“7–13 Epril: ‘Leftemap Voes blong Yufala…blong Talemaot Gospel blong Mi’: Doktrin mo Ol Kavenan 30–36,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 30–36,” Kam Folem Mi—Blong Hom mo Jos: 2025
7–13 Epril: “Leftemap Voes blong Yufala … blong Talemaot Gospel blong Mi”
Doktrin mo Ol Kavenan 30–36
Parli P. Prat i bin wan memba blong Jos blong samples wan manis taem God i bin singaotem hem “long ples we i no gat plante man long hem” blong prijim gospel (Doktrin mo Ol Kavenan 32:2). Tomas B. Mars i bin wan memba blong Jos we i no kasem wan manis yet, be oli talem long hem se: “Aoa blong misin blong yu i stap kam” (Doktrin mo Ol Kavenan 31:3). Orson Prat, Edwod Patrij, mo plante moa i semmak long tufala; oli jes baptaes nomo i kam long Jos taem we misin koling blong olgeta i kam tu. Be maet long paten ia, i gat wan lesen we i blong yumi tedei: sapos yu yu save inaf blong akseptem gospel ia we i kambak tru long baptaes, yu save inaf blong serem hemia wetem ol narawan. I tru, oltaem yumi wantem kasem moa save long saed blong gospel, be God i neva bin wet blong singaotem “olgeta we oli no skul gud” o oli no save tumas samting, blong prijim gospel blong Hem (Doktrin mo Ol Kavenan 35:13). I tru, Hem i stap invaetem yumi evriwan blong “openem maot blong yu blong talemaot gospel blong mi” (Doktrin mo Ol Kavenan 30:5). Mo yumi mekem hemia long bes wei, i no tru long waes tingting mo eksperiens blong yumiwan nomo, be, “tru long paoa blong Spirit” (Doktrin mo Ol Kavenan 35:13).
Luk tu long “The Faith mo Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” long Revelations in Context, 54–69.
Ol aedia blong Lanem Samting long Hom mo long Jos
Oli singaotem mi blong kam wan witnes blong Jisas Kraes.
Nomata sapos yu gat o no gat wan stret koling olsem wan misinari, yu save stap wan witnes blong Kraes “long evri taem mo long evri samting, mo long evri ples” (Mosaea 18:9). Taem yu stap stadi long Doktrin mo Ol Kavenan 30–36, raetemdaon wanem yu lanem abaot ol janis blong yu blong serem gospel. Yu save mekem wan lis blong ol samting we Lod i askem long yu mo wan narafala lis blong ol promes we Lod i mekem taem yu serem gospel (eksampol, luk long Doktrin mo Ol Kavenan 30:8; 31:3–5; 32:1, 5; 35:13–15, 24). Mo tu, yu save lukaotem ol prinsipol we i save helpem yu blong serem gospel. ?Wanem nao yu faenem we i givim insperesen long yu blong “talemaot ol gudfala nius blong bigfala glad”? (Doktrin mo Ol Kavenan 31:3).
Elda Gary E. Stevenson i bin tijim se blong stap talemaot gospel “i save hapen tru ol simpol prinsipol we i isi blong andastanem, we oli bin tijim long wanwan long yumi taem yumi smol: lavem, serem, mo invaetem” (“Lavem, Serem, Invaetem,” Liahona, Mei 2022, 85). Tingting blong stap stadi long mesej blong hem taem yu stap tingting abaot wan we yu no save gud, ol fren mo famli. ?Wanem ol aedia we i kam long yu abaot olsem wanem bae yu serem wetem olgeta “wanem we [yu] laekem abaot gospel blong Jisas Kraes”? ?Wanem wei nao yu save invaetem olgeta blong “kam mo luk,” “kam mo givim seves,” mo “kam mo stap pat”? Taem yu singsing mo lisin long “I’ll Go Where You Want Me to Go” (Hym, namba 270) o wan hym we i go wetem, maet bae yu askem yuwan, “?Wanem nao Lod i wantem mi blong talem mo kam, blong save serem gospel blong Hem?”
