Reirei ao Berita aika Tabu 20–22

Bukin tera ti karekea te Ekaretia ae barongaaki? Tao te kaeka ae moan te tamaroa bon “Ibukina bwa bon Iesu Kristo ae barongaia.” Ngkai ko kamatebwaia Reirei ao Berita aika Tabu 20–21, ko na bae n noori bwaai aika titebo i marenan te Ekaretia are E kateia ngkoa ao teuana are E kaokia ni boong aikai. Kabonganai kiibu aika i mwiina n reiakina aron ana Ekaretia te Tia Kamaiu n taai ake ngkoa: Mataio 16:15–19; Ioane 7:16–17; Ebeto 2:19–22; 3 Nibwaai 11:23–26; Moronaai 4–5. Kabonganai kiibu aikai n reiakina taekan te Ekaretia ae kaokaki: Reirei ao Berita aika Tabu 20:17–25, 60, 72–79; 21:1–2. Ko kona n tau mwiin baike ko kunei n te taibora ae ai aron aei:

Ngke e kaokaki te Ekaretia, e reireniia Ana Aomata Aika Itiaki te Uea taekan otenanti aika tabu, n ikotaki ma te bwabetito ao te toa. Ngkai ko wareki taekan otenanti aikai, iangoia bwa a kanga ni buokiko n aron reitakim ma te Tia Kamaiu. Te katooto, a kanga otenanti aikai ni buokiko ni kateimatoa “nanom ni beku ibukin [Iesu Kristo] ni karokoa te toki”?(te kibu 37). Ko na bae naba ni wareka tataron te toa (kiibu 77, 79) ao iangoia n am iango bwa ko a bon tibwa ongo n te moan tai. Tera nonori aika ko karekei?

Taraa naba D. Todd Christofferson, “Bukin Tera Kawain te Berita,” Riaona, Meei 2021, 116–19.

Ko a tia n iangoia bwa bukin tera e kakawaki iroun te Tia Kamaiu bwa E na kaoka te nakoanibonga n Ana Ekaretia? Warekan te bwai are E tuangiia naake a taua te nakoanibonga bwa a na karaoia n Reirei ao Berita aika Tabu 20:38–60 e kona n anganiko nonori tabeua. E kanga te Tia Kamaiu n tia ni kakabwaiako ao am utu rinanon te mwakuri ae kabwarabwaraaki ni kiibu aikai?

Irarikiia naake a katabuaki nakon te nakoanibonga, aine ake a kaokoroaki bwa a na beku inanon te Ekaretia a kamwakura naba ana kariaia te Atua ngkai a ira buakon Ana mwakuri. N reiakinna bwa e kanga aron aio, taraa ana rongorongo Dallin H. Oaks, “The Keys and Authority of the Priesthood,” (Liahona,, Meei 2014, 49–52).

Tarai naba Topics and Questions, “Joseph Smith’s Teachings about Priesthood, Temple, and Women,” Gospel Library.

Reirei ao Berita aika Tabu 21:4–9 iai i nanona kakao n iriira ana burabeti te Uea ao berita aika korakora nakoia aomata ake a karaoia. A kona ni buokiko iango aikai ni iangoi kiibu aikai:

• Tera taeka i nanon kiibu 4–5 aika a kabwarabwara bwa tera ae tangiriko te Tia Kamaiu bwa ko na karaoia ma aia taeka Ana burabeti aika a maiu? Bukin tera ngkai ko namakinna bwa te “taotaonaki n nano ao te onimaki” a kainnanoaki ni karaoan aio?

• Iangoa te banna n tamnei are e kabongana te Tia Kamaiu n te kibu 6 ni kabwarabwarai kakabwaia man irirakin Ana burabeti. Tera am iango n ae nanonaki n “mataroan moone”? E kanga te Uea ni “kamaenakoa mwaakan te roo” ibukim? Tera ae nanonaki n “ioioa karawa ibukin kabwaiami”?

