Ol Voes blong Restoresen

Long medel blong plante Sent we oli bin kam tugeta long Ohaeo, long ol yia 1830, i bin gat Phebe Carter (Fibi Kata). Hem i bin joenem Jos long Not Is Yunaeted Stet, taem hem i stap long medel blong ol twante yia blong hem, nomata papa mo mama blong hem i no bin joen. Samtaem afta, hem i bin raetem desisen ia blong hem blong muv i go long Ohaeo, blong joen wetem ol Sent:

“Ol fren blong mi oli sapraes long wokbaot blong mi, semmak olsem mi, be wan samting insaed long mi i bin pusum mi blong mekem. Harem nogud blong mama blong mi from bae mi aot long hom, i kolosap bitim wanem we mi save tekem; mo sapos i no from spirit we i stap insaed long mi, bae mi no bin save mekem nomo. Mama blong mi i talem se, bae i moa gud se hem i luk oli berem mi, bitim we bae mi go miwan insaed long wol ia we i no gat hat.

“‘[Phebe],’ hem i talem wetem strong tingting, ‘?bae yu kambak long mi sapos yu faenem se fasin blong Ol Momon ia, i wan giamanwan?’

“Mi ansa, ‘yes mama, bae mi kambak.’ … Ansa blong mi i mekem hat blong hem i kam oraet; be i bin had mo i tekem plante harem nogud blong save seperet. Taem we taem i kam blong mi aot, mi no bin save talem tata; mekem se mi raetem ol not blong talem tata long wanwan, mo mi livim olgeta i stap long tebol blong mi, mi ron i go daon long ol step, mo mi jiam long wilkat. Olsem ia nao mi lego hom ia we mi bin lavem tumas, ples we mi bin groap long hem, blong joenem laef blong mi wetem ol sent blong God.”

Long wan long ol mesej ia blong talem tata, Phebe i bin raetem:

“Papa mo Mama we Mi Lavem Tumas—naoia, bae mi aot long ruf blong haos blong papa mo mama blong wan smol taem … mi no save se bae i kasem wetaem—be mi aot wetem ol filing blong bigfala tangkyu from kaen fasin blong yutufala we yutufala i bin givim long mi, we mi bebi i kam kasem tedei—be i luk se Hae God i givim oda long mi se i mas olsem, mo i mas olsem. Bae yumi putum evri samting i go long han blong Hae God mo talem tangkyu from se Hem i bin letem yumi laef tugeta blong wan longfala taem long ol situesen we i gud tumas, mo wetem bilif ia se evri samting bae i go blong gud blong yumi sapos yumi lavem God bitim evri samting. Bae yumi luksave se yumi save prea long wan God ia we bae i harem ol tru prea blong evri samting we Hem i bin krietem, we i kamaot long tru hat blong yumi, mo bae Hem i givim long yumi wanem we i bes blong yumi. …

“Mama, mi biliv se hem i tingting blong God blong mi mi go long Wes mo mi bin save hemia longtaem se bae i olsem. Naoia, rod i open … ; Mi biliv se hem i Spirit blong Lod we i bin mekem hemia, mo hemia i inaf blong evri samting. O, yu yu no wari tumas from pikinini blong yu; Lod bae i givim kamfot long mi. Mi biliv se Lod bae i lukaotgud long mi, mo bae i givim mi wanem we i bes long mi. … Mi go, from se Masta blong mi i singaot—Hem i talemaot klia diuti blong mi.”