“10–16 Febwari : ‘Blong Yu Save Kamaot Olsem Man we I Win’: Doktrin mo Ol Kavenan 10–11,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 10–11,” Kam Folem Mi—Blong Hom mo Jos: 2025
Kopi blong orijinol Buk blong Momon we oli bin raetem long han
10–16 Febwari: “Blong Yu Save Kamaot Olsem Man we I Win”
Doktrin mo Ol Kavenan 10–11
Taem we translesen blong Buk blong Momon i stap gohed, wan kwestin i bin kam se: ?Wanem nao bae Josef Smit mo Oliva Kaodri i mekem abaot ol pej blong translesen ia we oli bin lus? Bae i moa gud blong transletem bakegen pat ia, be Lod i bin luk wan samting we tufala i no bin save luk: ol enemi blong tufala oli bin stap mekem plan blong jenisim ol toktok long ol pej ia blong givim tu tingting abaot wok blong insperesen we Josef i bin stap mekem. God i bin gat wan plan blong stopem problem ia mo gohed blong mekem wok i go i fored. Taosen yia i pas, God i givim insperesen long Nifae blong raetem wan nambatu rekod we kavremap semmak taem ia “from wan waes stamba tingting blong hem,” (1 Nifae 9:5).
“Waes blong mi,” Lod i talem long Josef, “i bigwan moa bitim ol trik blong devel” (Doktrin mo Ol Kavenan 10:43 Hemia i wan mesej blong givim hop long wan dei olsem blong yumi, taem we enemi ia, i kam strong moa blong mekem fet blong yumi i nomo strong. Olsem Josef, yumi save “stap fetful mo gohed” blong mekem wok we God i bin singaotem yumi blong mekem (ves 3). Afta long hemia, bae yumi faenem se Hem i bin givim wan wei finis blong mekem se “ol get blong hel bambae oli no save win” agensem yumi (ves 69).
Luk long Saints, 1:51–61.
Ol aedia blong Lanem Samting long Hom mo long Jos
God “bambae [i] no letem Setan i mekem rabis plan blong hem i kamtru long hemia.”
Setan i wantem blong yumi fogetem se hem i stap—o, we samtaem yumi no luksave se hem i stap traem blong lidim tingting blong yumi (luk long 2 Nifae 28:22–23 Be ol toktok blong Lod we oli stap insaed long Doktrin mo Ol Kavenan 10 oli stap soem se Setan i stap—mo hem i stap wok oltaem blong go agensem wok blong Lod. Long ol ves 1–33, faenemaot wanem we God i bin save abaot ol wok blong etan (luk tu long ol ves 62–63). Mo tu, yu save askem Lod blong helpem yu blong luk olsem wanem nao Setan i save temtem yu. Taem yu ridim seksen 10, tingting hevi long olsem wanem Sevya i save helpem yu blong stap longwe long ol wok blong Setan.
Doktrin mo Ol Kavenan 10:34–52
Waes blong [Lod] i bigwan moa bitim ol trik blong devel.”
Nifae i no save from wanem hem i kasem insperesen blong mekem koleksen blong ol rekod blong ol pipol blong hem. Mo Momon i no save from wanem hem i bin kasem insperesen blong putum tu nambatu koleksen wetem ol buk we oli mekem long gol. Be tugeta profet i trastem se God i bin gat “wan waes stamba tingting” (1 Nifae 9:5; Ol Toktok blong Momon 1:7). Be yet, tedei yumi save stamba tingting ia: blong riplesem 116 pej blong Buk blong Momon we oli bin lus. ?Wanem nao yu ting se Lod i wantem yu blong lanem aot long evri samting ia? Tingting hevi long kwestin ia taem yu ridim Doktrin mo Ol Kavenan 10:34–52. Maet yu save mekem tu wan lis blong ol trutok we yu lanem abaot Lod long ol ves ia. ?Olsem wanem nao ol trutok ia oli givim paoa long rilesensip blong yu wetem Hem? ?Wanem filing mo tingting nao i kam long yu abaot waes tingting blong Lod mo plan blong Hem blong stap rere blong ol 116 pej we oli lus?
Maet bae yu kasem insperesen blong lukaot wan pruf blong waes tingting mo plan we i bin gat long yu finis, long laef blong yu. Ridim ol stori long mesej blong Elda Ronald A. Rasband “By Divine Design”—bae oli tekem ol eksampol i kam long maen blong yu (Liahona, Nov. 2017, 55–57). Tingting blong raetemdaon olgeta taem oli kam long tingting blong yu. ?Olsem wanem nao Lod i bin stap wok long laef blong yu? Eksampol. ?Wanem ol “janis o laki samting” we Hem i bin rere long olgeta? ?Wanem nao ol fandesen we Hem i bin putum finis i stap blong ol blesing blong yu? ?Wetaem nao Hem i bin lidim yu blong go givhan long wan narawan we i stap long nid?
Luk tu long Rom 8:28; Doktrin mo Ol Kavenan 90:24; Topics and Questions, “Plan of Salvation,” Gospel Laebri.
Wan smol pat blong Momon I Stap Mekem I Kam Smol Ol Histri Buk, i kam long Tom Lovell
“Putum tras blong yu long Spirit blong [Lod] .”
