“Lotofaafetai e Aoao Lona Finagalo,” Liahona, Aperila 2025.
O Leo o le Au Paia o Aso e Gata Ai
Lotofaafetai e Aoao Lona Finagalo
Sa ma filifili ma lo’u aiga e vaai po o le a le mea o le a tupu pe afai ma te tuuina atu lo ma faalagolago i le Alii.
Ata na tusia e Bradley Clark
A o ou aoga i le iunivesite, sa ou iloaina sa ou manao e ui i se ala faapitoa faalegaluega. Sa ou fuafuaina uma a’u vasega seia oo i le faauuga, ma sa ou maua se avanoa faapisinisi sa ou saunia e talia. Sa faatulaga mea uma.
Peitai, ina ua uma ona ou fefautuaai ma le Tama Faalelagi i le tatalo, sa ou lagonaina sa Ia fetalai mai ia te au, “Ou te manaomia lou alu i se isi itu.” E lei leva ona mavae lena, ae faaali mai se avanoa e galue ai mo le Ekalesia. Sa matuai le’i faamoemoeina lava, ae sa ou iloaina o se taitaiga fou sa Ia saunia au e ui ai.
Sa ou faamalamalama atu i lo’u aiga ua tatalaina se avanoa fou e avea ai ma pule o aoaoga ma faagaoioiga i le Nofoaga Autu mo le Aoaoina o Faifeautalai i le Pasefika. O lenei mea na oo atu ai i se tofiga i le tolu tausaga mulimuli ane o se faatonu o le inisitituti i Seminare ma Inisitituti o Mataupu Faalelotu. O la’u uluai fuafuaga faalegaluega atonu sa sili atu ona manuia faaletino, ae sa ma filifili e vaai po o le a le mea o le a tupu pe afai ma te tuuina atu lo ma faalagolago i le Alii.
O lena faaiuga na taitai atu ai i faamanuiaga na foliga mai na saunia e le Alii mo i matou. E ofoofogia. Matou te le mauoa, ae sa i ai lava i taimi uma mea matou te manaomia, ma sa ola ae la ma fanau i se siosiomaga matagofie o le talalelei.
Ou te lei faanoanoa lava i la’u filifiliga i le 23 tausaga ua mavae, e ui ina sa tatau ona ou lafoaia nisi o mea ma tuua nisi tagata, nofoaga, meatotino, ma tofiga. Ae sa matou fiafia e faia lena mea mo le Tama Faalelagi. O le faia o lena mea o se faamanuiaga sili.
Ua ou aoaoina a taitaiina oe e le Alii i se itu patino ma e faalogo ma usitai, o le a faatalitali mai faamanuiaga. E pei ona aoao mai Peresitene Russel M.Nelson: “I na upu e fa—‘Faalogo Ia te Ia’—ua aumai ai e le Atua ia i tatou se mamanu mo le manuia, fiafia, ma le olioli i lenei olaga. E ao ona tatou faalogo i afioga a le Alii, lagona ia mea, ma usitai i mea ua Ia faatonu ai i tatou!”
O nisi taimi atonu tatou te taumafai ai e fautuaina le Tama Faalelagi, ma mafaufau, “Ou te iloa lelei.” Nai lo lena, e tatau ona tatala o tatou loto ma faalogo ia te Ia, ma aoina mai le vaaiga ma le malamalama. Afai tatou te o atu ia te Ia ma faasoa atu ia te Ia o tatou manaoga ma manaoga o o tatou loto, ona faalogo lelei lea, e mafai ona tatou iloa Lona finagalo mo i tatou.