Whakaakoranga me ngā Kawenata 10–11

Kua pai kē a Hātana me ka wareware tātou kei konei ia—ka kāpō rānei tātou ki āna mahi whakawai i a tātou (tirohia 2 Nīwhai 28:22–23). Engari ka whakaū ngā kupu a te Ariki i Whakaakoranga me ngā Kawenata 10 nā, he mea tūturu a Hātana—ā, e kaha ana ia ki te whawhai ki ngā mahi a te Ariki. Kei roto i ngā whiti 1–33, tohua tā te Atua i mōhio ai e pā ana ki ngā mahi a Hātana (tirohia anōtia whiti 62–63). Māu anō e ui atu ki te Ariki kia āwhina i a koe kia kitea ai tā Hātana mahi whakawai i a koe. I a koe e pānui ana i wāhanga 10, me huri ō whakaaro ki tā te Kaiwhakaora hei whakakaha i a koe kia kaua e tuohu iho i ngā mahi a Hātana.

Kāore a Nīwhai i te mōhio he aha ia i ākina wairuatia ki te hanga i ngā tuhinga e rua mō tōna iwi. Ā, kīhai a Moromona i te mōhio he aha ia i ākina wairuatia ai ki te whakauru i aua tuhinga e rua ki roto i ngā papa kōura. Engari i whakawhirinaki ngā poropiti e rua i a te Atua “tētahi take whai mātauranga” (1 Nīwhai 9:5; Ko ngā Kupu a Moromona 1:7). Kei te mōhio tātou ināianei ki tētahi wāhi o taua take: kia whakakīa te āputa o ngā whārangi ngaro 116 o te Pukapuka a Moromona. Ki ō whakaaro, he aha tā te Ariki e pai ai hei akoranga māu i ēnei mea katoa? Me āta whakaaro taua pātai i a koe e pānui ana i Whakaakoranga me ngā Kawenata 10:34–52. Māu pea tētahi whakarārangi o ngā mea pono e mahi mai i ngā akoranga e puta ai i ēnei whiti. Me pēhea ēnei mea pono e whakakaha ai i tō hononga ki a Ia? He aha te mea pai rawa ki a koe e pā ana ki te mātauranga a te Ariki me Tana titiro whakamua ki te whakarite mō te ngaronga atu o ngā whārangi 116?

Ka hihiko anō tō ngākau ki te kimi taunaki mō Tōna mātauranga me Tana titiro whakamua i roto i tō oranga. Pānuitia ngā tuhinga i tā Erata Ronald A. Rasband karere “By Divine Design”—mā konā toko ake ētahi whakaaro ki tō hinengaro (Liahona, Noema 2017, 55–57). Me tuhi iho aua mea i te wā e toko ake ai ki a koe. He aha tā te Ariki i roto i tō oranga? Hei tauira, he aha ngā mea whakamīharo Nāna nei i whakarite? He aha ngā tūāpapa Nāna nei i whakatakoto mō ō manaakitanga? Nonahea Ia ārahi ai i a koe ki te minita atu ki tētahi?

Tirohia anōtia Russell M. Nelson, Romana 8:28; Whakaakoranga me ngā Kawenata 90:24; Ngā Kaupapa me ngā Pātai, “Mahere o te Whakaoranga,” Wharepukapuka Rongopai.

I te hiahia te tuakana o Hōhepa, arā, a Hairama, kia mōhio ki tā te Ariki e pai ai mōna, nā konā ka tono atu ia ki a Hōhepa ki te rapu i tētahi whakakitenga mōna. I koa te Poropiti kia pērā ai, engari ko tētahi karere i roto i taua whakakitenga (Whakaakoranga me ngā Kawenata 11) koia ko te rapu atu a Hairama i tētahi whakakitenga mōna ake anō. Ā, e taea ana anō hoki te “hunga katoa e whai kōingo pai ana, ā, te hunga kua torona atu ā rātou toronaihi ki te kokoti” (whiti 27). I a koe e pānui ana i wāhanga 11, he aha tā te Ariki e whakaako nei ki a koe mō te whakakitenga mōu ake? Pehea te hāngaitanga o tēnei ki Tāna i whakaako ai ki a Ōriwa Kautere i wāhanga 6–9? He aha atu ngā karere kei a Ihu Karaiti mō tātou?

