“Mei 5–11: ‘Ol Promes … Bae Oli Kamtru’: Doktrin mo Ol Kavenan 45,’ Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 45,” Kam Folem Mi—Blong Hom mo Jos: 2025
Mei 5–11: “Ol Promes … Bae Oli Kamtru”
Doktrin mo Ol Kavenan 45
Revelesen long seksen 45 oli bin kasem, folem seksen heding, “ol Sent oli bin glad tumas.” Mo i gat plante samting blong stap glad from long revelesen ia. Long hem, Sevya i givim promes we i kam long hat blong Hem blong toktok long bihaf blong yumi long fored blong Papa (luk long ol ves 3–5). Hem i tokbaot kavenan blong Hem we i no gat en we i stap go raon long wol, olsem “wan mesenja … blong mekem rere rod fastaem long [Hem]” (ves 9). Mo Hem i profesae abaot Seken Kaming blong Hem we i fulap long glori. Sevya i mekem evri samting ia mo semmak taem tu, hem i akseptem se hemia i ol trabol taem (luk long ves 34), long pat ia, from ol denja we bae oli tekem ples bifo Hem i kam bak. Be denja ia, tudak ia i no strong inaf blong prapa spolem laet blong hop. “I tru, mi talem long yufala,” Lod i talemaot, “se mi mi … wan laet we i saen long tudak” (ves 7). Hemia nomo i risen ia blong kasem revelesen ia—wetem wanem kaen kaonsel mo ol woning mo trutok we Hem i wantem blong givim—wetem glad.
Ol aedia blong Lanem Samting long Hom mo long Jos
Jisas Kraes, Hem i Loya blong mi wetem Papa.
Taem yumi filim se yumi no inaf o no klin inaf long fored blong God, yumi save faenem hop long ol toktok blong Sevya long Doktrin mo Ol Kavenan 45:1–5. Taem yu lukaotem ol ves ia, tingting long kwestin olsem:
-
?Wanem ol toktok mo sentens insaed long ol ves ia we yu filim speseli se oli gat bigfala mining long yu?
-
Wan loya hem i wan man o woman we i sapotem o givim tingting abaot wan man o wanem we i hapen long pablik. Folem wanem we i stap long ol ves ia, ?olsem wanem nao Jisas Kraes i mekem hemia blong yu? ?Wanem nao i mekem se Hem i kwalifae blong mekem?
-
?Wanem nao yu filim abaot ol toktok blong Sevya we i go long Papa? (ol ves 4–5).
Mo tu, yu save stadi long wanem we Elda Dale G. Renlund i bin tijim abaot Jisas Kraes, Loya blong yumi, long “Choose You This Day” (Liahona, Nov. 2018, 104–5). Folem toktok blong Elda Renlund, ?olsem wanem nao hem i komperem stamba tingting blong Sevya wetem blong Lusifa?
Paragraf ia bae i save givim sam moa andastaning long yu abaot rol blong Sevya olsem Loya. Taem yu stadi long olgeta, tingting blong stap raetemdaon ol sentens o ol trutok we yu save serem wetem ol narawan: 2 Nifae 2:8–9; Mosaea 15:7–9; Moronae 7:27–28; Doktrin mo Ol Kavenan 29:5; 62:1. ?From wanem ol sentens ia oli gat bigfala mining long yu?
Luk tu long “Mi Sapraes Tumas,” Hym, namba 22; Topics and Questions, “Atonement of Jesus Christ,” Gospel Laebri; “The Mediator” (vidio), Gospel Laebri.
The Mediator
Gospel i wan standet long ol nesen.
Long taem bifo, wan standet i wan bana we oli karem i go long faet, hemia oli yusum blong karem i kam tugeta ol soldia mo blong mekem oli kam wan Wan standet i stap tu olsem wan eksampol, o rul we oli stap makem ol nara samting wetem. Taem yu ridim Doktrin mo Ol Kavenan 45:9–10, tingting hevi long olsem wanem ol kavenan blong yu wetem Lod, oli bin stap olsem wan standet blong yu.
Doktrin mo Ol Kavenan 45:11–75
Jisas Kraes bae i kambak wetem glori.
Seken Kaming blong Lod, oli bin tokbaot olsem tugeta, “bigfala” mo “fraet” (Malakai 4:5). Insaed long Doktrin mo Ol Kavenan 45, tugeta wei we oli tokbaot i luk olsem se i stret gud wantaem. Revelesen ia i tekem tu, tugeta ol tru woning mo ol promes we i givim hop abaot taem we Lod bae i kam. Taem yu stadi long ol ves 11–75, tingting hevi long olsem wanem yu save rere from Seken Kaming wetem fet long Kraes bitim blong fraet. Raetemdaon wanem we yu faenem long wan daegram olsem hemia:
|
Profesi o promes |
Wanem nao mi save mekem |
|---|---|
Profesi o promes Wan laet (gospel ia) bae i kam long olgeta we oli sidaon long tudak (ves 28) | Wanem nao mi save mekem Kasem laet ia—mo serem (ves 29) |
Profesi o promes | Wanem nao mi save mekem |
Profesi o promes | Wanem nao mi save mekem |
Profesi o promes | Wanem nao mi save mekem |
Long vidio ia “Men’s Hearts Shall Fail Them” (Gospel Laebri), ?wanem kaonsel nao we Presiden Russell M. Nelson i givim blong helpem yumi blong fesem ol situesen blong fraet wetem pis?
Men's Hearts Shall Fail Them
Doktrin mo Ol Kavenan 45:31–32, 56–57
Mi save “stanap long ol tabu ples” mo no muv.
