“12–18 Mei: ‘Lukaotem Wetem Strong Tingting, Ol Presen Ia we Oli Moa Gud Bitim Ol Narawan’: Doktrin mo Ol Kavenan 46–48,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 46–48,” Kam Folem Mi—Blong Hom mo Jos: 2025
Kamp Miting, i kam long Worthington Whittredge
12–18 Mei: “Lukaotem Wetem Strong Tingting, Ol Presen Ia we Oli Moa Gud Bitim Ol Narawan”
Doktrin mo Ol Kavenan 46–48
Taem we Parli P. Prat, Oliva Kaodri, Siba Pitasen, mo Pita Witma Junia oli aot long Ketlan mo oli muv i gohed blong prijim gospel, oli bin livim biaen moa long 100 niu memba blong Jos, we oli bin gat plante strong tingting, be oli gat smol eksperiens, o daereksen. Oli no bin gat ol instraksen hanbuk, i no gat lidasip trening miting, i no gat brodkas blong jeneral konfrens—wanem i stap, i we, oli no bin gat inaf kopi blong Buk blong Momon blong sendem i goraon. Plante long ol niufala konvet ia, oli bin kam long gospel ia we i bin kambak from promes ia nomo se bae Spirit i soemaot plante samting long olgeta, speseli olgeta we oli bin tokbaot insaed long Niu Testeman (eksampol, luk long 1 Korin 12:1–11). Be plante oli faenem i had blong luksave ol tru samting we Spirit i stap soemaot. Taem hem i luk fasin blong konfius we i stap, Josef Smit i bin prea blong kasem help. Ansa blong Lod i impoten tedei, taem we oltaem, ol pipol oli stap sakemaot o no wantem save long ol samting long saed blong Spirit. Hem i talem strong bakegen se ol samting we Spirit i stap soemaot, oli tru. Hem i mekem i klia wanem hem i olgeta : ol presen we i kam long wan Papa long Heven we i gat lav, “i givim ol samting ia blong gud blong olgeta we [Hem] i lavem mo stap obei evri komanmen blong [Hem], mo hem we i lukaotem blong mekem” (Doktrin mo Ol Kavenan 46:9).
Ol aedia blong Lanem Samting long Hom mo long Jos
Sevya i welkamem evriwan we oli wantem wosip insaed long Jos blong Hem.
?Yu yu filim se ol fren mo ol pipol we oli neba long ples we yu stap long hem, oli filim welkam long ol wosip seves long wod blong yu? ?Wanem nao yu stap mekem blong mekem se ol miting blong Jos oli ol ples we ol pipol oli wantem blong kambak long hem? Tingting hevi long olsem wanem blong yusum kaonsel blong Lod long Doktrin mo Ol Kavenan 46:1–7 (luk tu long 2 Nifae 26:24–28; 3 Nifae 18:22–23).
Mo tu, yu save tingting abaot wan taem we yu atendem ol seves long Jos—o wan miting blong wan narafala grup—blong fastaem. ?Wanem nao ol pipol oli mekem blong helpem yu filim welkam?
Luk tu long Moronae 6:5–9; “’Tis Sweet to Sing the Matchless Love,” Hym, namba 177; “Welcome” (vidio), Gospel Laebri.
Welkam ComeUntoChrist.org
Papa long Heven i givim ol presen long saed blong spirit long mi, blong mi blesem ol narawan.
Ol eli Sent oli bilivim ol presen long saed blong spirit be, oli nidim sam help blong luksave olgeta mo blong stap andastanem stamba tingting blong ol presen ia. Taem yu stadi abaot ol presen blong Spirit long Doktrin mo Ol Kavenan 46:7–33, tingting hevi long stamba tingting “se [from wanem nao] oli givim ol samting long yufala” (ves 8). ?Wanem nao yu lanem abaot God—Hem we i stap givim ol presen ia?
?Yu save tingting long ol eksampol blong ol pipol we yu bin luk we oli stap yusum ol presen ia o ol narafala presen? ?Olsem wanem nao ol presen ia oli “blong gud … blong ol pikinini blong God”? (ves 26). Mo tu, bae yu save luk sapos yu save fanem ol eksampol blong ol defdefren presen long saed blong spirit insaed long ol skripja olsem olgeta ia: 1 King 3:5–15; Daniel 2:26–30; Ol Wok 3:1–8; Hileman 5:17–19; Momon 1:1–5; Ita 3:1–15; Doktrin mo Ol Kavenan 6:10–12; Moses 7:13.
Stadi blong yu abaot ol presen long saed blong spirit bae i save lidim yu blong tingting hevi long ol wanem presen God i bin givim long yu. Long wanem wei nao yu save yusum ol presen ia blong blesem ol pikinini blong Hem? Sapos yu gat wan petriakel blesing, plante taem bae i talemaot ol presen we God i bin givim long yu. Blong stap ridim mesej blong Elda John C. Pingree Junia “I Have a Work for Thee” i save openem maen blong yu tu i go long ol presen we yu no bin tingting long olgeta (Liahona, Nov. 2017, 32–35).
Sapos yu laekem blong lanem abaot olsem wanem blong developem ol presen long saed blong spirit, mesej blong Elda Juan Pablo Villar long stat we i tokbaot klia long “Stap Mekem Ol Masel blong Spirit blong Yumi Oli Wok” i save help (Liahona, Mei 2019, 95). ?Wanem “ol eksasaes” we oli save helpem yu blong developem ol presen blong yu long saed blong spirit?
Luk tu long Topics and Questions, “Holy Ghost,” Gospel Laebri.
Lod i wantem Jos blong Hem blong kipim wan histri i stap.
