Ol Voes blong Restoresen

Enjel Moronae i bin soem ol buk we oli wokem long gol i go long Josef Smit, Oliva Kaodri, Deved Witma, mo Martin Haris insaed long ol bus blong ol tri kolosap long hom blong Famli Witma, long Feyet, Niu Yok. Papa mo mama blong Josef oli bin pas blong visitim Famli Witma long tetaem ia. Lusi Mak Smit, mama blong Josef, i tokbaot wanem we merikel eksperiens ia i bin mekem long ol witnes:

“Hem i bitwin tri mo fo klok. Misis. Witma mo Mista. Smit mo mi i bin stap sidaon long wan bedrum. Mi sidaon long saed blong bed. Taem we Josef i kam insaed, hem i bin kam slakem hem long saed blong mi. ‘!Papa! !Mama!’ hem i talem. ‘Yutufala i no save hamas nao mi mi hapi. Lod i bin mekem se bae oli soem ol buk ia long trifala moa wetem mi, we oli bin luk wan enjel mo bae oli mas testifae long trutok blong wanem we mi bin talem. From olgeta oli save gud we bae mi mi no stap go blong trikim ol pipol. Mo from hemia, mi filim olsem se wan bigfala hevi samting i kamaot long mi, we hem i tumas long mi blong tekem. Be naoia, bae oli mas tekem wan pat blong hem, mo i mekem sol blong mi i glad se bae mi no nid blong mi stap miwan long medel blong wol ia.’ Nao Martin Haris i kam insaed. I luk olsem se gladhat we i bigwan tumas i fulumap hem. Afta, hem i bin testifae long wanem we hem i bin luk mo harem, semmak olsem ol narawan, Oliva mo Deved. Testemoni blong olgeta i talem semmak long wanem we i bin stap long Buk blong Momon. …

“Martin Haris, i luk se hem i no save stap blong talemaot ol filing blong hem. Hem i talem: ‘Naoia, mi bin luk wan enjel we i kam long Heven, we i tru, i testifae abaot trutok blong evri samting we mi bin harem long saed blong histri ia, mo ol ae blong mi oli bin luk hem. Mi bin luk tu ol buk ia, mo mi tajem olgeta wetem ol han blong mi, mo mi save testifae abaot semmak samting i go long ful wol. Be mi bin kasem wan witnes blong miwan we ol toktok oli no inaf blong talemaot, we i no gat lanwis i save tokbaot, mo mi blesem God wetem tru hat blong sol blong mi, se hem i bin kamdaon blong mekem mi, iven mi ia, i kam wan witnes blong bigfala wok blong Hem mo ol plan blong Hem long bihaf blong ol pikinini blong ol man.’ Oliva mo Deved, tufala tu i bin joenem hem blong presem God long tabu fasin from gudfala fasin mo sore blong Hem. Mifala i gobak hom long Palmaera, Niu Yok long nekis dei, we mifala i wan smol grup we mifala i stap gladglad mo stap hapi.”

Lusi Mak Smit i bin stap tu taem Olgeta Eit Witnes oli bin kambak afta long eksperiens blong olgeta

“Afta we olgeta witnes ia oli kambak long haos, enjel i kamkamaot bakegen long Josef; long tetaem ia Josef i bin givim ol buk ia long han blong enjel. Long naet ia, mifala i bin holem wan miting, mo evri witnes oli bin talem testemoni blong olgeta se ol samting ia antap ia, oli hapen tru; mo evri memba blong famli blong mifala, iven kasem Don Karlos Smit, we i bin gat 14 yia, i bin testifae se lata-dei dispensesen ia i tru—mo i bin stat fulwan finis.”

Blong ademap i go wetem Ol Tri Witnes mo Olgeta Eit Witnes, Meri Witma, mama blong Deved Witma, i bin kasem blesing tu blong stap olsem wan witnes blong ol buk we oli wokem long gol. Enjel Moronae i bin soem olgeta long hem blong luksave ol sakrifaes we hem i bin mekem taem we Josef, Ema, mo Oliva oli bin stap insaed long hom blong hem. “Yu bin stap fetful tumas mo wok strong long ol wok blong yu,” Moronae i bin talem long hem. “Hem i stret, naoia se bae yu kasem wan witnes blong fet blong yu i save kam moa strong.”