Сургаал ба Гэрээ 1

Удиртгалд номыг танилцуулдаг. Энэ нь уг номын сэдэв болон зорилгыг тодорхойлж, уншигчдыг уншихаар бэлтгэхэд тусалдаг. Та 1-р хэсгийг буюу Их Эзэний Сургаал ба Гэрээний “удиртгал” (6-р шүлэг)-ыг уншихдаа Их Эзэний илчлэлтүүдийн сэдэв болон зорилгуудыг хайж ол. Энэ жил та Сургаал ба Гэрээг судлахад туслах юу сурсан бэ? Жишээ нь: Та эдгээр илчлэлтээс “Их Эзэний дуу хоолойг сонсох” (14-р шүлэг) эсвэл “эдгээр зарлигуудыг судлагтун” (37-р шүлэг) гэдэг нь юу гэсэн үг болохыг тунгаан бодож болох юм.

Сургаал ба Гэрээний удиртгал хэсгийг үзнэ үү.

1-р хэсэг нь Их Эзэн Өөрийн сонгосон үйлчлэгчдээр дамжуулан ярьдаг хэмээх Түүний мэдэгдлээр эхэлж мөн төгсдөг (4–6, 23–24, 38-р шүлгүүдийг үзнэ үү). Та энэ илчлэлтийн талаар юу мэдэж авснаа бичнэ үү.

• Их Эзэн ба Түүний дуу хоолой.

• Яагаад бошиглогчид өнөө үед хэрэгтэй вэ.

Олж мэдсэн зүйлийн үр дүнд юу хиймээр санагдаж байна вэ?

Та хэзээ Их Эзэний үйлчлэгчдийн дуу хоолойгоор дамжуулан Түүний дуу хоолойг сонсож байсан бэ? (38-р шүлгийг үзнэ үү).

Та амьд бошиглогчдын тухай мэддэггүй найзтайгаа хамт 1-р хэсгийг уншиж байна гэж төсөөлж болох юм. Найзад тань ямар асуултууд байж болох вэ? Найздаа өнөө үед бошиглогчтой байх талаар ямар бодолтой байдгаа ойлгоход нь туслахын тулд та аль шүлгийг түүнтэй хамт ярилцахыг хүсэх байсан бэ?

Иосеф Смитийн илчлэлтийг хэвлэх талаар ахлагчдын зөвлөлийг ярилцах үед зарим хүн уг санааг эсэргүүцсэн гэдгийг олж мэдэх нь танд сонирхолтой байж магадгүй. Тэд Иосеф Смитийн бичгийн чадвар муу гэдгээс ичиж, илчлэлтүүдийг хэвлэн гаргах нь гэгээнтнүүдэд илүү их асуудлыг авчирна гэдэгт санаа зовж байлаа (Гэгээнтнүүд номын 1:140–143-ыг үзнэ үү). Хэрвээ та энэ зөвлөлийн гишүүн байсан бол эдгээр асуудлыг хэрхэн шийдвэрлэх байсан бэ? Та 1-р хэсгээс тус болж болох ямар ойлголтыг авч болох вэ? (Жишээ болгож, 6, 24, 38-р шүлгүүдийг үзнэ үү).

Сургаал ба Гэрээ 1 дээр Их Эзэн яагаад Өөрийн сайн мэдээг сэргээснээ тайлбарладаг. Та 12–23-р шүлгийг уншихдаа, хэдэн шалтгаан жагсааж болохыг хар. Туршлагаас тань харахад, Сэргээлтийн талаарх Их Эзэний зорилго хэрхэн биеллээ олж байна вэ?

Их Эзэн бидний өдрүүдэд ноцтой сорилт бэрхшээлүүд байх болно гэдгийг мэдэж байсан (17-р шүлгийг үзнэ үү). Та 17–30, 34–36-р шүлгүүдээс эдгээр сорилт бэрхшээлийг үл харгалзан амар амгалан, өөртэй итгэлтэй байдлыг мэдрэхэд туслах юуг олж мэдсэн бэ?

Мөн Рассэлл М.Нэлсоны “Ирээдүйгээ итгэлээр хүлээн ав” захиасыг 2020 оны 10-р сарын Ерөнхий чуулганы х. 77–80-аас үзнэ үү.