Luk tu long Marcos A. Aidukaitis, “Leftemap Hed blong Yu mo Stap Glad,” Liahona, Mei 2022, 40–43; Topics and Questions, “Inviting All to Receive the Gospel of Jesus Christ,” “Ministering as the Savior Does,” Gospel Laebri; “Inviting All to Come unto Christ: Sharing the Gospel” (vidio), Gospel Laebri.
Inviting All to Come unto Christ: Sharing the Gospel
Doktrin mo Ol Kavenan 31:1–2, 5–6, 9, 13
Lod i save helpem mi wetem ol famli rilesensip blong mi.
Ol famli long ol yia 1830 oli bin gat trabol wetem ol semfala jalenj we ol famli tedei oli stap fesem. ?Wanem daereksen mo ol promes nao we Lod i bin givim long Tomas B. Mars abaot famli blong hem Doktrin mo Ol Kavenan 31? (luk speseli ol ves 1–2, 5–6, 9, 13). ?Olsem wanem nao ol toktok blong Hem oli helpem yu wetem ol famli rilesensip blong yu?
Blong kasem moa infomesen abaot Thomas B. Mars, luk long Saints, 1:79–80, 119–20.
Doktrin mo Ol Kavenan 32–33; 35
Lod i mekem mi rere from wok we Hem i wantem mi blong mekem.
Blong stap stadi long laef blong ol pipol we oli tokbaot olgeta long Doktrin mo Ol Kavenan 32–33; 35 i save helpem yu blong luksave olsem wanem nao Lod i stap mekem yu rere blong wok blong Hem. Eksampol, yu save rid abaot rilesensip bitwin Parli P. Prat mo Sidni Rigdon long “Ol Voes blong Restoresen: Ol Fasfala Konvet.” ?Long wanem wei nao rilesensip ia i blesem ol pikinini blong God? (luk long Doktrin mo Ol Kavenan 35).
Hemia wan narafala eksampol: Esra Teya i bin raetem se, samtaem bifo hem i kasem baptaes, hem i bin gat wan visen, mo insaed long visen ia, “wan man i bin kam, mo i tekem wan rol blong pepa i kam, i givim long mi; mo tu, i givim wan pupu mo i talem se bae mi plei long hem. Mi talem long hem se mi neva plei pupu long laef blong mi. Hem i talem se: yu save plei long hem; yu traem. … Hem i mekem wan naesfala saon, we mi neva harem bifo ” (“Revelation, October 1830–B, Revelation Book 1,” histri Introdaksen, josephsmithpapers.org). Afta, taem we Josef Smit i bin kasem wan revelesen blong Esra Teya mo Nortrop Swit, we naoia oli rekodem olsem Doktrin mo Ol Kavenan 33, Esra i tekem se hemia i revelesen ia we i olsem rol pepa insaed long visen blong hem. ?Olsem wanem nao Lod i stap mekem Esra i rere blong wok ia we Lod i wantem hem blong mekem long Doktrin mo Ol Kavenan 33:1–13?
?Wanem pruf nao yu luk, se han blong Lod i bin stap insaed long laef blong ol fasfala memba blong Jos? ?Huia nao Lod i putum long rod blong laef blong yu blong helpem yu kam long Kraes? ?Olsem wanem nao Hem i stap mekem yu rere blong blesem ol narawan taem yu stap fetful, lavem o mekem invitesen blong yu?
Luk tu long “A Mission to the Lamanites,” long Revelations in Context, 45–49.
Doktrin mo Ol Kavenan 33:12–18
Sapos mi bildimap laef blong mi long gospel blong Sevya, bambae mi no foldaon.
