“3–9 Febwari: ‘Hemia I Spirit blong Revelesen’: Doktrin mo Ol Kavenan 6–9,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 6–9,” Kam Folem Mi—Blong Hom mo Jos: 2025
3–9 Febwari: “Hemia I Spirit blong Revelesen”
Doktrin mo Ol Kavenan 6–9
Long manis Septemba blong yia 1828, wan yang skultija we nem blong hem i Oliva Kaodri i bin akseptem wan wok blong tija long Manjesta, Niu Yok, mo i bin stap wetem famli blong Lusi mo Josef Smit Senia. Oliva i bin harem abaot boe blong tufala, Josef, we i bin stap laef long Hamoni, Pensilvania, mo Oliva i tekem se, hem, hem i wan man we i stap lukaotem trutok, mo i bin wantem blong save moa. Famli Smit i tokbaot ol visit blong ol enjel, wan histri buk blong bifo, mo presen ia blong transletem toktok tru long paoa blong God. Oliva i bin sek bigwan mo i laekem. ?Hemia i tru o no? Lusi mo Josef Senia, tufala i bin givim wan advaes we i blong eniwan we i stap lukaotem trutok: prea mo askem Lod.
Oliva i bin mekem, mo Lod i bin ansa, i putum “pis long maen [blong hem]” (Doktrin mo Ol Kavenan 6:23). Oliva i faenemaot se, revelesen i no blong ol profet nomo olsem Josef Smit. Hem i blong eni wan we i wantem mo lukaotem wetem strong tingting. Oliva i gat plante samting yet blong lanem, be hem i bin save i naf blong tekem nekis step blong hem. Hem i bin save se Lod i bin stap mekem wan impoten samting tru long Josef Smit, mo Oliva i bin wantem se, hem tu, bae i gat wan pat insaed.
Luk tu long Saints, 1:58–64; “Days of Harmony” (vidio), Gospel Laebri.
Days of Harmony
Ol aedia blong Lanem Samting long Hom mo long Jos
Papa long Heven i toktok long mi tru long Tabu Spirit.
Long spring blong 1829, Oliva Kaodri i bin volontia blong hem i kam man blong raet blong Josef Smit taem hem i gohed blong transletem Buk blong Momon. Eksperiens ia i mekem hem i harem gud tumas, mo, hem tu, i stap askem hemwan sapos hem i save kasem revelesen mo presen blong save transletem buk. Nomata se hem i traem blong fastaem, i no bin go gud.
Sapos yu eva traehad blong kasem o andastanem revelesen, maet yu save gobak long eksperiens blong Oliva—mo lanem samting aot long hem. Taem yu ridim Doktrin mo Ol Kavenan 6, 8, mo 9, luksave wanem we Lod i bin tijim long Oliva abaot revelesen blong wanwan man. Eksampol:
-
?Wanem nao Doktrin mo Ol Kavenan 6:5–7; 8:1; 9:7–8 oli talem abaot wanem nao Lod i nidim long yu bifo bae Hem i talemaot tingting blong Hem?
-
?Wanem nao yu lanem aot long Doktrin mo Ol Kavenan 6:14–17, 22–24; 8:2–3; 9:7–9 abaot ol defren wei we revelesen i save kam? ?Olsem wanem nao yu save luksave?
-
?Wanem moa yu stap lanem abaot revelesen long ol seksen ia?
Ol eksperiens blong Oliva i save mekem yu yu “putum tingting blong yu i gobak” long ol taem we yu bin filim se Lod i stap toktok long yu (Doktrin mo Ol Kavenan 6:22). ?Yu bin eva rekodem ol tingting blong yu o ol filing blong yu abaot ol eksperiens ia? Sapos yes, tingting blong stap ridim wanem we yu bin raetemdaon. Sapos no, tekem smol taem blong raetemdaon wanem we yu tingbaot. Tingting long olsem wanem yu save gohed blong karem paoa aot long ol eksperiens ia. Blong kasem moa aedia, luk long mesej blong Elda Neil L. Andersen “Ol Memori long Saed blong Spirit we I Givim Paoa” (Liahona, Mei 2020, 18–22).