Tirohia anōtia “Let the Holy Spirit Guide,” Hymns, no. 143.

I mua noa atu i te whakapākehātanga o te Pukapuka a Moromona, i te hīkaka a Hairama Mete ki te āwhina i te mahi o te Whakahokinga. I a koe e pānui ana i te whakautu a te Ariki ki ana hiahia, me huri ō whakaaro ki te tino tikanga o te “rapu i [tā te Atua] kupu” (whiti 21). Me pēhea te rapunga i tā te Atua kupu e āwhina i a koe ki te mahi ki a Ia i runga i te kaha?

• Hei timatanga kōrero mō koutou ko ō tamariki, māu rātou e ui atu mō ngā mea e mahi nei rātou i ngā “wā katoa”. He aha tā te Ariki e kī nei me mahi e tātou i ngā wā katoa i Whakaakoranga me ngā Kawenata 10:5? He aha Ia e hiahia ai kia mahi tātou i tēnei?

• Me aha koe hei āwhina i ētahi atu i ō tamariki kia maumahara ai ki te inoi i ngā wā katoa? Tērā pea me kohikohi e rātou ētahi kohatu māheniheni, kātahi ka peitahia i runga rā te “Whakaakoranga me ngā Kawenata 10:5” te “Inoi i ngā wā katoa” rānei. Ka purua ā rātou kohatu ki roto ki ngā momo wāhi e hiahia ana hei whakamaharatanga mō rātou ki te inoi, e pātata ana ki ō rātou moenga, i te taha i ā rātou pukapuka kura, ki te wharekai rānei. E ai ki Whakaakoranga me ngā Kawenata 10:5, he aha tā te Ariki hei manaaki i a tātou ina inoi tātou? Ka rapua e ō tamariki ētahi atu whakautu i tētahi waiata pērā i “A Child’s Prayer” (Children’s Songbook, 13).

• Ka ako ngā tamariki kia mōhio ai ki te reo o te Wairua i a Ia e kōrero ana ki a rātou. Hei āwhina mō rātou, māu tētahi rama e huna me tētahi pikitia o tētahi kanohi harikoa i te ruma; kātahi ka tonoa ō tamariki ki te rapu i ēnei mea. Pānuitia Whakaakoranga me ngā Kawenata 11:13, kātahi ka āwhina i ō tamariki ki te tohu atu i ngā kupu e hāngai atu ana ki ngā mea i rapua ai e rātou. He aha ngā akoranga e puta mai ana i ēnei kupu mō tā te Wairua Tapu āwhina i a tātou?

• Mā tō toha atu i ngā āhuatanga ā-wairua i pā ai ki a koe ake ki ō tamariki e āwhina ai i a rātou kia kitea ai te kaha o te Wairua Tapu i ō rātou oranga. I a koe e toha kōrero ana, tono rātou kia kōrerohia ake ai ngā āhuatanga i pā ai ki a rātou. Me pānui tahi anō hoki i Whakaakoranga me ngā Kawenata 11:12–13, e kimihia ana te huarahi e mōhio ai tātou kei te ārahi te Wairua Tapu i a tātou. Me whakaatu atu kei te hiahia te Matua i te Rangi ki te ārahi i a tātou mā roto i te Wairua Tapu.

• Pērā i a Hairama Mete, ka huhua noa ngā wā e taea ai e ō tamariki te tohatoha atu i ngā kōrero o te rongopai ki ētahi atu. Me pānui ngātahi i Whakaakoranga me ngā Kawenata 11:21, 26, kātahi ka tonoa ō tamariki ki te rapu i tā te Ariki ki a Hairama hei mahi māna kia taea ai e ia te whakaako i te rongopai. He aha te tikanga o te “rapu” i tā te Atua kupu? Me pēhea tātou e pēnei ai? Me pēhea tātou e “poipoia ake” ai te kupu a te Atua i roto i ō tātou ngākau? Tērā pea me mahi whakaari ō tamariki anō nei kei te toha kōrero mō Ihu Karaiti, mō te Pukapuka a Moromona rānei ki ētahi atu.