Сургаал ба Гэрээ 2; Иосеф Смит—Түүх 1:27–65

Бид Бурханд Иосеф Смитээр хийлгэх ажил байсан гэдэгт итгэж, түүний амьдралыг эргэн харж, хийсэн зүйлийг нь тодорхой харж чадна. Харин та Бурханд танаар хийлгэх ажил бас байгаа талаар бодож үзсэн үү? Та Иосеф Смит—Түүх 1:27–33-ыг уншихдаа тэр ажил нь юу байж болохыг тунгаан бод. Энэ нь үргэлжилж буй Аврагчийн сайн мэдээний Сэргээлтэд хэрхэн хувь нэмэр болох вэ?

Ахлагч Гари Э.Стивэнсон: “Бид Христэд ирж, бусад хүнд мөн адил ийн ирэхэд нь тусалснаар Бурханы аврал, өргөмжлөлийн ажилд гар бие оролцдог ба энэ ажил тэнгэрээс томилогдсон үүрэг хариуцлага дээр төвлөрдөг. … Эдгээр үүрэг хариуцлага энгийн, сүнслэг, урам өгсөн, биелүүлэх боломжтой байдаг. Үүнд:

• Есүс Христийн сайн мэдээний дагуу амьдрах

• Тусламж хэрэгтэй хүмүүсийг харж халамжлах

• Бүх хүнийг сайн мэдээг хүлээн авахад урих

• Гэр бүлүүдийг мөнхөд нэгтгэх зэрэг үүрэг хариуцлага орно” гэж заажээ (“Үнэхээр сайхан, үнэхээр энгийн,” Лиахона, 2021 оны 11-р сар, 47).

Эдгээр тэнгэрээс томилогдсон үүрэг хариуцлага бүрд оролцож буй туршлагынхаа талаар тунгаан бод. Аврагч танаар дараа нь юу хийлгэх байсан бэ?

Заримдаа та Их Эзэн таныг гаргасан алдаа дутагдлаас тань болж ашиглахгүй гэж мэдэрч магад. Та Иосеф Смит—Түүх 1:28–29 дээрх Иосеф Смитийн туршлагаас юу сурч болох вэ? Та “[Бурханы] өмнө зогсож байгаагаа” хэрхэн мэдэх вэ?

Мөн “Бурханы аврал, өргөмжлөлийн ажил” гэдгийг Ерөнхий гарын авлагын 1.2-оос үзнэ үү.

3:15

Моронай Иосеф Смитэд үзэгдэх үедээ Исаиа 11; Үйлс 3:22–23; Иоел 2:28–32 гэх мэт Хуучин Гэрээ, Шинэ Гэрээний хэд хэдэн бошиглолыг эш татжээ. Та Иосеф Смит—Түүх 1:34–47-г уншихдаа, яагаад Иосеф эдгээр бошиглолыг мэдэх нь чухал байсан талаар тунгаан бод. Яагаад эдгээрийг мэдэх нь танд чухал вэ?

Та мөн ахлагч Дэвид А.Бэднар “Ялгуусан алдар суунд Бурханы хүчээр” үгэндээ Моронайн Иосеф Смит дээр ирсэн анхны айлчлалын талаар юу заасныг уншиж болно (Лиахона, 2021 оны 11-р сар, 28).

13:17

Иосеф Смит ердөө 17 настай байхдаа анх алтан ялтаснуудыг харсан бөгөөд дөрвөн жилийн дараа тэдгээрийг түүнд өгчээ. Иосеф Смит—Түүх 1:48–60-ыг уншаад, тухайн үед Иосефын амьдралд юу тохиолдсоныг олж мэд. Эдгээр үйл явдал Бурханы түүгээр хийлгэх ажилд түүнийг хэрхэн бэлтгэсэн гэж та бодож байна вэ? Таныг Бурханд болон бусдад үйлчлэхэд бэлтгэсэн ямар туршлага танд тохиолдсон бэ? Ирээдүйн үйлчлэлд бэлтгэхэд тань тус болох юу танд тохиолдож байна вэ?

