“Nsanananmu no ho Ndze Ahorow: Mormon Nwoma no ne Nkyerɛasee,” Bra, Bɛka Mo Do—Ma Fie na Asɔr: Nkyerɛkyerɛ na Ahyɛmudzi 2025 (2025)
“Mormon Nwoma no ne Nkyerɛasee,” Bra, Bɛka Mo Do—Ma Fie na Asɔr: Nkyerɛkyerɛ na Ahyɛmudzi 2025
Nsanananmu no ho Ndze Ahorow
Mormon Nwoma no ne Nkyerɛasee
Ebɔbira 1829 mu no, bosoom no a Nkyerɛkyerɛ na Ahyɛmudzi n’afã 6–9 wonyae no, nna Joseph Smith n’edwuma tsitsir ara nye Mormon Nwoma no ne nkyerɛasee. Yennyim nkyerɛasee kwan nwanwa no ho nsɛm dodowara, mbom yenyim dɛ nna Joseph Smith yɛ adzehunyi, edwindadze a Nyankopɔn esiesie: abo ebien a ɔtsew a wɔfrɛ no Urim na Thummim na abo kor so a wɔfrɛ no adzehunyi boba, na ɔboaa no.
Ber a ekyir no wobisaa no mbrɛ nkaa nkyerɛwee yi wosii kyerɛɛ ase no, Joseph see dɛ “nna ɔnnyɛ botae no dɛ wɔbɛkã ho nsɛm nyina akyerɛ wiadze mba.” Ɔtaa dɛ ɔkã no sin ara dɛ “wɔdze Nyankopɔn akyɛdze na tum” kyerɛɛ ase.
Nsɛmkã a odzi do yinom, a ofi nkyerɛasee kwan no ho enyido adasefo hɔ no, gye Joseph ne dasee no abamba.
Wɔgye dzi dɛ adakaba yi, a ɔyɛ Hyrum Smith dze no, wɔdze sika mprɛtse no sumaa mu mber kakra mu.
Emma Smith
“Ber a mo kun rekyerɛ Mormon Nwoma ase no, mekyerɛɛw ne fã bi, ber a osi do kãa asɛntɔw kor biara, kasafua kasafua, na ber a ɔbaa edzin a onntum mmbɔ do, anaa nkasafua atsentsen no, ɔsopɛl no, na ber a merekyerɛw no, sɛ meyɛ mfom wɔ no sopɛl mu a, ɔbɛma megyina na ɔatsen me sopɛl no a nna ɔwɔ mu dɛ onnkotum koraa ehu dza merekyerɛw no dɛm aber no. Kasafua Sarah mpo nna onntum mbɔ no yie ahyɛse no, mbom nna ɔwɔ dɛ ɔsopɛl, na mobɔ ma no.”
“Nna ɔtaa dɛ mprɛtse no da pon no do a ɔnnyɛ biribiara dɛ ɔdze resie, a ɔdze pon do tam kakrabaa, a medze ama no dɛ ɔmfa nkatado no akyekyer ho. Mpɛn bi mekãa mprɛtse no hwɛe, ber a ɔda pon no do, a medze me nsa fefaa n’ano n’ano. Nna wɔyɛ dza itum dandan no dɛ krataa a ɔyɛ dur, na edze wo nsa kokonyin dze pĩapĩa tse dɛ ma edze wo nsa kokonyin rubue buukuu n’ano n’ano a otwuuw do ma ɔyɛ tse dɛ kyensee. …
Me gyedzi nye dɛ Mormon Nwoma no fir Sor—minngye ho kyim koraa. Megye dzi ankasa dɛ nyimpa biara nnkotum abobɔ nsɛm a wɔakyerɛw no gyedɛ woekenyan no, osiandɛ ber a meyɛ no ɔkyerɛwfo no, [Joseph] bɔbobɔ nkasafua no akyerɛ me dɔnhwer dɔnhwer, na yɛsan ba edzidzi ekyir, anaa biribi a ɔmaa yegyaa a, ɔbɛhyɛ ase ntsɛmara wɔ bia a ogyaa no, a ɔnnhwɛ dza makyerɛw no do anaa ɔmma menkenkan afã bi nnkyerɛ no. Iyi yɛ adze ɔtaa yɛ. Nkyɛ obi a onyim nwoma mpo nnkotum ayɛ iyi, na, obi a ɔnnyim hwee na onnyim nwoma dɛ ɔno mbrɛ ɔtse no, ɔyɛ dza onnkotum esi dabiarada.”
Oliver Cowdery
“Medze mankasa m’akyerɛwdua kyerɛɛw Mormon Nwoma ne nyina (kã nkrataafa kakrabaa) ber a ofii nkɔnhyɛnyi no n’ano tɔe no ber a ɔdze Nyankopɔn n’akyɛdze na no tum kyerɛɛ ase, a ɔdze Urim na Thummim, anaa dza nwoma no frɛɛ no, asekyerɛdze krɔnkrɔn no. Medze m’enyiwa hunii, na medze me nsa kekãa, mprɛtse no a dza wɔkyerɛɛ ase wɔ do no. Muhun asekyerɛdze no so.”