Ol Voes blong Restoresen

Taem Abigail Calkins Leonard i bin stap long medel blong ol teti yia blong hem, hem i wantem kasem fogivnes from ol sin blong hem. Wanwan taem bae hem i ridim Baebol, mo ol pipol blong ol defren Kristin jos bae oli kam visitim hom blong hem, be hem i bin konfius abaot wanem nao i mekem wan jos i defren long narawan. Hem i talem: “Wan moning, mi tekem Baebol blong mi, mi go long bus, mo mi nildaon long ni blong mi.” Hem i bin prea strong i go long Lod. Hem i talem: “Wantaem nomo, wan visen i kamaot long fored blong ae blong mi”, “mo ol defren kaen jos oli pas, wan afta wan, mo wan voes i singaotem mi i stap talem: ‘Olgeta ia, oli bildimap olgeta blong mekem mane nomo.’ Afta, mi bin save luk wan bigfala laet, mo wan voes we i kam long heven i talemaot: ‘Bambae mi resemap wan pipol, we bae mi glad se oli blong mi, mo bae mi blesem olgeta.’” I no longtaem afta, Abigail i bin harem abaot Buk blong Momon. I nomata se hem i no bin gat wan kopi yet, hem i bin lukaot blong “save trutok blong buk ia, tru long presen mo paoa blong Tabu Spirit,” mo “wantaem nomo, hem i bin filim se hem i stap.” Taem we hem i bin save ridim Buk blong Momon, “hem i bin rere blong kasem ol toktok insaed long hem.” Hem mo hasban blong hem, Liman, tufala i bin baptaes long 1831.

Taem we Tomas B. Mars i bin wan yang adalt, hem i bin stadi long Baebol mo hem i bin joenem wan Kristin jos. Be hem i no bin glad , mo hem i bin kamaot long evri jos. Hem i talem, “Mi save lelebet abaot spirit blong profesi, mo mi talem long wan lida blong relijin se mi wantem luk wan niu Jos bae i girap, we bae i gat trutok we i klin gud i stap.” I no longtaem afta long hemia, Tomas i bin gat wan filing long saed blong Spirit we i pusum hem, blong hem i mas aot long hom blong hem long Boston, Masajusets, mo i travel i go long Wes. Afta we hem i spendem tri manis long Wes Niu Yok, mo we hem i no faenem wanem we hem i bin stap lukaotem, hem i stat blong gobak hom. Long rod, wan woman i bin askem Tomas sapos hem i bin harem abaot “Gol Buk we wan yut, nem blong hem, Josef Smit i bin faenem.” Stori ia i winim tingting blong hem, kwiktaem Tomas i travel i go long Palmaera mo i mitim Martin Haris long printing stoa, stret long taem ia we ol fasfala 16 pej blong Buk blong Momon oli stap kamaot long printa. Oli bin letem Tomas blong tekem wan kopi blong ol 16 pej ia, mo hem i tekem ol pej ia i gohom long waef blong hem, Elisabet. Hem i talem: “Elisabet i bin glad tumas long buk, mo hem i bin bilivim se hem i toktok blong God.” Afta long hemia, Tomas mo Elisabet i muv i go long Niu Yok, wetem ol pikinini blong tufala, mo oli bin kasem baptaes. (Blong gat moa infomesen abaot Tomas B. Mars, luk long Doktrin mo Ol Kavenan 31.)

Olsem Tomas Mars, Parli mo Thankful Prat, oli bin mekem folem ol filing we i pusum olgeta long saed blong spirit, blong oli lego gudfala fam blong olgeta long Ohaeo, wetem tingting ia blong prijim gospel olsem we oli bin andastanem long Baebol. Taem we Parli i talem long brata blong hem, “Spirit blong ol samting ia i bin wok wetem strong paoa long maen blong mi, mekem se mi no save spel.” Taem oli kasem Is Niu Yok, Parli i bin kasem strong tingting ia blong stap smol long eria ia. Thankful, oli bin jusum se bae oli gohed iven we Parli i no stap. “Mi gat wan wok blong mekem long ples ia,” Parli i bin talem long hem, “mo wanem wok ia, o bae i tekem mi hamas taem blong mekem, mi mi no save; be bambae mi kam taem wok ia i finis.” Long ples ia nao hem i fastaem we bae Parli i harem abaot Buk blong Momon. “Mi bin filim se mi intres tumas long buk ia,” hem i talem. Hem i askem wan kopi, mo i bin ridim buk truaot long naet. Long moning, hem i bin save se buk ia i tru, i tekem buk ia i impoten, “i moa impoten bitim evri rij samting blong wol ia.” Afta sam dei nomo, Parli i kasem baptaes. Afta long hemia, hem i gobak luk Thankful, we hem tu, i kasem baptaes. (Blong gat moa infomesen abaot Parli P. Prat, luk long Doktrin mo Ol Kavenan 32.)

Long rod blong hem, we i aot long Niu Yok i go long wan misin long Misuri, Parli Prat mo ol fren blong hem we oli stap wok, oli bin stop long Menta, Ohaeo, long hom blong Sidni mo Phebe Rigdon—tufala i ol gudfala fren blong Parli, we hem i save tufala taem oli bin stap long Ohaeo. Sidni i bin wan Kristin pasta, mo Parli i bin wan memba blong kongregesen blong hem, mo i tekem hem olsem wan tija blong lidim tingting long saed blong spirit. Parli i wantem tumas blong talem long ol fren blong hem abaot Buk blong Momon, mo Restoresen blong gospel blong Jisas Kraes. Sidni hemwan, i bin stap lukaotem wan restoresen blong tru Jos we hem i bin faenem insaed long Niu Testeman, nomata we hem i no gat gud filing abaot Buk blong Momon blong fas taem. Hem i talem long fren blong hem, Parli: “Be bae mi ridim buk blong yu, mo bae mi traem blong faenemaot se, yes o no, sapos hem i wan revelesen we i kam long God.” Afta long tu wik blong stadi mo prea, tugeta, hem mo Phebe, tufala i save stret se buk ia i tru. Be Sidni i bin save tu se, blong joenem Jos, bae i wan bigfala sakrifaes blong famli blong hem. Bae hem i lusum wok blong hem olsem wan wokman blong jos, wetem sosol ples blong hem insaed long komuniti. Taem we hem mo Phebe i toktok raon long hemia, Phebe i talem: “Mi kaontem se bae yumitu pem ol samting ia i hamas, mo … hem i tingting blong mi blong mekem tingting blong God, i nomata se bae mi fesem laef o ded.”