“Febwari 17–23: ‘Antap Long Hed Blong Yufala, Ol Wokman We Yumi Wok Tugeta’: Doktrin mo Ol Kavenan 12–17; Josef Smit—Histri 1:66–75,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 12–17; Josef Smit—Histri 1:66–75,” Kam Folem Mi—Blong Hom mo Jos: 2025
Suskehana Reva kolosap long Hamoni, Pensilvania
Febwari 17–23: “Antap Long Hed Blong Yufala, Ol Wokman We Yumi Wok Tugeta”
Doktrin mo Ol Kavenan 12–17; Josef Smit—Histri 1:66–75
Plante pipol raon long wol, maet oli neva harem abaot ples ia Hamoni, Pensilvania. Be plante taem, Lod i stap jusum ol ples we oli spesel blong ol bigfala samting oli hapen insaed long kingdom blong Hem. Long wan ples we i gat plante tri, kolosap long Hamoni, long namba 15 Mei 1829, Jon Baptaes i bin kamkamaot long Josef Smit mo Oliva Kaodri. Hem i putum han blong hem antap long hed blong tufala mo i givim Aronik Prishud long tufala, i singaotem tufala “ol wokman we yumi wok tugeta” (Doktrin mo Ol Kavenan 13:1).
Jon Baptaes hem i wokman blong God, we Hem i trastem, hem i baptaesem Sevya mo i bin mekem rere rod blong taem we Hem bae i kam (luk long Matiu 3:1–6, 13–17). Long tufala yang man ia, we tufala i stap long ol twante yia blong tufala, tufala i bin gat tingting we stap daon, iven, maet i bigwan tumas long tufala, blong oli singaotem tufala olsem wokman fren blong Jon. Long tetaem ia, Josef mo Oliva, oli no bin save gud tufala, semmak olsem we man i no save wea ia Hamoni. Be seves long wok blong God, oltaem hem i abaot olsem wanem yumi givim seves, i no abaot huia i stap luk. Be nomata wanem yu mekem i smol mo man i no luk samtaem, yu tu, yu wan wokman blong Lod long “bigfala mo gudfala wok ia” (Doktrin mo Ol Kavenan 14:1).
Ol aedia blong Lanem Samting long Hom mo long Jos
Mi save tekpat long “wok we i bigwan mo i gudfala,” blong God.
Josef Naet mo Deved Witma, tugeta, tufala i wantem blong save olsem wanem tufala i save help long wok blong Lod. Taem yu ridim ansa blong Lod long tufala (Doktrin mo Ol Kavenan 12; 14), tingting long wanem i minim long yu blong “mekem i kamtru mo stanemap stamba tingting blong Saeon;” (12:6; luk tu long 14:6). ?Wanem ol prinsipol mo ol fasin olsem hemia blong Kraes we yu faenem insaed long ol seksen ia we oli save helpem yu blong mekem hemia?
Luk tu long “The Knight mo Whitmer Families,” long Revelations in Context, 20–24.
Jisas Kraes i sendem Jon Baptaes blong putumbak Aronik Prishud.
Jon Baptaes i singaotem Josef Smit mo Oliva Kaodri se “ol wokman we yumi wok tugeta.” ?Wanem nao yu ting se i minim blong stap wan fren wokman we oli wok tugeta wetem Jon Baptaes? (luk long Matiu 3:13–17; Luk 1:13–17; 3:2–20).
Taem yu ridim wanem we Jon Baptaes i bin talem abaot Aronik Prishud long seksen 13, tingting hevi long olsem wanem ol ki blong prishud ia i help blong mekem i hapen misin blong Jon blong mekem rere rod blong Lod. Eksampol:
-
?Wanem hem i “seves blong ol enjel”? (luk long 2 Nifae 32:2–3; Moronae 7:29–32; Gaed long Ol Skripja, “Angels,” Gospel Laebri).
-
Wanem hem i “gospel blong fasin blong sakem sin”? (luk long Doktrin mo Ol Kavenan 84:26–27; Dale G. Renlund, “The Priesthood mo the Savior’s Atoning Power,” Liahona, Novemba 2017, 64–67).
Olsem wanem nao ol odinens blong Aronik Prishud (olsem, baptaes mo sakramen) oli help blong mekem rere rod blong yu blong kasem Sevya insaed long laef blong yu?
?Wanem nao oli ol prishud ki?
