Bwanaa man Kaokan Bwaai

Iotebwa Timiti Jr., kainabana

“Ma te kukurei ae e aki kona n taekinaki, ao te namakin ae korakora are e uota te kimwareirei ae kaona nanou, ngke I taua baina, n te tairiki anne, raou ae tangiraki Emma—neiere kainabau, are bon kainabau i nanon au bong n ataei; ao bon te aomata are e rang tangiria nanou. A mwaiti namakin n au iango ngkana I iango i nanon tabeua te tai i nanon mwaitin taneiai ake ti a tia ni weteaki bwa ti na rinanona. Taian korakai ao taian kamwane, nanokawaki, ao te karawawataki, ao te kimwareirei ao karaunano ake a tia n rinanona ni maiura ao a tia ni kakabwaia maiura. O! ai onrakera au kantaninga ma iango aika a kamiimi n te tai ae uarereke. Manga aio naba neiei, i nanon tain te kaitiua ni kangaanga, n aki bwarannano, e matoa, ao n aki burebureaki, n aki bibitaki, Emma ae tangiraki.”

“Ngke te kairake ngkoa ngaia, ao, bon kateina bwa te tatauan nano, e kabanea nanona ibukin ana mwakuri te Uea, ao ni kabane ana motinnano nakon ti te ekaretia ao ibukin te koaua. N te tai are e karaoa iai te mwakuri, e karaoia ma nanona ao e aki titiraki are bon te titiraki ni iangoia iai i bon irouna ‘Ao tao N na karekea riki ae rawata irou nakoia ake tabeman?’ Ngkana a kanakoaki unimwaane bwa ana tataekina te euangkerio, bon neiei ngaia te moan aomata ae e anga baina ni buokiia ma aia kunikai ibukin mwanangaia, n aki tabe bwa tera kataakina are e mena i nanona.”

Ana kakabwaia n tamanuea Emma, are e anganaki iroun Iotebwa Timiti te Ikawai., are e beku bwa te Tamanuea n te Ekaretia:

“Emma, ae buun natiu, ko kakabwaiaaki iroun te Uea, ibukin am kakaonimaki ao am koaua: ko na kakabwaiaki ma kainabam, ao ni kimwareirei n te mimitong are e na roko i aona: E a tia ni karawawataaki tamneim ibukin buakakaia mwaane are a ukoukora kamaunaan kaainabam, ao e a tia ni bane nanom ni kabane i nanon am tataro ibukin kainaomataana: kukurei, bwa e a tia n ongo am bubuti te Uea ae Atuam.

“Ko a atia n nanokawaki ibukin matoatoan nanoia kain ana auti tamam, ao ko a maan n tataninga ibukin kamaiuaia. E na karinea tangim te Uea, ao man ana motikitaeka e na karikiia tabeman bwa ana noora nanobabaia ao ana rairi nanoia man aia bure; ma e na riki man te karawawataaki are ana kamaiuaki iai. Ko na norii bong aika mwaiti; eng, e na kawakiniko te Uea ni karokoa e rau nanom, bwa ko na noora am tia Kamaiu. E na kimwareirei nanom n ana mwakuri te Uea ae e korakora, ao akea ae e kona n anaa te kimwareirei anne mai iroum.

“Ko na aki toki n uringa korakoran ruon te Atua ni kamangoria ni kariaia bwa ko na raona natiu ngkana e roko te anera n anganna aia rekooti Nibwaite nako nanon baina. Ko a tia n rinanon kananokawaki aika mwaiti ibukin bwa e a tia te Uea n anaa mai iroum teniman natim: ao aio bon tiaki am bure, bwa e ataa nanom ae e itiaki n karikirakea am utu, bwa e aonga ni kakabwaiaaki aran natiu. Ao ngkai, nooria, I taku nakoim, bwa e kangai te Uea, ngkana ko kakoauaa, ao ko na kakabwaiaaki n te bwai aio ao ko na manga karekeia riki tabeman ataei, nakon kimwareirein ao karauan nanom, ao nakon kimwareireia raoraom.

“Ko na kakabwaiaaki ma te atatai, ao ni karekea te korakora n reireiniia tabeman aine. Reireia am utu te etieti, ao ake a uarereke aroia ni maiu, ao a na kawariko anera aika tabu: ao ko na kamaiuaki n abanuean te Atua; e na bon riki aio. Amen.”