Сургаал ба Гэрээ 1:19–28-ыг уншиж байхдаа, Их Эзэний үйлчлэгч байх гэдэг нь юу гэсэн утгатайг тунгаан бодож болно. Их Эзэн Өөрийн үйлчлэгчдийг ямар ямар зан чанартай байгаасай гэж хүсдэг вэ? Их Эзэн Өөрийн үйлчлэгчдээр дамжуулан юу хийдэг вэ? Эдгээр шүлэг дэх бошиглолууд хэрхэн дэлхий даяар мөн таны амьдралд биелэгдэж байна вэ?

• Их Эзэний сэрэмжлүүлгийн талаар ярилцаж эхлэхийн тулд та өөрсдийн харж чадахгүй аюулын талаар бусдаас ямар сэрэмжлүүлэг авдаг тухай ярилцаж болно. Халтиргаатай шал, хүчтэй шуурга эсвэл ирж яваа машин гэх зэрэг жишээ байж болох юм. Та болон танай хүүхдүүд сэрэмжлүүлгийн тэмдгийн талаарх жишээнүүдийг харж, эдгээр сэрэмжлүүлгийг Их Эзэний бидэнд өгсөн сэрэмжлүүлэгтэй харьцуулж болно. Сургаал ба Гэрээ 1:4, 37–39-ийн дагуу, Их Эзэн биднийг хэрхэн сэрэмжлүүлдэг вэ? Тэр хамгийн сүүлд бидэнд ямар сэрэмжлүүлэг өгсөн бэ? Та магадгүй сүүлийн үеийн Ерөнхий чуулганы захиасны нэг хэсгээс үзэж эсвэл уншаад, Бурханы “сэрэмжлүүлгийн дуу хоолойны” жишээг хайж болно.

• “Бошиглогчийг дага” (Хүүхдийн дууны ном, 58) дууны сүүлийн бадаг гэх мэт бошиглогчийн тухай дууг хамтдаа дуул. Бошиглогч Бурханы үгийг ярьдаг талаар гэрчлэлээ хуваалц.

• Сургаал ба Гэрээ 1:17-ийн тухай ярилцахад урамшуулан дэмжихийн тулд та болон хүүхдүүд тань аялалд бэлтгэж байна гэж төсөөлж болно. Та юу баглаж боох байсан бэ? Хэрэв та бороо орно, таны машин эсвэл автобусны дугуй хагарна гэж урьдчилан мэдсэн бол уг аялалд бэлтгэхэд тань хэрхэн нөлөөлөх байсан бэ? 17-р шүлгийг хамт уншаад, Их Эзэн бидэнд юу тохиолдохыг мэдэж байсан талаар ярилц. Тэрээр үүнд хэрхэн бэлдсэн бэ? (Хэрэв шаардлагатай бол “сүйрэл” гэдгийг тайлбарла.) Энэ цаг үед тулгарч байгаа асуудлуудаа зохицуулахад Бурханы зарлигууд бидэнд хэрхэн тусалдаг вэ?

• Аврагчийн сайн мэдээг сэргээхэд гүйцэтгэсэн Иосеф Смитийн үүргийн талаар олж мэдэхийн тулд та болон хүүхдүүд тань Аврагчийн болон Иосеф Смитийн зургийг (энэ тойм дээрх зургуудыг үзнэ үү) харж, Аврагч Иосеф Смитээр дамжуулан бидэнд юу өгсөн талаар ярилцаж болно. Хүүхдүүд тань Сургаал ба Гэрээ 1:17, 29-өөс жишээнүүдийг хайж болно. Бурхан “өөрийн үйлчлэгч Бага Иосеф Смитийг дуудан, тэнгэрээс түүнд ярь[сан]” (17-р шүлэг) гэдгийг яаж мэдсэнээ хүүхдүүддээ хэлж өг.

• “Үнэн бөгөөд амьд” Сүм гэсэн нь юу гэсэн утгатай вэ? Хүүхдүүдээ энэ асуултын талаар бодуулахын тулд та тэдэнд амьд ургамал, үхсэн ургамал зэрэг амьтай, амьгүй зүйлсийн зургийг үзүүлж болох юм. Аливаа зүйлс амьд гэдгийг бид яаж мэдэх вэ? Та дараа нь Сургаал ба Гэрээ 1:30-ийг уншаад, Сүмийн хувьд “үнэн бөгөөд амьд” гэдэг нь юу гэсэн үг болох талаар ярилц.