Sam long ol lida blong Jos oli bin serem ol eksperiens blong olgeta wetem revelesen insaed long “Hear Him” vidio koleksen. Afta we yu wajem wan o moa long ol vidio ia, maet bae yu filim insperesen blong raetemdaon ol eksperiens blong yuwan, blong serem olsem wanem Lod i bin toktok long yu.
Luk tu long Topics and Questions, “Personal Revelation,” Gospel Laebri; “Oliver Cowdery’s Gift,” long Revelations in Context, 15–19.
Doktrin mo Ol Kavenan 6:18–21, 29–37
Lukluk long Kraes long saed blong evri tingting.
Lod i bin save se Josef Smit bae i gat eksperiens long “eni kaen problem” long ol yia we i stap kam (Doktrin mo Ol Kavenan 6:18). Hem i save wanem ol hadtaem we i stap long fiuja blong yu tu. ?Wanem nao yu faenem insaed long kaonsel blong Hem we i go long Josef Oliva Kaodri long Doktrin mo Ol Kavenan 6:18–21, 29–37 we i helpem yu blong trastem Hem?
?Wanem nao yu filim se “lukluk long [Kraes] long evri tingting” i stap minim? (ves 36). Olsem wanem nao yu save mekem hemia oltaem—long taem we oli gud mo “long eni kaen problem”? Tingting long kaonsel ia we i kam long Presiden Russell M. Nelson: “Long saed blong tingting, hem i wan wok blong traem blong stap lukluk long Hem long evri tingting. Be taem yumi mekem, bae ol tu tingting blong yumi bambae oli go lus” (“Pulum Paoa blong Jisas Kraes Insaed long Laef blong Yumi,” Liahona, 41).
Luk tu long Neil L. Andersen, “Tingting blong Mi I Fas long Tingting Ia,” Liahona, Mei 2023, 91–94.
Wan smol pat blong peinting ia Luk Han blong Mi, i kam long Jeffrey Ward
“No fraet blong mekem gud.”
?From wanem, samtaem, yumi stap “fraet blong mekem gud”? (ves 33 ?Wanem nao yu faenem long Doktrin mo Ol Kavenan 6:29–37 we i givim strong paoa long tingting blong yu blong mekem gud samting? Tingting blong singsing o stap lisin long wan hym we i givim insperesen long yu blong gat strong paoa long tingting long Kraes. olsem “Yumi Mas Gohed” (Hym, namba 10).
Doktrin mo Ol Kavenan 6–7; 9:3, 7–14
“Wanem we yu askem long mi, bambae mi mekem.”
Luk hamas taem toktok ia “wantem” i kamaot long seksen 6 mo 7. ?Wanem nao yu lanem aot long olgeta seksen ia abaot hamas nao i impoten long God blong save wanem we yu wantem? Askem yuwan kwestin ia blong Lod we i stap long Doktrin mo Ol Kavenan 7:1: ?Wanem nao yu wantem?
Wan long ol stret mo gud samting we Oliva Kaodri i bin wantem—blong transletem buk olsem we Josef i bin stap mekem—i no bin hapen. Taem yu ridim Doktrin mo Ol Kavenan 9:3, 7–14, ?wanem ol tingting mo filing we yu kasem we bae i save helpem yu taem we ol stret mo gud samting oli no hapen long stret taem we yu wantem?
Luk tu long Doktrin mo Ol Kavenan 11:8; Dallin H. Oaks, “Desire,” Liahona, Mei 2011, 42–45.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Doktrin mo Ol kavenan 6:5, 15–16, 22–23; 8:2; 9:7–9
Papa long Heven i stap toktok long mi tru long Tabu Spirit.