Bigfala brata blong Josef Haeram i wantem tumas blong save tingting we Lod i gat long hem, mekem se, hem i askem long Josef blong askem wan revelesen long bihaf blong hem. Profet i glad tumas blong mekem olsem, be i bin gat wan mesej long revelesen ia (Doktrin mo Ol Kavenan 11) we i se Haeram tu i save lukaotem revelesen blong hemwan. Mo tu se “olgeta evriwan we oli wantem ol gudfala samting, mo oli bin sakem huknaef blong olgeta wetem strongfala paoa blong tekem kaekae we i stap” (ves 27). Taem yu ridim seksen 11, ?Wanem nao yu filim se Lod i stap tijim long yu abaot revelesen blong yuwan? ?Olsem wanem nao hemia i go wetem wanem we Hem i bin tijim long Oliva Kaodri insaed long ol seksen 6–9? ?Wanem nao ol nara mesej we Lod i gat blong yu?
Luk tu long “Let the Holy Spirit Guide,” Hymns, namba 143.
Invaetem olgeta we oli stap lan blong askem ol ol kwestin. Oltaem ol kwestin oli lid i go long revelesen. Sapos yu stap tijim famli blong yu o wan klas long Jos, leftemap tingting blong olgeta blong askem ol kwestin, mo helpem olgeta blong faenem ol ansa insaed long ol skripja. Eksampol, sapos oli gat ol kwestin abaot revelesen blong wanwan man o woman, yufala evriwan i lukaotem ol ansa insaed long Doktrin mo Ol Kavenan 11:12–14.
Doktrin mo Ol Kavenan 11:15–26
Taem mi stap traem blong “kasem toktok [blong God],” bambae mi kasem Spirit mo paoa blong Hem.
Iven bifo oli transletem Buk blong Momon, Haeram Smit i wantem tumas blong help long wok blong Restoresen. Taem yu stap ridim ansa blong Lod from ol samting we hem i wantem, tingting, se i minim wanem long yu blong “kasem toktok [blong God]” (ves 21 ?Olsem wanem nao blong stap kasem toktok blong God i helpem yu blong givim seves long Hem wetem paoa?
Blong kasem moa aedia, luk long ol namba blong manis ia blong Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Taem mi prea oltaem, mi kasem paoa we i kam long God.
-
Blong introdiusum ves ia long ol pikinini blong yu, bae yu save askem long olgeta abaot ol samting we “oltaem” oli stap mekem. ?Wanem nao Lod i talem se oltaem yumi mas mekem long Doktrin mo Ol Kavenan 10:5? ?From wanem Hem i wantem yumi blong mekem hemia?
-
?Olsem wanem nao yu save helpem ol pikinini blong yu blong oli tingbaot blong prea oltaem? Maet oli save karem i kam tugeta sam smosmol, smut ston mo pentem olgeta “Doktrin mo Ol Kavenan 10:5” o “Prea Oltaem.” Oli save putum ol ston blong olgeta long defdefren ples, we bae oli wantem se long ples ia bae i stap rimaenem olgeta blong prea, olsem kolosap long bed blong olgeta, wetem ol skul buk blong olgeta o long ples we oli stap kakae tugeta long hem. Folem wanem we i stap long Doktrin mo Ol Kavenan 10:5, ?Olsem wanem nao God i blesem yumi taem yumi prea? Ol pikinini blong yu oli save faenem sam moa ansa insaed long wan singsing olsem “A Child’s Prayer” (Children’s Songbook, 13).
Doktrin mo Ol Kavenan 11:12–13
Tabu Spirit bae i lidim mi blong mekem i gud.
-
Ol pikinini oli save lanem blong luksave wetaem nao Spirit i stap toktok long olgeta. Blong helpem olgeta, yu save haedem wan balb blong laet o wan toj laet mo wan pikja blong wan hapi fes long wan ples long rum, mo afta, askem ol pikinini blong yu blong faenem ol aetem ia. Ridim Doktrin mo Ol Kavenan 11:13, mo helpem ol pikinini blong yu blong faenemaot ol toktok we i go wetem ol aetem we oli faenem. ?Wanem nao ol toktok ia i tijim abaot wei we Tabu Spirit i helpem yumi?
-
Blong stap serem ol eksperiens blong yuwan long saed blong spirit, i save helpem ol pikinini blong yu blong luksave paoa blong Tabu Spirit long laef blong olgeta. Taem yu serem, askem olgeta tu blong serem ol eksperiens blong olgeta. Mo tu, tugeta, yufala save ridim Doktrin mo Ol Kavenan 11:12–13, blong stap lukaotem ol wei we yumi save luksave wetaem Tabu Spirit i stap lidim yumi. Testifae se Papa long Heven i wantem gaedem yumi tru long Tabu Spirit.
Doktrin mo Ol Kavenan 11:21, 26
Mi nid blong save gospel blong mekem se mi save helpem ol narawan blong faenem trutok.
-
Semmak olsem Haeram, bae ol pikinini blong yu oli save gat plante janis blong serem gospel wetem ol narawan. Tugeta, yufala save ridim Doktrin mo Ol Kavenan 11:21, 26 mo askem ol pikinini blong faenem wanem Lod i bin talem long Haerem we hem i nid blong mekem, blong mekem se hem i save tijim gospel. ?Wanem i minim blong “kasem” toktok blong God? ?Olsem wanem nao yumi save mekem hemia? ?Olsem wanem nao yumi “holem taet strong” toktok blong God long hat blong yumi? Bae ol pikinini blong yu oli save mekem drama blong stap serem wan samting abaot Jisas Kraes o Buk blong Momon wetem ol narafala man.
Blong kasem moa aedia, luk long namba blong manis ia blong Fren.