɔboaboa Nyame ne nda odzi ekyir nyikyerɛ horow ano wɔ nwoma kor mu. Dɔm no hwetsee nkrataafa no a wɔmmfaa mbobɔɔ mu no, na ɔwɔ mu dɛ Ahotseweefo akokodurfo dze bi siei dze, naaso Mbrasɛm Nwoma kakrabaa a ɔnnso na ɔkãa nsa.
Dza sesei yenyim dɛ ɔyɛ Nkyerɛkyerɛ na Ahyɛmudzi ɔfa 133 no, nna nkyɛ ɔbɛyɛ Mbrasɛm Nwoma no n’abɔekyir, tse dɛ adze soronko bi wɔ Ewuradze ne nyikyerɛ a wɔdze epue guado no n’ekyir. Ɔbɔ kɔkɔ fa atsɛmbu da a ɔreba na osi do kã ɔfrɛ a ɔwɔ ndɛ nyikyerɛ mu dɛ: Hom nguan mmfi wiadze ndzɛmba ho, a Babylon yɛ ne ngyinahɔmadze no. Kyekyer Zion Yɛ ahoboa ma Mbae a Otsĩa Ebien no. Na wɔnkã asɛm yi nkyerɛ “ɔman, ebusua, kasa nye nyimpa nyina ” (nyiyimu 37). Mbrasɛm Nwoma ho ahyɛse nhyehyɛɛ no annhyɛ mã, mbom nyikyerɛ yi yɛ nkaadze na dasegye dɛ Ewuradze n’edwuma bɔkɔ kan, “Na obeyi n’abasa krɔnkrɔn no ho akyerɛ … , na asaase n’ano nyina bohu hɔn Nyankopɔn no nkwagye” (nyiyimu 3).
Adwenkyerɛ horow ma Adzesũa wɔ Fie na wɔ Asɔr
Nkyerɛkyerɛ na Ahyɛmudzi 133:4–14
Jesus Christ frɛ me dɛ mompow Babylon na membra Zion.
Zion no sunsum mu ebirabɔdze nye Babylon—tsetse kuropɔn a kyerɛwsɛm nyina mu no ogyina hɔ ma emumuyɛdze na sunsum mu ndɔmmum. Ber a ekenkan Nkyerɛkyerɛ na Ahyɛmudzi 133:4–14 no, dwendwen mbrɛ Agyenkwa no risi refrɛ dɛ “hom … mfi Babylon” (nyiyimu 5) na “hom … nkɔ … Zion” (nyiyimu 9). Ne frɛ yi ereyɛ ho dɛn? Ebɛnadze bio na isũa fa Zion ho fi Elder D. Todd Christofferson n’asɛm mu “Come to Zion”? (Liahona, Ɔberɛfɛw 2008, 37–40).
Nkyerɛkyerɛ na Ahyɛmudzi 133:1–19, 37–39
Sesei mubotum ayɛ ahoboa ama Agyenkwa no ne Mbae a Otsĩa Ebien no.
Ɔfã 1, Ewuradze ne nyienyim ma Nkyerɛkyerɛ na Ahyɛmudzi, na Ɔfã 133, ahyɛse abɔekyir ma Mbrasɛm Nwoma no, ebien nyina no dze ntotosɛrɛ kor noara a ofi Ewuradze hɔ no hyɛ ase: “Hom nyɛ aso, O m’asɔr mu mba” (Nkyerɛkyerɛ na Ahyɛmudzi 1:1; 133:1). Bia ibotum esũa Nkyerɛkyerɛ na Ahyɛmudzi 133:1–19, 37–39 na akyerɛw nsɛm a Ewuradze to nsa frɛ wo dɛ ebɛyɛ ho “aso” (tsie na dzi do) ber a eyɛ ahoboa ma Ne Mbae a Otsĩa Ebien no. Tsitsir ara, bia ibotum akyerɛw no nkorkor ndzɛmba a Ɔpɛ dɛ eyɛ dze(1) siesie woho na (2) edze boa yɛ wiadze no ahoboa ma Ne nsanee. Ebɛnadze na isũa fi nsɛm a wɔakyerɛw no nkorkor yinom mu?