Koling blong Jon Witma blong kipim wan histri blong Jos, i bin gohed olsem wan longfala tradisen blong ol man we oli stap kipim ol histri, long medel blong ol pipol blong God. ?Long tingting blong yu, from wanem i impoten blong kipim wan histri long Lod? Tingting hevi long hemia taem yu stap ridim seksen 47 mo tu, semmak instraksen long 2 Nifae 29:11–12; Moses 6:5; Ebraham 1:28, 31. ?Wanem nao yu filim se Lod i wantem yu blong raetemdaon abaot laef blong yu?
Insaed long FamilySearch, yu save raetemdaon ol memori mo ol eksperiens blong laef blong yu—mo laef blong ol bubu blong yu blong bifo (luk long FamilySearch.org).
Luk long Henry B. Eyring, “O Tingbaot, Tingbaot,” Liahona, Nov. 2007, 66–69.
Jon Witma
Tabu Spirit i save lidim mi taem mi mekem koling blong mi i hapen.
Bae yu save konektem wetem wanem we Jon Witma i bin filim taem hem i bin wantem save stret se koling blong hem i kam long God. ?Wanem nao Lod i talem long Doktrin mo Ol Kavenan 47 long Jon Witma—mo long yu—blong kasem insperesen wetem strong tingting, blong stap mekem i hapen ol koling we Hem i givim?
Rol blong wan tija. Blong stap tij i moa bitim blong stap givim infomesen nomo. Hem i tekem tu, tingting ia blong stap krietem wan envaeromen we long ples ia, ol memba blong klas oli save lan mo faenemaot ol trutok blong olgetawan mo serem wanem we oli bin lanem wetem wanwan long olgeta (luk long Tij Folem Wei blong Sevya, 26).
Sam Aedia blong Tijim Ol Pikinini
Mi save mekem ol nara man oli filim welkam long jos.
-
Afta we yu ridim Doktrin mo Ol Kavenan 46:5 wetem ol pikinini blong yu, tokbaot olsem wanem nao Sevya i wantem ol pipol blong filim taem oli kam long Jos blong Hem. Askem ol pikinini blong yu blong pikjarem long maen blong olgeta se oli luk wan we i jes kam long Jos blong fastaem. Helpem olgeta blong praktisim ol wei blong helpem man o woman ia blong filim welkam.
Papa long Heven i givim ol presen long saed blong spirit long mi, blong mi blesem ol narawan.
-
Blong helpem ol pikinini blong yu blong lanem abaot ol presen long saed blong spirit we oli tokbaot long Doktrin mo Ol Kavenan 46:13–26, tingting long aedia ia. Yu save raetem ol presen ia long ol pis blong pepa mo haedem olgeta raon long rum. Taem ol pikinini blong yu oli faenem wanwan pepa, helpem olgeta blong faenem weaples nao oli tokbaot presen ia long seksen 46. Tokbaot wetem olgeta abaot olsem wanem wanwan presen ia oli bin yusum blong blesem ol narawan (oli tokbaot long “Japta 20: Ol Presen blong Spirit,” long Ol Doktrin mo Ol Kavenan Stori, 77–80, i save help).
2:19Chapter 20: Gifts of the Spirit: 8•March 1831
-
Talem long ol pikinini blong yu abaot ol presen we yu filim se Papa long Heven i bin givim long olgeta, mo askem olgeta blong tokbaot ol presen we oli luksave long wanwan long olgeta. Folem wanem we i stap long Doktrin mo Ol Kavenan 46:8–9, 26, ?from wanem nao Papa long Heven i givim long yumi ol presen long saed blong spirit? ?Olsem wanem nao yumi save yusum ol presen ia blong yumi blong helpem ol narawan?
Mi save raetem histri blong mi.
-
Askem ol pikinini blong yu blong faenemaot wanem we Lod i wantem blong Jon Witma i mekem long Doktrin mo Ol Kavenan 47:1, 3. Mo tu, bae yu save serem wetem wanwan long yufala, ol fevret stori insaed long ol skripja. Poenemaot se, yumi save abaot ol stori ia from se wan i bin raetemdaon olgeta.
-
Tingting long olsem wanem bae yu save givim insperesen long ol pikinini blong yu blong oli raetemdaon ol histri blong olgetawan. Yu save serem sam long olgeta we yu bin raetemdaon long jenol blong yuwan o wan stori blong wan bubu blong yu blong bifo (luk long FamilySearch.org o long Memories ap). Yu save givim stat blong sam sentens blong raet long jenol, olsem: “?Wanem i hapen long wik ia we yu wantem blong serem wetem ol apupikinini blong yu? o ?olsem wanem nao yu luk han blong Lod insaed long laef blong yu long wik ia Ol yangfala pikinini oli save droem ol pikja blong eksperiens blong olgeta, o yu save rekodem olgeta we oli stap talem stori blong olgeta. ?Wanem ol blesing we bae oli kam taem yu stap kipim “oltaem wan histri”? (Doktrin mo Ol Kavenan 47:1).
Mi save helpem ol narawan taem mi serem wanem we oli bin givim long mi.
-
Taem yu ridim Doktrin mo Ol Kavenan 48:2–3 wetem ol pikinini blong yu, bae yu nidim blong eksplenem se ol pipol we oli bin aot long Is mo stap kam long Ohaeo, oli no bin gat ples blong stap long hem. ?Wanem nao Lod i askem Ol Sent blong mekem blong help? Helpem ol pikinini blong yu blong tingting long ol samting we God i bin givim long olgeta we oli save serem wetem ol narawan. Yu save singsing tu wetem olgeta wan singsing olsem “‘Give,’ Said the Little Stream” (Children’s Songbook, 236).
Blong kasem moa aedia, luk long magasin blong Fren long manis ia.