Whakaakoranga me ngā Kawenata 3–5

I ngā wā moata o tā Hōhepa minitatanga, he uaua te rapu hoa pai—ngā hoa pērā rawa i a Mātini Hārihi, tētahi tangata whai mana, tētahi tangata whairawa nāna nei ngā mahi nunui i mea ai e ia hei tautoko i tā Hōhepa mahi. Nō reira i te wā i tono atu a Mātini i ngā whārangi 116 tuatahi o te whakapākehātanga o te Pukapuka a Moromona kia huraina atu ki tana hoa wahine, i te tino hiahia a Hōhepa ki te whakaae atu, ahakoa i whakatūpatoria ia e te Ariki. He pōuri rawa te ngaronga atu o aua whārangi i te wā i a Mātini, kātahi ka tino kohete rawatia a Hōhepa rāua ko Mātini e te Ariki (tirohia Hunga Tapu, 1:51–53).

I a koe e pānui ana i Whakaakoranga me ngā Kawenata 3:1–15, me whakaaroaro ki tā te Ariki e hiahia nei hei akoranga māu i roto i ā rāua mahi. Hei tauira, he aha ngā akoranga māu mō:

• Tā te Atua mahi? (tirohia whiti 1–3, 16).

• Ngā utu mō te whakawhirinaki ki te tangata mahue te whakawhirinaki ki te Atua? (tirohia whiti 4–8).

• Ngā manaakitanga e puta mai ai i te ū tonu? (tirohia whiti 8).

• Te huarahi i whakatikaina, i akiakina e te Ariki a Hōhepa? (tirohia whiti 9–16).

I roto i tana karere “Which Way Do You Face?,” ka tuku a Erata Lynn G. Robbins i ngā tauira maha mai i ngā karaipiture o ngā tāngata i wehi ki te Atua me ngā tāngata i riro atu i ngā whakaaro o ētahi atu (Liahona, Noema 2014, 9–11). Me pānui ēnei tauira i roto i ngā karaipiture e kōrerotia nei e ia. He aha ngā akoranga māu i ēnei kōrero? He aha ngā āhuatanga i pā ai ki a koe i tētahi wā i whakawhirinaki ai koe ki te Ariki i reira werohia mai ngā whakaaro a ētahi atu kia mahi koe i tētahi mahi kē atu? He aha ngā hua o āu mahi?

Tirohia anōtia a Dale G. Renlund, “A Framework for Personal Revelation,” Liahona, Noema 2022, 16–19; “The Contributions of Martin Harris,” i Revelations in Context (2016), 1–9; Ngā Kaupapa me ngā Pātai, “Seeking Truth and Avoiding Deception,” Wharepukapuka Rongopai; “How Gentle God’s Commands,” Hymns, no. 125.

He rite tonu te whakataurite i tewāhanga 4 ki ngā mihingare. Heoi anō, he mīharo kua tukuna tēnei whakakitenga ki a Hōhepa Mete Tama., kāore nei i karangahia ake ki tētahi mīhana, engari i a ia tonu te “kōingo ki te mahi ki te Atua” (whiti 3).

Ko tētahi huarahi hei pānui i tēnei wāhanga ko te whakaaro ake anō nei he whakamāramatanga mahi mō tētahi e hiahia ana ki te āwhina i tā te Ariki mahi. He aha te mea e kimihia ana e te Ariki? He aha Ōna painga ki a koe?

He aha ngā akoranga māu mō te mahi ki te Ariki i roto i tēnei whakakitenga?

I kīa e Tumuaki Russell M. Nelson ko te whakahuihuinga o Iharaira “te wero nui rawa, te kaupapa nui, me te mahi nui rawa i runga i te whenua” (“Hope of Israel” [huinga taiohi o te ao, Hune 3, 2018], Wharepukapuka Rongopai). He aha tāu e kite nei i tana kōrero nā konā hihiko ake tō ngākau ki te tautoko i tēnei mahi?

I te Maehe 1829, i tuku kerēme te hoa wahine a Mātini Hārihi i roto i te kōti e mea ana i te tinihanga a Hōhepa Mete i te iwi i runga i te whakataruna me te mea nei kei te whakapākehā ia i ngā papa kōura (tirohia Hunga Tapu, 1:56–58). Nō reira a Mātini tono atu anō ai ki a Hōhepa mō ētahi atu taunaki he mea tūturu ngā papa kōura. KoWhakaakoranga me ngā Kawenata 5 tētahi whakakitenga hei whakautu i tā Mātini tono. He aha ngā akoranga māu i ēnei kōrero mō ngā mea e whai ake nei:

• Mō ngā mea i kī ake ai te Ariki ka puta mehemea ka whakaatuhia atu ngā papa kōura ki te ao hei kitenga mā te katoa (tirohia Whakaakoranga me ngā Kawenata 5:7). He aha te take e pērā ai ki ōu whakaaro?

