Doktrin mo Ol Kavenan 23–26

Revelesen long Doktrin mo Ol Kavenan 24 oli bin givim blong “mekem i kam strong moa, leftemap tingting, mo givim instraksen” long Josef Smit mo Oliva Kaodri long wan taem blong hadtaem (seksen heding; luk tu long Saints, 1:94–96). Lukaotem ol toktok long Doktrin mo Ol Kavenan 24 we yu filim se bae i save stap givim paoa mo leftemap tingting blong olgeta.

?Wanem nao ol skripja ia oli talem long yu abaot olsem wanem Sevya i helpem yu wetem ol jalenj blong yu?

Doktrin mo Ol Kavenan 24:1–3

Doktrin mo Ol Kavenan 24:8

Doktrin mo Ol Kavenan 121:7–8

Aesea 40:28–31

Mosaea 24:14–15

Taem Ema Smit i wajem Restoresen we i kam tru long hasban blong hem, Josef Smit, maet bae hem i tingting se wanem nao rol blong hem. Lukaotem ol ansa we God i givim long Doktrin mo Ol Kavenan 25. ?Yu, yu faenem eni samting long seksen ia we yu filim se hem i “voes blong Hem we i kam long [yu]”? (ves 16).

Luk tu long “An Elect Lady” (video), Gospel Laebri; “Thou Art an Elect Lady,” long Revelations in Context, 33–39; Joy D. Jones, “Wan Spesel Hae Koling,” Liahona, Mei 2020, 15–18.

5:15

?Wanem nao sentens ia “spirit blong no stap flas” i minim long yu? Tingting blong stap lukaotem long seksen 25 blong faenem ol toktok mo ol sentens we i helpem yu blong andastanem wanem i minim blong no stap flas. Mesej blong Elda David A. Bednar “Hem I No Stap Flas mo Tingting blong Hat blong Hem I Stap Daon” i save help tu (Liahona, Mei 2018, 30–33). ?Olsem wanem nao Jisas Kraes i wan eksampol blong fasin blong no stap flas, long yu? (luk long Matiu 11:28–30). Tingting abaot ol samting long laef blong yu we yu save mekem “wetem spirit blong no stap flas.”

Taem yu tingting hevi long kaonsel blong Lod insaed long Doktrin mo Ol Kavenan 25:10, maet i save help blong mekem wan lis blong “ol samting blong wol ia” we Hem i wantem yu blong “livim oli stap long saed.” Afta, yu save mekem wan lis blong “ol samting blong wan [wol] we i moa gud” we Hem i wantem yu blong lukaotem. Maet yu save jusum wan samting nomo we i stap long fas lis we bae yu livim i stap long saed mo wan samting aot long nambatu lis we bae yu lukaotem.

Presiden Russell M. Nelson i bin givim ol kaonsel mo ol promes abaot “[stap putum] long saed plante samting blong wol ia.” Lukaotem hemia long pej 77 long mesej blong “Ol Rij Samting long Saed blong Spirit” (Liahona, Novemba 2019). ?Olsem wanem nao bae yu folem kaonsel blong hem?

Taem yu ridim ves 13, tingting long ol kavenan we yu bin mekem wetem Papa long Heven mo Jisas Kraes. ?Wanem i minim blong “holemtaet” ol kavenan ia? ?Olsem wanem nao ol kavenan blong yu oli helpem yu blong “livim i stap long saed ol samting blong wol ia, mo lukaotem ol samting we i moa gud”?

Hemia sam narafala skripja we oli save helpem yu blong luksave “ol samting blong wol ia” mo “ol samting blong wan wol we i moa gud”: Matiu 6:19, 21, 25–34; Luk 10:39–42; 2 Nifae 9:51.

Luk tu long Topics and Questions, “Sacrifice,” Gospel Laebri.