President Russell M. Nelson akyɛ nokwar tsitsir binom a ɔfa mbrɛ wiadze bɛyɛ ber a Agyenkwa no san ba—na mbrɛ yɛbɛyɛ ho ahoboa. Hwehwɛ nokwar yinom wɔ n’asɛm mu “The Future of the Church: Preparing the World for the Savior’s Second Coming” (Liahona, Ebɔbira 2020, 6–11). Ebɛnadze na inya ho nkenyan dɛ yɛ—anaa kɔ do yɛ—fa “yɛ wiadze no ahoboa ma Agyenkwa no ne nsanee?” (“Aaronic Priesthood Quorum Theme,” Asɛmpa Nwoma Korabea).
San hwɛ Matthew 25:1–13; Russell M. Nelson, “Embrace the Future with Faith,” Liahona, Ɔberɛfɛw 2020, 73–76; “Ewuradze Ne Mba Hom Mbra,” Asɔr na Mbofra Ndwom, nkanee 7; Nsɛngyinado na Nsɛmbisa, “Second Coming of Jesus Christ,” Asɛmpa Nwoma Korabea.
Nkyerɛkyerɛ na Ahyɛmudzi 133:19–56
Jesus Christ Ne Mbae a Otsĩa Ebien no bɛyɛ enyigyesɛm ama atseneneefo.
Ber a ekenkan Agyenkwa no ne nsanee ho nsɛm wɔ nyiyimu 19–56, ebɛnadze na ihu a erohwɛ no kwan? Ebɛn nsɛmfua na kasasin horow na ɔkã Ewuradze No dɔ ma No nkorɔfo ho asɛm? Susu dɛ ebɛkyerɛw wankasa wo sũahu a ɔfa “[w’] Ewuradze n’adɔyɛ nye dza ɔdze ama [wo] nyina, dɛ mbrɛ ne papayɛ tse” ho (nyiyimu 52).
Ɔyarsafo, Kelsy na Jesse Lightweave wɔyɛɛ nsaano mfonyin
“Nyame na ɔhyehyɛɛ aban dze maa nyimpa ne yieyɛ.”
Nna asɔpɔkan Ahotseweefo no hɔn nkitahodzi nye aban no ɔyɛ biribi biribi. Ber a wɔhyɛɛ Ahotseweefo no ma wotui fii Jackson County, Missouri, wɔ afe 1833 mu no, wɔserɛɛ mboa fii mansin na ɔman mu aban no hɔ na woennya hwee. Aber noara no, nkorɔfo bi a wonnyi Asɔr no mu kyerɛkyerɛɛ Zion nkyerɛkyerɛ mu dɛ Ahotseweefo no pow asaase do aban no tumdzi. Nkyerɛkyerɛ na Ahyɛmudzi 134 ne fã bi no, wɔkyerɛɛw dɛ ɔreda Asɔr no ne sibew wɔ aban ho edzi. Ebɛnadze na ɔfã yi susu fa mbrɛ Ahotseweefo no hɔn atsenka wɔ aban no ho no nnyɛ?
Ber a isũa ɔfã 134, susu dɛ ebɔhwehwɛ aban ho fapem nsɛm na amamfo hɔn asodzi. Osii dɛn na adwenkyerɛ yinom tumii yɛɛ mboa maa asɔpɔkan Ahotseweefo no? Beebi a etse no wobesi dɛn dze edzi dwuma?
San hwɛ Gyedzi ho Nsɛmpɔw 1:11–12; Nsɛngyinado na Nsɛmbisa, “Religious Freedom,” Asɛmpa Nwoma Korabea.
Adwenkyerɛ horow ma Erekyerɛkyerɛ Mbofra
Nkyerɛkyerɛ na Ahyɛmudzi 133:4–5, 14
Ewuradze pɛ dɛ motwe moho fi wiadze bɔn ho.
-
Ɔwo na wo mbofra botum akyerɛw no nkorkor mbea na gyinabew binom a Ewuradze pɛ dɛ yɛtwe hɛnho fi ho. Nkyii hom botum dze dɛm mbea na gyinabew ahorow no atoto dza wɔakã afa “Babel, Babylon” ho wɔ Kyerɛwsɛm no Kwankyerɛ wɔ (Asɛmpa Nwoma Korabea) mu. Nkyii wobotum akenkan Nkyerɛkyerɛ na Ahyɛmudzi 133:4–5, 14. “Hom mfi Babylon” n’asekyerɛ nye dɛn? (nyiyimu 5). Hom botum so akyerɛw no nkorkor mbea na gyinabew horow a Ewuradze to nsa frɛ hɛn na yɛdze dza yɛakyerɛw no nkorkor no atoto dza wɔaka afa “Zion” ho wɔ Kyerɛwsɛm no Kwankyerɛ mu.
