“24 Febwari–2 Maj, ‘Praes blong Wan Sol I Bigwan’: Doktrin mo Ol Kavenan 18,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 18,” Kam Folem Mi—Blong Hom mo Jos: 2025
24 Febwari–2 Maj: “Praes blong Wan Sol I Bigwan”
Doktrin mo Ol Kavenan 18
I gat plante defdefren wei blong traem blong skelem hamas wan i impoten. Talen, edukesen, ol rij samting, mo lukluk blong wan man long wan narawan i save jenisim olsem wanem yumi lukluk long ol narawan—mo yumiwan. Be long ae blong God, praes blong yumi i wan samting we i moa simpol mo i talem klia long Doktrin mo Ol Kavenan 18: “Tingbaot se praes blong wan sol i bigwan long ae blong God” (ves 10). Simpol trutok ia i eksplenem plante samting abaot wanem God i stap mekem mo from wanem Hem i mekem. ?From wanem nao Hem i givim instraksen long Josef Smit mo Oliva Kaodri blong tufala i stanemap Jos Ia blong Jisas Kraes long dei blong yumi? (luk long ol ves 1–5). From se praes blong wan sol i bigwan. From wanem nao Hem i “komandem evri man long evri ples blong oli mas sakem sin,” mo sendem Ol Aposol blong go prijim fasin blong sakem sin? (ves 9). From se praes blong wan sol i bigwan. Mo from wanem nao Jisas Kraes i safa long “ded blong bodi” mo “sobodi blong evri man”? (ves 11). From se praes blong wan sol i bigwan. Sapos wan long ol sol ia i jusum blong akseptem presen ia blong Sevya, Hem i glad bigwan, from “glad blong hem i bigwan tumas from sol we i sakem sin” (ves 13).
Ol aedia blong Lanem Samting long Hom mo long Jos
“Bildimap jos blong mi.”
Insaed long seksen 18, Lod i bin givim ol instraksen long Oliva Kaodri blong help putum fandesen blong Jos Ia blong Jisas Kraes. ?Wanem nao yu luksave abaot kaonsel we Hem i bin givim—speseli long ol ves 1–5? Maet yu save tingting long olsem wanem semmak kaonsel ia i blong yu taem yu “bildimap” fet blong yu long Kraes. Eksampol:
-
?Wanem nao yu yu “wantem save” abaot Lod? (ves 1).
-
?Wanem nao i minim long yu blong “trastem olgeta samting we oli raetem finis”? (ves 3). ?Olsem wanem nao Spirit i bin “soemaot long yu” se ol samting ia oli tru? (ves 2; luk tu long Doktrin mo Ol Kavenan 6:22–24).
-
?Olsem wanem nao yu bildimap laef blong yu long “fandesen blong gospel blong [Sevya] mo strong ston blong [Hem]”? (ves 5).
Askem ol kwestin. Doktrin mo Ol Kavenan i pruf ia se ol kwestin oli lidim yumi i go long revelesen. Taem yu stap stadi long ol skripja, raetemdaon ol kwestin we yu gat. Afta, tingting hevi long olgeta mo prea blong lukaotem ol ansa.
Doktrin mo Ol Kavenan 18:10–13
“Praes blong wan sol i bigwan long ae blong God.”
?Olsem wanem nao yumi faenemaot praes blong wan samting? Eksampol, ?from wanem wan aetem long maket i moa sas bitim narafala aetem? Taem yu ridim seksen 18 long wik ia, speseli ol ves 10–13, maet bae yu save talem wanem i defren long olsem wanem oltaem ol pipol oli faenemaot valiu wetem wanem we i mekem wan sol i gat moa valiu long ae blong God. Tingting blong putum nem blong yu i tekem ples blong ol toktok ia “sol,” “ol sol,” mo “evri man.” ?Olsem wanem nao ol ves ia i save helpem wan we i stap askem ol kwestin abaot valiu blong hemwan?
Hemia sam narafala paragraf we oli tij abaot praes blong wan sol: Luke 15:1–10; Jon 3:16–17; 2 Nifae 26:24–28; Moses 1:39. Folem ol paragraf ia, ?olsem wanem nao yu save talem long sot toktok abaot wei we God i filim abaot yu? Mo tu, bae yu save lukaotem mesej blong Presiden Dieter F. Uchtdorf long “You Matter to Him” (Liahona, Nov. 2011, 19–22) blong faenem ol toktok mo ol sentens we i helpem yu blong save abaot hamas yu yu impoten long ae blong God.
?Long wanem wei nao God i soem long yu se praes blong yu i bigwan long Hem? ?Olsem wanem nao hemia i jenisim wei we yu filim abaot yuwan mo ol narafala man?
Luk tu long Joy D. Jones, “Value beyond Measure,” Liahona, Nov. 2017, 13–15; Topics and Questions, “Children of God,” Gospel Laebri.
Doktrin mo Ol Kavenan 18:11–16
Lod i glad bigwan taem mi sakem sin.
Luksave hamas taem ol toktok olsem sakem sin mo fasin blong sakem sin oli yusum truaot long Doktrin mo Ol Kavenan 18. Tingting hevi long wanem we yu lanem aot long ol toktok ia, evri taem we oli yusum. Speseli, tingting long ol ves 11–16. ?Olsem wanem nao ol ves ia oli jenisim wei we yu filim abaot fasin blong sakem sin—fasin blong sakem sin blong yuwan, mo diuti blong yu blong invaetem ol nara pipol blong sakem sin mo kam moa gud? Hemia wan wei blong raetemdaon wanem yu lanem: mekem lis blong sam wei we bae yu save komplitim sentens ia “Fasin blong sakem sin hem i .”