Wanem nao sam long “[ol] singsing [blong yu] we i kam long hat”—ol singsing we oli talemaot ol filing blong yu abaot Papa long Heven o Jisas Kraes? Tingting blong stap singsing o stap lisin long sam long olgeta. ?Wanem nao i abaot ol singsing ia we i mekem olgeta oli spesel long yu?

Maet yu save tingting hevi tu long olsem wanem ol hym ia oli olsem wan prea. ?Wanem nao tabu miusik mo prea, tufala i gat we oli semmak? ?Olsem wanem nao ol tabu singsing blong yu oli bin “ansa wetem wan blesing”?

Luk tu long “Oh, What Songs of the Heart,” Hym, namba 286.

Tufala toktok ia “ful sapot” long ves ia, i stap tokbaot aksen blong stap leftemap han blong yumi blong soem se yumi sastenem mo sapotem wan man o woman we i stap kasem wan koling o wan prishud odinesen. ?Olsem wanem nao bae yu eksplenem long wan visita we i kam long wan Jos miting, se i minim wanem taem yumi sastenem wan man o woman? ?Wanem ol ansa we yu faenem insaed long mesej blong Presiden Henry B. Eyring “Paoa blong Fet blong Sapotem Man”? (Liahona, Mei 2019, 58–60).

• Blong lanem abaot sam long ol hadtaem o ol jalenj we Josef Smit mo ol Sent blong bifo oli fesem, yu save luklukbak long “Japta 11: Moa Pipol oli Joenem Jos,” long Ol Doktrin mo Ol Kavenan Stori, 46–47, o vidio we i go wetem insaed long Gospel Laebri. Afta, yu mo ol pikinini blong yu i save faenemaot wanem we Lod i talem long Josef abaot ol hadtaem blong hem insaed long Doktrin mo Ol Kavenan 24:1, 8. Mo tu, yu save serem wetem wanwan long yufala, olsem wanem Lod i helpem yufala long taem blong ol hadtaem.

  

  1:52

• Blong lanem wanem i minim blong gat “fasin blong save wet longtaem long ol hadtaem blong [yumi],” yu mo ol pikinini blong yu i save krietem bakegen eksperimen long vidio “Gohed wetem Fasin blong Stap Wet Longtaem” (Gospel Laebri). ?Wanem nao Doktrin mo Ol Kavenan 24:8 i tijim yumi abaot fasin blong save wet longtaem? ?Long wanem wei nao Sevya i letem yumi save se Hem i “stap wetem [yumi]” long taem blong ol hadtaem blong yumi?

  

  2:42

• Afta we yufala i ridim Doktrin mo Ol Kavenan 25:12, yufala save talem long wanwan long yufala abaot fevret hym o fevret singsing blong Jos blong yufala—“singsing blong [yu] we i kam long hat”—mo tugeta, singsing long olgeta. Serem wetem yufala wanwan, from wanem yufala i laekem ol singsing ia. ?From wanem Lod i hapi taem yumi singsing ol singsing ia? ?Long wanem wei nao singsing blong yumi i olsem “wan prea we i go long [Hem]”?

• Blong andastanem wanem i minim blong “holemtaet ol kavenan” (Doktrin mo Ol Kavenan 25:13), ol pikinini blong yu oli save gat wanwan janis blong stap holem wan samting strong olsem we oli save mekem. Afta, yu mo ol ol pikinini blong yu i save tokbaot olsem wanem yufala i save “holemtaet” o holem strong ol kavenan blong yufala. Sapos i gat nid, tokbaot bakegen wetem ol pikinini abaot ol kavenan we yumi mekem (luk long Mosaea 18:8–10; Doktrin mo Ol Kavenan 20:37; ,mo aktiviti pej blong wik ia).

• Blong givim long ol pikinini blong yu wanem i hapen long Doktrin mo Ol Kavenan 25:13, maet yu save talemaot se hemia i wan samting we Lod i bin talem long Ema Smit, sot taem afta long baptaes blong hem. ?From wanem hemia i save kam wan gudfala kaonsel long wan we i kasem baptaes i no longtaem?