Doktrin mo Ol Kavenan 41–44

Long eli 1831, Ol Sent oli stat blong kam tugeta long Ohaeo. Oli wantem tumas blong kasem loa we God i bin promes blong givim long olgeta long ples ia (luk long Doktrin mo Ol Kavenan 38:32). Be faswan, Hem i tijim olsem wanem ol disaepol blong Hem oli mas rere blong kasem o akseptem loa blong Hem. ?Wanem ol prinsipol we yu faenem insaed long Doktrin mo Ol Kavenan 41:1–6 we bae i save helpem Ol Sent blong akseptem loa blong God? ?Olsem wanem nao ol prinsipol ia oli save helpem yu blong kasem instraksen we i kam long Hem?

Luk tu long “A Bishop unto the Church,” long Revelations in Context, 77–83.

Olgeta Sent oli bin tekem se, revelesen ia we i stap long Doktrin mo Ol Kavenan 42:1–72 i stap olsem wan long ol revelesen we i moa impoten we Profet i bin kasem. Hemia i wan long ol fasfala revelesen we oli pablisim. Blong plante yia, Ol Sent oli bin singaotem long simpol toktok olsem “loa.” Nomata se seksen ia i no tekem evri komanmen o loa blong Lod, hem i impoten inaf blong tingting hevi long, from wanem nao ol prinsipol ia oli impoten long niufala Jos we i kambak. ?From wanem oli impoten long yumi tedei?

From se seksen 42 i longfala long ol narawan, maet yu save tingting blong stap stadi long ol smosmol pat olsem olgeta ia. Faenemaot ol prinsipol we oli tijim long wanwan mo tingting long olsem wanem ol loa ia oli wan saen blong lav blong Lod long ol pipol blong Hem.

• Ol ves 4–9, 11–17, 56–58

• Ol ves 18–29

• Ol ves 30–31

• Ol ves 40–42

• Ol ves 43–52

?From wanem Lod i givim ol loa mo ol komanmen long yumi? ?Tru long ol wanem wei nao yu bin kasem blesing blong save mo stap folem ol komanmen?

Olsem pat blong loa we oli talemaot long seksen 42, Lod i tijim Ol Sent, olsem wanem oli save, gat “evri samting long medel blong olgeta” (Ol Wok 2:44; 4 Nifae 1:3), mo we i “no gat pua long medel blong olgeta” (Moses 7:18). ?Wanem nao yu lanem aot long Doktrin mo Ol Kavenan 42:30–42 abaot olsem wanem Ol Sent oli laef folem loa blong Konsekresen? (Blong konsekretem i minim blong putum wan samting long saed blong wan tabu stamba tingting.)

Nomata se yumi no gat “evri samting long medel blong yumi” tedei, insaed long tempol, Ol Lata-dei Sent oli mekem kavenan blong laef folem loa blong konsekresen. ?Olsem wanem nao yu save konsekretem wanem we God i bin givim long yu blong blesem ol pipol we oli stap long nid? Maet singsing long wan singsing olsem “Because I Have Been Given Much” (Hym, namba 219) i save givim sam aedia.

Luk tu long Sharon Eubank, “Mi Prea se Bae Hem I Yusum Yumi,” Liahona, Novemba 2021, 53–56; “The Law,” long Revelations in Context, 93–95.

Traem tingting se, yu stap storian wetem wan niu memba blong Jos we i glad blong save se Jos ia, i kasem daereksen tru long revelsen. ?Olsem wanem nao yu save yusum Doktrin mo Ol Kavenan 43:1–16 blong helpem hem i lanem abaot paten blong Lod blong stap lidim Jos blong Hem tru long profet blong Hem? ?Olsem wanem nao bae yu yusum Doktrin mo Ol Kavenan 42:61, 65–68 blong tijim abaot fasin blong stap kasem revelesen blong yuwan?

?Wanem i sam long ol “trutok blong kingdom we bae oli givim pis” mo ol samting we i givim glad long yu we yu bin kasem long Lod tru long Spirit blong Hem?