Nkyerɛkyerɛ na Ahyɛmudzi 133:19–21, 25
Jesus Christ bɛsan aba bio.
-
Bia wo mbofra enyi bɛgye dɛ wɔreyɛ ɔyɛkyerɛ wɔ dza ɔtse dɛ wɔreyɛ ahoboa ama biribi, tse dɛ agordzi akansi, hɔho kɛse bi, anaa afahyɛ bi a wɔpɛ papaapa. Dɛn ntsi na ahoboaboa ho hia? Nkyii hom botum abɔ mu akenkan Nkyerɛkyerɛ na Ahyɛmudzi 133:17–19, 21 na ama wo mbofra no aahwehwɛ dza Ewuradze to nsa frɛ hɛn dɛ yɛnyɛ ho ahoboa. Ibotum dze mfonyin a ofi dapen yi n’apɔwdo n’apɔwdo n’apɔwdo akyerɛ na ebisa hɔn dza wonyim fa Jesus Christ ne Mbae a Otsĩa. Ebien ho. Ebɛnadze bio na yesũa fi nyiyimu 19–25, 46–52? Ebɛnadze na yebotum ayɛ dze ayɛ ahoboa ama enyigye da yi?
-
Ibotum dze mfonyin horow anaa ndzɛmba horow a ɔkyerɛ ndzɛmba a yebotum ayɛ dze ayɛ ahoboa ama Jesus Christ ne Mbae a Otsĩa Ebien no (tse dɛ kenkan kyerɛwsɛm no, kyɛ asɛmpa no, anaa som hɛn ebusua ebusua). Boa wo mbofra ma wɔnhwehwɛ mfonyin anaa ndzɛmba horow no na wɔnkasa mfa mbrɛ yɛreyɛ ndzɛmba yinom bɔboa hɛn ma yɛayɛ krado ehyia Agyenkwa no ber a Ɔsan ba bio no.
-
Hom so botum abɔ mu atow ndwom a ɔfa Mbae a Otsĩa Ebien no ho, tse dɛ “When He Comes Again” (Children’s Songbook, 82–83). Hom nye homho nkyɛ hom dɔ ma Agyenkwa no na hom atsenka fa Ne nsanee ho.
Nkyerɛkyerɛ na Ahyɛmudzi 133:52–53
Jesus Christ yɛ adɔyɛ na ayamuyie.
-
Ɔwo na wo mbofra botum ahwɛ mfonyin a ɔkyerɛ dɛ Jesus yɛ adɔyɛ na ayamuyie. (Mfatoho, hwɛ Gospel Art Book, nkanee 42, 47.) Ebɛnadze bio na Jesus ayɛ dze akyerɛ No dɔ na ayamuyie? Hom mbɔ mu nkenkan Nkyerɛkyerɛ na Ahyɛmudzi 133:52, na boa wo mbofra no ma wɔndwen akwan horow a wobotum “akã hɔn Ewuradze n’ayamuyie adɔyɛ” ho asɛm akyerɛ binom.
In His Light [Ne Kan Mu] n’afã bi, Greg Olsen yɛɛ nsaano mfonyin no
Kyerɛkyerɛ nkyerɛkyerɛ a ɔyɛ pefee na ɔda famu. Ewuradze kyerɛkyerɛ N’asɛmpa no wɔ “mberɛw yɛ mu na pefee mu” (Nkyerɛkyerɛ na Ahyɛmudzi 133:57). Ebɛnadze na nsɛmfua yinom kyerɛ wo fa kwan a wɔdze kyerɛkyerɛ asɛmpa no wɔ w’ebusua anaa class mu?
Nkyerɛkyerɛ na Ahyɛmudzi 134: 1–2
Ewuradze pɛ dɛ midzi mbra no do.
-
Wo mbofra botum akyerɛw no nkorkor ahyɛdze anaa mbra a wodzi do. Nkyɛ abrabɔ bɛyɛ dɛn sɛ obiara nndzi mbra yinom do a? Nkyii ibotum nye hɔn akenkan Nkyerɛkyerɛ na Ahyɛmudzi 134:1–2 a, eroboa hɔn wɔ nsɛmfua anaa kasasin biara a bia wɔnntse ase ho. Dɛn ntsi na Ewuradze pɛ dɛ yɛyɛ setsie ma mbra no? (Hwɛ Gyedzi ho Nsɛmpɔw 1:12).
Epɛ adwenkyerɛ horow bi akã ho a, hwɛ bosoom yi Friend dawurbɔ krataa mu.