Elda Dale G. Renlund mo waef blong hem, Ruth, i givim mining blong ol prishud ki ia:
“Toktok ia ol prishud ki oli yusum long 2 defren wei. Faswan, i tokbaot wan spesifik raet o spesel janis we oli pasem long evriwan we oli kasem Aronik o Melkesedek Prishud. … Be, olgeta we oli holem Aronik Prishud, oli kasem ol ki blong seves blong ol enjel, mo ol ki blong gospel blong stap mekem rere we i fasin blong sakem sin, mo baptaes andanit long wota blong kam klin aot long ol sin (luk long Doktrin mo Ol Kavenan 13:1; 84:26–27). Olgeta we oli holem Melkesedek Prishud, oli holem ki blong ol sikret blong kingdom, ki blong save ia we i blong God, mo ol kit blong evri blesing blong Jos long saed blong spirit (luk long Doktrin mo Ol Kavenan 84:19; 107:18). …
“Nambatu wei we oli yusum toktok ia, ol prishud ki,i blong tokbaot lidasip. Ol prishud lida oli kasem moa prishud ki, olsem raet blong prisaed ova long wan oganaesesen grup blong Jos, o wan kworom. Long saed ia, ol prishud ki oli atoriti mo paoa blong lidim, rul mo kontrol insaed long Jos” (The Melchizedek Priesthood: Understanding the Doctrine, Living the Principles [2018], 26).
Josef Smit I Baptaesem Oliva Kaodri, i kam long Del Parson
Ol odinens oli givim mi rod blong kasem paoa blong God.
?Yu bin eva tingting se bae i olsem wanem blong stap wetem Josef Smit mo Oliva Kaodri long ol bigfala samting we i bin hapen long Restoresen? Taem yu ridim Josef Smit—Histri 1:66–75, we i tekem tu not we i stap long en blong ves 71, maet bae yu andastanem sam long ol wanem we oli bin filim. ?Wanem nao i tajem hat mo tingting blong yu abaot ol toktok blong olgeta? Mekem not, speseli, ol blesing we tufala i bin kasem, from tufala i kasem prishud mo we tufala i bin kasem baptaes. ?Wanem ol blesing we Sevya i bin givim long yu tru long ol odinens blong prishud?
Blong lanem moa, tingting blong krietem wan tebol wetem ol heding ia Ol Odinens mo Ol Blesing. Afta, yu save lukaotem ol skripja olsem ia, blong mekem ol lis blong ol odinens mo ol blesing we oli kam tru long olgeta: Jon 14:26; Ol wok 2:38; Doktrin mo Ol Kavenan 84:19–22; 131:1–4; Josef Smit—Histri 1:73–74. ?Wanem ol narafala blesing we bae yu ademap long lis ia? ?Long wanem wei, tru long ol odinens we yu bin kasem, oli givim paoa blong Sevya insaed long laef blong yu?
Luk tu long David A. Bednar, “With the Power of God in Great Glory,” Liahona, Novemba 2021, 28–30; Saints, 1:65–68; “God of Power, God of Right,” Hym, namba 20; Topics mo Questions, “Covenants mo Ordinances,” Gospel Laebri.
Blong stap tekem ol sol oli kam long Kraes, i impoten tumas.
?Yu eva tingting, olsem Jon mo Pita Witma i bin mekem, wanem nao “bae i moa gud” long laef blong yu? (Doktrin mo Ol Kavenan 15:4; 16:4). Taem yu stap ridim Doktrin mo Ol Kavenan 15–16, tingting hevi se, from wanem nao, blong tekem ol sol oli kam long Kraes i wan samting we i moa impoten. ?Wanem nao yu stap mekem blong “tekem ol sol” oli kam long Kraes?
Luk tu long Saints, 1:68–71.
Lod i stap yusum ol witnes blong stanemap toktok blong Hem.
?Wanem nao i wan witnes? ?From wanem Lod i yusum olgeta witnes long wok blong Hem? (luk long 2 Korin 13:1). Tingting hevi long olgeta kwestin ia taem yu stap ridim ol toktok we God i talem long Olgeta Tri Witnes insaed long Doktrin mo Ol Kavenan 17. (Luk tu long “Testemoni blong Olgeta Tri Witnes” insaed long Buk blong Momon.) ?Olsem wanem nao ol witnes oli help blong mekem ol “stret mo gud stamba tingting” blong God oli hapen? (ves 4
?Wanem nao yu save talemaot witnes blong yu long hem?
Luk tu long Saints, 1:73–75; “A Day for the Eternities” (vidio), Gospel Laebri.