?Wanem nao yu lanem long Doktrin mo Ol Kavenan 45:31–32, 56–57 abaot, stap rere long taem we Lod bae i stap kam? ? Wanem nao i ol “tabu ples” blong yu? ?Hem i minim wanem blong “no muvmuv”? ?Olsem wanem nao yu save mekem ples we yu stap long hem i moa tabu?
Tekem not se Lod i tokbaot bakegen parabol blong ol ten yang gel, we i stap komperem oel olsem trutok mo Tabu Spirit. Tingting blong stap ridim parabol long Matiu 25:1–13 wetem tingting ia long maen. ?Wanem nao ol niu tingting we yu kasem?
Luk tu long David A. Bednar, “If Ye Had Known Me,” LiahonaNov. 2016, 102–5.
Parabol blong Ol Ten Yangfala Gel, i kam long Dan Burr
Doktrin mo Ol Kavenan 45:11–15, 66–71
Saeon i wan ples blong sefti blong Ol Sent blong God.
Ol Sent long taem blong Josef Smit oli bin wantem tumas blong bildimap Saeon, Niu Jerusalem (luk long Ita 13:2–9; Moses 7:18, 62–64). ?Wanem nao yu lanem, abaot Saeon—tugeta, we i siti blong Inok, mo lata-dei siti—we oli tokbaot long Doktrin mo Ol Kavenan 45:11–15, 66–71 Tedei, komanmen ia blong stanemap Saeon i stap minim blong stanemap kingdom blong God long weaples yumi stap long hem. ?Wanem nao yu save mekem blong bildimap Saeon long weaples yu stap long hem?
Sam Aedia blong Tijim Ol Pikinini
Jisas Kraes, Hem i Loya blong mi long fored blong Papa.
-
Bae yu save helpem ol pikinini blong yu blong andastanem se wan loya i wan man o woman we i stap sapotem wan narawan. Afta, yu save tokbaot sam eksampol blong wan we i stap olsem wan loya we bae oli save smol long hem (olsem blong stap sapotem wan fren). Taem yufala i ridim tugeta Doktrin mo Ol Kavenan 45:3–5 , helpem ol pikinini blong yu blong faenemaot huia nao hem i Loya blong yumi mo olsem wanem Hem i stap helpem yumi.
Mi save “stanap long ol tabu ples.”
-
Bae i naes tumas blong putum ol pikja blong wan hom, wan Jos bilding, mo wan tempol raon long wan rum. Afta, yu save givim long ol pikinini blong yu sam saen we i stap tokbaot ol ples ia mo invaetem olgeta blong stanap kolosap long pikja we yu stap tokbaot. Askem olgeta blong stanap kwaet taem yu stap ridim fasfala laen long Doktrin mo Ol Kavenan 45:32. ?Wanem sam long ol tabu ples we God i givim long yumi? Helpem ol pikinini blong yu blong oli andastanem se “blong stanap long ol tabu ples, mo … oli no muv,” i minim blong jusum raet long evri taem, i nomata wanem i stap hapen. ?Olsem wanem nao yumi save mekem hom blong yumi i kam wan moa tabu ples?
Gospel blong Jisas Kraes i wan standet long wol ia.
-
Bae yu save eksplenem long ol pikinini blong yu se long taem bifo, wan standet i bin wan bana o flaeg we oli karem i go long taem blong faet. Hem i helpem ol soldia blong save weaples blong kam wanples long hem, mo wanem blong mekem Tugeta, ridim Doktrin mo Ol Kavenan 45:9, mo tokbaot ol wei we gospel i olsem wan standet. Ol pikinini blong yu bae oli laekem blong stap mekem standet o flaeg blong olgetawan, we i tekem tu, ol pikja o ol toktok we i soemaot ol filing blong olgeta abaot Sevya.
Gospel i olsem wan standet, o wan bana o flaeg.
Doktrin mo Ol Kavenan 45:44–45
Jisas Kraes bae i kambak bakegen.
-
Ol prapa nogud samting we bae oli hapen bifo long Seken Kaming, bae i save mekem ol pikinini oli fraet. Blong stap poenem olgeta i go long Jisas Kraes i save helpem olgeta blong lukluk fored wetem fet! Tingting blong stap invaetem olgeta blong tingting abaot, olsem wanem nao oli filim taem wan we i spesel i stap kam blong visit, olsem wan bubuman o bubuwoman o wan fren. ?Olsem wanem bae oli rere from visit ia? Afta, yu save soem wan pikja blong Sevya mo ridim Doktrin mo Ol Kavenan 45:44–45. Serem wetem wanwan long yufala abaot wanem nao yu filim, abaot taem we Sevya bae i stap kam.
-
Blong helpem ol pikinini blong yu blong filim bigfala glad abaot Seken Kaming blong Sevya, yu save raetem long ol longfala pis blong pepa sam long ol promes we i givim hop we i stap long seksen 45 (luk long, eksampol, ol ves 44–45, 51–52, 55, 58–59, 66–71). Givim ol pepa ia long ol pikinini blong yu mo askem olgeta blong leftemap han blong olgeta taem oli harem yu ridim promes we oli stap holem taem yu stap ridim ol ves. Tokbaot wanem nao ol promes ia oli minim. Mo tu, yu save singsing wetem ol pikinini blong yu wan singsing abaot blong Seken Kaming, olsem “When He Comes Again” (Children’s Songbook, 82–83).
Helpem ol pikinini blong luksave Spirit. Taem yu tijim ol pikinini blong yu, talem long olgeta wetaem nao yu filim Tabu Spirit. Tokbaot olsem wanem nao yu luksave paoa blong Hem. Eksampol. Maet yu filim pis o glad taem yu stap singsing wan singsing abaot Sevya.
Blong kasem moa aedia, luk long magasin blong Fren long manis ia.