Blong lanem abaot olsem wanem ol lida blong Jos oli harem voes blong Lod, yu save wajem wan long ol vidio long “Lisin Gud long Hem” koleksen insaed long Gospel Laebri. Tingting blong stap krietem vidio blong yuwan, blong stap eksplenem olsem wanem Lod i stap toktok wetem yu.

Luk tu long Russell M. Nelson, “Revelesen blong Jos, Revelesen blong Laef blong Yumi,” Liahona, Mei 2018, 93–96; “All Things Must Be Done in Order,” long Revelations in Context, 50–53.

• Blong helpem ol pikinini blong yu oli save wanem i minim blong stap wan disaepol blong Jisas Kraes, yu save raetemdaon Doktrin mo Ol Kavenan 41:5 long wan pis blong pepa, livim ol spes long ples ia we toktok ia disaepol bae i stap long hem. Afta, oli save lukaotem long ves 5 blong faenem toktok we i no gat. Folem wanem we i stap long ves ia, ?wanem nao i minim blong stap wan disaepol blong Jisas Kraes? ?Olsem wanem nao, yumi stap traem blong kam ol moa gud disaepol blong Kraes?

• Maet ol pikinini blong yu bae oli glad blong stap plei wan gem we i nidim olgeta blong lisin gud mo folem ol instraksen. Maet yufala i save yusum gem ia blong tokbaot wanem i minim blong “lisin gud mo harem mo obei” long Lod (Doktrin mo Ol Kavenan 42:2). ?Wanem ol instraksen we Hem i bin givim long yumi? ?Long wanem wei nao yumi kasem blesing taem yumi stap obei ol loa mo ol komanmen blong Hem?

• Maet yu save finisim aktiviti pej blong wik ia wetem ol pikinini blong yu. Mo tu, yufala i save singsing wan singsing abaot fasin blong stap obei ol loa blong God, olsem “I Want to Live the Gospel” (Children’s Songbook, 148). Tingting blong serem wetem wanwan long yufala, se olsem wanem taem yu obei ol loa blong God i givim bigfala glad long yu.

  

• Afta we yufala i ridim tugeta Doktrin mo Ol Kavenan 42:38, helpem ol pikinini yu blong tingting long ol wei we oli save givim seves long Jisas taem oli stap givim seves long ol narawan. Oli save faenem sam aedia long vidio “Pass It On” (ChurchofJesusChrist.org). Mo tu, oli save luk ol pikja blong Sevya we i stap helpem ol narawan, hilim ol sikman,i stap kaen long ol pikinini (luk long Gospel Art Buk, ol namba 42, 47).

  

  2:18

  

• Maet yu save soem long ol pikinini blong yu wan risit blong Taeting mo Ol Narafala Ofring mo tokbaot olsem wanem blong yusum blong givim wanem we yumi gat blong blesem ol narawan (luk tu long “Tithing and Donations Online”).

• Invaetem ol pikinini blong yu blong pikjarem long maen blong olgeta se wan man we i stanap long wan testemoni miting mo talem long wod se hem i bin kasem wan revelesen blong ful Jos (eksampol, wan revelesen se bae yumi nomo save kakae karot o se yumi mas wasem han wetem melek be i no wota). Hem i talem se yumi mas lisin long wanem hem i talem, be i no wanem profet i talem. ?Wanem i rong wetem hemia? Afta, tugeta yufala i save stadi long Doktrin mo Ol Kavenan 43:1–7 blong faenemaot olsem wanem Lod i givim ol komanmen long Jos blong Hem.

• Mo tu, yu save soem wan pikja blong profet we i stap laef, mo invaetem ol pikinini blong yu blong serem wan samting we Hem i bin tijim i no longtaem i pas. Sapos oli nidim help, serem wan vidio o sot stori long wan jeneral konfrens mesej we i jes hapen i no longtaem. ?From wanem i wan blesing blong gat wan profet we i stap laef tedei?