A Day for the Eternities
Blong kasem moa aedia, luk long namba blong manis ia blong Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Doktrin mo Ol Kavenan 13; Josef Smit—Histri 1:68–74
Jon Baptaes i bin putumbak Aronik Prishud long wol ia.
-
Artwok long aotlaen ia i save helpem ol pikinini blong yu blong luksave Aronik Prishud we i bin kambak (luk tu long “Japta 6: Oli Givim Prishud long Josef mo Oliva,” long Ol Doktrin mo Ol Kavenan Stori, 26–27, o vidio we i go wetem long Gospel Laebri). ?Bae oli glad blong stap droem wan pikja blong samting we i bin hapen folem wanem we yu ridim wetem olgeta long Josef Smit—Histri 1:68–74?
2:12Angels Restore the Priesthood: Power to do God's work
-
Yu save soem tu wan pikja blong Jon Baptaes taem yufala i stap rid tugeta Matiu 3:13–17; Josef Smit—Histri 1:68–70. ?From wanem hem i impoten se Lod i sendem Jon Baptaes blong givim prishud atoriti blong mekem baptaes long Josef Smit?
Stap mekem rere ol pikinini blong yu from kavenan rod blong God blong wan ful laef taem. Blong kasem moa aedia blong helpem ol pikinini blong yu blong lanem samting abaot prishud paoa, atoriti mo ol ki, luk long apendiks A o apendiks B.
Pikja blong Jisas we i stap kasem baptaes, i kam long Dan Burr
Papa long Heven i blesem mi tru long Aronik Prishud.
-
Blong mekem wan storian we i givim insperesen abaot ol ki we oli tokbaot insaed long Doktrin mo Ol Kavenan 13, yu mo ol pikinini blong yu i save lukluk long wan bandel blong ol ki, mo tokbaot se, ol wanem ki nao oli letem long yumi blong mekem. Maet yu save helpem olgeta blong faenem toktok ia ol ki insaed long seksen 13. ?Wanem ol narafala toktok o sentens insaed long Doktrin mo Ol Kavenan 13 we oli tokbaot ol blesing blong Aronik Prishud? Ol pikinini blong yu oli save talemaot tu ol wei we Papa long Heven i stap blesem yumi tru long prishud long vidio “Blessings of the Priesthood” (Gospel Laebri).
Blessings of the Priesthood
Doktrin mo Ol Kavenan 15:4–6; 16:4–6
Blong stap helpem ol narawan blong kam long Jisas Kraes hem i “moa gud.”
-
Jon mo Pita Witma, tufala i wantem save wanem bae i moa gud long tufala (luk long Doktrin mo Ol Kavenan 15:4; 16:4). Maet yu mo pikinini blong yu i save tokbaot ol samting we oli moa gud bigwan long yufala. Taem yu ridim Doktrin mo Ol Kavenan 15:6 o 16:6, askem ol pikinini blong yu blong leftemap han blong olgeta taem oli harem wanem Lod i talem we “i moa gud.”
-
?Wanem nao i minim blong “tekem ol sol i kam long [Jisas Kraes]”? Helpem ol pikinini blong yu blong mekem wan lis blong ol aedia, olsem blong stap fren wetem ol narawan, stap serem ol skripja wetem wan fren, o stap prea from wan man we i gat nid. Ol pikinini blong yu oli save lukaotem ol pikja blong ol samting ia insaed long ol magasin blong Jos o long Gospel Art Buk. O, oli save droem ol pikja blong olgetawan. Invaetem olgeta blong jusum wan samting aot long lis blong olgeta we bae oli wantem blong mekem. Mo tu, tugeta, yufala i save singsing long namba fo ves blong “I Feel My Savior’s Love” (Children’s Songbook, 74–75).
Mi save kam wan witnes blong Buk blong Momon.
-
“Japta 7: Ol Witnes Oli bin Luk Ol Buk we Oli Wokem long Gol” (long Ol Doktrin mo Ol Kavenan Stori, 31–33, o vidio we i go wetem long Gospel Laebri) oli save helpem ol pikinini blong yu oli lanem samting abaot Ol Tri Witnes. Afta we yufala i ridim Doktrin mo Ol Kavenan 17:5–6, talem long ol pikinini blong yu, olsem wanem yu bin save se Buk blong Momon i tru. ?Olsem wanem nao yumi save stap olsem ol witnes blong Buk blong Momon?
4:58Witnessess See the Book of Mormon Plates: Bearing testimony to the world
Blong kasem moa aedia, luk long magasin blong Fren long manis ia.