సిద్ధాంతము మరియు నిబంధనలు 12-17; జోసెఫ్ స్మిత్—చరిత్ర 1:66–75

ప్రభువు యొక్క కార్యములో తాము ఏవిధంగా సహాయపడగలమో తెలుసుకోవాలని జోసెఫ్ నైట్ మరియు డేవిడ్ విట్మర్ ఇద్దరూ కోరుకున్నారు. వారికి ప్రభువు యొక్క సమాధానాన్ని మీరు చదువుతున్నప్పుడు (సిద్ధాంతము మరియు నిబంధనలు 12; 14), “సీయోను హేతువును ముందుకుతెచ్చి స్థాపించుటకు” (12:6; 14:6 కూడా చూడండి) అనగా మీకు గల అర్థమేమిటో ఆలోచించండి. మీరు దీనిని చేయడానికి సహాయపడగలిగేలా ఈ ప్రకరణములలో మీరు ఏ సూత్రాలు మరియు క్రీస్తువంటి లక్షణాలను కనుగొంటారు?

బాప్తిస్మమిచ్చు యోహాను జోసెఫ్ స్మిత్‌ మరియు ఆలీవర్ కౌడరీలను తన “తోటి సేవకులు” అని పిలిచాడు. బాప్తిస్మమిచ్చు యోహానుకు తోటి సేవకులుగా ఉండడమంటే అర్థమేమిటని మీరనుకుంటున్నారు? (మత్తయి 3:13–17; లూకా 1:13–17; 3:2–20 చూడండి).

13వ ప్రకరణములో అహరోను యాజకత్వము గురించి బాప్తిస్మమిచ్చు యోహాను చెప్పిన దానిని మీరు చదువుతున్నప్పుడు, ప్రభువు యొక్క మార్గమును సిద్ధపరిచే యోహాను యొక్క నియమితకార్యమును సాధించడానికి ఈ యాజకత్వము యొక్క తాళపుచెవులు ఏవిధంగా సహాయపడ్డాయో ధ్యానించండి. ఉదాహరణకు:

• “దేవదూతల పరిచర్య” అంటే ఏమిటి? (2 నీఫై 32:2–3; మొరోనై 7:29–32 చూడండి).

• “పశ్చాత్తాప సువార్త” అంటే ఏమిటి? (సిద్ధాంతము మరియు నిబంధనలు 84:26–27; డేల్ జి. రెన్‌లండ్, “యాజకత్వము మరియు రక్షకుని ప్రాయశ్చిత్త శక్తి,” లియహోనా, నవ. 2017, 64–67 చూడండి).

మీ జీవితంలో రక్షకుడిని స్వీకరించడానికి మీ కొరకు మార్గాన్ని సిద్ధపరచడంలో అహరోను యాజకత్వ విధులు (బాప్తిస్మము మరియు సంస్కారము వంటివి) ఏవిధంగా సహాయపడతాయి?

యాజకత్వ తాళపుచెవుల గురించి ఎల్డర్ డేల్ జి. రెన్‌లండ్ మరియు ఆయన భార్య రూత్ ఈ వివరణ అందించారు:

“యాజకత్వ తాళపుచెవులు అనే పదం రెండు భిన్నమైన విధాలుగా ఉపయోగించబడింది. మొదటిది అహరోను లేదా మెల్కీసెదెకు యాజకత్వాన్ని పొందిన వారందరిపై అనుగ్రహించబడబోవు ప్రత్యేక హక్కు లేదా విశేషాధికారాన్ని సూచిస్తుంది. … ఉదాహరణకు, అహరోను యాజకత్వము కలిగియున్నవారు దేవదూతల పరిచర్య యొక్కయు, పశ్చాత్తాపము యొక్క సిద్ధపరచు సువార్త యొక్కయు, పాపక్షమాపణ కొరకు ముంచుట ద్వారా బాప్తిస్మము యొక్కయు తాళపుచెవులను పొందుతారు (సిద్ధాంతము మరియు నిబంధనలు 13:1; 84:26–27 చూడండి). మెల్కీసెదెకు యాజకత్వము కలిగియున్నవారు పరలోకరాజ్య మర్మముల తాళపుచెవులను, దేవుని జ్ఞానము యొక్క తాళపుచెవులను మరియు సంఘము యొక్క ఆత్మీయ దీవెనలన్నింటి యొక్క తాళపుచెవులను పొందుతారు (సిద్ధాంతము మరియు నిబంధనలు 84:19; 107:18 చూడండి). …