• Te mahi a ngā kaiwhakaatu i roto i te mahi a te Ariki (tirohia whiti 11–15; tirohia anōtia 2 Korinihi 13:1).

• Me pēhea e rapu whakaaturanga mō te Pukapuka a Moromona mōu ake (tirohia whiti 16, 24; tirohia anōtia  Moronai 10:3–5).

He aha ngā mea e whakaakona ana koe e te Whakaakoranga me ngā Kawenata 5:1–10 mō te mahi a Hōhepa Mete i ēnei rā—i roto hoki i tō oranga? (Tirohia anōtia 2 Nīwhai 3:6–24.)

• Hei hika ake i tētahi kōrero mō te ako ki te whakawhirinaki ki te Matua i te Rangi, māu pea e arotake te kōrero mō ngā whārangi ngaro (tirohia Ngā Paki Kōrero Whakaakoranga me ngā Kawenata, 18–21). Kātahi pea koutou ka whakaari tahi me ō tamariki ngā momo tūāhuatanga e whakawaia ai rātou ki te mahi i tētahi mahi e mōhio ana rātou kāore nei i te tika. He aha ngā kupu, ngā rerenga rānei i Whakaakoranga me ngā Kawenata 3:5–8; 5:21–22 e āwhina ai i a rātou i roto i ēnei āhuatanga?

  

  4:39

• E mau ana i ia whiti i Whakaakoranga me ngā Kawenata 4 ētahi mea pono utu nui e āwhina ai i ō tamariki ki te ako e pā ana ki te mahi ki te Atua. Anei ētahi whakaaro hei āwhina i a rātou ki te rapu i ēnei mea pono:

  • Me pānui tahi koutou i Whakaakoranga me ngā Kawenata 4:1 me te hura atu i ngā pikitia e whakaatu ana i tā te Atua mahi “mīharo” i ngā rā o muri nei (pērā i ngā mihingare, ngā temepara, me te Pukapuka a Moromona).

  • Mā ō tamariki e whakaaro ake ki ngā ā-ringa, e tā pikitia rānei e hāngai atu ana ki te rerenga “mahi ki a ia i runga i te katoa o tō ngākau, tō kaha, ō whakaaro me tō mārohirohi” (Whakaakoranga me ngā Kawenata 4:2).

  • Me titiro tahi koutou ki ngā taputapu e whakamahia ana i roto i te whīra. Me pēhea ēnei taputapu e āwhina ai i a tātou? Kātahi ka rapu ō tamariki i ngā mea i Whakaakoranga me ngā Kawenata 4:5–6 e rite ana ki ngā taputapu e whakamahia ai ngā mahi a te Atua.

  • Me rapu ngā taiohi i Whakaakoranga me ngā Kawenata 4 ko rātou anake me te whakamahi i tētahi rārangi mō ngā mea e ako ai rātou e pā ana ki te mahi ki te Atua.

  • Me waiata tahi anō i tētahi waiata e pā ana ki te mahi mihingare, pērā i “I Want to Be a Missionary Now” (Children’s Songbook, 168).

• Hei rautaki whakaako, tēnā, tonoa ō tamariki kia huri ngā whakaaro me te mea nei i kī mai tētahi hoa, nā, i kite ia i tētahi ngeru e hīkoi ana i runga i ōna waewae mua. Ka whakapono rātou ki tērā kōrero? Ka pēhea mēnā i pērā anō te kōrero a tētahi atu hoa? Me kōrero mō te tikanga o tētahi “kaiwhakaatu” me te hiranga hoki o ngā kaiwhakaatu. Kātahi koe ka āwhina i ō tamariki ki te rapu Whakaakoranga me ngā Kawenata 5:1–3, 7, 11 mō ngā whakautu ki ngā pātai pēnei:

  • He aha te mea i hiahia nei a Mātini Hārihi kia mōhio?

  • I taea e Hōhepa Mete te whakaatu atu i ngā papa kōura ki a wai?

  • He aha te take e kore nei tētahi e whakapono he pono te Pukapuka a Moromona nā te kite atu i ngā papa?

  • he aha ngā mea e taea ana e tātou hei kaiwhakaatu mō te Pukapuka a Moromona? (tirohia Whakaaturanga me ngā Kawenata 5:16; Moronai 10:3–5).