Doktrin mo Ol Kavenan 33 i ol toktok we i go long Nortrop Swit mo Esra Teya, tufala niu memba blong Jos. Nortrop i lego Jos stret afta we revelesen ia i bin kamaot. Esra i bin fetful blong givim seves blong sam taem, be long en, hem i bin kamaot long Jos. Blong stap rid abaot olgeta insaed long seksen ia i save givim insperesen long yu blong tingting long hamas yu stanap strong “antap long strong ston ia” (ves 13) blong gospel. ?Wanem ol trutok, insaed long ol ves ia, we i save helpem yu blong gohed blong stap fetful long Sevya?
Luk tu long Hileman 5:12
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Mi mas lukluk nomo long ol samting blong God bitim ol samting blong wol ia.
-
Bae i wan gudfala samting blong mekem blong ol pikinini blong yu blong traem blong mekem tu wok long semmak taem, olsem blong talem baehat ol toktok blong wan fevret singsing mo semtaem stap raetemdaon ol nem blong evri memba blong famli blong olgeta. ?From wanem i had blong mekem tu samting long semmak taem? Tugeta, yufala i save ridim Doktrin mo Ol Kavenan 30:1–2 . ?Wanem sam “samting blong wol” we i save pulum tingting blong yumi, blong no stap tingbaot Jisas Kraes mo gospel blong Hem? ?Olsem wanem nao yumi save lukluk nomo long Hem?
Doktrin mo Ol Kavenan 33:2–3, 6–10
Mi save serem gospel blong Jisas Kraes.
-
Blong helpem ol pikinini blong yu blong andastanem Doktrin mo Ol Kavenan 33:8–10, yu save invaetem olgeta blong traem blong talem wan toktok wetem maot blong olgeta i klos, mo taem ia bae yu mo ol narafala pikinini blong yu bae i traem talem se wanem ia oli stap traem blong talem. Ridim ol ves 8–10 mo mo askem olgeta blong openem maot blong olgeta taem we toktok ia “openem maot blong yu” oli stap ripitim. ?From wanem Papa long heven i wantem yumi blong openem ol maot blong yumi mo serem gospel wetem ol narawan? ?Wanem nao yumi save talem long famli mo ol fren blong yumi abaot Sevya mo gospel blong Hem? Mo tu, yu save singsing wan singsing abaot stap serem gospel olsem “We’ll Bring the World His Truth” (Children’s Songbook, 172–73).
-
Tingting blong stap serem ol eksperiens we yu bin gat we i go wetem ol prinsipol o ol promes insaed long Doktrin mo Ol Kavenan 30–34. ?Wanem nao yu lanem o filim abaot Sevya blong yu mo wok blong Hem taem yu bin givim seves long Hem?
I gat plante wei blong serem gospel.
Testifae abaot ol blesing we Lod i promesem. Taem yu invaetem ol pikinini blong laef folem wan gospel prinsipol, yu save serem ol promes we God i bin mekem long ol pipol we oli bin laef folem eksampol ia. Eksampol, yu save serem testemoni abaot ol blesing we Hem i givim long yumi taem yumi openem maot blong yumi blong serem gospel.
Doktrin mo Ol Kavenan 33:12–13
Mi save bildim laef blong mi long gospel blong Jisas Kraes.
-
Yu save tekem ol pikinini blong yu i go aotsaed blong luk fandesen blong hom blong olgeta o blong Jos bilding mo askem olgeta blong tokbaot fandesen ia. ?From wanem wan bilding i nidim wan strong fandesen? Ridim wetem olgeta Doktrin mo Ol Kavenan 33:12–13, mo serem ol filing blong yufala tugeta abaot from wanem Lod i wantem yumi blong bildimap laef blong yumi long gospel blong Hem. ?From wanem “strong ston” i wan gudfala toktok blong tokbaot gospel? ?Olsem wanem nao yumi save bildimap laef blong yumi long strong ston blong gospel? (luk tu long Matiu 7:24–29).
Blong kasem moa aedia, luk long magasin blong Fren long manis ia.