Doktrin mo Ol Kavenan 19

Josef Smit i eksplenem se revelesen long seksen 19 hem i “wan komanmen … we i go long Martin Haris, we Hem we i no save finis nao i givim long hem” (seksen heding). Lukaotem ol ples long ol ves 1–12 long ples ia Lod i tokbaot plante fasin blong Hem we i no save finis. ?From wanem yu ting se hem i impotem blong Martin Haris i save abaot fasin blong Lod? ?From wanem hem i impoten blong yu yu save hemia?

?From wanem yu ting se Jisas Kraes oli singaotem Hem olsem “hem we i stat mo i en”? (ves 1).

Niu Testeman i tokbaot safaring blong Sevya long Getsemane; hemia i kam long lukluk blong ol pipol we oli luk hemia i hapen. Long Doktrin mo Ol Kavenan 19:15–20, Jisas Kraes i tokbaot safaring blong Hem long lukluk blong Hemwan. Taem yu ridim tabu stori ia blong Hemwan, lukaotem wei we Hem i tokbaot safaring blong Hem. Tingting long wanem nao wanwan toktok mo sentens ia oli stap tijim yu. ?From wanem Sevya i bin glad mo rere blong safa? Yu save faenemaot moa long Jon 15:13; Mosaea 3:7; Alma 7:11–12; Doktrin mo Ol Kavenan 18:10–13.

Ol filing we yu gat taem yu stap stadi long harem nogud blong Sevya, bae i givim niu tingting long ol kwestin olsem hemia: ?From wanem Sevya i mas ded from ol sin blong mi? ?From wanem mi mas sakem sin blong kasem ol blesing we i fulwan blong sakrifaes blong Hem? Maet bae yu save faenem ol niu tingting abaot ol kwestin ia mo ol narawan long mesej blong Elda Ulisses Soares “Jisas Kraes: Man we I Givim Kea long Sol blong Yumi” (Liahona, Mei 2021, 82–84). Taem yu stap stadi, ?wanem ol tingting mo filing we i kam long maen blong yu? Tingting blong raetemdaon ol filing blong yu abaot Jisas Kraes mo sakrifaes we Hem i mekem blong yu.

Olsem pat blong stadi mo wosip blong yu, maet yu save lukaotem wan hym we yu save lisin o singsing long hem, we i soem tangkyu blong yu long Sevya from safaring blong Hem long bihaf blong yu. “I Stand All Amazed” (Hym, namba 193) i wan gudfala eksampol.

?Wanem nao yu filim se Papa long Heven mo Jisas Kraes bae Tufala i wantem yu blong mekem olsem wan risal blong wanem we yu bin filim mo stadi long hem?

Luk tu long “Jesus Christ will help you,” Blong Ol Yut Oli Kam Strong: Wan Gaed blong Stap Mekem Ol Joes (2022), 6–9; Topics and Questions, “Atonement of Jesus Christ,” “Repentance,” Gospel Laebri; D. Todd Christofferson, “The Divine Gift of Repentance,” Liahona, Nov. 2011, 38–41; “Jesus Suffers in Gethsemane” (video), Gospel Laebri.

8:48

Tingting long invitesen blong Sevya: “Lanem samting aot long mi.” ?Wanem nao yumi lanem abaot Jisas Kraes long Doktrin mo Ol Kavenan 19? Raetemdaon ol tingting mo ol filing blong yu, afta, tingting hevi long wei we ol trutok ia abaot Sevya oli stap helpem yu blong faenem pis. ?Hem i minim wanem long yu blong “wokbaot wetem fasin blong no stap flas we i kam long Spirit blong [Hem]”?

Luk tu long Henry B. Eyring, “Finding Personal Peace,” Liahona, Mei 2023, 29–31; “Peace in Christ” (video), Gospel Laebri.