Энэ хэсгийн “суулгах,” “зүрх сэтгэл,” “эргэх” зэрэг үгс Елиагийн зорилго болон түүний сэргээсэн санваарын түлхүүрүүдийн адислалуудын талаар танд юу зааж байна вэ? Та зүрх сэтгэлээ өвөг дээдэс рүүгээ эргэснийг хэрхэн мэдэрч байсан бэ? Та ийм мэдрэмжийг илүү ойр ойрхон мэдэрч болох арга замуудын талаар бодож үзээрэй. Өвөг дээдсээ хайж олон, тэдний төлөө ариун сүмд ёслолуудыг гүйцэтгэх нь нэг арга зам юм (FamilySearch.org-ийг үзнэ үү). Та өөр ямар арга замуудыг бодож чадах вэ?

Мөн Сургаал ба Гэрээ 110:13–16-г болон Гэррит В.Гонгийн “Үүрд мөнхөд аз жаргалтай” захиасыг 2022 оны 11-р сарын Лиахонагийн 83–86-р хуудаснаас үзнэ үү.

• Бид бүгд заримдаа Иосеф Смитийн адилаар “[өөрсдийн] сул тал хийгээд төгс бусынхаа улмаас буруутгагд[сан]” мэт мэдэрдэг. Та болон танай хүүхдүүд Иосеф Смит—Түүх 1:29-ийг хамтдаа уншаад, Иосеф Смит ийн мэдрэх үедээ юу хийсэн талаар олж мэд. Түүний жишээнээс бид алдаа гаргасан үед маань туслах ямар сургамжийг авч болох вэ? Иосеф төгс биш байсан ч Бурханаар дуудагдсан гэдгийг мэдэх нь яагаад чухал вэ?

• Таныг Иосеф Смит—Түүх 1:27–54 эсвэл “3-р бүлэг: Тэнгэр элч Моронай ба алтан ялтаснууд” дээрх Моронайн айлчлалын түүхийг ярих үед хүүхдүүд тань Иосеф Смит болж дүр эсгэн хөгжилдөж болох юм. Жишээлбэл: Тэд залбирч байгаа мэт гараа зөрүүлэх, Кумора гүвээнд авирч буй мэт дүр эсгэх гэх мэт байж болно. Дараа нь та тэднээс Бурхан Иосеф Смитээр юу хийлгэхээр дуудсан мөн үүний үр дүнд бид хэрхэн адислагдсан талаар ярихыг хүсэж болно. Жишээлбэл: Иосеф Смит Мормоны Номыг орчуулсан учраас бид хэрхэн адислагдсан бэ? Түүний ажил бидэнд Тэнгэрлэг Эцэг, Есүс Христ хоёрт илүү ойртоход хэрхэн тусалсан бэ?

  

  2:29

• Магадгүй та болон хүүхдүүд тань гэр бүлийнхээ зарим зургийг, тэр дундаа ариун сүм дэх гэр бүлийнхээ зургийг үзэхэд таатай байх болно (эсвэл Сайн мэдээний уран зургийн цуглуулгын д. 120-ийг үзнэ үү). Дараа нь та Сургаал ба Гэрээ 2-ыг уншаад, бидэнд яагаад ариун сүм байдаг мөн Тэнгэрлэг Эцэг яагаад биднийг гэр бүлтэйгээ үүрд хамт байхыг хүсдэг талаар санаа бодлоо бие биетэйгээ хуваалцаж болно. “Гэр бүл үүрд хамт байх болно” (Хүүхдийн дууны ном, 98) дууг хамтдаа дуулах талаар бодож үз. Гэр бүлтэйгээ үүрд хамт байхын тулд бид юу хийж болох талаар энэ дуу юу өгүүлдэг вэ?

• Хүүхдүүд гэр бүлийн түүхийн талаарх баяр баяслыг мэдэрч, сэтгэл нь хөдөлдөг. Тэдэнд туслахын тулд та өвөг дээдсийнхээ түүх, зургийг үзүүлж болно. Өвөг дээдсийн тань хүүхэд насны амьдрал ямар байсан талаар хүүхдүүдтэй ярилц. Түүнчлэн хүүхдүүд тань FamilySearch.org/discovery дээрх гэр бүлийн түүхийн зарим үйл ажиллагааг хийх дуртай байж болно.