“Naʻe Fanauʻi ʻe ʻIlisapeti ʻa Sione, pea Fakamoʻoni ʻa Sakalia,” Palani Ako ki he Kilisimasí (2024)
“Naʻe Fanauʻi ʻe ʻIlisapeti ʻa Sione, pea Fakamoʻoni ʻa Sakalia,” Palani Ako ki he Kilisimasí
21 Tīsema
Naʻe Fanauʻi ʻe ʻIlisapeti ʻa Sione, pea Fakamoʻoni ʻa Sakalia
“Pea ʻe muʻomuʻa ia ʻiate ia ʻi he anga mo e mālohi … ke teuʻi ʻa e kakaí ke lelei maʻá e ʻEikí” (Luke 1:17).
Ko ʻIlisapeti mo hono husepāniti ko Sakaliá “naʻá na angatonu fakatouʻosi pē ʻi he ʻao ʻo e ʻOtuá, ʻo na ʻalu taʻehala ʻi he ngaahi fekau mo e tuʻutuʻuni kotoa pē ʻa e ʻEikí” (Luke 1:6). Ka neongo ʻena faivelengá, naʻe ʻikai ke na lava ʻo maʻu ha fānau. Te ke fakahaaʻi fēfē ʻa e tui ki he ngaahi talaʻofa ʻa e ʻOtuá neongo ʻoku ʻikai ke ke aʻusia ʻa e ngaahi tāpuaki naʻá ke ʻamanaki ki aí?
Ngaahi Folofolá mo e Ngaahi Fehuʻí
-
Fakafehoanaki ʻa e ngaahi lea ʻa Sakalia kimuʻa ʻi he ʻikai ke ne lava ʻo leá pea mo e hili ʻene toe lava ʻo leá. Ko e hā ʻa e meʻa naʻe ako ʻe Sakaliá? Ko e hā ha meʻa te ke lava ʻo ako mei he aʻusia ʻa Sakaliá?
-
Hili ʻa e ʻilo ʻe Mele te ne hoko ko e faʻē ʻa e ʻAlo ʻo e ʻOtuá, naʻá ne ʻaʻahi ki hono kāinga ko ʻIlisapetí, ʻa ia naʻá ne foua foki ha feitama fakaofó. Ko e hā ʻa e founga naʻe fepoupouʻaki ai ʻa Mele mo ʻIlisapetí? Fakakaukau ki he founga ʻokú ke fepoupouaki ai mo ho ngaahi kaungāmeʻá pe ko ho fāmilí.
“Fiefia Fakataha ʻa Mele mo ʻIlisapeti”
Lekooti ʻa e ngaahi ongo ʻokú ke maʻú.
Hivá
“Fiefia ki Māmani,” Ngaahi Himí, fika 110.
ʻEkitivitī maʻá e Fānaú
ʻI he taimi naʻe tatali ai ʻa ʻIlisapeti mo Mele ke fanauʻi ʻa Sione Papitaiso mo Sīsuú, naʻá na fetokoniʻaki. Tuʻu takatakai ʻi ha foʻi siakale. Lī ha foʻi pulu pe laʻipepa kuo nusinusiʻi ki ha taha kehe ʻi he siakalé. ʻI he taimi ʻoku hapo ai ʻe he tokotahá ʻa e foʻi pulú, te ne kaila ʻaki ha ʻulungaanga lelei ʻo ha kaungāmeʻa lelei (hangē ko e angalelei, anga fiefia, pe faʻa fakakaukau).
Ngaahi Fakakaukau ki he Ngāue Tokoní
-
Talaange ki ha taha ʻokú ke ʻofa ai ʻokú ne mahuʻinga kiate koe.
-
ʻAʻahi ki ha kaungāʻapi toulekeleka.
-
Fakaafeʻi ha niʻihi kehe ki ha polokalama fakafiefiaʻi ʻo e Kilisimasí.