“14–20 Epril: ‘Mi Mi Hem Ia we I Stap Laef, Mi Mi Hem we Oli Bin Kilim Hem I Ded’: Ista,” Kam Folem Mi—Blong Hom mo Jos: Doktrin mo Ol Kavenan 2025 (2025)

“Ista,” Kam Folem Mi—Blong Hom mo Jos: 2025

14–20 Epril: “Mi Mi Hem Ia we I Stap Laef, Mi Mi Hem we Oli Bin Kilim Hem I Ded”

Ista

3 Epril 1836, i bin Ista Sandei. Afta we tufala i bin help blong blesem mo pasem sakramen long Ol Sent long niufala Ketlan Tempol we oli jes dediketem, Josef Smit mo Oliva Kaodri, tufala i bin faenem wan kwaet ples biaen long wan vel mo tufala i bin benem hed blong tufala mo prea long saelen. Afta, long tabu dei ia, taem Ol Kristin Man, long evri ples, oli bin stap makem Laef Bakegen long Ded blong Jisas Kraes, Sevya ia we i bin girap, Hemwan i bin kamkamaot insaed long tempol blong Hem, i talem: “Mi mi hem ia we i stap laef, mi mi hem we oli bin kilim hem i ded” (Doktrin mo Ol Kavenan 110:4).

?Hem i minim wanem blong talem se Jisas Kraes, Hem i “hem ia we i stap laef”? Hem i no minim nomo se Hem i bin girap long tumb i kamaot long ol disaepol blong Hem long Galili. I minim se Hem i stap laef, tedei. Hem i stap toktok tru long ol profet, tedei. Hem i stap lidim Jos blong Hem, tedei. Hem i stap hilim ol soa mo ol hat we oli brokbrok, tedei. Mekem se yumi save talemaot ol toktok blong testemoni blong Josef Smit we i gat paoa: “Afta long plante testemoni we oli bin givim abaot hem, hemia i testemoni, … we mitufala i givim abaot hem: !Se hem i stap laef!” (Doktrin mo Ol Kavenan 76:22). Yumi save harem voes blong Hem long ol revelesen ia, witnesem han blong Hem long laef blong yumi mo filim “glad we i kam tru tok ia: ‘!Mi save Ridima Hem i laef!’” (STSP, namba 38).

Ol aedia blong Lanem Samting long Hom mo long Jos

Jisas Kraes i stap laef.

Plante long yumi i no bin luk Jisas Kraes olsem we profet Josef Smit i bin luk. Be yumi save kam blong save, olsem we hem i mekem, se Sevya i stap laef, se Hem i save ol sakses blong yumi mo ol hadwok, mo se Hem bae i helpem yumi long ol taem blong nid. Tingting long testemoni blong yuwan abaot Kraes we i stap laef, taem yu tingting hevi long ol kwestin we i stap ia mo stadi long ol risos we i kam wetem.

?Huia I Jisas Kraes? ?From wanem yumi wosipim Hem? (luk long “Kraes we I Stap Laef: Testemoni blong Olgeta Aposol”).
?Wanem nao Spirit i tijim long mi abaot eksperiens blong Josef Smit mo ol narawan we oli bin luk Sevya? ?Olsem wanem nao ol testemoni blong olgeta i mekem testemoni blong mi i kam strong moa? (luk long Doktrin mo Ol Kavenan 76:11–14, 20–24; 110:1–10; Josef Smit—Histri:17).
?Wanem nao mi lanem abaot misin blong Sevya mo hamas ol toktok blong Hemwan oli tabu? (luk long Doktrin mo Ol Kavenan 29:5; 38:7).
?Olsem wanem nao Sevya i helpem mi tedei? (luk long Aesea 53:3–5; Hibrus 2:17–18; Mosaea 3:7; Alma 7:11–13; 36:3; Ita 12:27; Moses 5:10–12).

