Nsanananmu no ho Ndze Ahorow

Ɔbɔfo Moroni dze sika mprɛtse no kyerɛɛ Joseph Smith, Oliver Cowdery, David Whitmer, na Martin Harris wɔ ndua kwaa no a ɔbɛn Whitmer fie wɔ Fayette, New York. Dɛm aber no nna Joseph n’awofo abɛserɛ Whitmerfo no. Lucy Mack Smith, Joseph ne maame, kãa nsunsuando a sũahu nwanwa yi nyaa wɔ adasefo no do ho asɛm.

“Nna wɔabɔ ndɔn ebiasa dze rokɔ ndɔn anan. Owurayer Whitmer na Owura Smith na emi yɛtsena pia mu. Metsenaa mpa ne nkyɛn. Ber a Joseph baa pia no mu no, ɔtoow no ho baa me nkyɛn. ‘Ɔsee dɛ m’Egya! Me nã! “Hom nnyim mbrɛ m’enyi esi agye. Ewuradze ama wɔdze mprɛtse no akyɛrɛ baasa so akã mo ho, hɔn so woehu ɔbɔfo na ɔwɔ dɛ wɔgye dza makã no nokwar ho dase. Osiandɛ woehu ama hɔn ho dɛ minnkyimakyima nndaadaa nkorɔfo no. Na metse dɛ ɔyɛ dɛ adzesoadze duudur bi efi mo do a nna ɔyɛ dur dodow ma me dɛ mosoa. Mbom afei ɔsɛ dɛ wɔsoa afã, na ɔma me kra dzi dɛw, dɛ mennyɛɛ ankonam bio wɔ wiadze no mu.’ Nkyii Martin Harris baa mu. Nna ɔyɛ dɛ ma enyigye mbordo ahyɛ no do. Nkyii ɔgyee dase wɔ dza oehu na ɔatse ho, tse dɛ mbrɛ nkaafo no, Oliver na David, yɛe no. Hɔn dasegye mu nsɛm no tse dɛ ma ɔwɔ Mormon Nwoma mu no. …

“Martin Harris dze nna ɔyɛ dɛ ma onntum nnhue n’atsenkã wɔ nkasafua mu. Ɔkãa dɛ, ‘Afei mehu ɔbɔfo a ofir Sor a ɔagye dza hom atse a ɔfa nkyerɛwee no ho dase a otsim, na m’enyiwa ehu no. Mahwɛ mprɛtse no so na medze me nsa akekã na mubotum agye ɔno ho dase akyerɛ wiadze nyina. Mbom menya dasegye ama mo ho a nkasafua nnkotum akã, a tɛkyerɛma nnkotum akyerɛ, na medze me kra no nokwar nyina hyira Nyankopɔn dɛ Ɔaberɛ Noho adze ayɛ emi mpo, dasefo ma no ndwuma na no botae ma adasamba hɔn afã.’ Oliver na David so kãa no ho wɔ ntonton awɔse mu ma Nyankopɔn wɔ ne papayɛ na ehumbɔbɔr. Yɛsanee kɔr fie [kɔr Palmyra, New York,] adzekyee no a dɔm kumabaa a yɛdze ehurusi, na dɛwdzi.”

Nna Lucy Mack Smith wɔ hɔ ber a Adasefo Baawɔtwe no baa fie hɔn sũahu no ekyir no.

“Adasefo yinom sanee baa fie no, bɔfo no yii noho kyerɛɛ Joseph bio, na dɛm aber yi Joseph dze mprɛtse no hyɛɛ ne nsamu. Dɛm ewimbir no yɛyɛɛ nhyiamu, a adasefo no nyina gyee hɔn dasee wɔ nokwar a wɔakã no sor ha yi ho; na hɛn ebusua nyina, kesi Don Carlos [Smith] mpo do, ɔno a nna oedzi mfe 14 no, gyee dase wɔ nda a odzi ekyir mberano no nokwar ho—dɛ afei ɔahyɛ ase emudzi mu.”

Mary Whitmer, David Whitmer ne nã kã Adasefo Baasa na Adasefo Baawɔtwe no ho a, ɔyɛɛ n’adom dɛ ɔbɛyɛɛ sika mprɛtse no ho dasefo. Ɔbɔfo Moroni na ɔdze mprɛtse no kyerɛɛ no dɛ n’afɔrbɔ a ɔyɛɛ ber a Joseph, Emma, na Oliver tse ne fie no, ɔagye ato mu. Moroni kãa kyerɛɛ no dɛ, “Ayɛ nokwafo na edze enyimpi ayɛ wo ndwuma.” “Dɛm ntsi, ɔsɛ fata dɛ, ibenya adanse ama wo gyedzi aahyɛ dzen.”