• Tera ae e tuangko te Uea bwa ko na karaoia rinanoia Beretitenti n te Ekaretia aika ngkai? E kanga te Uea ni kakoroi nanon Ana berita ngkai ko iriira Ana reirei?

Korei ni karinanii nonori ake a reke iroum man mwakoron ana marooro Unimwaane Neil L. Andersen “Ana Burabeti te Atua” (Riaona, Meei 2018, 24–27):

• Bukin Tera Ti Ira te Burabeti:

• Te Tia Taratara Iaon te Taua:

• Tai Kubanako:

Taraa naba “Watchman on the Tower” (video), ChurchofJesusChrist.org; Topics and Questions, “Prophets,” Gospel Library; “We Listen to a Prophet’s Voice,” Bokin n Anene, nambwa. 22.

4:17

• Iangoia ni kabongana atuun te mwakoro ibukin Reirei ao Berita aika Tabu 21, mwakoro 9 n Karaki n Reirei ao Berita aika Tabu, ke te witeo “Organization of the Church” (ChurchofJesusChrist.org) ni buokiia am ataei ni mataata bwa tera ae riki n te tai are e kateaki iai te Ekaretia.

  

  2:37

• Tao a kona am ataei ni katoatoai tamnein Iesu Kristo, temanna ae e ibuobuoki, te bwabetito, ao te toa ma kiibu inanon mwakoro 20 (tarai kiibu 21–23, 47, 72–74, 75–79). Kabonganai tamnei ao kiibu aikai ni maroroakin kakabwaia ake ti karekei ibukin ae Iesu Kristo e kaoka Ana Ekaretia.

• Am ataei a na bae ni kukurei n noora tamnein te ataei ae e bwabetitoaki ao ni kamatoaaki. A kona n taekinna bwa e kanga n titebo ma te kaetieti i nanon Reirei ao Berita aika Tabu 20:41, 71–74. Tera ae ti reiakinna man Reirei ao Berita aika Tabu 20:37 i aoia aomata ake a tangiria ni bwabetitoaki? Kam kona naba n uaia n anenea “When I Am Baptized” ni kabane (Aia Boki n Anene Ataei, 103) ke mataku n te witeo “The Baptism of Jesus” (Gospel Library).

  

  3:10

  

• Ngkana a tia am ataei ni bwabetitoaki ao ni kamatoaaki, titirakiniia n aron te bwai are a rinanona. Iai tamneia ae a kona n tibwaia? Marooro ma ngaiia i aon te bwai are a karaoia ni iriira Iesu Kristo ao e kanga ni kakabwaiaia.

• A kona am ataei ni kakaea te taeka “kukurei” i nanon Reirei ao Berita aika a Tabu 20:37 (i aon te bwabetito) ao te kibu 77 (tataron te toa). Tera ae tangiria te Uea bwa ti na kukurei ni karaoia? Tao a kona am ataei n taraa te bwai teuana ae iai te ara i aona (n aron aran te kanikina ke aran te aomata). Tera ae e tuangiira te ara ibukin taekan te bwai? Tera ae e nanonaki n ae ti na katoka Aran Iesu Kristo i aora?

• Bootaki ni wareka Reirei ao Berita aika Tabu 20:77 ao tuangiia am ataei bwa a na kinai taian berita ake ti karaoi ae mwakoron te bootaki n toa. Tao a na kona ni ikaruoruo ni katea kain te bwai teuana are a kona ni karaoi “n aki toki n ururinga” te Tia Kamaiu ao ni ketinna bwa tera are a katea kaina. Ni kaineti ma te kibu 77, ti na kanga ni kakabwaiaaki ngkai ti aki toki ni ururinga te Tia Kamaiu?

• I mwiin kunean te kakao ao berita i nanon Reirei ao Berita aika a Tabu 21:4–6, a kona am ataei n taraa tamnein te burabeti ae ai tibwa ngkai. Tibwaia i marenami taian kawai ae Iesu Kristo e kakabwaiako iai ibukin iriiraia Ana burabeti.