-
Ol trutok we Oliva Kaodri i lanem abaot revelesen blong wanwan man, i save helpem ol pikinini blong yu blong oli developem ol janis blong olgeta blong luksave Tabu Spirit. Yu save yusum“Japta 5: Josef Smit mo Oliva Kaodri” (long Ol Doktrin mo Ol Kavenan Stori, 22–25, o vidio we i go wetem long Gospel Laebri) blong tijim olgeta abaot wanem we hem i bin lanem. Serem wetem olgeta wanwan, abaot ol fevret pat blong yu long stori. Taem yu mekem olsem, tokbaot plante ol samting we Lod i bin tijim long Oliva abaot olsem wanem blong harem voes blong God, mo ridim ol stret ves, olsem Doktrin mo Ol Kavenan 6:23 o 9:7–9.
3:11The Lord Sends Oliver Cowdery: Learning about how God speaks to us
Oliva Kaodri i lanem abaot revelesen taem hem i stap helpem Josef Smit blong transletem Buk blong Momon.
-
Mo tu, yu save invaetem ol pikinini blong yu blong tajem hed blong olgeta mo jes blong olgeta taem yu ridim ol toktok ia “maen” mo “hat” Doktrin mo Ol Kavenan 8:2. Talem long ol pikinini blong yu se, aot long ol eksperiens blong yu, se i olsem wanem taem Tabu Spirit i stap toktok long maen mo hat blong yu. Helpem olgeta blong faenem ol ansa blong kwestin ia “?Olsem wanem nao Tabu Spirit i toktok long yumi?” long ol ves ia: Doktrin mo Ol Kavenan 6:15–16, 22–23; 8:2; 9:7–9.
Yusum ol stori. Ol stori oli helpem ol pikinini blong andastanem ol prinsipol blong gospel from se oli soemaot olsem wanem ol narafala pipol oli laef folem ol prinsipol ia. Taem yu stap tij, faenem ol wei blong yusum tu ol stori—we i kam long ol skripja, Jos Histri, o we i kam long laef blong yuwan—we i soem eksampol blong ol prinsipol insaed long ol skripja.
From tru long Jisas Kraes, mi no save “fraet.”
-
Lod i talem long Josef mo Oliva, “Smol grup, no fraet” (Doktrin mo Ol Kavenan 6:34). Maet yu save invaetem ol pikinini blong yu blong ripripitim toktok ia wetem yu plante taem. Mo tu, oli save glad blong stap priten blong stap olsem wan smol sipsip we i stap fraet. ?Wanem nao sipsip i stap fraet long hem? Afta, yu mo ol pikinini blong yu i save lukluk long wan pikja blong Sevya we i stap olsem man blong lukaot long sipsip (i gat wan long en blong aotlaen ia) mo tokbaot olsem wanem Hem i stap lukaot long yumi olsem man blong lukaot long sipsip i stap lukaot long ol sipsip blong Hem.
-
Tingting blong stap plei o singsing long wan singsing abaot stap faenem strong paoa long tingting long Kraes, olsem “Dare to Do Right” (Children’s Songbook, 158) o “Yumi mas gohed” (Hym, namba 10). ?Wanem nao singsing ia i tijim abaot olsem wanem Sevya i stap helpem yumi blong no stap fraet?
Luk long Doktrin mo Ol Kavenan 6:36.
Mi save lukluk long Jisas long evri tingting.
-
Afta we yufala i ridim tugeta Doktrin mo Ol Kavenan 6:36, yu mo ol pikinini blong yu i save mekem ol droing blong helpem yu tingbaot blong “lukluk long [Jisas Kraes] long evri tingting [blong yufala].” Tokbaot ol droing blong yufala wetem wanwan long yufala, mo helpem ol pikinini blong yu blong tingting long ol ples we oli save putum olgeta long hem, mekem se oltaem oli save stap luk.
Blong kasem moa aedia, luk long magasin blong Fren long manis ia.