4:10

Oli no bin salem gud Buk blong Momon long Palmaera. Olsem wan risal blong hemia, Martin Haris i mas salem wan bigfala ples blong fam blong hem blong save pemaot kaon blong printa (luk long “The Contributions of Martin Haris,” long Revelations in Context, 7–8). Tingting hevi long sakrifaes blong Martin—mo ol blesing we yu bin kasem from hemia—taem yu ridim Doktrin mo Ol Kavenan 19:26–41. Mo tu, yu save tingting abaot wanem we Lod i bin askem yu blong sakrifaes long hem. ?Wanem nao yu faenem insaed long ol ves ia we i givim insperesen long yu blong mekem olgeta sakrifaes ia wetem “glad”? (Luk tu long ol ves 15–20).

• Yu save helpem ol pikinini blong filim respek mo gat fasin blong talem tangkyu long Sevya taem, tugeta, yufala i stap ridim Doktrin mo Ol Kavenan 19:16–19 o “Japta 51: The Contributions of Martin Haris,” long Ol Niu Testeman Stori, 129–32, o ol vidio we i go wetem long Gospel Laebri. Tingting blong stop smoltaem blong mekemsua se ol pikinini blong yu oli andastanem mo blong letem olgeta oli talemaot ol tingting mo filing blong olgeta. Eksampol, long ves 16, ?wanem nao “ol samting ia” we Jisas i bin safa long olgeta from yumi? (luk long Mosaea 3:7; Alma 7:11–12). ?Wanem nao yumi lanem aot long wanem we Hem i tokbaot abaot safaring blong Hem? ?Olsem wanem yumi save soem fasin blong talem tangkyu long wanem we Hem i bin mekem blong yumi?

1:47

• Yu mo ol pikinini blong yu i save lukaotem Hymns o Children’s Songbook blong ol singsing we i save helpem yu blong soemaot ol filing blong yu abaot Jisas Kraes (luk long ol topik indeks long ol buk ia).

• Blong harem nogud from ol sin blong yumi i wan samting we i hat tumas, be Jisas Kraes i wantem blong obei long Papa blong Hem mo blong soem lav blong Hem long Papa God mo from yumi. Tugeta, yufala i save lukluk long wan pikja blong Jisas Kraes we i stap safa long Garen blong Getsemane (olsem olgeta long aotlaen ia) mo askem long ol pikinini blong yu blong talem long yu wanem oli save abaot wanem i stap hapen long pikja. Tugeta, yufala save ridim Doctrine and Covenants 19:18–19, 24 blong tokbaot bigwan se harem nogud from ol sin blong yumi i samting we i had moa bitim evri nara samting we eni man i bin mekem, be from Jisas i bin lavem Papa blong Hem mo yumi, Hem i bin obei long wanem we God i wantem (luk tu long Mosaea 3:7). ?Wanem ol samting we i had tumas we God i askem yumi blong mekem? ?Olsem wanem nao yumi save gat strong paoa long tingting blong obei long Hem?

• Maet yu save helpem ol pikinini blong yu blong tingting long ol simpol aksen we i go stret wetem ol sentens long Doktrin mo Ol Kavenan 19:23. Ridim ves ia fulap taem, long semtaem we oli stap mekem ol aksen. ?Wanem sam long ol wei we yumi save lanem samting abaot Kraes mo lisin long ol toktok blong Hem?.

• Yu mo ol pikinini blong yu i save gat wanwan janis blong stap holem wan kopi blong Buk blong Momon mo stap serem wanem we yufala i laekem tumas abaot buk ia. Tokbaot sot stori abaot sakrifaes we Martin i bin mekem blong mekem se oli save printim Buk blong Momon (luk long Ol Doktrin mo Ol Kavenan Stori, 33). ?Wanem nao Lod i talem long Martin long Doktrin mo Ol Kavenan 19:38 we maet i bin save helpem hem blong stap fetful mo stap obei? Helpem ol pikinini blong yu blong tingting long wan samting we oli save sakrifaesem blong obei long God o help long wok blong Hem.