Luk tu long Alma 36:18–21; Gaed long Ol Skripja, “Fasin blong sakem sin,” Gospel Laebri; Dale G. Renlund, “Fasin blong Sakem Sin: Wan Joes we I Mekem Man I Glad,” Liahona, Oktoba 2016, 121–24.
Ol ditel blong Pikinini Boe we i Lus mo i Kambak, i kam long Clark Kelley Price
Doktrin mo Ol Kavenan 18:14–16
Bigfala glad i kam taem yumi stap helpem ol narawan blong kam long Kraes.
Taem yu ridim ol ves 14–16, tingting hevi long wanem i minim blong “taltalemaot long ol pipol ia blong oli sakem sin,”—mo from wanem i hemia i givim bigfala glad. ?Wanem sam wei we yu bin faenem blong helpem ol narawan blong kam long Kraes mo kasem fogivnes? ?Olsem wanem nao ol narafala pipol oli bin mekem hemia long yu?
Luk tu long Craig C. Christensen, “I No Save Gat Wan Samting We I Moa Naes mo Swit olsem Glad we Mi Bin Gat,” Liahona, Mei 2023, 45–47.
Doktrin mo Ol Kavenan 18:34–36
Mi save harem voes blong Lod insaed long ol skripja.
?Sapos wan i askem yu se voes blong Lod i olsem wanem, bae yu talem wanem? Tingbaot kwestin ia taem yu stap ridim Doktrin mo Ol Kavenan 18:34–36. ?Wanem nao yu lanem abaot voes blong Lod taem yu stap ridim Doktrin mo Ol Kavenan? ?Wanem nao yu save mekem blong harem voes blong Hem i moa klia?
Luk tu long “As I Search the Holy Scriptures,” Hym, namba 277.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Ol Aedia blong Stap Tijim Ol Pikinini
Doktrin mo Ol Kavenan 18:10–13
Wanwan long yumi i gat bigfala praes long God.
-
Taem yu mo ol pikinini blong yu i ridim Doktrin mo Ol Kavenan 18:10–13, tingting blong putum nem blong wanwan long yufala long ples blong ol toktok ia “sol,” “ol sol,” mo “evri man.” Afta, yu save tokbaot olsem wanem ol ves ia oli helpem yumi blong andastanem olsem wanem Papa long Heven i filim abaot wanwan long yumi.
-
Yu save askem ol pikinini blong yu tu abaot ol samting we ol pipol oli tingting long olgeta olsem samting we oli gat moa valiu. O yu save soem long olgeta wan samting we i gat moa valiu long yu. ?Olsem wanem nao yumi tritim ol samting we oli gat moa valiu long yumi? Afta askem olgeta blong gat wanwan janis blong stap lukluk i go long mira. Taem oli mekem olsem, talem long wanwan pikinini se olgeta, oli pikinini blong God mo praes blong olgeta i bigwan. ?Olsem wanem nao yumi save soem long ol narawan se “praes blong sol [blong olgeta] i bigwan” long ae blong yumi?
-
Blong tokbaot plante se praes blong evri pipol i bigwan long Papa long Heven, ol pikinini blong yu oli save lukluk long pikja long en blong aotlaen ia long taem we yu ridim Doktrin mo Ol Kavenan 18:10–13. Tugeta, singsing wan singsing olsem“Every Star Is Different” (Children’s Songbook, 142–43) i save help blong andastanem moa gud, poen ia.
Ditel blong Praes blong wan Sol, i kam long Liz Lemon Swindle
Doktrin mo Ol Kavenan 18:13–16
Blong stap serem gospel, i givim bigfala glad.
-
Blong mekem ol pikinini blong yu oli kasem insperesen blong serem gospel blong Jisas Kraes, yufala save toktok wetem wanwan long yufala abaot ol eksperiens we yu bin faenem wan samting we yu wantem serem wetem ol fren o famli blong yu. ?From wanem nao bae yu wantem blong serem, mo taem yu stap serem, yu filim olsem? Afta, yu save ridim Doktrin mo Ol Kavenan 18:13, 16. ?Wanem nao i mekem Lod i glad? ?Wanem nao Hem i talem se bae i mekem yumi glad? Yu mo ol pikinini blong yu, yufala i save tokbaot eniwan long ol eksperiens we yufala i bin gat taem yufala i stap serem bigfala glad blong gospel blong Sevya.
-
Wan singsing blong stap serem gospel, olsem, “I Want to Be a Missionary Now” (Children’s Songbook, 168), i save helpem ol pikinini blong yu blong tingting long ol wei we oli save serem gospel.
Doktrin mo Ol Kavenan 18:34–36
Mi save harem voes blong Lod insaed long ol skripja.
-
Maet ol pikinini blong yu bae oli glad blong mekem wan gem we tru long gem ia, bae oli traem blong harem save ol voes blong ol defdefren pipol, olsem, ol memba blong famli, ol fren o ol lida blong Jos. ?Long wanem wei nao yumi harem save ol voes blong yumi? ?Long wanem wei nao yumi harem save voes blong Lod? Tugeta, yufala i save ridim Doktrin mo Ol Kavenan 18:34–36 blong toktok raon long kwestin ia. Mo tu, yu save serem wetem wanwan long yufala, olsem wanem yu bin harem voes blong Lod insaed long ol skripja.
Blong kasem moa aedia, luk long magasin blong Fren long manis ia.