Paoa i kam tru long fasin blong lanem samting baehat. Elda Richard G. Scott i bin eksplenem se: “Bigfala paoa i save kam taem yu lanem baehat ol skripja. Blong lanem wan skripja baehat, hem i blong bildimap wan niu frensip. Hem i olsem blong faenemaot wan niu man o woman we i save help long taem blong nid, we i save givim insperesen mo kamfot, mo i stap olsem wan we i save pusum yu blong mekem wan jenis we i nid blong mekem” (“The Power of Scripture,” Ensign, Nov. 2011, 6). Sapos yu faenem wan skripja abaot Sevya we speseli, i gat bigfala mining long yu—maet wan we i save givim kamfot long yu long wan taem blong nid—tingting blong lanem baehat.

Long vidio ia “My Spiritual Goal,” wan yang woman i jusum blong laenem baehat “Kraes we I Stap Laef” (Gospel Laebri). ?Wanem nao i tajem hat blong yu abaot eksperiens blong hem? ?Wanem nao yu filim we i givim insperesen long yu blong mekem blong kasem ol trutok insaed long “Kraes we I Stap Laef” long hat mo maen blong yu?

Blong lanem moa abaot olsem wanem Sevya i stap blesem yumi tedei, yu save stadi, lisin o singsing “Mi Save Ridima Hem i Laef” (STSP, namba 38). Bae i save givim insperesen blong lukaotem ol trutok insaed long hym ia we oli tijim tu insaed long Doktrin mo Ol Kavenan 6:34; 84:77; 98:18; 138:23.

Luk tu long Topics and Questions, “Jesus Christ,” Gospel Laebri.

Hem i from Jisas Kraes, bambae mi laef bakegen long ded.

Josef Smit i bin save se, man i harem olsem wanem, taem hem i stap krae sore from ded blong olgeta we yumi lavem olgeta, hemia i tekem tu, papa mo tufala brata blong hem. Josef mo Ema, tufala i bin berem sikis pikinini blong tufala, we oli moa yang mo i no ova tu yia. Long ol revelesen we God i givim, Josef mo Ema i bin kasem wan lukluk we i no save finis.

Lukaotem ol trutok abaot ded mo plan ia blong God we i no save finis Doktrin mo Ol Kavenan 29:26–27; 42:45–46; 63:49; 88:14–17, 27–31; 93:33–34. ?Olsem wanem nao ol trutok ia oli jenisim wei we yu lukluk long saed blong ded? ?Olsem wanem oli save jenisim fasin ia we yu stap laef long hem?

Luk tu long 1 Korin 15; Teachings of Presidents of the Church: Joseph Smith (2007), 174–76; Easter.ChurchofJesusChrist.org.

Jisas Kraes i bin mekem i hapen wan “atonmen we i stret evriwan” blong mi.

Wan wei blong lukluk nomo long Sevya long Ista taem, hem i blong stadi long ol revelesen insaed long Doktrin mo Ol Kavenan, we oli tij abaot sakrifaes blong Hem we i pem praes from ol sin blong ol man. Oli save faenem samfala insaed long Doktrin mo Ol Kavenan 18:10–13; 19:16–19; 45:3–5; 76:69–70. Tingting blong raetem wan lis blong ol trutok we yu faenem insaed long ol ves ia. Blong mekem stadi blong yu i kam moa gud, yu save ademap long lis blong yu taem yu stap lukaotem Luk 22:39–44; 1 Jon 1:7; 2 Nifae 2:6–9; Mosaea 3:5–13, 17–18; Moronae 10:32–33.

Hemia samfala kwestin we oli save lidim stadi blong yu:

?Wanem nao hem i Atonmen blong Jisas Kraes?
?From wanem Jisas i bin jusum blong safa mo ded from yumi?
?Wanem nao bae mi mas mekem blong kasem ol blesing blong sakrifaes blong Hem?
?Mi filim olsem wanem abaot Jisas Kraes afta we mi ridim ol ves ia?

Luk tu long Gaed long Ol Skripja, “Atonemen,” Gospel Laebri; “The Savior Suffers in Gethsemane” (vidio), Gospel Laebri.

Blong kasem moa aedia, luk long ol magasin blong manis ia Liahona mo Blong Ol Yut Oli Kam Strong magasin.

Sam Aedia blong Tijim Ol Pikinini

Hem i from Jisas Kraes, bambae mi laef bakegen long ded.

