పునఃస్థాపన స్వరములు

న్యూయార్క్‌‌లోని ఫేయెట్‌లో విట్మర్ ఇంటికి సమీపంలో ఉన్న అడవుల్లో జోసెఫ్ స్మిత్, ఆలీవర్ కౌడరీ, డేవిడ్ విట్మర్ మరియు మార్టిన్ హారిస్‌లకు దేవదూత మొరోనై బంగారు పలకలను చూపెను. జోసెఫ్ తల్లిదండ్రులు ఆ సమయంలో విట్మర్ కుటుంబీకులను సందర్శించారు. ఈ అద్భుత అనుభవం సాక్షులపై చూపిన ప్రభావాన్ని జోసెఫ్ తల్లి లూసీ మాక్ స్మిత్ వివరించారు:

“అప్పుడు మూడు నాలుగు గంటల మధ్య సమయం. శ్రీమతి విట్మర్ మరియు శ్రీ స్మిత్ మరియు నేను ఒక పడకగదిలో కూర్చున్నాము. నేను మంచం ప్రక్కన కూర్చున్నాను. జోసెఫ్ లోపలికి వచ్చినప్పుడు, అతడు నిట్టూరుస్తూ నా ప్రక్కన కూర్చున్నాడు. ‘నాన్నా! అమ్మా!’ అని పిలిచాడు. ‘నేను ఎంత సంతోషంగా ఉన్నానో మీకు తెలియదు. నాతో పాటు మరో ముగ్గురికి పలకలు చూపబడునట్లు ప్రభువు చేసారు, వారు ఒక దేవదూతను కూడా చూశారు మరియు నేను చెప్పినదాని యొక్క సత్యానికి వారు సాక్ష్యమివ్వాలి. నేను ప్రజలను మోసం చెయ్యనని వారికి తెలుసు. నేను ఘోరమైన భారం నుండి ఉపశమనం పొందినట్లు భావిస్తున్నాను, అది భరించడానికి చాలా కష్టంగా ఉండెను. కానీ వారు ఇప్పుడు కొంత భాగాన్ని భరించాల్సి ఉంటుంది, ఇకపై నేను ప్రపంచంలో పూర్తిగా ఒంటరిగా ఉండనవసరం లేనందుకు అది నా ఆత్మను సంతోషపరుస్తున్నది.’ అప్పుడు మార్టిన్ హారిస్ లోపలికి వచ్చాడు. దాదాపుగా అతడు అమితానందంతో నింపబడినట్లు అగుపించాడు. తనతో పాటు ఉన్న ఆలీవర్ మరియు డేవిడ్ చేసినట్లే తాను చూసిన మరియు విన్న వాటికి అతడు సాక్ష్యమిచ్చాడు. వారి సాక్ష్యము యొక్క ఆవశ్యక అంశములు మోర్మన్ గ్రంథములో ఉన్నట్లుగానే ఉన్నాయి. …

“మార్టిన్ హారిస్ ముఖ్యంగా తన భావాలను మాటల్లో చెప్పలేకపోయాడు. అతడు ఇలా అన్నాడు, ‘నేను ఇప్పుడు పరలోకం నుండి వచ్చిన ఒక దేవదూతను చూశాను, అతడు ఆ గ్రంథము గురించి నేను విన్న వాటన్నిటి యొక్క సత్యానికి నిశ్చయంగా సాక్ష్యమిచ్చాడు, నా కళ్ళు అతడిని చూశాయి. నేను కూడా పలకలను చూశాను, వాటిని నా చేతులతో పట్టుకున్నాను మరియు ప్రపంచం మొత్తానికి అదే సాక్ష్యమివ్వగలను. కానీ పదాలు వ్యక్తపరచలేని, ఏ నాలుక వర్ణించలేని ఒక సాక్ష్యాన్ని నాకై నేను పొందాను మరియు నా ఆత్మ యొక్క చిత్తశుద్ధితో దేవుడిని ఘనపరుస్తున్నాను, ఆయన నన్ను కూడా మనుష్య సంతానము తరఫున తన కార్యము మరియు ఉద్దేశముల యొక్క గొప్పతనానికి సాక్ష్యమిచ్చేలా చేసెను.’ ఆలీవర్ మరియు డేవిడ్ కూడా అతనితో కలిసి దేవుని మంచితనము, కనికరము కొరకు ఆయనను ప్రశంసించారు. ఉల్లాసంగా, ఆనందంగా ఉన్న చిన్న గుంపుగా మరుసటి రోజు మేము ఇంటికి [న్యూయార్క్‌లోని పాల్మైరాకు] తిరిగి వచ్చాము.”

ఎనిమిదిమంది సాక్షులు తమ అనుభవం నుండి తిరిగి వచ్చినప్పుడు లూసీ మాక్ స్మిత్ కూడా ఉన్నారు:

“ఈ సాక్షులు ఇంటికి తిరిగి వచ్చిన తరువాత, దేవదూత మళ్ళీ జోసెఫ్‌కు కనిపించెను; ఆ సమయంలో జోసెఫ్ పలకలను అతడికి అప్పగించెను. ఆ సాయంత్రం మేము ఒక సమావేశాన్ని నిర్వహించాము, దానిలో సాక్షులందరూ పైన చెప్పిన వాస్తవాలకు సాక్ష్యమిచ్చారు; మరియు మా కుటుంబ సభ్యులందరూ, 14 సంవత్సరాల వయస్సులో ఉన్న డాన్ కార్లోస్ [స్మిత్] కూడా, కడవరి-దిన యుగము పూర్తిగా ప్రవేశపెట్టబడినదన్న సత్యానికి సాక్ష్యమిచ్చారు.”

ముగ్గురు సాక్షులు మరియు ఎనిమిదిమంది సాక్షులతో పాటు, డేవిడ్ విట్మర్ తల్లి మేరీ విట్మర్ కూడా బంగారు పలకలకు సాక్షిగా ఉండేందుకు దీవించబడింది. జోసెఫ్, ఎమ్మా మరియు ఆలీవర్‌లు ఆమె ఇంటిలో నివసిస్తున్నప్పుడు ఆమె చేసిన త్యాగాలకు అంగీకారంగా మొరోనై దేవదూత వాటిని ఆమెకు చూపెను. “మీరు మీ శ్రమలలో చాలా నమ్మకంగా మరియు శ్రద్ధగా ఉన్నారు” అని మొరోనై ఆమెతో చెప్పాడు. “కాబట్టి, మీ విశ్వాసం బలపడునట్లు మీరు సాక్ష్యం పొందడం సరైనది.”