“యాజకత్వ తాళపుచెవులు అనే పదం ఉపయోగించబడిన రెండవ విధానం నాయకత్వాన్ని సూచిస్తుంది. యాజకత్వ నాయకులు అదనపు యాజకత్వ తాళపుచెవులను, సంఘము లేదా సమూహము యొక్క సంస్థాగత విభాగముపై అధ్యక్షత్వము వహించే హక్కును పొందుతారు. ఈ విషయంలో, యాజకత్వ తాళపుచెవులు సంఘములో నిర్దేశించడానికి, నడిపించడానికి మరియు పరిపాలించడానికి గల శక్తి మరియు అధికారము” (The Melchizedek Priesthood: Understanding the Doctrine, Living the Principles [2018], 26).

పునఃస్థాపన యొక్క ప్రధాన సంఘటనలలో జోసెఫ్ స్మిత్ మరియు ఆలీవర్ కౌడరీలతో కలిసి ఉంటే ఎలా ఉండేదోనని మీరు ఎప్పుడైనా ఆలోచించారా? 71వ వచనము చివరనున్న గమనికతో కలిపి మీరు జోసెఫ్ స్మిత్—చరిత్ర 1:66–75 చదువుతున్నప్పుడు, వారు భావించిన దానిలో కనీసం కొంత మీరు గ్రహించియుండవచ్చు. వారి మాటల గురించి మిమ్మల్ని ఏది ఆకట్టుకుంది? ప్రత్యేకించి, వారు యాజకత్వము పొంది, బాప్తిస్మము తీసుకున్నందువలన వారు పొందిన దీవెనలను గమనించండి. యాజకత్వ విధుల ద్వారా రక్షకుడు మీకిచ్చిన దీవెనలేవి?

మరింత నేర్చుకోవడానికి, విధులు మరియు దీవెనలు అనే శీర్షికలతో ఒక పట్టికను రూపొందించడాన్ని పరిగణించండి. తర్వాత, వాటి నుండి వచ్చే విధులు మరియు దీవెనలను జాబితా చేయడానికి మీరు ఇటువంటి లేఖనాలను పరిశోధించవచ్చు: యోహాను 14:26; అపొస్తలుల కార్యములు 2:38; సిద్ధాంతము మరియు నిబంధనలు 84:19–22; 131:1–4; జోసెఫ్ స్మిత్—చరిత్ర 1:73–74. జాబితాకు మీరు జతచేసే అదనపు దీవెనలేవి? మీరు పొందిన విధులు మీ జీవితంలోకి రక్షకుని శక్తిని ఏవిధంగా తెచ్చాయి?

డేవిడ్ ఎ. బెడ్నార్, “గొప్ప మహిమయందు దేవుని శక్తితో,” లియహోనా, నవ. 2021, 28–30 కూడా చూడండి.

జాన్ మరియు పీటర్ విట్మర్‌ల వలె, మీ జీవితంలో ఏది “అత్యంత విలువైనది కాగలదని” మీరెప్పుడైనా ఆశ్చర్యపోయారా? (సిద్ధాంతము మరియు నిబంధనలు 15:4; 16:4). మీరు సిద్ధాంతము మరియు నిబంధనలు 15–16 చదువుతున్నప్పుడు, క్రీస్తు యొద్దకు ఆత్మలను తెచ్చుట ఎందుకు అత్యంత విలువైనదో ధ్యానించండి. క్రీస్తు యొద్దకు “ఆత్మలను తెచ్చుటకు” మీరేమి చేస్తున్నారు?

సాక్ష్యము అంటే ఏమిటి? ప్రభువు తన పనిలో సాక్షులను ఎందుకు ఉపయోగిస్తారు? (2 కొరింథీయులకు 13:1 చూడండి). మీరు సిద్ధాంతము మరియు నిబంధనలు 17 లో ముగ్గురు సాక్షులకు ఇవ్వబడిన దేవుని మాటలు చదివేటప్పుడు ఈ ప్రశ్నలను ధ్యానించండి. (మోర్మన్ గ్రంథములో “ముగ్గురు సాక్షుల సాక్ష్యము” కూడా చూడండి.) దేవుని యొక్క “నీతిగల ఉద్దేశ్యములు” నెరవేర్చుటకు సాక్షులు ఏవిధంగా సహాయపడతారు? (4వ వచనము).