Blong tijim ol pikinini blong yu abaot laef bakegen long ded, yu save stat taem yu stap soem ol pikja blong ded mo Laef Bakegen long Ded blong Sevya long olgeta. Letem ol pikinini i serem wanem oli save abaot ol samting ia we oli hapen. Mo tu, yu save singsing wan singsing olsem “Did Jesus Really Live Again?” (Children’s Songbook, 64).
Tingting long wan lesen we i yusum wan samting we i save helpem ol pikinini blong yu blong andastanem wanem i hapen taem yumi ded (ol spirit blong yumi mo bodi i seperet) mo taem yumi laef bakegen long ded (ol spirit mo bodi blong yumi i kambak tugeta, mo ol bodi blong yumi oli kam stret gud evriwan mo i nomo save ded). Eksampol: ?wanem i hapen taem yumi karem batri aot long wan toj o kontena blong ing aot long wan pen? ?Wanem i hapen taem oli joenem olgeta bakegen? (Luk long Alma 11:44–45.)
?Ol pikinini blong yu oli save wan we i ded i no longtaem? Askem olgeta blong serem wan smol samting abaot wanwan man o woman ia, afta, tugeta, ridim Doktrin mo Ol Kavenan 138:17. Toktok wetem wanwan long yufala abaot wanem yu filim blong save se olgeta we yumi lavem bae oli laef bakegen long ded mo gat ol bodi bakegen.
Sapos yu gat ol pikinini we oli bigwan, bae yu save invaetem olgeta blong lukaotem ol sentens we mekem oli andastanem mesej blong Ista long ol skripja ia: Doktrin mo Ol Kavenan 63:49; 88:14–17, 27; 138:11, 14–17. Oli save mekem i semmak wetem vidio “Because He Lives” (Gospel Laebri). ?Olsem wanem nao yumi save serem mesej ia wetem ol narafala man?

taem oli berem mo Laef Bakegen long Ded blong Kraes

Profet Josef Smit i bin luk Jisas Kraes.

Maet bae yu mo ol pikinini blong yu i intres blong rid abaot tri defren taem we Jisas Kraes i bin kamkamaot long Josef Smit mo ol narawan, olsem we oli rekodem long Josef Smit—Histri 1:14–17; Doktrin mo Ol Kavenan 76:11–24; 110:1–10. Mo tu, ol pikinini blong yu oli save lukluk long pikja blong ol samting ia we oli hapen insaed long aktiviti pejblong wik ia. ?Wanem nao yumi lanem abaot Jisas Kraes aot long ol wanwan eksperiens ia? ?From wanem i wan blesing blong save se Josef Smit mo ol narawan we oli bin luk Sevya we i bin girap long ded?

From Jisas Kraes, bae mi save kasem fogivnes from ol sin blong mi.

Ol trutok we Josef Smit i lanem abaot fasin blong fogiv we i kam tru long Jisas Kraes, i save givim hop long ol pikinini blong yu, se oli save kasem fogivnes long ol mistek mo ol sin blong olgeta. Tingting blong stap invaetem ol pikinini blong yu blong krietem wan tebol wetem ol heding olsem hemia: Wanem nao Sevya i mekem blong mi mo Wanem nao mi mas mekem blong kasem fasin blong fogivnes. Helpem ol pikinini blong yu blong lukaotem ol sentens ia blong faenem ol samting we i blong stap andanit long ol heding ia: Doktrin mo Ol Kavenan 18:10–13; 19:16–19; 45:3–5; 58:42–43. Serem wetem wanwan long yufala glad mo tangkyu blong yufala long wanem Sevya i bin mekem blong yumi.
Mo tu, yufala i save wajem vidio “The Shiny Bicycle” wetem ol pikinini blong yufala (Gospel Laebri) mo serem ol eksperiens blong taem we yu bin filim fogivnes blong Sevya taem yu sakem sin.

Blong kasem moa aedia, luk long magasin blong Fren long manis ia.

Kraes ia we i girap long ded i kamkamaot long Meri — Kraes mo Meri long Tumb, i kam long Joseph Brickey