దేనికి మీరు సాక్ష్యమివ్వగలరు?

23:10

• ఈ నమూనా‌లోని కళాకృతి మీ పిల్లలు అహరోను యాజకత్వము యొక్క పునఃస్థాపనను దృశ్యమానం చేయడంలో సహాయపడగలదు. వారితో కలిసి జోసెఫ్ స్మిత్—చరిత్ర 1:68–74లో మీరు చదివిన దానిపై ఆధారపడి ఆ సంఘటనను చిత్రీకరించడాన్ని వారు ఆనందిస్తారా?

  

  2:12

• మీరు కలిసి మత్తయి 3:13–17; జోసెఫ్ స్మిత్—చరిత్ర 1:68–70 చదివేటప్పుడు, బాప్తిస్మమిచ్చు యోహాను యొక్క చిత్రాన్ని కూడా మీరు చూపించవచ్చు. బాప్తిస్మమివ్వడానికి జోసెఫ్ స్మిత్‌కు యాజకత్వ అధికారాన్ని ఇవ్వడానికి ప్రభువు బాప్తిస్మమిచ్చు యోహానును పంపడం ఎందుకు ముఖ్యమైనది?

• సిద్ధాంతము మరియు నిబంధనలు 13లో చెప్పబడిన తాళపుచెవుల గురించి చర్చను ప్రేరేపించడానికి, మీరు మరియ మీ పిల్లలు ఒక తాళపుచెవుల గుత్తిని చూచి, ఏమి చేయడానికి తాళపుచెవులు మనల్ని అనుమతిస్తాయనే దాని గురించి మాట్లాడవచ్చు. బహుశా మీరు 13వ ప్రకరణములో తాళపుచెవులు అనే పదాన్ని కనుగొనడానికి వారికి సహాయపడవచ్చు. సిద్ధాంతము మరియు నిబంధనలు 13 లోని ఏ ఇతర పదాలు లేదా వాక్యభాగాలు అహరోను యాజకత్వ దీవెనలను వర్ణిస్తాయి?

• జాన్ మరియు పీటర్ విట్మర్‌లు తమ జీవితాలలో ఏది అత్యంత విలువైనదో తెలుసుకోవాలని కోరుకున్నారు (సిద్ధాంతము మరియు నిబంధనలు 15:4; 16:4 చూడండి). బహుశా మీరు మరియు మీ పిల్లలు మీకు అత్యంత విలువైన విషయాల గురించి మాట్లాడవచ్చు. మీరు సిద్ధాంతము మరియు నిబంధనలు 15:6 లేదా 16:6 చదువుతున్నప్పుడు, “అత్యంత విలువైనది” అని ప్రభువు చెప్పినది వారు వినినప్పుడు మీ పిల్లలను చేతులు పైకెత్తమని అడగండి.

• “[యేసు క్రీస్తు] వద్దకు ఆత్మలను తెచ్చుట” అనగా అర్థమేమిటి? ఇతరులతో స్నేహం చేయడం, స్నేహితునితో లేఖనాలను పంచుకోవడం లేదా అవసరంలో ఉన్నవారి కోసం ప్రార్థించడం వంటి ఆలోచనల జాబితాను రూపొందించడంలో మీ పిల్లలకు సహాయం చేయండి. మీ పిల్లలు సంఘ పత్రిక‌లలో ఈ విషయాల చిత్రాల కోసం వెదకవచ్చు. లేదా వారు వారి స్వంత చిత్రాలను గీయవచ్చు. వారి జాబితా నుండి వారు చేయబోయే వాటిని ఎంచుకోవడానికి వారిని ఆహ్వానించండి.

• సిద్ధాంతము మరియు నిబంధనలు 17:5–6 చదివిన తరువాత, మోర్మన్ గ్రంథము సత్యమని మీకెలా తెలుసో మీ పిల్లలకు చెప్పండి. మోర్మన్ గ్రంథానికి మనం ఏవిధంగా సాక్షులు కాగలము?

  

  4:58